Fer fas si ou konzwen in trai ou

MARGARITA ek son msye Raúl zot tou le de zot ti servi Zeova konman serviter a plen tan pour plizyer lannen. * Me en pti pe letan apre nesans zot premye zanfan, Raúl ti konmans elwannyen avek Zeova. Finalman, Raúl ti konmans viv en lavi imoral e i ti ganny ekskli dan kongregasyon Kretyen. Margarita i dir: “Kan tousala ti arive, mon ti krwar ki mon ti pou mor. Mon leker ti fermal e mon pa ti konnen ki mon pou fer.”

Pa tro lontan apre ki Jane ti’n marye, son msye ti trai li e sa ti fer li perdi konfyans ek lafeksyon ki i ti annan pour son msye. Son msye ti konmans abiz li fizikman. Jane i dir: “Premye fwa ki i ti tap mwan en koudpwen, mon ti vreman soke, anbarase e santi mon imilye. Sa ti vin en labitid, i ti bat mwan apre i ti sipliy mwan pour pardonn li. Mon ti krwar ki i ti mon devwar konman en Kretyen pour touzour pardonnen e oubliye. Mon ti osi krwar ki si mon ti rakont nou problenm avek en lot dimoun, menm avek en ansyen dan nou kongregasyon, sa ti pou montre ki mon pa ti fidel anver li. Sa labitid kot i ti bat mwan e apre demann pardonn ti kontinyen pour plizyer lannen. Tou sa letan mon ti krwar ki i bezwen annan en keksoz ki mon ti kapab fer pour fer mon msye kontan mwan. Finalman, kan i ti kit mwan ek nou fiy, mon ti santi  konmsi mon ti’n fel e ki mon ti’n devret fer plis oubyen kominik plis pour ki nou maryaz pa kase.”

Parey Margarita ek Jane, kekfwa ou pe soufer emosyonnelman, spirityelman oubyen ou annan problenm finansyel akoz ou msye in trai ou. Oubyen kekfwa ou en msye ki pe soufer emosyonnelman akoz ou madanm pa’n fidel avek ou. Definitivman nou pe viv dan bann “letan difisil” parey Labib in predir. Sa profesi i endike ki dan “bann dernyen zour,” bann fanmir pou rankontre difikilte akoz dan bokou ka i pou napa preski ditou lafeksyon natirel. Serten pou dir zot servi Bondye me zot pou fer tou lekontrer. (2 Tim. 3:1-5) Bann vre Kretyen osi i eksperyans sa bann kalite problenm, alor si ou konzwen in trai ou, kwa ki pou kapab ed ou pour fer fas avek sa sityasyon?

Vwar ou lekor parey Zeova i vwar ou

Premye kou, petet ou pou vwar li difisil pour krwar ki en dimoun ki ou kontan ti pou kapab bles ou sa kantite. Ou menm kapab konmans blanm ou lekor pour move kondwit ou konzwen.

Zis mazinen, menm Zezi, sa zonm parfe ti ganny trai par en dimoun ki i ti kontan e annan konfyans ladan. Zezi ti swazir son bann konpanyon pli pros, andotmo, son bann zapot, apre ki i ti’n byen reflesir e priy lo sa size. Tou le 12 zapot ti bann serviter Zeova ki ti diny konfyans sa letan. Alor, san okenn dout Zezi ti sagrin en kantite ler Zida ti “trai” li. (Lik 6:12-16) Me Zeova pa ti kondann Zezi pour sa ki Zida ti fer.

I vre, napa personn ki parfe pour lemoman, alor i pa egziste en konzwen parfe. Msye ek madanm, tou le de i fer fot. Sa parol enspire ki en psalmis ti ekrir i vre: “Si ou ti vey bann fot, O Ya, O Zeova, lekel ki ti pou kapab debout devan ou?” (Ps. 130:3) Pour kapab imit Zeova, tou le de konzwen i devret pare pour pardonn lenperfeksyon kanmarad.—1 Pyer 4:8.

Me par kont, “sakenn antre nou pou bezwen rann kont devan Bondye pour son prop lekor.” (Rom. 14:12) Si en konzwen i devlop sa labitid pour dir bann parol obsenn oubyen abiz son konzwen fizikman, li ki koupab e i pou bezwen rann kont pour son aksyon devan Zeova. Zeova i kondann vyolans ek bann dimoun ki servi parol obsenn, alor i napa okenn leskiz ki valab pour tret en konzwen dan en tel fason ki montre en mank lanmour ek respe. (Ps. 11:5; Efe. 5:33; Kol. 3:6-8) Anfet, si en Kretyen i kontinyen napa kontrol lo son lakoler e i pa sanz son latitid, i merit ganny ekskli dan kongregasyon Kretyen. (Gal. 5:19-21; 2 Zan 9, 10) En dimoun marye pa devret santi li koupab si i raport move kondwit son konzwen avek bann ansyen. Byensir, Zeova i annan konpasyon pour bann viktim ki ganny maltrete.

