Kontinyen “domin lemal” par kontrol ou lakoler
Kontinyen “domin lemal” par kontrol ou lakoler
“Byenneme, pa vanze, . . . me okontrer zot domin lemal par sa ki byen.”—ROM. 12:19, 21.
1, 2. Ki bon legzanp serten Temwen ki ti pe vwayaze in kite?
EN GROUP trannkat Temwen Zeova ti pe vwayaze pour al dedikasyon en biro brans kan zot vol ti ganny retarde akoz en problenm teknik. Zot ti aret lo en erport kot zot ti’n sipoze esper pour enn erdtan pour ki avyon i met bennzin, me finalman zot ti bezwen reste karannkat erdtan lo en erport kot ti napa ni manze ek delo e twalet ti sal. Bokou pasaze ti ankoler e menas bann travayer lo sa erport. Me bann frer ek ser zot, zot ti reste kalm.
2 Finalman, sa 34 Temwen ti ariv kot zot destinasyon zis atan pour antann dernyen parti sa progranm pour dedikasyon. Menm si zot ti fatige, zot ti reste apre pour pas letan avek bann frer ek ser dan sa landrwa. Pli tar zot ti aprann ki i ti annan dimoun ki ti’n obzerv zot pasyans ek bon konportman. En lot pasaze ti dir lakonpannyen sa avyon: “Si ti napa sa trannkat Kretyen lo sa vol, i ti pou’n annan en rayot lo erport.”
Nou pe viv dan en lemonn kot bokou i ankoler vitman
3, 4. (a) Ki mannyer e depi kan bann imen i annan lakoler vyolan? (b) Eski Kaen ti pou’n kapab kontrol son lakoler? Eksplike.
3 Presyon lavi dan sa move lemonn ki nou pe viv ladan i fer bokou dimoun ankoler. (Ekle. 7:7) Souvandfwa, sa lakoler i anmenn laenn e menm vyolans. Bann pei i lager antre zot oubyen dan en menm pei dimoun i lager. Presyon dan lafanmir i anmenn konfli dan bokou lakour. Depi byen byen lontan lakoler ek konfli in egziste. Kaen, premye garson Adan ek Ev, ti touy Abel son frer akoz son lakoler ek zalouzi. Kaen ti fer sa move aksyon menm si Zeova ti’n konsey li pour kontrol son santiman e promet ki i ti pou beni li si i ti fer li.—Lir Zenez 4:6-8. *
4 Menm si i ti enparfe, Kaen ti annan en swa. I ti’n kapab kontrol son lakoler. Se pour sa rezon ki i ti antyerman responsab pour son move aksyon. Pareyman, akoz nou lenperfeksyon, i kapab arive ki nou pran lakoler e mal azir. I osi annan lezot gro problenm ki met bokou presyon lo nou dan sa “letan difisil.” (2 Tim. 3:1) Par egzanp, problenm ekonomik i kapab met en kantite presyon lo nou santiman. Lapolis ek bann lorganizasyon ki ed bann fanmir i dir ki bann problenm ekonomik ek sa logmantasyon dan lakantite dimoun ki ankoler vitman e fer vyolans domestik, i mars ansanm.
5, 6. Ki latitid sa lemonn an rapor avek lakoler ki kapab annan lefe lo nou?
5 An plis ki sa, bokou dimoun ki nou zwenn i “egois” “arogan” e menm “vyolan.” I vreman fasil pour nou devlop sa bann kalite move tre e pran lakoler. (2 Tim. 3:2-5) Anfet, bann film ek progranm lo televizyon i souvan montre ki i oke pour en dimoun revanze e ki vyolans i normal e en solisyon ki zistifye pour rezourd en problenm. Bann zistwar parey i fer bann telespektater esper avek enpasyans sa moman dan sa film kot sa move dimoun i “ganny sa ki i merite,” ki souvan sa letan kot i ganny touye dan en fason kriyel avek sa akter prensipal dan sa film.
