Eski ou pe swiv Kris antyerman?
Eski ou pe swiv Kris antyerman?
“Parey zot pe fer, fer pli byen ankor.”—1 TESA. 4:1.
1, 2. (a) Ki bann keksoz merveye bann dimoun dan letan Zezi ti vwar? (b) Akoz nou letan osi i enportan?
ESKI ou’n deza mazinen ki degre gou i ti pou’n ete, si ou ti la sa letan ler Zezi ti lo later? Si ou malad ouswa annan en dezabilite fizik, Zezi ti pou’n kapab geri ou. Oubyen ou kapab mazin sa plezir ou ti’n kapab annan pour vwar e tann Zezi, andotmo, pour kapab aprann avek li e vwar li fer serten mirak. (Mark 4:1, 2; Lik 5:3-9; 9:11) Pa i ti pou’n vreman en gran privilez pour la prezan kan Zezi ti fer sa bann travay merveye! (Lik 19:37) Depi sa letan, napa okenn lezot zenerasyon ki’n trouv sa bann keksoz e sa ki Zezi ti fer lo later “par [sakrifye] son prop lekor” pa pou zanmen ganny repete.—Ebr. 9:26; Zan 14:19.
2 Par kont, sa letan ki nou pe viv ladan ozordi osi i annan en gran lenportans. Akoz? Nou pe viv dan sa letan ki Labib i apel “letan lafen” ek “bann dernyen zour.” (Dan. 12:1-4, 9; 2 Tim. 3:1) Satan ti ganny retire dan lesyel pandan sa letan. Byento, i pou ganny ansennen e zete “dan labim.” (Rev. 12:7-9, 12; 20:1-3) Pandan sa menm peryod letan, nou osi annan sa privilez pour anons “sa Bonn Nouvel Rwayonm” lo later antye avek bann dimoun, e koz avek zot konsernan lespwar sa Paradi ki pou vini. Sa travay li menm i en travay ki pa pou zanmen ganny repete ankor.—Mat. 24:14.
3. Zis avan mont dan lesyel, ki Zezi ti dir son disip fer e ki sa ti enplike?
3 Zis avan i ti mont dan lesyel, Zezi ti dir son bann disip: “Zot a vin mon bann temwen dan Zerizalenm, dan tou rezyon Zide ek Samari e ziska tou bann landrwa pli elwannyen lo later.” (Akt 1:8) Sa travay pour ansennyen ti merit ganny fer dan lemonn antye. Ki son lobzektif? Son lobzektif se pour ansenny lezot, pour ki zot osi zot vin disip Kris, avan lafen i arive. (Mat. 28:19, 20) Ki nou devret fer si nou anvi reisi akonplir sa travay ki Kris in donn nou?
4. (a) Parol Pyer dan 2 Pyer 3:11, 12 i met lanfaz lo ki nesesite? (b) Nou bezwen protez nou kont kwa?
4 Remark sa ki zapot Pyer ti eksprimen: “Ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.” (2 Pyer 3:11, 12) Parol Pyer i met lanfaz lo sa nesesite pour reste eveye pandan bann dernyen zour pour ki nou priyorite dan lavi i baze lo fer bann travay ki demontre devosyon pour Bondye. Bann tel aksyon i enplik pres sa bon nouvel. Alor, eski pa i vreman en gran lazwa pour vwar devouman nou bann frer ek ser dan lemonn antye anmezir zot akonplir sa travay predikasyon ki Kris in donn nou pour fer! Me, an menm tan nou realize ki nou bezwen fer atansyon ki nou pa les lemonn Satan ek nou tandans pour fer pese met presyon lo nou pour ki sa devouman ki nou annan pour akonplir nou servis pour Bondye i diminyen. Aprezan annou egzaminen ki mannyer nou kapab fer sir ki nou pe kontinyen swiv Kris.
Aksepte avek gran ker sa responsabilite ki Bondye in donn nou
5, 6. (a) Akoz Pol ti felisit lezot Kretyen Zerizalenm e ki lavertisman i ti donn zot? (b) Akoz nou pa devret pran nou responsabilite ki Bondye in donn nou alalezer?
5 Dan son let pour bann Kretyen Zerizalenm, zapot Pol ti felisit lezot krwayan ki depi lontan ti pe reste fidel e andire malgre persekisyon. I ti dir: “Rapel zot ki ti arive avek zot, apre ki zot ti’n resevwar lalimyer, ki zot ti reste ferm dan lalit avek soufrans.” Wi, Zeova ti rapel zot fidelite. (Ebr. 6:10; 10:32-34) I tre probab ki felisitasyon Pol ti vreman ankouraz bann Kretyen Ebre en kantite. Par kont, dan sa menm let, Pol ti osi averti zot konsernan tandans ki nou imen nou annan, ki si i pa ganny kontrole, sa i kapab diminyen nou devouman dan servis pour Bondye. I ti dir ki bann Kretyen i devret fer atansyon pour ki zot pa ‘refize ekoute’ ouswa rod leskiz pour swiv komannman Bondye.—Ebr. 12:25.
