Madanm, akoz soumet avek lotorite zot msye?
Madanm, akoz soumet avek lotorite zot msye?
“En mari i sef son madanm.”—1 KOR. 11:3.
1, 2. (a) Ki zapot Pol ti ekrir lo laranzman ki Zeova in etablir lo lotorite ek soumisyon? (b) Ki kestyon nou pou egzaminen dan sa lartik?
ZEOVA in etablir en prensip lo lotorite ki zapot Pol ti mansyonnen ler i ti ekrir ki “Kris i sef tou zonm” e ki “Bondye i sef Kris.” (1 Kor. 11:3) Sa lartik presedan ti fer resorti ki Zezi ti vwar li konman en privilez pour soumet avek son Sef, Zeova, i ti kontan pour fer li e bann msye Kretyen i annan Kris konman zot sef. Kris ti zantiy, dous, annan konpasyon e i pa ti azir dan en fason egois avek lezot dimoun. Bann msye dan kongregasyon i bezwen azir koumsa avek lezot, sirtou anver zot madanm.
2 Ki nou pou dir lo bann madanm? Lekel zot sef? Pol ti ekrir: “En mari i sef son madanm.” Ki mannyer en madanm i devret vwar sa parol dan Labib? Eski sa prensip i touzour aplikab ler en msye i pa en Temwen Zeova? Lefet ki en madanm i soumet avek lotorite son msye, eski sa i vedir ki i devret reste trankil, e i pa kapab donn son lopinyon ler i annan desizyon pour pran? Dan ki fason en madanm i ganny onore?
“Mon pou fer en led pour li”
3, 4. Akoz sa laranzman lo lotorite dan maryaz i enportan?
3 Sa laranzman lo lotorite in ganny etablir par Bondye. Apre ki Zeova ti kree Adan, i ti dir: “I pa bon pour en zonm reste li tousel. Mon pou fer en led pour li, enn ki pou al byen avek li.” Apre ki Ev ti ganny kree, Adan ti vreman kontan pour annan en konpanyon ek led ki i ti dir: “La la anfen lezo sorti dan mon lezo e laser sorti dan mon laser.” (Zen. 2:18-24) Adan ek Ev ti annan sa lespwar pour annan en lavenir merveye, zot ti pou vin papa ek manman tou laras imen ki ti pou parfe e ki ti pou viv pour touzour ere dan en paradi lo later antye.
4 Akoz rebelyon nou premye paran, zot ti perdi sa kondisyon parfe ki zot ti ladan dan zarden Edenn. (Lir Romen 5:12.) Me sa laranzman lo lotorite in touzour reste parey. Kan sa prensip i ganny byen aplike, i anmenn bokou byenfe ek boner dan maryaz. Bann dimoun ki aplik sa prensip i santi parey Zezi ti santi konsernan son soumisyon anver son Sef, Zeova. Pandan son legzistans dan lesyel, Zezi ti “toultan kontan devan” Zeova. (Prov. 8:30) Akoz lenperfeksyon, bann zonm nepli kapab vin bann sef fanmir parfe, ni bann madanm pa kapab demontre en soumisyon parfe. Ler msye ek madanm i kontinyen fer zefor pour fer zot mye pour swiv sa laranzman, se dan sa fason ki zot annan sa pli gran lakontantman dan zot lavi maryaz.
5. Akoz bann konzwen i devret pran aker sa konsey ki dan Romen 12:10?
5 Pour reisi dan zot lavi maryaz, sa de konzwen i bezwen swiv bann konsey Labib ki aplik pour tou Kretyen: “Annan en gran lafeksyon pour kanmarad parey bann frer, e setaki montre plis respe pour kanmarad.” (Rom. 12:10, nou ki’n met an italik.) Msye ek madanm i devret travay dir pour “vin bon, ranpli avek lafeksyon pour kanmarad; e pardonn kanmarad.”—Efe. 4:32.
Kan sa msye i pa en Temwen
6, 7. Ki rezilta i kapab annan si en madanm Kretyen i soumet avek son msye ki pa Temwen?
6 Me si par egzanp zot msye pa en serviter Zeova? Souvan i sa msye ki pa Temwen. Dan sa ka, ki mannyer sa madanm i devret tret li? Labib i reponn: “Zot bann madanm, soumet sakenn avek son msye, pour ki, par zot kondwit, si serten parmi zot msye pa obei parol Bondye, zot a kapab kanmenm aksepte lafwa san laparol. Sa bann zonm i a war ki zot kondwi zot dan en fason drwat e avek respe.”—1 Pyer 3:1, 2.