6 Bann tel propagann pa pe promot lafason ki Bondye i azir, me plito i pe promot “Lespri dapre lemonn” ek Satan, son dirizan kriyel. (1 Kor. 2:12; Efe. 2:2; Rev. 12:12) Lespri dapre lemonn i promot sa lide pour satisfer nou dezir enparfe, i kont lespri sen Bondye e i anpes nou devlop fri lespri. Anfet, enn bann lansennyman vreman enportan pour bann Kretyen se ki zot pa devret revanze ler zot pe ganny provoke. (Lir Matye 5:39, 44, 45.) Alor, ki mannyer nou kapab pli byen aplik lansennyman Zezi?
Bann bon e move legzanp
7. Ki ti arive ler Simeon ek Levi pa ti kontrol zot lakoler?
7 Dan Labib i annan en kantite konsey lo konman pour kontrol lakoler e i osi annan bann legzanp konsernan sa ki i kapab arive si nou pran lakoler e kan nou pa pran lakoler. Egzamin sa ki ti arive kan Simeon ek Levi, sa de garson Zakob ti revanze kont Sekenm akoz i ti’n vyol zot ser Dina. Zot ti “santi zot ofanse e zot ti pran en gran lakoler.” (Zen. 34:7) Apre sa, lezot garson Zakob ti touy tou zonm dan lavil kot Sekenm ti sorti, atak sa lavil e pran bann madanm ek zanfan konman lesklav. Zot pa ti fer tou sa la zis akoz Dina, me tre probab zot ti azir koumsa akoz zot lorgey, andotmo zot pa ti anvi ki sa ki ti’n pase i gat zot repitasyon. Zot ti santi ki Sekenm ti’n ofans zot ek zot papa Zakob. Me ki Zakob ti panse lo zot kondwit?
8. Ki sa resi lo Simeon ek Levi i ansenny nou lo revanze?
8 Sirman move leksperyans Dina ti’n kapab sagrin Zakob en kantite, me pourtan i pa ti dakor avek lefet ki son de garson ti’n revanze. Me Simeon ek Levi ti esey zistifye zot aksyon an dizan: “Eski okenn dimoun i devret tret nou ser konman en prostitye?” (Zen. 34:31) Me pa se tou ki ti arive parski Zeova ti mekontan. Plizyer lannen plitar, Zakob ti predir ki akoz move aksyon ki Simeon ek Levi ti’n fer dan lakoler, zot desandans ti pou eparpiye parmi bann tribi Izrael. (Lir Zenez 49:5-7. *) Wi, zot lakoler ki pa ti ganny kontrole ti fer zot perdi laprouvasyon Bondye e osi pour zot papa.
9. Kan ki David ti pros pour les lakoler kontrol li?
9 Keksoz ti diferan pour Lerwa David. I ti annan en kantite loportinite pour revanze, me i pa ti fer li. (1 Sam. 24:3-7) Par kont, en fwa i ti pros pour les lakoler kontrol li. En zonm ris ki ti apel Nabal ti maltret bann zonm David, menm si zot ti’n protez son bann troupo ek berze. I tre probab ki akoz i ti santi li ofanse sirtou pour son bann zonm ki David ti pros pour revanze. Letan ki David ek son bann zonm ti dan semen pour al atak Nabal ek son lakour, en zennonm ti enform madanm Nabal, ki ti apel Abigail sa ki ti pe pase e ankouraz li pour fer keksoz. Deswit i ti prepar en gro kado e ale pour zwenn David. Avek limilite i ti demann leskiz pour fason azir Nabal e sipliy David akoz i ti konnen David ti annan lakrent pour Zeova. Finalman, David ti retourn dan son bon sans e dir: “Ki ou ganny beni akoz ou’n anpes mwan koupab pour mert ozordi.”—1 Sam. 25:2-35.
