Rol lespri sen dan lakonplisman plan Bondye
Rol lespri sen dan lakonplisman plan Bondye
“Mon parol ki sorti dan mon labous . . . pou sirman annan sikse pour sa rezon ki mon’n anvoy li.”—IZA. 55:11.
1. Donn legzanp pour montre diferans ant en plan detaye ek en plan zeneral.
MAZIN de zonm ki pe prepare pour al fer en vwayaz dan zot loto. Enn i konn byen an detay ki semen i pou pran pour ariv direkteman kot son destinasyon. Sa lot li i konn tre byen kote i pe ale, me i konn lezot larout osi ki i kapab pran pour ariv ver menm landrwa. I pare pour li sanz semen si an ka i rankontre serten problenm. Lo en serten degre metod ki sa de zonm in servi i montre byen diferans ki i annan ant en plan detaye ek en plan zeneral. En plan detaye i enn kot tou pti detay in ganny enkli, sa dimoun i konn egzakteman ki semen i pou pran. Tandis ki en plan zeneral li, i pa neseserman enkli tou pti detay, me sa dimoun i gard son destinasyon antet.
2, 3. (a) Kwa ki enplike dan plan Zeova? (b) Ki mannyer i ti regle sa problenm ki ti leve kan Adan ek Ev ti fer pese? (c) Ki mannyer nou devret adapte avek plan Zeova ki pe progresivman ganny akonplir?
2 An rapor avek akonplir son lavolonte, Zeova napa en plan detaye, me plito i annan en plan zeneral. (Efe. 3:11) Sa plan zeneral ki i annan i enplik sa ki i’n anvi pour bann imen ek sa later depi o konmansman, setadir ki later antye i vin en paradi kot bann imen parfe i kapab viv dan lape ek lazwa pour touzour. (Zen. 1:28) Kan Adan ek Ev ti fer pese, Zeova ti reazir deswit e fer sa ki ti neseser pour ki son plan i ganny akonplir. (Lir Zenez 3:15. *) Zeova ti deside ki son madanm senbolik ti pou prodwi en “desandans” oubyen Garson ki ti pou finalman detrir Satan, sa enn ki responsab lemal e retir tou move keksoz ki i’n fer.—Ebr. 2:14; 1 Zan 3:8.
3 Napa nanryen dan lesyel ouswa lo later ki kapab anpes Bondye akonplir sa ki i’n dir i pou fer. (Iza. 46:9-11) Akoz nou kapab dir sa? Sa i akoz lespri sen Zeova i enplike ladan. Napa nanryen ki pou kapab anpes sa lafors akonplir plan Bondye akoz i “pou sirman annan sikse.” (Iza. 55:10, 11) Nou bezwen byen gete lafason ki Zeova pe progresivman akonplir son plan e azir an armoni avek li. Nou lespwar pour lavenir i depan lo lakonplisman son plan. Deplis, i ranforsi nou lafwa pour vwar konman Zeova i servi son lespri sen. Alor, annou egzamin rol ki lespri sen ti zwe dan lepase, dan nou letan e dan lavenir an rapor avek lakonplisman plan Zeova.
Rol lespri sen dan lepase
4. Konman Zeova in ptitapti revel son plan?
4 Dan letan lontan, Zeova ti revel son plan ptitapti. O konmansman, lidantite sa Desandans ki ti’n ganny promet ti en “sekre.” (1 Kor. 2:7) Letan ti pase e apepre 2,000 an plitar, Zeova ti koz ankor enn fwa lo sa desandans. (Lir Zenez 12:7; 22:15-18. *) Letan i ti pe koz avek Abraam, Zeova ti fer en promes ki annan en pli gran lakonplisman. Sa parol, “atraver ou desandans” i montre klerman ki sa Desandans ti pou ne konman en imen sorti dan fanmir Abraam. Nou kapab asire ki Satan ti pe get tousala avek en gran lentere anmezir sa bann lenformasyon ti ganny revele. San okenn dout, sa Adverser ti zis anvi detrir ouswa enterfer avek laliny desandans Abraam pour ki plan Zeova pa ti pou reisi. Me sa ti pou enposib, akoz lespri envizib Bondye ti pe travay. Dan ki fason?