7 Parol Bondye i demann bann madanm pour toultan soumet avek zot msye ki pa Temwen. Kondwit sa madanm i kapab annan en lefe lo sa msye e fer li esey rode kwa ki’n motiv son madanm pour azir dan en bon fason. Sa i kapab fer sa msye egzamin krwayans son madanm Kretyen e finalman i kapab aksepte laverite.
8, 9. Ki en madanm Kretyen i kapab fer si son msye ki pa Temwen pa azir byen anver son bon kondwit?
8 Alor, ki nou pou dir si malgre zefor sa madanm Kretyen sa msye pa azir dan en bon fason? Labib i ankouraz bann madanm pour toultan demontre bann kalite Kretyen, kantmenm i kapab paret difisil. Par egzanp, nou lir dan 1 Korentyen 13:4: “Lanmour i pasyan.” I byen alor pour bann madanm Kretyen kontinyen demontre “limilite, ladouser ek pasyans” e “avek lanmour siport kanmarad.” (Efe. 4:2) Avek led lafors aktif Bondye, setadir son lespri sen, i posib pour kontinyen demontre bann kalite Kretyen menm dan bann sityasyon difisil.
9 Pol ti ekrir: “Mon kapab fer fas avek tou par Kris ki donn mwan lafors.” (Fili. 4:13) Lespri sen Bondye i permet bann konzwen Kretyen pour fer en kantite keksoz ki i pa ti pou posib pour zot fer otreman. Par egzanp, si en konzwen i ganny trete dan en fason dir sa i kapab fer li anvi rann laparey. Par kont, Labib i demann tou Kretyen pour: “Pa rann mal pour mal. . . . Akoz in ganny ekrir: ‘Mwan ki pou fer vanzans, Mwan ki pou fer peye.’” (Rom. 12:17-19) Pareyman, 1 Tesalonisyen 5:15 i konsey nou: “Fer atansyon ki personn pa rann mal pour mal, me dan tou lokazyon esey touzour fer dibyen kanmarad, ensi ki tou lezot dimoun.” Sa ki enposib pour fer avek nou prop lafors, pa enposib avek lespri sen Zeova. Pa i apropriye ki nou priy Bondye pour ganny led son lespri sen dan domenn kot nou bezwen!
10. Ki mannyer Zezi ti azir anver bann parol ek aksyon dezagreab lezot?
10 Zezi ti donn en legzanp remarkab dan fason ki i ti tret bann dimoun ki ti dir oubyen fer bann keksoz dezagreab anver li. Dan 1 Pyer 2:23, i dir: “Kan zot ti ensilte li, i pa ti reponn par lensilt. Dan son soufrans, i pa’n fer okenn menas; me i ti met tou dan lanmen Bondye ki rann lazistis.” Nou ganny ankouraze pour swiv son bon legzanp. Pa les move latitid lezot enfliyans nou pour rann laparey. Tou Kretyen i ganny konseye pour, “annan konpasyon pour kanmarad e viv avek limilite. Pa rann lemal pour lemal, ni lensilt pour lensilt.”—1 Pyer 3:8, 9.
Eski sa i vedir ki bann madanm Kretyen pa devret koze?
11. Ki sa gran privilez serten madanm Kretyen pou gannyen?
11 Eski en madanm ki soumet avek lotorite son msye pa devret koze, i pa merit donn son lopinyon lo bann keksoz ki konsern lavi fanmir oubyen lezot size? Pa ditou. Msye ensi byen ki madanm in ganny en kantite privilez avek Zeova. Zis mazin sa gran privilez ki sa 144,000 dimoun pou annan konman lerwa ek pret dan lesyel anba lotorite Kris ler i pou domin lo sa later. Bann madanm i osi ganny enkli dan sa sif. (Gal. 3:26-29) I evidan ki Zeova in donn bann madanm en gran rol pour zwe dan son laranzman.
12, 13. Donn en legzanp pour montre ki madanm i profetize.
12 Par egzanp, dan letan ki Labib ti ganny ekrir bann madanm ti profetize. Yoel 2:28, 29 ti predir: “Mon pou vers mon lespri lo tou dimoun, e zot bann garson ek zot bann fiy pou profetize. . . . Dan sa letan mon pou devid mon lespri menm lo bann serviter, zonm konman fanm.”