6 Sa lavertisman konsernan nou tandans pour rod leskiz pour pa aksepte avek gran ker sa responsabilite ki Bondye in donn nou i aplik avek bann Kretyen ozordi osi. Nou konnen ki nou bezwen determinen pour pa zanmen pran nou responsabilite konman Kretyen alalezer ouswa les nou devouman pour servis Bondye diminyen. (Ebr. 10:39) Apre tou, nou desizyon pour servi Bondye oubyen non i vedir swa lavi swa lanmor.—1 Tim. 4:16.
7, 8. (a) Kwa ki pou ed nou gard nou devouman dan servis pour Bondye? (b) Si nou’n perdi sa devouman ki nou ti annan o konmansman, ki nou devret rapel lo Zeova ek Zezi?
7 Kwa ki pou ed nou pa rod leskiz an rapor avek akonplir nou lobligasyon anver Bondye? En fason enportan pour lalit avek sa tandans se pour medit regilyerman lo sinifikasyon ve nou dedikasyon. Anfet, nou’n promet Zeova ki nou priyorite dan lavi se pour fer son lavolonte e nou anvi gard sa promes. (Lir Matye 16:24.) Alor, parler nou bezwen aret en kou e demann nou lekor: ‘Eski mon ankor annan sa menm determinasyon pour viv annakor avek mon dedikasyon anver Bondye parey i ti leka avan mon ti batize? Eski mon’n perdi en pe mon devouman dan bann lannen ki’n pase depi sa letan?’
8 Si ler nou pe egzamin nou lekor, nou remarke ki nou devouman pe ptitapti diminyen, i byen pour nou rapel parol ankourazan profet Tsefanya. I ti dir: “Pa bes lebra. Zeova ou Bondye i parmi ou. Konman sa Enn ki for, i pou delivre. I pou rezwir avek lazwa.” (Tsef. 3:16, 17) Sa parol ti premyerman aplik avek bann Izraelit dan letan lontan ki ti’n retourn Zerizalenm apre ki zot ti’n ganny large par bann Babilonnyen ki ti’n kaptir zot. Par kont, sa parol i en lasirans pour pep Bondye dan nou letan osi. Lefet ki sa travay ki nou pe fer i pour Zeova, touzour gard antet ki Zeova ek son Garson pe siport nou dan sa travay e donn nou lafors pour akonplir plennman nou responsabilite sorti kot Bondye. (Mat. 28:20; Fili. 4:13) Si nou fer bokou zefor pour kontinyen fer travay Bondye avek devouman, i pou beni nou e ed nou pour kontinyen progrese spirityelman.
“Rod plito Rwayonm” avek devouman
9, 10. Ki Zezi ti oule fer resorti dan son parabol lo sa gran festen e ki leson nou kapab tire ladan?
9 Ler i ti pe pran en repa kot lakour en Farizyen, Zezi ti rakont en parabol konsernan en gran festen. Dan sa parabol i ti dekrir sa loportinite ki diferan dimoun ti annan pour viv dan Rwayonm ki dan lesyel. I ti osi donn legzanp pour montre ki savedir “rod eskiz.” (Lir Lik 14:16-21.) Bann envite dan parabol Zezi ti donn diferan leskiz pour zot pa vin sa festen. Enn ti dir ki i ti bezwen al vizit en propriyete ki i ti’n fek aste. En lot ti dir ki i ti’n aste detrwa bef e i ti anvi al get zot. En lot ankor ti dir: ‘Mon pa kapab vini, mon fek marye.’ Tou sa la ti bann leskiz ki pa ti valab. En dimoun ki aste en propriyete ouswa zannimo i normalman al get zot avan i aste, alor i pa vreman neseser pour get zot apre. Kwa ki kapab anpes en dimoun ki fek marye aksepte sa lenvitasyon enportan? I pa drol alor ki organizater sa festen ti ankoler!