5, 6. Ki mannyer Zeova ti servi son lespri sen pour protez zanset sa Desandans ki ti’n ganny promet?
5 Zeova ti servi son lespri sen pour protez zanset sa Desandans. Zeova ti dir Abram (Abraam): “Mon en boukliye pour ou.” (Zen. 15:1) Sa pa ti zis en parol dan vid. Egzamin par egzanp sa ki ti arive apepre 1919 A.N.L., kan Abraam ek Sara ti al reste Gerar pour en pe letan. Abimelek, lerwa Gerar, san konnen ki Sara ti madanm Abraam, ti pran Sara avek lentansyon pour fer li vin son madanm. Eski Satan ti annan kek rol pour zwe par deryer sa, pour esey anpes Sara fer en zanfan pour Abraam? Labib pa dir. Me toudmenm Labib i dir nou ki Zeova ti entervenir. Dan en rev ki Abimelek ti gannyen, Zeova ti dir li pa tous Sara.—Zen. 20:1-18.
6 Sa pa ti sa sel moman ki Zeova ti protez zot. Zeova ti delivre Abraam ek son fanmir plizyer fwa. (Zen. 12:14-20; 14:13-20; 26:26-29) En psalmis ti alor kapab dir sa lo Abraam ek son desandans: “[Zeova] pa ti les okenn imen fer zot ditor, i ti reprimann bann lerwa akoz zot, an dizan: ‘Pa tous sa bann ki mon’n swazir, e pa fer okenn keksoz mal mon bann profet.’”—Ps. 105:14, 15.
7. Dan ki fason Zeova ti protez nasyon Izrael?
7 Atraver son lespri sen Zeova ti protez nasyon Izrael dan letan lontan, akoz sa Desandans ki ti’n ganny promet ti pou sorti dan sa nasyon. Zeova ti donn Izrael son Lalwa atraver son lespri sen, sa ti protez vre ladorasyon ek bann Zwif pangar zot ganny kontaminen spirityelman, moralman e fizikman. (Egz. 31:18; 2 Kor. 3:3) Dan letan bann Ziz, lespri sen Zeova ti donn serten zonm pouvwar pour delivre Izrael dan lanmen zot lennmi. (Ziz 3:9, 10) Pandan bann syek ki ti pase ziska nesans Zezi sa parti prensipal desandans Abraam, i tre probab ki lespri sen ti pe protez Zerizalenm, Betleenm ek tanp, akoz tou sa la ti enportan dan lakonplisman bann profesi konsernan Zezi.
8. Kwa ki montre ki lespri sen Bondye ti pe zwe en rol enportan dan lavi e minister Garson Bondye?
8 Lespri sen ti annan en rol enportan pour zwe dan lavi ek minister Zezi. Lespri sen ti fer en keksoz ki pa ti’n zanmen ganny fer oparavan e ganny fer ankor. I ti permet Mari, en vyerz, konsevwar dan son matris en zanfan e donn nesans en Garson parfe ki pa ti ne anba kondannasyon lanmor. (Lik 1:26-31, 34, 35) Pli tar lespri sen ti protez Zezi ki ti ankor en zanfan e anpes li ganny touye avan ler. (Mat. 2:7, 8, 12, 13) A laz apepre 30 an, Bondye ti anvoy son lespri sen lo Zezi, dan sa fason i ti apwent li pour vin zeritye tronn David e donn li lord pour prese. (Lik 1:32, 33; 4:16-21) Lespri sen ti donn Zezi pouvwar pour fer bann mirak, enkli geri bann malad, nouri lafoul e resisit dimoun mor. Bann tel aksyon ti en avangou bann benediksyon ki nou kapab ekspekte anba dominasyon Zezi konman lerwa.
9, 10. (a) Bann disip Zezi dan premye syek ti ganny lespri sen, ki mannyer nou konnen? (b) Ki sanzman konsernan plan Zeova ti ganny revele dan premye syek Nou Lepok?