Kan en konzwen i komet adilter, i pa pe zis fer pese kont son konzwen me osi kont Zeova. (Mat. 19:4-9; Ebr. 13:4) Si sa konzwen inosan in fer bokou zefor pour viv dapre prensip Labib, alor i pa bezwen santi li koupab akoz move kondwit son konzwen ki’n komet adilter.

Pa bliye ki Zeova i konnen ki mannyer ou santi. I dekrir son lekor konman propriyeter nasyon Izrael e dan son Parol i annan en kantite verse vreman tousan ki eksprim son sagrinasyon lefet ki sa nasyon ti komet adilter dan en sans spirityel. (Iza. 54:5, 6; Zer. 3:1, 6-10) Si ou konzwen in trai ou, ou kapab asire ki Zeova i vwar larm ki ou verse. (Mal. 2:13, 14) I konnen ki ou bezwen rekonfor ek lankourazman.

Dan ki fason Zeova i donn konsolasyon

Zeova i servi kongregasyon Kretyen konman en mwayen pour konsol son bann serviter. Jane ti ganny sa kalite sipor. Jane i rapel: “Sirveyan rezyonal ti vin vizit mwan sa mo man kot mon moral ti vreman ba. I ti konnen ki mon ti vreman tris lefet ki mon msye ti pe fer bann prosedir pour nou divorse. I ti pran letan pour ed mwan rezonn lo bann verse parey 1 Korentyen 7:15. Sa bann verse Labib ek bann parol rekonfortan ki i ti dir ti ed mwan pour mwan pa santi mwan koupab e sa ti donn mwan lape lespri.” *

Margarita, sa ser ki’n ganny mansyonnen o konmansman sa lartik, li osi i ti aprann ki Zeova i servi kongregasyon Kretyen pour ed son bann serviter dan en fason pratik. Margarita i dir: “Ler mon ti remarke ki mon msye pa ti’n repantir, mon ti pran mon bann zanfan e mon ti al reste dan en lot lavil. Ler mon ti ariv laba, mon ti nobou trouv de lasanm pour lwe. Son lannmen, avek bokou latristes mon ti pe tir bann zafer dan sak ler mon ti tann tap laport. Mon ti pe ekspekte vwar propriyeter sa landrwa akoz sa madanm ti reste zis akote. Mon ti sirprann akoz i pa ti sa madanm, me i ti sa ser ki ti fer letid mon manman e ki ti ed mon fanmir konn laverite. I pa ti pe ekspekte vwar mwan me i ti’n vin kot sa lakaz akoz i ti pe fer letid Labib avek propriyeter sa landrwa. Mon ti santi mwan soulaze e mon pa ti kapab kontrol mon lemosyon. Mon ti eksplik li mon problenm e nou tou le de nou ti plere. Deswit i ti fer laranzman pour nou asiste renyon sa zour menm. Sa kongregasyon ti byen akeyir nou e bann ansyen ti fer bann laranzman pratik pour ed mwan pran swen avek bezwen spirityel mon fanmir.”

Dan ki fason lezot i kapab ede

Byensir bann frer ek ser dan kongregasyon Kretyen i kapab donn led pratik dan diferan fason. Par egzanp, aprezan Margarita ti pou bezwen rod en travay. En fanmir dan kongregasyon ti ofer pour okip son bann zanfan apre lekol kan i ti pou bezwen zot led.

Margarita i dir: “Sa ki mon vreman apresye i ler bann frer ek ser i ofer pour akonpanny mwan ek mon bann zanfan dan predikasyon.” Sa bann kalite led pratik ki bann frer ek ser i donn lezot dan kongregasyon i ede pour “anmenn fardo kanmarad” e ler zot fer sa zot pe akonplir “lalwa Kris.”—Gal. 6:2.

Sa bann ki pe soufer akoz pese ki lezot in komet, i vreman apresye sa kalite led. Msye Monique ti kit li avek en det apepre 155,000 roupi ek kat zanfan pour okipe. Monique i dir: “Mon bann frer ek ser spirityel ti vreman demontre lanmour. Mon pa konnen ki mannyer mon ti pou fer fas avek sa sityasyon san zot sipor. Mon santi ki Zeova ti servi bann frer ek ser vreman remarkab pour ed mwan e zot  ti fer bokou pour mon bann zanfan. Avek led ki mon ti gannyen mon’n annan sa plezir pour vwar mon bann zanfan vin matir spirityelman. Kan mon ti bezwen konsey, bann ansyen ti ed mwan. Kan mon ti bezwen en dimoun pour koze, zot ti la pour ekoute.”—Mark 10:29, 30.

