Zenn, ogmant ou dezir pour servi Zeova
Zenn, ogmant ou dezir pour servi Zeova
“Mazin ou Gran Kreater letan ou ankor zenn.”—EKLE. 12:1.
1. Ki lenvitasyon ki bann zanfan dan nasyon Izrael ti gannyen?
APEPRE 3,500-z-an pase, Moiz, enn bann profet Zeova ti donn lord bann pret ek bann ansyen dan nasyon Izrael pour: “Rasanble lepep, bann zonm ek bann madanm ek zot bann zanfan . . . , pour zot kapab ekoute e ki zot kapab aprann, akoz zot devret annan lakrent pour Zeova zot Bondye e fer atansyon pour aplik tou bann parol sa lalwa.” (Det. 31:12) Remarke lekel ki ti ganny demande pour rasanble pour ladorasyon: bann zonm, madanm ek zanfan. Wi, menm bann zanfan ti parmi bann ki ti ganny demande pour ekoute, aprann e swiv gidans Zeova.
2. Ki mannyer Zeova ti demontre lentere pour bann zenn dan kongregasyon Kretyen dan premye syek?
2 Dan premye syek, Zeova ti kontinyelman demontre lentere pour bann zanfan parmi son pep. Par egzanp, i ti enspir zapot Pol pour enkli bann lenstriksyon spesifik pour bann zenn dan serten let ki i ti anvoy pour bann kongregasyon. (Lir Efezyen 6:1; Kolosyen 3:20.) Bann zenn Kretyen ki ti aplik sa bann konsey ti ganny benediksyon zot Papa ki dan lesyel e zot ti devlop plis lapresyasyon pour li.
3. Ki mannyer bann zenn ozordi i demontre ki zot annan sa dezir pour servi Zeova?
3 Eski bann zenn ozordi in ganny envite pour rasanble ansanm pour ador Zeova? Byensir! Alor i en sours lazwa pour pep Bondye obzerv sa kantite zenn serviter Bondye partou dan lemonn antye ki pe pran aker sa konsey Pol: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.” (Ebr. 10:24, 25) An plis ki sa, i annan bokou zenn ki partisip ansanm avek zot paran dan sa travay predikasyon pour anons sa bon nouvel lo Rwayonm Bondye. (Mat. 24:14) Pour demontre zot profon lanmour pour Zeova, plizyer milye zenn i batize tou le-z-an e zot ganny bokou benediksyon akoz zot vin en disip Kris.—Mat. 16:24; Mark 10:29, 30.
Aksepte sa lenvitasyon, la konmela
4. Kan ki bann zenn i kapab aksepte sa lenvitasyon pour servi Zeova?
4 Eklezyast 12:1 i dir: “Mazin ou Gran Kreater letan ou ankor zenn.” Zenn, ki laz ou krwar ou merit annan pour kapab aksepte sa lenvitasyon ranpli avek lanmour pour ador Zeova e servi li? Napa en laz ki ganny spesifye dan Labib. Dan sa ka, pa bezwen ezite e krwar ki ou tro zenn pour ekout Zeova e servi li. Nenport ki laz ou annan, ou ganny ankouraze pour aksepte sa lenvitasyon san tarde.
5. Ki mannyer bann paran i kapab ed zot zanfan pour progrese dan laverite?
5 Bokou parmi zot i ganny led avek enn oubyen tou le de paran pour progrese dan laverite, zis parey Timote. Depi ler i ti ankor en pti manrmay, son manman Enis ek son granmanman Lois ti ansenny li Lekritir sakre. (2 Tim. 3:14, 15) Pareyman, ou paran pe ansenny ou dan sa menm fason par etidye Labib avek ou, fer lapriyer avek ou, anmenn ou renyon ek lasanble, e osi travay dan predikasyon avek ou. Pour ansenny ou lo lafason ki Bondye i azir i en responsabilite byen enportan ki Zeova li menm in donn ou paran. Zenn, eski ou apresye sa lanmour e lentere ki zot annan pour ou?—Prov. 23:22.
6. (a) Dapre Psonm 110:3, ki kalite ladorasyon ki fer plezir Zeova? (b) Ki nou pou aprezan egzaminen?