13 Apepre 120 disip Zezi ti’n rasanble anler dan en lasanm Zerizalenm zour Lapannkot lannen 33 Nou Lepok e sa ti enkli bann madanm osi byen ki bann msye. Bondye ti devers son lespri sen lo tou sa bann dimoun. Alor Pyer ti kapab sit sa parol ki profet Yoel ti predir e aplik sa parol avek bann msye ek madanm osi. Pyer ti dir: “La sa ki Profet Zoel in dir: ‘Bondye in dir, dan lepok avan lafen, mon pou vers mon Lespri lo tou dimoun. Zot bann garson ek zot fiy pou profetize. . . . Menm lo mon bann serviter, zonm konman fanm, mon pou devid mon Lespri lo zot sa zour, e zot pou profetize.’”—Akt 2:16-18.
14. Ki rol bann madanm ti zwe pour propaz lansennyman Kretyen dan premye syek?
14 Dan premye syek, bann madanm ti zwe en rol enportan pour propaz lansennyman Kretyen. Zot ti pres avek lezot lo Rwayonm Bondye e fer bann keksoz ki ti relye avek sa travay predikasyon. (Lik 8:1-3) Par egzanp, zapot Pol ti dir ki Febe i en “ser ki travay konman en dyakones [oubyen “minis,” NW]” dan kongregasyon Sankre. Ler i ti pe anvoy salitasyon pour son bann konpanyon, Pol ti mansyonn serten sa bann madanm fidel, enkli parmi i “Trifenn ek Trifoz ki [ti] pe travay pour Senyer.” I ti osi mansyonn son “zanmi Persid ki’n travay” pour Senyer.—Rom. 16:1, 12.
15. Ki rol bann madanm Kretyen i zwe pour propaz lansennyman Kretyen dan nou letan?
15 Dan nou letan, en bon pe dan sa set milyon dimoun ki pe pres sa bon nouvel lo Rwayonm Bondye dan lemonn antye i bann madanm ki annan laz diferan. (Mat. 24:14) En kantite parmi zot i serviter a plen tan, misyonner, e manm fanmir Betel. Psalmis David ti sante: “Zeova li menm i dir sa parol; bann madanm ki pe anons sa bon nouvel i en gran larme.” (Ps. 68:11) Pa sa bann parol in vin vre! Zeova i apresye rol ki bann madanm i zwe pour anons sa bon nouvel e akonplir son plan. Lefet ki i demann bann madanm Kretyen pour demontre soumisyon, sirman sa pa vedir ki zot pa devret koze.
De madanm ki ti koze
16, 17. Ki mannyer legzanp Sara i montre ki bann madanm i kapab koze dan maryaz?
16 Si Zeova i donn bann madanm en kantite privilez, pa bann msye i devret diskit avek zot madanm avan pran bann desizyon enportan? I ti pou saz lo zot par pour fer sa. Parol Bondye i mansyonn detrwa lensidan kot bann madanm ti koze oubyen azir, menm kan zot msye pa ti demann zot zot pwennvi. Annou egzamin de ka.
17 Sara, madanm patrias Abraam ti kontinyen dir li pous sa lot madanm ek son garson akoz zot ti napa respe pour li. “Sa pa ti fer plezir Abraam ditou.” Me Zeova ti annan en lot pwennvi, i ti dir avek Abraam: “Pa mekontan akoz sa ki Sara pe kontinyen dir ou lo sa garson ek ou lesklav. Ekout son lavwa.” (Zen. 21:8-12) Abraam ti obeir Zeova, i ti ekout Sara e fer sa ki i ti demann li.
18. Ki linisyativ Abigail ti pran?
18 Mazin osi Abigail, madanm Nabal. Ler David ti sove akoz zalouzi Lerwa Sail, i ti reste pour detrwa letan pa tro lwen avek troupo Nabal. Olye pran okenn keksoz ki sa zonm ris ti posede, David ek son bann zonm ti protez son bann zannimo. Me, Nabal “ti dir e azir dan en move fason” e i ti maltret bann zonm David. I ti en “zonm bon nanryen.” Ler bann zonm David ti demann li dan en fason respektab serten provizyon, Nabal ti refize. Ki mannyer Abigail ti reakte kan i ti tann sa ki ti’n arive? San dir Nabal nanryen, “vitman i ti pran de san bar dipen, de gran potis diven, senk mouton ki’n fini ganny prepare ek senk mezir lagrenn roti, san gato rezen ek de san gato fig plat” e i ti donn tousala David ek son bann zonm. Eski Abigail ti’n byen fer? Labib i dir ki “Zeova ti frap Nabal, e i ti mor.” Pli tar David ti marye avek Abigail.—1 Sam. 25:3, 14-19, 23-25, 38-42.