Byensir en bon zanmi i konnen kan ki i pa lemoman pour koz lo en move leksperyans ki son zanmi in pas atraver. (Ekle. 3:7) Margarita i dir: “Laplipar ditan mon kontan koz avek bann ser dan mon nouvo kongregasyon konsernan predikasyon, nou bann letid Labib ek nou zanfan, anfet lo nenport keksoz eksepte mon problenm. Mon apresye ki zot pa relev sa ki’n pase e ki zot in ed mwan pour refer mon lavi.”

Reziste kont sa dezir pour revanze

Parler, olye santi ou koupab pour pese ki ou konzwen in komet, ou kapab santi ou ankoler ki ou pe soufer en kantite akoz son fot. Si ou les sa santiman devlope, sa pou fer ou annan mwens determinasyon pour reste fidel avek Zeova. Par egzanp, petet ou pou anvi rod fason pour fer peye ou konzwen ki’n tronp ou.

Si ou remarke ki en tel santiman pe devlope dan ou, ou kapab reflesir lo legzanp Zozye ek Kaleb. Sa bann zonm fidel ti riske zot lavi pour espyonn Later Promiz. Lezot espyon ti napa ase lafwa e zot ti fer lepep dezobeir Zeova. Serten Izraelit ti menm oule saboul Zozye ek Kaleb avek ros ler zot ti pe esey ankouraz sa nasyon pour reste fidel. (Nom. 13:25–14:10) Pour fini kont, Zozye ek Kaleb ti bezwen pas 40 an ale vini dan dezer akoz aksyon bann Izraelit, menm si sa pa ti zot lafot me lafot lezot.

Menm si petet Zozye ek Kaleb ti dezapwente, zot pa ti vin anmer akoz pese zot bann frer. Zot ti konsantre lo ki mannyer pour gard zot lekilib spirityel. A lafen sa 40 an dan dezer, Kaleb ek Zozye ansanm avek bann Levit ti ganny rekonpanse ler zot ti ganny sove ansanm avek sa zenerasyon ki ti ganny permet pour antre dan Later Promiz.—Nom. 14:28-30; Zoz. 14:6-12.

Ou kapab soufer pour en kantite letan akoz ou konzwen pa’n fidel avek ou. Zot kapab divorse, e petet apre ou pou soufer emosyonnelman e fer fas avek bann difikilte finansyel. Me, olye ki les sa sityasyon dekouraz ou, mazinen ki Zeova i konn pli byen ki mannyer pour azir anver bann dimoun ki’n volonterman rezet son bann standar, zis parey bann Izraelit enfidel dan dezer ti dekouver pour zot menm.—Ebr. 10:30, 31; 13:4.

Ou kapab fer fas

Olye les bann panse negatif fer ou dekouraze, ranpli ou lespri avek bann panse Zeova. Jane i dir: “Mon’n vwar ki ler mon ekout bann lanrezistreman Latour Veyer ek Awake! sa in ed mwan pour fer fas avek mon problenm. Mon ti osi ganny lafors atraver bann renyon. Ler mon ti partisipe dan renyon, sa ti fer mwan oubliy mon problenm. Predikasyon in ed mwan dan menm fason. Ler mon ed lezot pour devlop lafwa dan Zeova, mon ranforsi mon prop lafwa. Ler mon pran swen avek bann etidyan Labib, sa i ed mwan pour reste konsantre lo bann keksoz pli enportan.”

Monique, sa ser ki nou’n mansyonnen pli boner dan sa lartik i dir: “Par asiste renyon regilyerman e partisip dan predikasyon osi souvan ki mon kapab, sa i ed mwan andire. Mon fanmir in vin pli pros avek kanmarad e avek kongregasyon. Mon difikilte in ed mwan rekonnet mon prop febles. Mon’n ganny teste, me Zeova in ed mwan pour fer fas.”

Ou osi ou pou kapab fer fas si ou rankontre menm kalite leprev. Malgre sa soufrans emosyonnel ki en traizon i kapab anmennen, fer bokou zefor pour swiv konsey zapot Pol: “Annou pa aret fer sa ki byen, parski nou pou rekolte kan letan i a’n arive, si nou pa arete.”—Gal. 6:9.

[Not anba lo paz]

[Portre lo paz 31]

Bann konzwen ki’n ganny abandonnen i apresye ler nou ed zot dan predikasyon