6 Anmezir ki ou grandi, Zeova i anvi ou ‘konpran son lavolonte, sa ki bon, sa ki fer li plezir, sa ki parfe,’ zis parey Timote ti fer. (Rom. 12:2) Si ou fer sa, ou pou asiste e partisip dan bann aktivite kongregasyon pa akoz i fer ou paran plezir, me akoz ou anvi fer lavolonte Zeova. I pou fer Zeova kontan si ou servi li volonterman. (Ps. 110:3) Dan ki fason alor, ou kapab demontre ki ou anvi ogmant ou dezir pour ekout Zeova e swiv son gidans? Nou pou egzamin trwa fason enportan: letid Labib, lapriyer ek en bon konportman. Annou egzamin zot enn par enn.
Konn Zeova konman en personnaz reel
7. (a) Ki legzanp Zezi in kite pour nou? (b) Kwa ki ti ed li konpran e devlop en lapresyasyon pour Lekritir?
7 Premye fason pour montre ki ou anvi fer ou dezir pour servi Zeova vin pli for i par lir Labib tou le zour. Letan ou fer sa regilyerman, ou pou kapab satisfer ou bezwen spirityel e konpran Labib pli byen. (Mat. 5:3) Zezi in donn nou en legzanp. En fwa letan i ti annan 12 an, son paran ti trouv li dan tanp “pe asize parmi bann profeser, i ti pe ekout zot e kestyonn zot.” (Lik 2:44-46) Depi ki i ti ankor zanfan, Zezi ti konpran e devlop en lapresyasyon pour Lekritir. Kwa ki ti ed li pour fer sa? San dout son manman, Mari ek son papa adoptif, Zozef, ti zwe en rol enportan. Zot ti bann serviter Bondye ki ti ansenny Zezi lo Bondye depi ki i ti ankor en pti zanfan.—Mat. 1:18-20; Lik 2:41, 51.
8. (a) Kan ki bann paran i merit konmans ansenny zot zanfan Parol Bondye? (b) Donn en legzanp ki montre valer pour ansenny zanfan depi ki zot ankor byen ptipti.
8 Pareyman ozordi, bann paran ki annan lakrent pour Zeova i realiz valer ki ansenny zot zanfan i annan, par ed zot devlop lanmour pour Parol Bondye depi ki zot ankor pti pti. (Det. 6:6-9) Rubi, en ser Kretyen, ti fer sa avek son premye garson, Zozef, zis apre ki i ti’n ne. Tou le zour i ti lir en zistwar avek li dan Mon liv zistwar Labib. Anmezir i ti pe grandi, i ti ed li pour mazin plizyer verse Labib. Eski sa ti benefisye Zozef? Zis apre ki i ti’n konmans koze, i ti kapab rakont plizyer zistwar Labib dan son prop mo. Kan i ti annan zis senk an, i ti fer son premye size dan Lekol Minister Teokratik.
9. Akoz i enportan pour lir Labib e medit lo sa ki ou lir?
9 Pour ou kontinyen progrese spirityelman, zenn, ou bezwen fer li en labitid pour ou lir Labib tou le zour tou dilon ou lavi. (Ps. 71:17) Akoz lektir Labib pou ed ou progrese spirityelman? Get sa ki Zezi ti dir avek son Papa dan en lapriyer: “Ou’n donn li pouvwar lo tou dimoun pour donn lavi eternel tou bann ki ou’n donn li. Savedir ki zot konn ou konman sel vre Bondye, ek Zezi-Kri ki ou’n anvoye.” (Zan 17:2, 3) Anmezir ou aprann konn Zeova, i pou sirman vin en personnaz reel pour ou e ou lanmour pour li pou vin pli for. (Ebr. 11:27) Alor, sak fwa ou lir Labib, servi sa loportinite pour aprann plis lo Zeova. Demann ou lekor: ‘Ki sa resi i fer mwan aprann lo Zeova konman en personnaz? Ki mannyer sa resi i montre mwan ki Zeova i kontan e enterese avek mwan?’ Ou pou aprann ki mannyer Zeova i panse, santi e osi sa ki i anvi ou fer, si ou pran letan pour medit lo sa bann kestyon. (Lir Proverb 2:1-5.) Parey Timote kan i ti ankor zenn, ou osi ou pou “vreman krwar” sa ki ou aprann dan Labib e sa pou fer ou anvi ador Zeova volonterman avek tou ou leker.—2 Tim. 3:14.
Ki mannyer lapriyer i fer ou lanmour pour Zeova vin pli for?