‘Sa madanm ki ganny felisite’
19, 20. Kwa ki fer en madanm vreman merit felisitasyon?
19 Labib i felisit bann madanm ki fer keksoz lafason ki Zeova i oule. Liv Proverb i felisit “en madanm debrouyer,” an dizan: “I annan plis valer ki koray. Son msye i annan konfyans dan li, e nanryen pa manke. Tou dilon son lavi i’n rekonpans li avek sa ki bon, e pa sa ki mal.” Deplis, “i’n ouver son labous avek lasazes, e lalwa labonte leker i lo son lalang. I pe vey lo sa ki pe pase dan son lakour, e i pa manz dipen lapares. Son bann garson in leve e zot in deklar li ere; son msye in leve, e i’n felisit li.”—Prov. 31:10-12, 26-28.
20 Kwa ki fer ki en madanm i vreman merit felisitasyon? Proverb 31:30 i dir: “Laparans i kapab tronpe, e labote i kapab anven, me sa madanm ki annan lakrent pour Zeova i sa enn ki ganny felisite.” Pour annan lakrent pour Zeova nou bezwen soumet volonterman avek sa laranzman ki Zeova in etablir lo lotorite. “En mari i sef son madanm,” zis parey “Kris i sef tou zonm,” e “Bondye i sef Kris.”—1 Kor. 11:3.
Annan rekonesans pour kado Bondye
21, 22. (a) Pour ki rezon bann Kretyen ki’n marye i devret annan rekonesans pour maryaz sa kado sorti kot Bondye? (b) Akoz nou devret demontre respe pour laranzman ki Zeova in etablir lo lotorite ek soumisyon? (Vwar sa bwat anler.)
21 Pa bann Kretyen ki’n marye i annan en kantite rezon pour eksprim zot rekonesans anver Bondye! Zot kapab mars lanmen dan lanmen konman en koup ere. Sirtou zot kapab remersye Bondye pour maryaz ki en kado e osi en benediksyon akoz i donn zot sa loportinite pour viv zot lavi ini ansanm e mars avek Zeova. (Rit 1:9; Mik. 6:8) Zeova, Loter maryaz, i konn egzakteman kwa ki neseser pour ki en maryaz i ere. Toultan fer keksoz dan fason ki i oule, e ‘lazwa ki sorti kot Zeova pou vin zot lafors,’ menm dan sa lemonn difisil ozordi.—Nee. 8:10.
22 En msye Kretyen ki kontan son madanm parey i kontan son prop lekor pou dous, e egzers son lotorite par demontre konsiderasyon anver son madanm. Son madanm Kretyen pou vreman demontre lanmour, akoz i pou siport li e annan en gran respe pour li. Pli enportan ankor, zot legzanp konman en koup marye pou onor sa enn ki merit ganny loue, Zeova.
Eski ou rapel?
• Ki laranzman Zeova in etablir lo lotorite ek soumisyon?
• Akoz bann dimoun ki’n marye i devret respekte kanmarad?
• Ki mannyer en madanm Kretyen i devret tret son msye ki pa Temwen?
• Akoz bann msye i devret diskit avek zot madanm avan pran bann desizyon serye?
[Kestyon]
[Bwat lo paz 22]
Akoz nou bezwen respekte lotorite?
Parmi bann lanz ek imen, Zeova in fer laranzman pour etabli lotorite ek gidans. I’n fer sa pour zot byennet. Sa i donn zot loportinite pour servi zot liberte pour swazir e onor Bondye par servi li dan linite ek larmoni.—Ps. 133:1.
Kongregasyon Kretyen swazir i rekonnet lotorite ek gidans Zezi Kri. (Efe. 1:22, 23) Vi ki i rekonnet lotorite Zeova, finalman “Garson limenm, i a soumet son lekor avek sa enn ki’n soumet tou keksoz avek li, e alor Bondye i ava tou pour tou dimoun.” (1 Kor. 15:27, 28) I pa drol alor ki bann imen ki’n dedye zot lavi avek Bondye i korpere anba gidans Kris dan kongregasyon e dan lafanmir! (1 Kor. 11:3; Ebr. 13:17) Kan nou fer sa, nou vin parmi sa bann ki ganny laprouvasyon Zeova ek son benediksyon.—Iza. 48:17.
[Portre lo paz 19]
Lapriyer i kapab ed en madanm Kretyen pour demontre bann kalite Kretyen