9 Lapannkot lannen 33 N.L, Zeova ti servi son lespri sen pour konmans swazir dezyenm parti desandans Abraam, ki bokou parmi pa ti vreman sorti dan desandans Abraam. (Rom. 8:15-17; Gal. 3:29) I ti evidan ki lespri sen ti pe travay lo bann disip Zezi dan premye syek akoz i ti permet zot pres avek devouman e donn zot pouvwar pour fer bann mirak. (Akt 1:8; 2:1-4; 1 Kor. 12:7-11) Lefet ki zot ti’n ganny don pour fer mirak atraver lespri sen, sa ti prouve ki en sanzman remarkab ti’n arive an konneksyon avek lakonplisman plan Zeova. Zeova ti pe nepli anvi ki bann dimoun i ador li lafason ki son pep dan letan lontan ti ador li, setadir ador li dan tanp Zerizalenm. Aprezan, sa kongregasyon ki ti’n fek formen ki ti pe ganny son faver. Depi sa letan, Zeova in servi sa kongregasyon, setadir bann Kretyen swazir pour akonplir son plan.
10 Donn proteksyon ek lafors e swazir bann dimoun, i zis detrwa fason ki Zeova ti servi son lespri sen dan letan lontan pour asire ki son plan i bouz annavan pour ki i ganny akonplir. Me ki pour dir konsernan nou letan? Dan ki fason Zeova pe servi son lespri sen pour siport son plan? Nou devret konnen parski nou anvi azir an armoni avek lespri sen. Alor, annou egzamin kat fason ki Zeova pe servi son lespri sen dan nou letan.
Rol lespri sen dan nou letan
11. (a) Kwa ki montre ki lespri sen i sa lafors ki gard pep Bondye pir? (b) Ki mannyer ou kapab montre ki ou pe korpere avek lespri sen?
11 Premyerman, lespri sen i ede pour gard pep Bondye pir. Bann ki annan en rol pour zwe dan plan Zeova i devret pir moralman. (Lir 1 Korentyen 6:9-11.) Serten dimoun ti pratik bann aksyon imoral parey fornikasyon, adilter ek omoseksyalite avan vin en Kretyen. Bann dezir ki fer en dimoun fer bann move aksyon i kapab vreman anrasinen dan li. (Zak 1:14, 15) Pourtan, sa bann dimoun in ganny “lave” e sa i endike ki zot in fer bann sanzman neseser dan zot lavi pour ki zot fer plezir Bondye. Kwa ki fer en dimoun ki kontan Bondye reisi reziste sa tandans pour les son move dezir kontrol li? Dan 1 Korentyen 6:11, nou kapab lir ki se “Lespri nou Bondye” ki fer sa. Si ou reste prop moralman, ou pe montre ki ou pe les lespri sen diriz ou lavi.
12. (a) Dapre vizyon Ezekyel, ki mannyer Zeova i diriz son lorganizasyon? (b) Ki mannyer ou kapab montre ki ou pe korpere avek lespri sen?
12 Dezyenmman, Zeova i servi son lespri sen pour diriz son lorganizasyon dan sa direksyon ki li i oule. Dan en vizyon ki Ezekyel ti gannyen, lorganizasyon Zeova ki dan lesyel ti ganny reprezante par en saret dan lesyel ki kontinyelman pe bouze pour akonplir plan Zeova. Kwa ki pous sa saret pour bouz dan en serten direksyon? Lespri sen. (Ezek. 1:20, 21) Annou touzour rapel ki lorganizasyon Zeova i separ an de, enn i dan lesyel e lot i lo later. Si sa enn dan lesyel i ganny dirize par lespri sen, alor i bezwen parey pour sa enn ki lo later. Si ou obeir e ou fidel avek gidans ki ou gannyen avek lorganizasyon Zeova lo later, sa pou montre ki ou pe bouz menm vites avek saret Zeova dan lesyel e ou pe les son lespri sen diriz ou.—Ebr. 13:17.
13, 14. (a) Lekel “sa zenerasyon” ki Zezi ti koz lo la? (b) Donn en legzanp pour montre ki mannyer lespri sen pe travay pour fer nou pli byen konpran Labib. (Vwar bwat “Eski ou azour avek lalimyer spirityel ki pe vin deplizanpli kler?”)
