‘Sa bann ki drwat pou briye parey soley’
‘Sa bann ki drwat pou briye parey soley’
“Alor, sa bann ki [“drwat,” NW] pour briye parey soley dan Rwayonm zot Papa.”—MAT. 13:43.
1. Ki diferan laspe lo Rwayonm, Zezi ti koz lo la dan son bann parabol?
ZEZI KRI ti servi plizyer legzanp ouswa parabol pour eksplik diferan laspe Rwayonm. I ti “servi bann parabol pour koz avek lafoul; i pa ti dir zot nanryen san servi parabol.” (Mat. 13:34) Dan bann parabol konsernan senm lagrenn laverite Rwayonm, Zezi ti met lanfaz lo kondisyon leker en dimoun kan i aksepte sa mesaz e osi lo rol ki Zeova i zwe pour sa dimoun kapab grandi spirityelman. (Mark 4:3-9, 26-29) Zezi ti osi servi parabol pour montre logmantasyon remarkab dan lakantite dimoun ki aksepte sa mesaz Rwayonm isi lo later, menm si sa logmantasyon pa touzour evidan o konmansman. (Mat. 13:31-33) Deplis, i ti fer resorti ki pa tou sa ki aksepte sa mesaz Rwayonm ki neseserman kalifye pour vin sitwayen sa Rwayonm.—Mat. 13:47-50. *
2. Dan parabol Zezi konsernan dible ek move zerb, ki sa bon lagrenn i reprezante?
2 Par kont, enn parmi bann parabol Zezi i met lanfaz lo rasanbleman sa bann ki pou dirize ansanm avek li dan son Rwayonm. I souvan ganny apele parabol lo dible ek move zerb, e i ganny rikorde dan Matye sapit 13. Dan lezot parabol, Zezi i dir nou ki sa lagrenn ki ganny senmen i reprezant “Laparol,” tandis ki dan sa enn parabol i dir nou ki sa bon lagrenn i reprezant en keksoz diferan. Sa bon lagrenn i reprezant “pep [oubyen “bann garson,” NW] rwayonm.” (Mat. 13:19, 38) Zot pa bann sitwayen sa Rwayonm, me plito, zot bann “garson” ouswa zeritye sa Rwayonm.—Rom. 8:14-17; lir Galat 4:6, 7.
Parabol lo dible ek move zerb
3. Eksplike ki problenm sa zonm dan sa parabol ti fer fas avek e ki mannyer i ti deside pour regle sa problenm.
3 Sa parabol i dir: “Rwayonm lesyel i parey en zonm ki ti senm bann bon lagrenn dan son plantasyon. Letan tou dimoun ti pe dormi en lennmi ti vini e senm lagrenn move zerb dan son plantasyon dible, e ale. Kan bann plant ti pouse e zepi ti formen, bann move zerb osi ti pous ansanm. Bann serviter sa propriyeter ti dir li, ‘Met, ou ti senm bon lagrenn dan ou zarden, me kote sa bann move zerb i sorti?’ I ti reponn zot, ‘En lennmi ki’n fer sa.’ Bann serviter ti demann li, ‘Eski nou aras sa bann move zerb?’ I ti reponn zot, ‘Non. Si zot aras sa bann move zerb zot a riske derasin dible an menm-tan. Les zot pous ansanm ziska rekolt e la mon a dir avek bann ki fer rekolt; avan tou aras bann move zerb, anmare e brile; e apre rekolte dible e met dan mon stor.’”—Mat. 13:24-30.
4. (a) Lekel sa zonm dan sa parabol? (b) Kan e dan ki fason Zezi ti konmans senm sa lagrenn?
4 Lekel sa zonm ki ti plant bon lagrenn dan son plantasyon? Zezi i donn larepons pli tar kan i eksplik son bann disip: “Sa zonm ki senm bon lagrenn dan son plantasyon se Fis-de-Lonm.” (Mat. 13:37) Zezi, “Fis-de-Lonm” ti prepar plantasyon pandan sa trwa-z-an edmi ki i ti fer lo later pour akonplir son minister. (Mat. 8:20; 25:31; 26:64) Apre sa, depi Lapannkot 33 N.L. anmontan, i ti konmans senm sa bon lagrenn ki reprezant “bann garson rwayonm.” I evidan ki sa travay pour senmen ti konmanse ler Zezi, konman reprezantan Zeova, ti konmans vers lespri sen lo bann disip. Par fer sa, i ti pe swazir zot konman bann garson Bondye. * (Akt 2:33) Sa bon lagrenn ti grandi pour vin dible. Alor, bon lagrenn ti ganny senmen avek bi pour finalman rasanble sif konplet sa bann ki pou vin zeritye ek dirizan ansanm avek Zezi dan son Rwayonm.