10, 11. Ki mannyer lapriyer i ed ou pour ogmant ou dezir pour servi Bondye?
10 Dezyenm fason ki kapab ed ou ogmant ou dezir pour servi Zeova avek tou ou leker, i atraver ou lapriyer. Psonm 65:2 i dir: “Ou ki ekout lapriyer, tou kalite dimoun pou vin ver ou.” Menm dan letan ki nasyon Izrael ti ankor pep swazir Zeova, bann dimoun ki ti sorti dan en lot pei ti kapab al dan tanp e koz avek li dan lapriyer. (1 Rwa. 8:41, 42) Bondye pa fer okenn preferans. Bann ki obeir son bann konmannman i kapab annan sa lasirans ki Zeova pou ekout zot lapriyer. (Prov. 15:8) Sirman, “tou kalite dimoun” i enkli zot bann zenn.
11 Ou konnen ki pour annan en bon zanmi i depan lo en bon kominikasyon. Petet ou kontan partaz ou bann panse, lenkyetid, ek santiman avek en zanmi ki ou pli pros avek. Ou kapab koz avek ou Gran Kreater dan sa menm fason, par dir li tou sa ki lo ou leker. (Fili. 4:6, 7) Koz avek Zeova konmsi ou ti pe devid ou leker avek ou paran ki kontan ou bokou oubyen avek enn ou zanmi pros. An realite, fason ki nou fer lapriyer i relye tre pros avek nou santiman pour Zeova. Ou pou remarke ki pli ou vin pli pros avek Zeova, ou lapriyer pou fer plis sans.
12. (a) Kwa ki fer nou lapriyer fer plis sans? (b) Kwa ki pou ed ou realize ki Zeova i pros avek ou?
12 Alor, gard antet ki pa zis nou parol ki fer nou lapriyer fer sans, me osi nou santiman pli profon. Dan ou lapriyer, montre ki ou kontan e annan en profon respe pour Zeova, e ki ou met tou ou konfyans dan Li. Anmezir ki ou vwar lafason ki Zeova i reponn ou lapriyer, ou pou realize, plis ki avan ki “Zeova i pros avek tou bann ki kriy li.” (Ps. 145:18) Wi, Zeova pou apros avek ou, i pou donn ou lafors pour ou reziste kont Dyab e pour ou fer bann bon swa dan lavi.—Lir Zak 4:7, 8.
13. (a) Ki mannyer en bon relasyon avek Zeova ti ed en ser? (b) Ki mannyer en bon relasyon avek Bondye i kapab ed ou pour fer fas avek presyon zanmi?
13 Annou vwar legzanp Cherie. I ti annan en bon relasyon avek Zeova e sa ti donn li lafors. Letan i ti ankor pe lekol, i ti ganny en kantite pri akoz i ti fer byen dan laklas e i ti tre bon dan sport. Ler i ti fini lekol, i ti ganny ofer en labours kot i ti pou kapab ganny en ledikasyon pli avanse. Cherie ti dir: “Sa ti atir mwan. Mon bann antrener ek bann kanmarad lekol ti met en kantite presyon lo mwan pour mwan aksepte sa labours.” I ti kantmenm sa realize ki si i ti pourswiv en ledikasyon pli avanse, i ti pou bezwen pas tou son letan etidye e antrennen pour bann levennman sportif, alor pa ti pou reste li preski ditou letan pour servi Zeova. Ki Cherie ti fer? I ti dir: “Apre ki mon ti’n priy Zeova, mon ti refize pour aksepte sa labours e mon ti pran servis pionye ordiner.” I annan senk an depi ler i pe fer pionye. I dir: “Mon napa okenn regre. Mon kontan akoz mon konnen ki mon’n fer en desizyon ki fer Zeova plezir. I vre ki si ou met Rwayonm Bondye premye, ou pou ganny tou lezot keksoz.”—Mat. 6:33.
En bon konportman i montre ki ou annan en “leker pir”
14. Akoz en bon konportman i enportan dan lizye Zeova?
14 Trwazyenm fason ou kapab montre ki ou pe servi Zeova volonterman avek tou ou leker, i atraver ou konportman. Zeova i beni bann zenn ki reste moralman pir. (Lir Psonm 24:3-5.) Samyel dan son zenn tan, ti refize pour imit konportman imoral bann garson Gran Pret Eli. Son bon konportman ti ganny byen remarke. Labib i dir: “Pandan tou sa letan, ki i ti pe grandi, Samyel ti pe deplizanpli ganny apresye par Zeova e osi bann zonm.”—1 Sam. 2:26.