13 Trwazyenmman, Zeova i servi son lespri sen pour ed nou konpran sa laverite dan Labib. (Prov. 4:18) I fer en bon pe letan depi ki “lesklav fidel e pridan” pe servi Latour Veyer konman en mwayen prensipal pour revel bann laverite dan Labib. (Mat. 24:45, NW) Par egzanp, egzamin nou konprenezon lo sa bann ki form parti “sa zenerasyon” ki Zezi ti koz lo la. (Lir Matye 24:32-34.) Zezi ti pe refer avek ki zenerasyon? Sa lartik “Prezans Kris—ki sa i vedir pour ou?” i eksplike ki Zezi pa ti pe refer avek bann move dimoun, me plito avek son bann disip ki plitar ti pou ganny swazir par lespri sen. * Bann disip Zezi ki’n ganny swazir, ki swa dan premye syek ouswa dan nou letan, pou sa bann ki pa pou zis vwar sa siny, me zot pou konpran son sinifikasyon, setadir ki Zezi “i devan laport.”
14 Ki sa leksplikasyon i vedir pour ou? Menm si nou pa kapab konn egzakteman ki kantite letan “sa zenerasyon” pou dire, nou devret touzour gard antet detrwa keksoz konsernan sa mo “zenerasyon”: I souvan refer avek bann dimoun diferan laz ki viv ansanm pandan en serten letan, sa kantite letan ki sa zenerasyon i dire i pa sitan long e i annan en lafen. (Egz. 1:6) Alor, ki mannyer nou pou konpran parol Zezi konsernan “sa zenerasyon”? I paret ki Zezi ti oule dir ki bann Kretyen swazir ki ti vwar konmansman bann dernyen zour an 1914 ti pou viv en serten letan avek bann Kretyen swazir ki ti pou vwar konmansman gran ladetres. Sa zenerasyon ti annan en konmansman e sirman i pou annan en lafen. Lakonplisman sa bann diferan parti sa siny i montre klerman ki gran ladetres i pros. Si ou touzour gard antet ki letan i kourt e ou reste eveye, ou pou montre ki ou pe reste azour avek bann azisteman lo nou konprenezon lo bann laverite ki dan Labib e ou pe swiv gidans lespri sen.—Mark 13:37.
15. Kwa ki montre ki lespri sen i donn lafors pour anons sa bon nouvel?
15 Katriyenmman, lespri sen i donn nou lafors pour anons sa bon nouvel. (Akt 1:8) Konman nou pou kapab eksplike ki mannyer sa predikasyon pe ganny fer dan lemonn antye, si pa lespri sen ki pe ede fer sa travay? Mazin lo la. I kapab ki ou parmi sa bann ki petet akoz ou kanmi ouswa santi en serten lafreyer ou ti mazinen, ‘Mon zanmen mon pou kapab pres portanport!’ Pourtan, aprezan ou pe partisip dan sa travay avek devouman. * Bokou Temwen Zeova ki fidel in kontinyen prese malgre lopozisyon ouswa persekisyon. Zis lespri sen Bondye ki kapab donn nou lafors pour sirmont bann lobstak efreyan e fer bann keksoz ki lo nou menm nou pa ti pou kapab fer. (Mik. 3:8; Mat. 17:20) Ler ou partisip plennman dan predikasyon, ou pe montre ki ou pe korpere avek lespri sen.
Rol lespri sen dan lavenir
16. Akoz nou kapab annan konfyans ki Zeova pou protez son pep pandan gran ladetres?
16 Dan lavenir Zeova pou servi son lespri sen dan en fason vreman remarkab pour akonplir son plan. Premyerman, egzamin konsernan proteksyon son pep. Parey nou’n vwar, Zeova ti servi son lespri sen dan lepase pour protez bann dimoun endividyelman e osi nasyon Izrael. Alor, nou annan tou rezon pour krwar ki i pou servi sanmenm sa lespri sen pour protez son pep pandan sa gran ladetres ki pe aprose. Nou pa devret esey rode konman Zeova pou egzakteman pran swen avek nou. O kontrer, nou kapab get lavenir avek konfyans akoz nou konnen Zeova pa pou zanmen inyor sa bann ki kontan li ouswa pa ed zot avek son lespri sen.—2 Kron. 16:9; Ps. 139:7-12.