5. Lekel sa lennmi dan sa parabol e ki move zerb i reprezante?
5 Lekel sa lennmi e ki move zerb i reprezante? Zezi i dir nou ki “dyab” i sa lennmi. Move zerb i reprezant “pep [oubyen “bann garson Dyab,” NW].” (Mat. 13:25, 38, 39) Sa kalite zerb anpwazonnen (bearded darnel) ki Zezi ti pe refer avek dan son parabol, i parey dible ler i ankor ptipti e pa ankor byen grandi. Pa sa i vreman en bon legzanp pour dekrir sa bann Kretyen ki pretann zot bann garson Rwayonm me ki pa prodwi bann bon fri! Sa bann Kretyen ipokrit ki pretann zot disip Kris i vreman form par “desandans” Dyab.—Zen. 3:15.
6. Kan ki sa bann ki resanble move zerb ti aparet e dan ki sans bann zonm ti pe “dormi” sa letan?
6 Kan sa bann Kretyen ki parey move zerb ti aparet? Zezi ti dir: “Letan tou dimoun ti pe dormi.” (Mat. 13:25) Kan sa ti arive? Nou trouv larepons dan parol ki zapot Pol ti dir bann ansyen Efez: “Mon konnen ki apre mon depar pou annan bann zonm parey loulou feros ki pou vin parmi zot e ki pa pou eparny personn dan troupo. Menm parmi zot pou annan dimoun ki pou leve pour ansenny bann mansonz pour fer bann krwayan swiv zot.” (Akt 20:29, 30; nou ki’n met an italik.) I ti konsey sa bann ansyen pour reste eveye spirityelman. Apre ki bann zapot, ki ti azir konman bann ki ti “met lobstak,” ti tonm dormi dan lanmor, bokou Kretyen ti tonm dormi spirityelman. (Lir 2 Tesalonisyen 2:3, 6-8.) Lanmenm ler ki sa gran lapostazi ti konmanse.
7. Eski serten dible ti vin move zerb? Eksplike.
7 Zezi pa ti dir ki sa dible ti pou vin move zerb, me i ti dir ki sa move zerb ti ganny senmen parmi dible. Alor, sa parabol pa pe donn lide ki bann vre Kretyen ki ti pou kit laverite. O kontrer, i met lanfaz lo en zefor ki Satan ti pou fer pour esey sali kongregasyon Kretyen par entrodwir bann move dimoun dan kongregasyon. Letan ki Zan, dernyen zapot ti’n vye, sa rebelyon kont Bondye ouswa sa lapostazi ti konmans vin evidan.—2 Pyer 2:1-3; 1 Zan 2:18.
“Les zot pous ansanm ziska rekolt”
8, 9. (a) Akoz lenstriksyon ki sa Met ti donn son bann serviter ti fer sans pour bann ki ti pe ekout Zezi? (b) Dan son lakonplisman, ki mannyer dible ek move zerb ti pous ansanm?
8 Bann serviter sa Met ti enform li lo sa problenm e demande: “Eski nou aras sa bann move zerb?” (Mat. 13:27, 28) Son larepons ti kapab paret en pe drol. I ti dir zot les dible ek move zerb pous ansanm ziska letan rekolt. Sa lord ti fer sans pour bann disip Zezi. Zot ti realize ki i ti pou vreman difisil pour disteng dible ek sa kalite move zerb. Bann dimoun ki annan serten leksperyans dan lagrikiltir ti pou osi realize ki rasin sa move zerb i souvan anmay anmay avek rasin dible. * I pa drol alor ki sa Met ti demann zot pour espere!
9 Pareyman, pandan sa bann syek ki’n pase, bann sekt parmi larelizyon Kretyen in prodwir en kantite move zerb. I ti konmans avek legliz Katolik Romen ek Ortodoks, e apre avek plizyer group Protestan ki ti aparet pli tar. Pandan menm moman, en pti pe bon lagrenn dible ti pe osi ganny senmen dan lemonn. Sa propriyeter dan sa parabol ti esper avek pasyans pandan en bon pe letan ziska ki sa pti moman rekolt ti pou arive.
Rekolt ki lontan pe ganny espere
10, 11. (a) Kan letan larekolt? (b) Dan ki sans sa dible senbolik i ganny anmennen dan stor Zeova?
10 Zezi i dir nou: “Larekolt se lafen [oubyen “konklizyon en sistenm,” NW]. Bann travayer se bann lanz.” (Mat. 13:39) Pandan bann dernyen zour sa move lemonn, en separasyon i ganny fer. Bann garson Rwayonm i ganny rasanble e separe avek sa bann ki resanble move zerb. Konsernan sa, zapot Pyer i dir nou: “Ler i’n arive pour zizman konmanse, e se par pep Bondye ki i pou konmanse. Alor si zizman Bondye i konmans par nou, ki pou arive avek sa ki refize obei Levanzil?”—1 Pyer 4:17.