Latitid en Kretyen
10. Ki kalite latitid bann Kretyen i devret annan an rapor avek revanze?
10 Sa ki ti arive avek Simeon ek Levi e sa ki ti arive ant David ek Abigail i san okenn dout montre ki Zeova i ay vyolans ek lakoler ki pa ganny kontrole, e i beni zefor ki ganny fer pour fer lape. Zapot Pol ti ekrir: “Fer tou sa ki depann lo ou pour viv anpe avek tou dimoun. Byenneme, pa vanze, me les lakoler Bondye azir. Parski Senyer i dir dan Lekritir: ‘Mwan ki pou fer vanzans, Mwan ki pou fer peye.’ ‘Non, si ou lennmi i lafen, donn li manze; si i swaf, donn li bwar, parski an azisan ensi [“ou pou met labrez lo son latet,” NW].’ Pa les lemal domin zot, me okontrer zot domin lemal par sa ki byen.”—Rom. 12:18-21. *
11. Ki mannyer en ser ti aprann kontrol son lakoler?
11 Nou osi nou kapab aplik sa konsey. Par egzanp, en ser ti pe konplent avek en frer konsernan son bourzwa kot i travay. I ti dekrir son bourzwa konman en dimoun enzis ki pa zantiy. I ti ankoler akoz sa madanm e i ti anvi kit son louvraz. Sa ansyen ti ankouraz li pour pa azir tro an gran. I ti realize ki lakoler sa ser anver lafason ki son bourzwa ti azir ti’n agrav sityasyon. (Tit 3:1-3) Alor, sa ansyen ti fer li vwar ki menm si i pou trouv en lot louvraz apre, i pou kantmenm sa bezwen sanz lafason i reakte anver move tretman ki i kapab gannyen. Sa ansyen ti konsey li pour tret son bourzwa lafason ki li i ti pou kontan ganny trete, zis parey Zezi ti ansenny nou pour fer. (Lir Lik 6:31.) Sa ser ti dakor pour eseye. Avek ki rezilta? Apre en pe letan, latitid son bourzwa ti sanze, i ti vin pli zantiy e i ti menm remersye sa ser pour son travay.
12. Akoz i kapab pli fermal kan i annan diferans ant bann Kretyen?
12 I pa sirprann nou si en tel problenm i ariv avek en dimoun ki pa dan kongregasyon. Nou konnen ki lavi dan lemonn Satan i souvan enzis e nou bezwen lite pour anpes bann dimoun ki fer sa ki move fer nou pran lakoler. (Ps. 37:1-11; Ekle. 8:12, 13; 12:13, 14) Par kont, kan bann problenm koumsa i arive ant nou avek nou bann frer ek ser, sa douler i pli for. En ser Temwen i rapel: “Sa ki ti pli difisil pour mwan kan mon ti vin dan laverite se pour aksepte ki pep Zeova pa parfe.” Nou sorti dan en lemonn ki napa lanmour e ki pa zantiy, nou ekspekte ki tou dimoun dan kongregasyon i tret kanmarad avek labonte konman Kretyen. Alor, si en konpanyon Kretyen, sirtou enn ki annan responsabilite dan kongregasyon, pa pran konsiderasyon pour nou ouswa i azir dan en fason ki pa apropriye konman en Kretyen, sa i kapab bles nou ouswa fer nou ankoler. Petet nou kapab demande: ‘Ki mannyer i kapab posib pour en tel keksoz arive parmi pep Zeova?’ Anfet, sa kalite aksyon ti arive menm parmi bann Kretyen swazir dan letan bann zapot. (Gal. 2:11-14; 5:15; Zak 3:14, 15) Ki mannyer nou devret azir kan sa menm problenm pe afekte nou?