17. Konman Zeova pou servi son lespri sen dan nouvo lemonn?
17 Ki mannyer Zeova pou servi son lespri sen dan nouvo lemonn ki pe vini? Sa lespri sen pou sa lafors par deryer sa nouvo liv ki pou ganny ouver sa letan. (Rev. 20:12) Ki pou annan dan sa liv? I evidan ki ladan i pou annan plis detay lo sa ki Zeova pou ekspekte avek nou pandan sa mil an. Eski ou enpasyan pour vwar sa ki i annan dan sa liv? Nou pe esper sa nouvo lemonn avek bokou lantouzyasm. Nou pa kapab ni menm konmans imazinen ki mannyer i pou ete pour viv dan sa letan kot pou annan bokou benediksyon, kot Zeova pou servi son lespri sen pour akonplir son plan pour later e bann imen ki pou reste lo la.
18. Ki ou determinen pour fer?
18 Annou pa zanmen oubliye ki plan ki Zeova i annan pou sirman annan sikse akoz i servi son lespri sen, sa lafors pli pwisan dan liniver pour akonplir sa travay. Ou osi ou enkli dan sa plan. Alor, sipliy Zeova avek determinasyon pour ganny son lespri sen e viv annakor avek son gidans. (Lik 11:13) Si ou fer sa, ou pou annan lespwar pour viv parey Zeova ti’n plàn, setadir pour viv pour touzour lo later.
[Not anba lo paz]
^ par. 2 Zenez 3:15: “Mon pou met en laenn ant ou ek sa madanm, ant ou desandans ek son desandans. I pou kraz ou latet e ou pou kraz son talon.”
^ par. 4 Zenez 12:7; 22:15-18: “Zeova ti alor aparet avek Abram e dir: ‘Mon pou donn ou desandans sa pei.’ Apre sa i ti konstrir en lotel la, pour Zeova, ki ti’n aparet avek li.” “E anler dan lesyel, lanz Zeova ti kriy Abraam pour en dezyenm fwa e i ti dir: ‘Wi, par mwan menm mon promet,’ se sa ki Zeova in dir, ‘akoz lefet ki ou’n fer sa e ou pa’n ezite donn ou garson, ou sel garson, mon pou vreman beni ou e mon pou vreman fer ou desandans vin bokou parey zetwal dan lesyel e parey gren disab o bor lanmer; e ou desandans pou pran lavil son bann lennmi. Atraver ou desandans tou nasyon lo later pou sirman ganny beni, parski ou’n ekout mwan.’”
^ par. 15 Legzanp en dimoun ki ti sirmont lakanmizri e devoue dan minister i ganny trouve dan Latour Veyer le 15 Septanm 1993, paz 19 (Angle/Franse).
Eski ou rapel?
• Dan ki fason Zeova ti servi son lespri sen dan letan lontan pour ki son plan i kontinyen bouz devan?
• Ki mannyer Zeova pe servi son lespri sen ozordi?
• Ki mannyer Zeova pou servi son lespri sen dan lavenir pour akonplir son plan?
[Kestyon]
[Bwat lo paz 22]
Eski ou azour avek lalimyer spirityel ki pe vin deplizanpli kler?
Zeova i kontinyen ekler son pep. Ki serten azisteman ki’n ganny pibliye dan Latour Veyer?
▪ Ki leson enportan lo progre spirityel parabol Zezi lo lelven i met lanfaz lo la? (Mat. 13:33)—1 Zilyet 2008, paz 27-28.
▪ Kan ki bann Kretyen ki annan lespwar pour al dan lesyel i aret ganny swazir?—1 Me, 2007, paz 30-31 (Angle/Franse).
▪ Ki savedir ador Zeova “an-espri”? (Zan 4:24)—1 Out 2002, paz 12.
▪ Dan ki lakour tanp gran lafoul i servi? (Rev. 7:15)—1 Me 2002, paz 30-31 (Angle/Franse).
▪ Kan ki separasyon mouton ek kabri i ganny fer? (Mat. 25:31-33)—15 Oktob 1995, paz 18-28 (Angle/Franse).