11 En pti pe letan apre ki bann dernyen zour ouswa “konklizyon en sistenm” ti konmanse, sa bann ki ti pretann zot bann vre Kretyen ti konmans ganny zize, ki swa zot ti “bann garson Rwayonm” ouswa “bann garson Dyab.” “Avan tou” Gran Babilonn i tonbe, e “apre” bann garson Rwayonm i ganny rasanble ansanm o konmansman larekolt. (Mat. 13:30) Me dan ki sans sa dible senbolik pe aprezan ganny anmennen dan stor Zeova? Sa bann ki ti ganny rekolte ti swa ganny anmennen dan kongregasyon Kretyen ki ti’n ganny reetablir, kot zot annan faver ek proteksyon Bondye, ouswa zot ti ganny zot rekonpans dan lesyel.
12. Pour ki kantite letan larekolt i dire?
12 Pour konbyen letan sa zizman i dire? Zezi ti koz lo “larekolt.” Normalman larekolt i ganny fer dan en sezon, andotmo i dire pour en serten letan. (Rev. 14:15, 16) Zizman sak manm Kretyen swazir i kontinyen pandan letan lafen. I pou ale ziska ki zot tou zot ganny sele.—Rev. 7:1-4.
13. Dan ki fason move zerb i okazyonn lemal e osi fer sa ki mal?
13 Lekel ki pou ganny retire dan Rwayonm e dan ki fason zot okazyonn lemal e osi fer sa ki mal? (Mat. 13:41) Pour plizyer syek, move zerb, setadir bann sef relizye parmi bann ki pretann zot Kretyen, in tronp plizyer milyon dimoun. Zot in fer sa atraver bann keksoz “ki okazyonn lemal,” andotmo bann fo lansennyman ek krwayans parey pinisyon eternel dan lanfer dife ek Trinite, sa mister ki konfiz dimoun. En kantite sef relizye in kit en move legzanp pour zot troupo akoz zot lanmitye avek sa lemonn. Dan serten ka, zot in menm enplike dan bann kondwit imoral ki fer onte. (Zak 4:4) Deplis, bann larelizyon ki pretann Kretyen in toler en kantite aksyon imoral parmi son bann manm. (Lir Zid 4.) Malgre tou sa la, zot ankor pe pretann zot relizye e devoue anver Bondye. Pa bann garson Rwayonm i vreman ere ki zot separe avek lenfliyans bann move zerb koumsa ek zot fo lansennyman ki fer tonbe spirityelman!
14. Dan ki sans bann ki resanble move zerb i plere e grens zot ledan?
14 Dan ki sans sa bann ki resanble move zerb i plere e grens zot ledan? (Mat. 13:42) “Bann garson Dyab” i ganny tourmante par lefet ki “bann garson rwayonm” in ekspoz zot kondisyon spirityel deplorab ki anpwazonnen parey sa move zerb dan parabol Zezi. Zot osi sagren akoz sa sipor ki zot ti gannyen avek manm legliz oparavan in diminyen e zot in osi perdi kontrol lo bann fidel dan legliz.—Lir Izai 65:13, 14. *
15. Dan ki sans bann ki resanble move zerb i ganny brile dan dife?
15 Dan ki sans bann move zerb i ganny derasinen e zet dan dife? (Mat. 13:40) Sa i refer avek sa ki pou finalman arive avek sa bann move zerb. Lefet ki zot pou senbolikman ganny anvoye dan dife, sa i endike ki zot pou ganny detrir pour touzour. (Rev. 20:14; 21:8) Sa bann move zerb, setadir bann swadizan Kretyen ki’n abandonn Bondye, pou ganny eliminen konpletman pandan “gran ladetres.”—Mat. 24:21, NW.
Zot pou “briye parey soley”
16, 17. Ki Malaki ti profetize konsernan tanp Bondye e ki mannyer sa ti konmans ganny akonplir?
16 Kan ki sa bann ki resanble dible pou “briye parey soley”? (Mat. 13:43) An rapor avek pirifye tanp Bondye, Malaki ti profetize: “‘En sel kou sa vre Senyer pou vin kot Son tanp, sa enn ki zot pe rode, e sa mesaze lalyans dan ki zot pran plezir. Gete! I pou sirman vini,’ se sa ki Zeova bann larme in dir. ‘Me lekel ki pou kapab siport sa zour ki i pou vini, e lekel sa enn ki pou reste debout kan i aparet? Parski i pou parey dife en lorfev e parey savon bann blansisez. E i devret asiz konman enn ki rafinen e netway larzan e i devret pirifye bann garson Levi, e i devret filtre zot parey lor e zot a vin pour Zeova konman bann ki prezant en lofrann avek ladrwatir.’”—Mal. 3:1-3.
