Ki Zezi ti ansennyen lo li?

“Zezi ti napa okenn dout konsernan lekel li, kote i sorti, akoz i ti vin dan lemonn e ki lavenir ti’n anmase pour li.”—EKRIVEN HERBERT LOCKYER.

AVAN nou aksepte e met lafwa dan sa bann keksoz ki Zezi ti ansennyen, nou bezwen konn en pe lo li. Lekel li Zezi? Kote i ti sorti? Ki ti son bi dan lavi? Dan Levanzil Matye, Mark, Lik ek Zan nou kapab ganny larepons dan parol ki Zezi li menm ti dir.

I ti egziste avan ki i ti ne lo later En zour Zezi ti dir: “Avan ki Abraam ti ne mon egziste.” (Zan 8:58) Abraam ti viv apepre 2,000 an avan nesans Zezi. Zezi ti vivan menm avan sa patrias fidel ti viv. Me kote Zezi ti ete? Zezi ti eksplike: “Mon’n sorti dan lesyel.”—Zan 6:38.

Garson Bondye Zeova i annan en kantite garson, sa i bann lanz dan lesyel, me par kont Zezi li i inik. Zezi li menm ti dir ki i sa “sel Garson Bondye.” (Zan 3:18) Sa lekspresyon i vedir ki zis Zezi ki’n ganny kree direkteman par Bondye. Sa sel Garson byenneme i sa enn atraver ki Bondye ti kree tou lezot keksoz.—Kolosyen 1:16.

“Fis-de-Lonm” Zezi ti servi sa lekspresyon plis ki tou lezot pour idantifye son lekor. (Matye 8:20) Alor i ti montre ki i pa ti en lanz ki ti’n pran en lekor fizik e i pa ti’n ni menm ganny reenkarnen. Me i ti plito en imen. Atraver lespri sen, Bondye ti transfer lavi son Garson dan vant Mari, en fiy ki ti vyerz lo later. Sa ti fer ki Zezi ti ne konman en imen parfe, san pese.—Matye 1:18; Lik 1:35; Zan 8:46.

Sa Mesi ki ti’n ganny promet En madanm Samariten ti dir avek Zezi: “Mon konnen ki Mesi pou vini.” Zezi ti reponn: “Mwanmenm li, mwan ki pe koz avek ou.” (Zan 4:25, 26) Sa mo “Mesi” parey sa mo “Kris” i vedir sa “Enn ki’n ganny swazir.” Zezi ti ganny swazir oubyen apwente par Bondye pour zwe en rol spesyal dan lakonplisman bann promes Bondye.

Son premye misyon En fwa Zezi ti dir: “Mon bezwen anons Bonn Nouvel konsernan Rwayonm Bondye . . ., parski se pour sa, ki Bondye in anvoy mwan.” (Lik 4:43) Menm si i ti fer en kantite dibyen pour bann dimoun ki ti dan bezwen, pres lo Rwayonm Bondye ti sa keksoz pli enportan pour li dan lavi. Nou pou diskit sa ki i ti ansennyen lo Rwayonm plitar.

I kler ki Zezi pa ti en zonm ordiner. * Parey nou pou vwar, vi ki i ti pe viv dan lesyel avan vin lo later, sa ki i ti dir ler i ti lo later ti fer plis sans. Eski i devret sirprann nou ki i ti pres en mesaz ki ti pou annan en lefe lo lavi plizyer milyon dimoun dan lemonn antye?

[Not anba lo paz]