Sa zonm ki’n sanz lemonn

Lo sa later, plizyer bilyon dimoun in viv e mor. Laplipar sa bann dimoun pa’n arive fer nanryen ekstraordiner pour nou rapel zot. Par kont, i annan en pti minorite ki’n annan en lefe dirab lo listwar imen e petet menm lo ou lavi tou le zour.

BOMATEN ou leve pour prepar ou pour al travay e pandan ki ou fer sa, ou alim lalimyer. Ou pran en liv oubyen magazin pour ou lir dan bis. Ou mazinen pour pran ou antibyotik ki dokter in donn ou pour konbat en lenfeksyon. Ou lazournen pa ankor ni menm konmanse e deza ou’n benefisye avek sa ki serten zonm remarkab in envante.

Michael Faraday I ti ne an 1791. I ti en syantis Angle ki ti envant masin elektrik ek dinanmo. Son dekouvert ti fer ki dimoun ti kapab ganny akse avek elektrisite.

Ts’ai Lun En zofisye dan lakour rwayal Lasin ki ti renonmen pour amelyor lafason ki papye i ganny prodwir apepre lannen 105 Nou Lepok e sa ti fer li posib pour prodwir papye par gran kantite.

Johannes Gutenberg Ver lannen 1450, i ti envant premye masin pour enprimen. I ti kout pli bonmarse pour enprimen avek sa masin e sa ti alor fer ki en kantite lenformasyon baze lo en gran varyete topik ti kapab ganny propaze.

Alexander Fleming An 1928, sa serser ki sorti Lekos ti dekouver en antibyotik ki i ti apel penisilin. Antibyotik i aprezan ganny servi partou dan lemonn pour tret lenfeksyon koze par bakteri.

Nou dakor ki sa bann dekouvert ek lenvansyon ki sa pti minorite dimoun in fer i permet plizyer bilyon dimoun benefisye oubyen ganny en bon lasante.

Me i annan en zonm ki vreman diferan parmi tou sa bann. I pa renonmen pour okenn dekouvert syantifik oubyen medikal. Me sa zonm ki ti mor preski 2,000 an pase ti sorti dan en fanmir ordiner e i’n kit deryer en mesaz pwisan ranpli avek lespwar e vreman rekonfortan. Kan nou kalkil sa kantite lefe ki son mesaz in annan lo lavi bann dimoun partou dan lemonn, laplipar dimoun pou dakor ki i sa zonm ki’n enfliyans lemonn dan en fason remarkab.

Sa zonm i Zezi Kri. Ki mesaz i ti prese e ki lefe son mesaz i kapab annan lo ou lavi?