10 Tou serviter Bondye i kapab tir en leson dan parabol Zezi. Ki leson? Nou pa devret zanmen les bann keksoz personnel parey sa bann ki Zezi in mansyonnen dan son parabol vin pli enportan ki i fer nou met dekote nou servis pour Bondye. Si en Kretyen pa met bann keksoz personnel dan son plas apropriye, son devouman pour minister pou ptitapti diminyen. (Lir Lik 8:14.) Pour anpes sa arive, annou swiv konsey Zezi pour kontinyen “rod plito Rwayonm Bondye ek son lazistis.” (Mat. 6:33) Pa i vreman ankourazan pour vwar bann serviter Bondye, zenn konman vye, pe aplik sa konsey enportan! Anfet, bokou in pran bann pa neseser pour senplifye zot lavi pour ki zot kapab pas plis letan dan minister. Zot in aprann atraver leksperyans ki rod plito Rwayonm avek devouman i anmenn vre boner ek gran satisfaksyon.
11. Ki resi dan Labib ki montre lenportans pour annan devouman e servi Bondye avek tou nou leker?
11 Pour donn en legzanp lo lenportans nou devouman dan servis Bondye, remark sa ki ti arive dan lavi Yeoas, lerwa Izrael. I ti vreman konsernen avek sa posibilite ki Siri ti pou konkerir Izrael, ki i ti al plere kot Elisa. Sa profet ti demann li pour tir dart par lafnet ki vir avek Siri e sa ti pe endik laviktwar Zeova lo sa nasyon. Sa ti’n devret sirman donn kouraz sa lerwa. Apre sa, Elisa ti demann Yeoas pour pran larestan dart e tap ater. I ti tap zis trwa fwa apre i ti arete. Elisa ti ankoler akoz sa, parski si Yeoas ti’n tap senk oubyen sis fwa ater sa ti pou’n montre ki i ti pe al “detrir Siri ziska i ganny eliminen.” Me la prezan, Yeoas ti pou ganny zis trwa pti laviktwar kont sa pep. Lefet ki i ti napa ase devouman, Yeoas pa ti ganny bokou sikse. (2 Rwa. 13:14-19) Ki leson nou aprann avek sa resi? Zeova pou beni nou en kantite si nou fer son travay avek tou nou leker e avek devouman.
12. (a) Kwa ki pou ed nou gard nou devouman dan servis pour Bondye anmezir nou fer fas avek bann difikilte dan lavi? (b) Rakonte ki mannyer ou pe benefisye ler ou reste okipe dan minister.
12 Bann difikilte dan lavi i teste nou devouman ek devosyon dan servis pour Bondye. Bokou frer ek ser pe fer fas avek bann difikilte ekonomik. Lezot i fristre akoz en problenm lasante serye ki limit sa ki zot ti a voudre fer dan servis Zeova. Kantmenm sa, sakenn antre nou, nou kapab pran bann pa neseser pour asire ki nou gard nou devouman e kontinyen swiv Kris antyerman. Silvouple remark serten sizesyon ek verse Labib ki’n ganny mete dan sa bwat “Kwa ki pou ed ou kontinyen swiv Kris?” Vwar ki mannyer ou kapab aplik zot o maksimonm. Si ou fer li, ou pou ganny bann vre byenfe. Si nou reste okipe dan predikasyon, sa i kapab ed nou reste ekilibre, fer nou lavi annan plis sans e nou pou ganny plis lape ek lazwa. (1 Kor. 15;58) Deplis, ler nou partisip dan servis Bondye avek tou nou leker sa i ed nou pour gard antet ki zour Zeova i pros.—2 Pyer 3:12.
Egzamin seryezman ou sirkonstans
13. Ki mannyer endividyelman nou pou konnen ki savedir servi Bondye avek tou nou leker?
13 Toudmenm, i bon pour osi mazinen ki servi Bondye avek tou nou leker i pa zis en zafer lakantite letan nou pase dan predikasyon. Sirkonstans sak dimoun i diferan. En dimoun ki pas zis enn oubyen de-z-erdtan sak mwan dan predikasyon i kapab vreman fer plezir Zeova si vreman se tou ki son lasante i permet li fer. (Konpar Mark 12:41-44.) Alor, pour personnelman konnen ki savedir servi Bondye avek tou nou leker, i byen ki nou egzamin seryezman nou abilite ek sirkonstans. Konman disip Kris, nou anvi annan menm pwennvi avek li. (Lir Romen 15:5; 1 Kor. 2:16) Kwa ki Zezi ti met konman priyorite dan son lavi? I ti dir lafoul Kapernaoum: “Mon bezwen anons Bonn Nouvel konsernan Rwayonm Bondye . . . parski se pour sa, ki Bondye in anvoy mwan.” (Lik 4:43; Zan 18:37) Gard antet devouman Zezi dan son minister e evalye ou sirkonstans pour vwar si ou osi ou pou kapab fer plis dan minister.—1 Kor. 11:1.
