Labib i sanz lavi

KWA ki ti pous en Rastafarian pour koup son seve rasta e sirmont move pwennvi lo bann dimoun blan? Kwa ki ti ed en zenn onm ki ti vyolan e ki ti anmas larzan pour bann trafiker drog sanz son lavi? Silvouple lir sa ki zot annan pour dir.

“Mon ti menm sirmont move pwennvi lo dimoun blan”—HAFENI NGHAMA

LAZ: 34

PEI NATAL: ZANBI

LEPASE: RASTAFARIAN

MON LAVI DAN LEPASE: Mon ti ne dan en kan refizye Zanbi. Mon manman ti’n sove Namibi dan letan lager e i ti zwenn en lorganizasyon ki ti apel West Africa People’s Organization (SWAPO). Sa lorganizasyon ti pe lager kont sa gouvernman ki ti o pouvwar dan Sid Lafrik e ki ti pe gouvern Namibi sa letan.

Pandan mon 15 premye lannen, mon ti reste dan plizyer kan refizye. Bann zenn dan kan SWAPO ti ganny antrennen pour promot mouvman liberasyon. Nou ti aktif dan politik e nou ti aprann ki mannyer pour deteste bann dimoun blan.

Letan mon ti annan 11 an, mon ti anvi fer lakonfirmasyon dan en legliz kot bann Katolik Romen, Lutheran, Anglikan ek lezot larelizyon ti zwenn ansanm pour ladorasyon. Sa paster ki mon ti koz avek, ti dekouraz mwan pour pran sa pa. Depi sa, mon ti aret krwar dan Bondye. Me, a laz 15 an, mon ti konmans ekout lanmizik rege, e mon dezir pour retir serten sa bann lenzistis ki ti pe fer soufer bann Afriken nwanr ti pous mwan pour zwenn en group Rastafarian. Mon ti les mon seve vin rasta, fim mariwana, aret manz lavyann e konmans fer kanpanny pour liber bann dimoun nwanr. Kantmenm sa, mon pa ti sanz mon lavi imoral, ni menm aret get bann film vyolan. Mon ti kontinyen servi bann parol obsenn.

KI MANNYER LABIB IN SANZ MON LAVI: An 1995, apepre laz 20, mon ti konmans reflesir seryezman lo sa ki mon ti anvi fer avek mon lavi. Mon ti pe etidye tou bann liv Rastafarian ki mon ti kapab met mon lanmen lo la. Serten sa bann liv ti fer referans avek Labib, me zot leksplikasyon pa ti fer sans pour mwan. Alors, mon ti deside pour lir Labib pour mwan menm.

Pli tar, enn mon zanmi ki ti en Rastafarian tou, ti donn mwan en liv ki ou kapab servi pour etidye Labib, pibliye par Temwen Zeova. Anmezir ki mon ti etidye sa liv, mon ti refer  avek Labib. Pli tar, mon ti zwenn Temwen Zeova e mon ti kontinyen mon letid avek zot.

Mon ti fer en gran zefor pour aret fimen e bwar en kantite e mon ti arive fer li. (2 Korentyen 7:1) Mon ti sanze. Mon ti koup mon seve rasta, aret get film pornografi ek film vyolan, e mon ti aret servi bann parol obsenn. (Efezyen 5:3, 4) Avek letan, mon ti menm aret annan move pwennvi lo bann dimoun blan. (Akt 10:34, 35) Pour mwan kapab fer sa bann sanzman, mon ti bezwen debaras mwan avek bann lanmizik ki ti ankouraz rasis e aret frekant mon bann zanmi ki ti enfliyans mwan pour refer bann move keksoz.

Apre ki mon ti’n fer sa bann sanzman, mon ti rod en Lasal Rwayonm Temwen Zeova e demann zot pour mwan vin dan zot larelizyon. Mon ti etidye Labib. Letan mon ti deside pour batize konman en Temwen Zeova, mon bann fanmir pa ti kontan. Mon manman ti dir mwan ki mon ti kapab swazir nenport larelizyon “Kretyen” ki mon anvi, me pa Temwen Zeova. Enn mon bann tonton dan lwen ki ti en dimoun enportan dan gouvernman ti toultan kritik mon desizyon pour asosye avek Temwen Zeova.

Kantmenm sa, mon ti aprann e aplik bann konsey lo ki mannyer Zezi ti fer avek bann dimoun. Kan lezot ti opoz e sikann mwan, sa ti ed mwan. Letan mon ti konpar sa ki mon ti pe aprann avek bann Temwen e sa ki Labib i dir, mon ti konvenki ki mon ti’n trouv sa vre larelizyon. Enn parmi sa bann keksoz se ki zot swiv sa konmannman dan Labib pour pres avek lezot dimoun. (Matye 28:19, 20; Akt 15:14) Zot osi pa enplike dan politik.—Psonm 146:3, 4; Zan 15:17, 18.

KI BYENFE MON’N GANNYEN: Aprann viv dapre bann standar Labib in ed mwan dan bann fason pratik. Par egzanp, mon’n kapab anmas en kantite larzan ki mon ti pou’n gaspiye sak mwan pour aste mariwana. Mon nepli vwar bann keksoz ki pa reel akoz lefe drog, e mon lasante in amelyore mantalman e fizikman.