17 Aparaman, sa profesi ti konmans ganny akonplir dan nou letan, an 1918, kan Zeova ansanm avek Zezi Kri, “sa mesaze lalyans,” ti enspekte tanp spirityel. Malaki i dir nou sa ki arive enn fwa ki sa pirifikasyon i konplete: “Ankor enn fwa zot pou vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.” (Mal. 3:18) Bann vre Kretyen ti rekonmans devoue dan travay predikasyon e sa i montre ki sa moman letan rekolt ti konmanse.
18. Ki Danyel ti dir pou arive dan nou letan?
18 Profet Danyel ti pe koz lo nou letan kan i ti predir: “Bann ki annan bon zizman pou briye konman lalimyer dan latmosfer; e bann ki pe anmenn bokou ver ladrwatir, parey bann zetwal, pour en letan endefini, wi pour touzour.” (Dan. 12:3) Lekel sa bann ki pou briy sitan kler koumsa? Be, sa i pa lot ki bann Kretyen swazir, sa vre dible ki Zezi ti refer avek dan son parabol lo dible ek move zerb! I evidan ki bann Kretyen ki resanble move zerb pe ganny ‘derasinen’ akoz manm gran lafoul i kontinyelman ogmante. Letan ki zot asosye avek bann manm Izrael spirityel ki ankor lo later, sa bann Kretyen ki annan lespwar konman sitwayen Rwayonm i pareyman fer briye zot lalimyer dan sa lemonn vreman fernwanr.—Zeka. 8:23; Mat. 5:14-16; Fili. 2:15.
19, 20. Ki “bann garson rwayonm” pe espere avek enpasyans e ki nou pou diskite dan lot lartik?
19 Ozordi, “bann garson rwayonm” pe esper avek enpasyans zot rekonpans merveye dan lesyel. (Rom. 8:18, 19; 1 Kor. 15:53; Fili. 1:21-24) Me, ziska ki sa letan i arive, zot bezwen reste fidel, kontinyen briye, montre ki zot diferan konpare avek “bann garson Dyab.” (Mat. 13:38; Rev. 2:10) Eski pa nou vreman ere ki nou annan sa privilez pour vwar sa bann move zerb ganny ‘derasinen’ senbolikman dan nou letan!
20 Me ki relasyon i annan ant sa bann garson Rwayonm ek sa gran lafoul ki kontinyelman ogmante ki annan lespwar pour viv lo later pour touzour konman sitwayen sa Rwayonm? Lot lartik pou reponn sa kestyon.
[Not anba lo paz]
^ par. 1 Pour en leksplikasyon pli detaye lo sa bann parabol, vwar Latour Veyer le 1 Zilyet 2008, paz 20-29.
^ par. 4 Dan sa parabol, senm lagrenn pa pe reprezant sa travay pour prese e fer dimoun vin bann nouvo disip ki ti pou vin bann Kretyen swazir. Konsernan sa bon lagrenn ki ganny senmen dan plantasyon, Zezi ti dir: “Bon lagrenn i reprezant [“bann garson rwayonm,” NW].” I pa ti dir ki zot ti pou “vin” bann garson rwayonm. Alor, senm lagrenn i refer avek ler sa bann garson Rwayonm i ganny swazir dan lemonn.
^ par. 8 Rasin sa kalite move zerb (bearded darnel) i telman anmay anmay avek rasin dible ki si i ganny arase avan rekolt, bokou dible pou ganny arase.—Vwar Insight on the Scriptures, Volim 1 paz 1178 an Angle e Volim 1 paz 836 an Franse.
^ par. 14 Izai 65:13, 14: “La sa ki Souvren Senyer Zeova in dir: ‘Gete! Mon prop serviter pou manze, me zot zot pou lafen. Gete! Mon prop serviter pou bwar, me zot zot pou swaf. Gete! Mon prop serviter pou dan lazwa, me zot zot pou onte. Gete! Mon prop serviter pou kriye avek lazwa akoz zot annan lakontantman dan zot leker, me zot zot pou kriye akoz douler dan zot leker e zot pou irle senpleman akoz depresyon.’”
Eski ou rapel?
Dan parabol Zezi lo dible ek move zerb, ki sa bann diferan keksoz dan sa parabol i reprezante?
• Bon lagrenn
• Sa zonm ki senm lagrenn
• Senm lagrenn
• Lennmi
• Move zerb
• Letan larekolt
• Stor
• Plere ek grensman ledan
• Dife
[Kestyon]
[Portre lo paz 25]
Bon lagrenn ti konmans ganny senmen Lapannkot 33 N.L.
[Portre lo paz 28]
Dible senbolik pe aprezan ganny anmennen dan stor Zeova