13. Akoz e ki mannyer nou devret fer fason pour sirmont nou bann diferans?
13 Sa ser ki nou fek mansyonnen ti dir: “Mon ti aprann priy pour sa bann ki bles mwan. I touzour ede.” Parey nou’n deza lir, Zezi ti ansenny nou pour priy pour sa bann ki persekit nou. (Mat. 5:44) Eski pa nou annan plis rezon ankor pour priy pour nou bann frer ek ser? Zis parey en papa i anvi ki son bann zanfan i kontan kanmarad, Zeova i anvi ki son bann serviter lo later i annan bon lantant antre zot. Nou pe esper avek enpasyans sa moman kot nou pou viv ansanm dan lape ek lazwa pour touzour, e depi la konmela Zeova pe ansenny nou konman pour fer li. I anvi nou korpere ansanm pour fer sa gran travay ki i’n donn nou. Alor, annou rezourd nou problenm oubyen senpleman “les pase” bann lofans e gard nou linite. (Lir Proverb 19:11. *) Olye reste lwen avek nou frer ek ser kan problenm i leve, nou devret ed kanmarad pour reste parmi pep Bondye, e ganny proteze dan “lebra eternel” Zeova.—Det. 33:27, American Standard Version.
Labonte anver lezot i anmenn bon rezilta
14. Ki mannyer nou kapab lalit avek lenfliyans Satan ki anvi diviz nou?
14 Pour anpese ki nou anons sa bon nouvel partou kote, Satan ek son bann demon pe fer en kantite pour esey diviz bann fanmir ek kongregasyon. Zot esey senm diskord akoz zot konnen ki divizyon i fer en kantite dega. (Mat. 12:25) Pour arive konbat zot move lenfliyans, i byen pour nou swiv sa konsey ki Pol in donnen: “Serviter Senyer pa devret en dimoun ki fer kerel. Okontrer, i devre byen avek tou dimoun.” (2 Tim. 2:24) Rapel byen ki nou pa pe lager avek “dimoun, me kont bann pouvwar move lespri.” Pour reisi dan sa batay nou devret met lo nou tou nou lekipman batay spirityel, e parmi i sa lekipman “pour anons levanzil” konsernan lape.—Efe. 6:12-18.
15. Ki mannyer nou devret azir anver bann latak ki sorti an deor kongregasyon?
15 An deor kongregasyon, bann lennmi Zeova pe lans bann latak visye pour kas sa lape ki egziste parmi son pep. Serten sa bann lennmi i atak Temwen Zeova fizikman. Lezot i fann rimer lo nou atraver medya ouswa ankour. Zezi ti averti son bann disip konsernan sa bann keksoz. (Mat. 5:11, 12) Ki mannyer nou devret reazir? Nou pa devret zanmen “rann mal pour mal,” ki swa an parol oubyen an aksyon.—Rom. 12:17; lir 1 Pyer 3:16.
16, 17. Ki tes en kongregasyon ti fer fas avek?
16 Malgre nenport kwa ki Dyab i fer nou pas atraver, si nou “domin lemal par sa ki byen” nou pou kapab donn en bon temwannyaz. Par egzanp, en kongregasyon lo en zil Pasifik ti lwe en lasal pour Memoryal. Ler zot ti aprann sa, bann reprezantan en legliz dan sa landrwa ti demann manm zot legliz pour rasanble kot sa menm lasal pour en lanmes sa menm ler ki ti’n ganny plàn pour Memoryal. Par kont, sef lapolis ti’n donn lord sa bann reprezantan legliz pour fer sir ki sa lasal i disponib pour bann Temwen sa ler. Me kantmenm sa, kan sa ler ti arive, sa lasal ti ranpli avek manm legliz e zot ti konmans zot servis.