15. Donn serten rezon akoz ou gard en bon konportman.
15 Nou pe viv dan en lemonn ki ranpli avek bann dimoun egois, arogan, dezobeisan anver zot paran, engra, tret, kriyel, anfle avek lorgey, kontan plezir plis ki Bondye. Sa i zis detrwa keksoz ki Pol ti mansyonnen. (2 Tim. 3:1-5) Alors, i kapab vreman difisil pour ou gard en konportman egzanpler sirtou dan sa move lemonn ki nou pe viv ladan. Me, sak fwa ki ou fer sa ki byen e refize pour fer sa ki mal, ou prouve ki ou lo kote Zeova an sa ki konsern son drwa pour diriz liniver. (Zob 2:3, 4) Ou pou osi ganny satisfaksyon letan ou konnen ki ou pe azir an armorni avek sa ki Zeova pe demann ou avek bokou lanmour: “Vin saz, mon garson e rezwir mon leker, pour ki mon a kapab reponn sa enn ki pe provok mwan.” (Prov. 27:11) Deplis, letan ki ou konnen ki ou annan laprouvasyon Zeova, sa pou donn ou lafors pour ogmant ou dezir pour servi li.
16. Ki mannyer en ser ti fer leker Zeova rezwir?
16 En ser Kretyen ki apel Carol ti toultan swiv bann prensip Labib letan i ti dan segonder e lezot ti remark son bon konportman. Ki ti arive? Bann manrmay dan son laklas ti toultan sikann li akoz son konsyans ki’n ganny edike par Labib pa ti permet li partisip dan bann lafet ek seremoni patriyotik. Dan sa bann lokazyon, i ti ganny sans parfwa pour li eksplik son krwayans avek lezot. Plizyer lannen apre, Carol ti ganny en kart sorti kot en dimoun ki i ti lekol avek. Ladan i ti ekrir: “Mon’n toultan anvi kontakte ou pour remersi ou. Ou bon konportman e ou legzanp konman en zenn Kretyen e osi sa kouraz ki ou ti annan pour pa partisip dan bann lafet ti ganny byen remarke. Ou ti sa premye Temwen Zeova ki mon ti zwenn.” Legzanp Carol ti telman annan en gran lefe lo li, ki pli tar i ti konmans etidye Labib. Dan sa kart i ti dir Carol ki i annan 40 an depi ki i ti’n batize! Ozordi zot zenn, ki pe swiv bann prensip Labib avek kouraz, zot kapab motiv bann dimoun ki annan en leker senser pour aprann konn Zeova, zis parey Carol.
Bann zenn pe loue Zeova
17, 18. (a) Ki mannyer ou vwar bann zenn dan ou kongregasyon? b) Ki lavenir ki pe esper bann zenn ki annan lakrent pour Bondye?
17 Nou tou dan lorganizasyon mondyal Zeova, nou vreman kontan pour vwar plizyer milye zenn devoue ki pe partisip dan vre ladorasyon! Sa bann zenn in ogmant zot dezir pour ador Zeova par lir Labib tou le zour, fer lapriyer e konport zot dan en fason ki fer Zeova plezir. Sa bann zenn i en bon legzanp e zot en sours lankourazman pour zot paran e pour pep Zeova.—Prov. 23:24, 25.
18 Dan lavenir, bann zenn ki fidel pou parmi bann ki pou sirviv pour antre dan sa nouvo lemonn ki Bondye in promet. (Rev. 7:9, 14) Dan sa nouvo lemonn, zot pou ganny bokou benediksyon anmezir ki zot lapresyasyon pour Zeova i ogmante e zot pou kapab loue li pour touzour.—Ps. 148:12, 13.
[Eski ou kapab eksplike]
• Ki mannyer bann zenn ozordi i kapab partisip dan vre ladorasyon?
• Akoz i enportan pour ou medit lo sa ki ou lir dan Labib?
• Ki mannyer lapriyer i ed ou pou vin pli pros avek Zeova?
• Letan en Kretyen i annan en bon konportman, ki rezilta sa i anmennen?
[Kestyon]
[Portre lo paz 17]
Eski i ou labitid pour lir Labib tou le zour?