Respekte bann dimoun aze

SA PYE dibwa ki dimoun in tir plis son portre dan lemonn i ganny trouve lo lakot Kaliforni. Dimoun i konn sa pye dibwa konman Lone Cypress. Dapre lenformasyon i annan plis ki 250 an. I renonmen pour son landirans. Dimoun in pran swen avek sa zoli pye dibwa dan diferan fason. Par egzanp pour anpes li tonbe, i’n ganny anmare avek lakord e i annan bann ros toultour li.

Sa pye i kapab fer nou rapel bann Kretyen aze parmi nou, ki montre en landirans remarkab. En fason ekstraordiner ki zot fer sa i ler zot anons sa bon nouvel. Profet Zoel ti predir ki “bann vyeyar” pou anons sa mesaz Labib. (Yoel 2:28-32; Akt 2:16-21) Zis mazin sa kantite erdtan ek zefor ki zot depanse pour ed lezot aprann konsernan sa “Bonn nouvel Rwayonm”! (Mat. 24:14) Serten sa bann proklanmater aze in andir persekisyon oubyen difikilte pour plizyer lannen. Si dimoun i remark en pye cypress pour son landirans e zot fer sa pye vin pli solid par soutenir li avek bann lakord ek ros, pa nou merit rekonnet plis ankor bann Kretyen aze parmi nou e tret zot avek respe ek dinyite!

Zeova ti donn lord son pep dan letan pase an dizan: “Devan bann seve blan ou devret leve, e ou merit montre konsiderasyon pour en vye dimoun.” (Lev. 19:32) Parmi bann serviter Zeova ozordi, nou annan legzanp bann serviter fidel ki’n ‘mars avek Bondye’ pour plizyer dizenn lannen. (Mik. 6:8) Anmezir ki zot kontinyen aplik bann prensip Labib, zot seve blan i vreman vin “en kouronn labote.”—Prov. 16:31.

Zapot Pol ti ansenny zenn Timote: “Pa bezwen koz dir avek en vyeyar.” O kontrer Timote ti devret ‘koz avek li konmsi i pe koz avek son papa’ e ‘bann vye madanm konman son manman.’ (1 Tim. 5:1, 2) Annefe, Timote ti devret “leve” devan bann seve blan. I kler alor ki Zeova i oule ki nou demontre respe pour zot osi dan lafason ki nou koze.

 Romen 12:10 i dir: “Setaki montre plis respe pour kanmarad.” Sirman bann ansyen dan kongregasyon i demontre respe anver bann Kretyen aze. Me nou tou nou devret montre respe pour kanmarad.

Byensir, bann manm fanmir i annan en responsabilite enportan anver zot paran ek gran paran. Dan ka sa pye Lone Cypress, dimoun in rod diferan fason pour ede prezerv sa pye e zot kontinyen fer li. Sirman alor nou devret rod fason pour prezerv dinyite nou bann paran ek gran paran aze. Par egzanp, ler nou ekout zot byen nou pa pou ensiste pour fer keksoz dan nou fason san pran an konsiderasyon zot santiman.—Prov. 23:22; 1 Tim. 5:4.

Bann dimoun aze parmi nou i vreman presye pour Zeova. I pa pou abandonn zot. (Ps. 71:18) Sa vre Bondye pou vreman fortifye zot pour ki zot kontinyen servi li fidelman. Annou kontinyen siport e respekte bann ki aze.

[Portre lo paz 13]

Zis parey sa pye Lone Cypress i bezwen sipor, bann dimoun aze i bezwen ganny trete avek respe ek dinyite