17 Anmezir ki lapolis ti pe prepare pour retir bann dimoun dan sa lasal pardfors, sef sa legliz ti apros enn bann ansyen e demann li: “Eski i annan okenn keksoz spesyal ki zot in plàn pour ozordi swar?” Sa frer ti koz avek li lo Memoryal e sa zonm ti reponn: “Ar zot, mon pa ti konnen!” Ler i ti tann sa, en zofisye lapolis ti dir: “Be pa nou ti dir zot bomaten!” Sa zonm ti get sa ansyen e fer en pti riye konmsi pour boufonnen e dir: “Ki ou pou fer prezan? Lasal i plen avek dimoun. Eski ou pou les lapolis pous nou deor?” I ti’n plàn tou keksoz dan en fason rize pour ki bann Temwen i ganny vwar konman bann ki persekit lezot. Me ki bann frer ti fer?
18. Ki mannyer bann frer ti reazir anver en provokasyon e avek ki rezilta?
18 Bann Temwen ti ofer pour les sa group fer en servis en demi erdtan, koumsa apre sa bann frer ti pou kapab konmans fer Memoryal. Sa lanmes ti depas letan, me apre ki bann manm legliz ti’n ale, Memoryal ti ganny fer. Son lannmen, bann manm ofisyel dan gouvernman ti rasanble ansanm pour rod plis detay. Apre ki zot ti’n egzamin bann detay, sa group dimoun ti fors bann reprezantan legliz pour anonse ki se pa bann Temwen ki ti lakoz sa problenm, me plito sef zot legliz. Manm sa bord ti remersye Temwen Zeova pour zot pasyans dan lafason ki zot ti’n tret sa problenm. Zefor bann Temwen pour “viv anpe avek tou dimoun” ti anmenn bon rezilta.
19. Kwa ankor ki kapab promot lape?
19 En lot keksoz ki ede pour protez lape avek lezot i kan nou servi parol agreab. Lot lartik pou koz lo bann parol agreab e ki mannyer nou kapab koz bann parol agreab e kontinyen fer li.
[Not anba lo paz]
^ par. 3 Zenez 4:6-8: “Alor Zeova ti dir Kaen: ‘Akoz ou sitan ankoler koumsa e akoz ou figir i long? Si ou konmans fer sa ki byen, pa ou pou ganny met pli o? Me si ou pa pe fer sa ki byen, pese pe espere dan larantre e i anvi ou; e ou lo ou kote, eski ou pou kontrol li?’ Apre sa Kaen ti dir avek son frer Abel: ‘Annou al dan lakanpanny.’ Alor, i ti arive ki, kan zot ti dan lakanpanny, Kaen ti atak son frer Abel e touy li.”
^ par. 8 Zenez 49:5-7: “Simeon ek Levi i de frer. Zot servi zot zarm pour fer vyolans. Mwan mon pa pou al dan zot group. Fer mwan pa form parti avek zot, o mon nanm, akoz dan zot lakoler zot ti touy bann zonm e san reflesir zot in koup zare bann toro. Ki zot lakoler i ganny modi akoz i kriyel, e osi zot firer akoz i brit. Les mwan separ zot dan teritwar Zakob e eparpiy zot Izrael.”
^ par. 10 Met “labrez” i refer avek en vye metod ki ti ganny servi pour tir salte dan metal kan labrez ti ganny mete parlao e anba sa metal. Si nou demontre labonte anver bann ki pa zantiy avek nou, sa i kapab fer zot annan en pli bon latitid anver nou e nou pou vwar zot bann bon kalite.
^ par. 13 Proverb 19:11: “En zonm ki annan bon zizman pou tarde pour li ankoler, e i en zoli keksoz lo son par pour les pase lofans.”
Eski ou kapab eksplike?
• Akoz dimoun dan sa lemonn ozordi i sitan ankoler?
• Ki legzanp dan Labib ki montre sa ki kapab arive si en dimoun i kontrol ouswa pa kontrol son lakoler?
• Ki mannyer nou devret azir si en konpanyon Kretyen i ofans nou?
• Ki mannyer nou devret reazir anver latak ki bann ki pa Temwen i lanse kont nou?
[Kestyon]
[Portre lo paz 18]
Bann aksyon labonte i kapab sanz latitid lezot