14. Ki mannyer nou kapab fer plis dan minister?
14 Letan nou byen egzamin nou sirkonstans, sa i kapab fer ki nou pou finalman tonm lo sa konklizyon ki nou pou kapab ogmant lakantite letan nou pase dan minister. (Mat. 9:37, 38) Par egzanp, bokou zenn ki’n fini lekol in partisip plis dan predikasyon e zot pe ganny bokou lazwa ki vin avek sa devouman ki zot annan pour servi konman bann pionye. Eski ou ti pou kontan annan sa menm lazwa ou osi? Serten frer ek ser in egzamin zot sirkonstans e deside ki zot kapab al dan en lot landrwa dan zot pei oubyen menm aletranze kot i annan plis bezwen pour bann proklanmater Rwayonm. Lezot ankor in aprann en lot langaz pour ed bann dimoun ki koz en lot langaz ki dan zot teritwar. I kapab en defi pour ogmant nou partisipasyon dan minister, me i anmenn en kantite benediksyon e nou kapab ed plizyer lezot dimoun pour “ganny konnesans laverite.”—1 Tim. 2:3, 4; 2 Kor. 9:6.
Legzanp dan Labib pour swiv
15, 16. Lekel bann disip devoue Kris ki nou kapab imit zot legzanp?
15 Ki mannyer serten dimoun ki plitar ti vin bann zapot ti reazir kan Zezi ti envit zot pour vin son disip? Konsernan Matye, sa resi i dir: “Levi ti leve, i ti kit tou e i ti swiv Zezi.” (Lik 5:27, 28) Nou lir sa konsernan Pyer ek Andre ki ti pe lapes: “Deswit zot ti kit zot lasenn e zot ti swiv li.” Apre sa, Zezi ti vwar Zak ek Zan ki ti pe repar lasenn ansanm avek zot papa. Ki mannyer zot ti reazir ler Zezi ti envit zot? “Deswit zot ti kit zot kannot ek zot papa e swiv Zezi.”—Mat. 4:18-22.
16 En lot bon legzanp i sa enn pour Sol ki plitar ti vin zapot Pol. Menm si i ti kontan persekit bann disip Kris, i ti sanze e i ti ganny “swazir” pour port non Kris. “[Pol] ti konmans prese deswit dan bann sinagog e i ti anonse ki Zezi i Garson Bondye.” (Akt 9:3-22) Malgre ki i ti bezwen andir en kantite difikilte ek persekisyon, Pol pa ti zanmen perdi son devouman.—2 Kor. 11:23-29; 12:15.
17. (a) Ki ou an dezir fer an rapor avek swiv Kris? (b) Ki benediksyon nou gannyen lefet ki nou pe fer lavolonte Zeova avek tou nou leker ek lafors?
17 Sirman nou osi nou anvi imit legzanp sa bann disip e reazir deswit san ezite. (Ebr. 6:11, 12) Ki benediksyon nou gannyen anmezir nou kontinyen fer bokou zefor pour swiv Kris antyerman e avek devouman? Nou ganny sa vre lazwa pour fer lavolonte Bondye e ganny sa satisfaksyon ki vin avek aksepte lezot privilez dan servis ek responsabilite dan kongregasyon. (Ps. 40:8; lir 1 Tesalonisyen 4:1.) Wi, anmezir nou fer bokou zefor pour swiv Kris, nou ganny bann gran benediksyon parey lape lespri, satisfaksyon, lakontantman, laprouvasyon Bondye ek lespwar pour ganny lavi eternel.—1 Tim. 4:10.
Eski ou rapel?
• Ki travay enportan nou annan e ki mannyer nou devret vwar li?
• Ki tandans nou devret evite e akoz?
• Ki egzaminasyon serye nou devret fer?
• Kwa ki pou ed nou pour kontinyen swiv Kris?
[Kestyon]
[Bwat/Portre lo paz 31]
Kwa ki pou ed ou kontinyen swiv Kris?
▪ Lir Parol Bondye tou le zour e medit lo sa ki ou lir.—Ps. 1:1-3; 1 Tim. 4:15.
▪ Toultan priye pour ganny sipor ek gidans lespri sen Bondye.—Zeka. 4:6; Lik 11:9, 13.
▪ Frekant bann ki annan devouman senser pour minister.—Prov. 13:20; Ebr. 10:24, 25.
▪ Gard antet ki sa letan ki nou pe viv ladan i kourt.—Efe. 5:15, 16.
▪ Mazin danze ki i annan pour “rod eskiz.”—Lik 9:59-62.
▪ Reflesir regilyerman lo ve ou dedikasyon e tou sa benediksyon ou gannyen ler ou servi Zeova e swiv Kris avek tou ou leker.—Ps. 116:12-14; 133:3; Prov. 10:22.