Mon aprezan annan en bi dan mon lavi ki mon’n toultan anvi depi ki mon ti zenn. Me pli enportan ki tou, mon santi ki mon’n vin pros avek Bondye.—Zak 4:8.

“Mon’n aprann pour kontrol mon lakoler”—MARTINO PEDRETTI

LAZ: 43

PEI NATAL: LOSTRALI

LEPASE: TRAFIKER DROG

MON LAVI DAN LEPASE: Mon fanmir ti sanz lakaz souvan letan mon ti pe grandi. Mon’n reste dan bann pti lavil, dan bann gran lavil e pour en pe letan dan lakanpanny kot en group larelizyon formen par bann aborizin. Mon annan bann bon souvenir avek mon bann kouzen ek tonton dan lakanpanny ler nou ti pe lapes, fer lasas, fer karving enkli bann boomerang.

 Mon papa ti fer laboks e i ti montre mwan lager depi ki mon ti ankor manrmay. Souvan mon ti pe lager. Dan laz adolesan, mon ti pas en ta letan zis bwar dan bann bar. Mwan ek mon bann dalon nou ti rod lager avek dimoun. Nou ti servi kouto ek bat baseball pour atak bann group dimoun ki ti annan 20 zot oubyen plis.

Mon ti fer larzan par vann drog ek bann keksoz ki bann dimoun ki travay lo lasose ti vole. Mon ti osi kolekte larzan pour bann trafiker drog e menm menas bann ki pa ti oule peye par servi fizi ek pistol. Mon lobzektif ti pou mwan touy dimoun. Mon moto ti: Touye oubyen ganny touye.

KI MANNYER LABIB IN SANZ MON LAVI: Mon ti’n tann koz konsernan Temwen Zeova letan mon ti pe grandi. Ler mon ti dan mon bann 20-t-an an montan, mon rapel ki mon ti demann mon manman si i ti konnen ki bor mon ti kapab zwenn Temwen Zeova. De zour apre sa konversasyon, en Temwen ki ti apel Dixon ti tap mon laport. Nou ti koze pour en pe letan e i ti envit mwan enn bann renyon Temwen Zeova. Mon ti ale e depi sa i fer plis ki 20-t-an ki mon pe asiste sa bann renyon. Tou kestyon ki mon ti annan zot ti kapab reponn par servi Labib.

Mon ti kontan pour aprann ki Zeova i enterese avek sak dimoun endividyelman, menm si sa dimoun pa pe servi Bondye. (2 Pyer 3:9) Mon ti dekouver ki i en Papa ki kontan mwan e ki i pou pran ka avek mwan, menm letan lezot pa pou fer li. Mon ti osi aprann ki i ti pou pardonn mon bann pese si mon ti sanz mon fason viv. Sa bann verse Labib dan Efezyen 4:22-24 ti annan en gran lefe lo mwan. Sa bann verse Labib ti ankouraz mwan pour “debaras” mwan avek mon “vye natir” e “vin en dimoun konpletman nouvo; kree dan resanblans Bondye.”

I ti pran mwan en pe letan avan ki mon ti kapab sanz mon fason viv. Mon ti kapab fer en semenn san tous drog, me kan wikenn ti arive e mon ti avek mon bann zanmi, mon ti rekonmans fimen. Mon ti alor realize ki mon ti bezwen bouz lwen avek sa bann dimoun ki mon ti pe asosye avek si mon ti pou sanz mon bann vilen manni. Alor, mon ti deside pour al reste en lot landrwa. Serten mon bann zanmi ti ofer pour akonpanny mwan e mon ti aksepte. Zot ti konmans fim mariwana dan semen e ofer mwan en pe. Mon ti dir zot mon ti pe aret sa bann move manni e letan nou ti ariv kot lafrontyer mon ti kontiny mon larout tousel. Plitar mon ti aprann ki zis apre sa, mon bann zanmi ki ti arme avek fizi ti vol en labank.

KI BYENFE MON’N GANNYEN: Apre ki mon ti’n aret sa bann move frekantasyon, i ti pli fasil pour fer bann sanzman ki ti neseser dan mon lavi. An 1989, mon ti batize konman en Temwen Zeova. Apre ki mon ti’n batize, mon pti ser, mon manman ek mon papa ti zwenn ansanm avek mwan pour servi Zeova.

I annan 17 an depi ler mon’n marye, e mon annan 3 bon zanfan. Mon’n aprann pour kontrol mon lakoler, menm letan mon ganny provoke. Mon’n aprann pour kontan dimoun sorti dan tou “tribi, pep ek lalang.” (Revelasyon 7:9) Mon santi ki parol Zezi in vin vre dan mon ka. I ti dir: “Si zot obei byen sa ki mon ansenny zot, zot a vin vreman mon disip. Zot a konn laverite e laverite i ava fer zot lib.”—Zan 8:31, 32.

[Pwen adisyonnel]

Fer sanzman ti enplik debaras mwan avek lanmizik ki ti ankouraz rasis

[Pwen adisyonnel]

Mwan ek mon bann zanmi ti rod lager avek dimoun. Nou ti servi kouto ek bat baseball pour atak bann group dimoun ki ti annan 20 zot oubyen plis