Trouv rekonfor dan bann keksoz spirityel

“Pran mon zoug . . .  e zot a ganny repo.”—MAT. 11:29.

1. Ki laranzman Bondye ti fer lo Montanny Sinai e akoz?

KAN lalyans Lalwa ti ofisyelman ganny donnen lo Montanny Sinai, ladan i ti annan sa laranzman Saba ki ti devret ganny fer tou le semenn. Atraver Moiz son portparol, Zeova ti donn nasyon Izrael sa lord: “Sis zour ou pou travay; me setyenm zour ou devret arete, pour ki ou toro ek bourik i kapab repoze e garson ou lesklav fiy e bann rezidan etranze i repoz zot lekor.” (Egz. 23:12) Wi, Zeova ti pran konsiderasyon pour sa bann ki ti anba Lalwa, se pour sa rezon ki i ti fer sa laranzman pour ki son pep i ganny en zour repo pour zot kapab “repoz zot lekor.”

2. Ki byenfe bann Izraelit ti gannyen lefet ki zot ti fer Saba?

² Eski Saba ti zis en zour repo? Non, Saba ti en moman vreman enportan dan ladorasyon bann Izraelit. Saba ti donn bann sef fanmir loportinite pour ansenny zot fanmir pour “gard semen Zeova pour fer sa ki drwat.” (Zen. 18:19) I ti osi en loportinite pour bann fanmir ek zanmi zwenn ansanm pour medit lo bann keksoz ki Zeova ti’n fer e apresye bann moman lazwa ansanm. (Iza. 58:13, 14) Pli enportan ankor, dan en sans profetik, Saba ti pe reprezant en letan dan lavenir kot bann dimoun ti pou ganny sa vre repo ouswa rekonfor atraver Renny Milener Kris. (Rom. 8:21) Me ki pou dir lo nou letan? Kote e ki mannyer bann vre Kretyen ki enterese avek fason azir Zeova i kapab ganny sa kalite repo ouswa rekonfor?

Trouv rekonfor par asosye avek lezot Kretyen

3. Dan ki fason bann Kretyen dan premye syek ti siport kanmarad e avek ki rezilta?

³ Zapot Pol ti dekrir kongregasyon Kretyen konman en “pilye ek sipor laverite.” (1 Tim. 3:15) Bann Kretyen dan premye syek ti ganny en kantite sipor atraver lankourazman ki zot ti gannyen avek kanmarad e osi  akoz zot ti batir kanmarad dan lanmour. (Efe. 4:11, 12, 16) Letan i ti Efez, Pol ti ganny en vizit ankourazan avek bann manm sorti dan kongregasyon Korent. Remark lefe ki sa ti annan lo li: “Vizit Stefanas, Fortinatis ek Akaikis in fer mwan ere akoz . . . zot in rekonfort mwan.” (1 Kor. 16:17, 18, Bible en fran­çais courant) Pareyman, kan Tit ti al Korent pour ed bann frer laba, Pol ti reekrir sa kongregasyon an dizan: “Tit ti dan lazwa par fason ki zot in konsol li.” (2 Kor. 7:13) Ozordi osi, Temwen Zeova pe ganny sa vre konsolasyon atraver lasosyasyon ankourazan avek lezot frer ek ser.

4. Dan ki fason renyon kongregasyon i rekonfort ou?

⁴ Par ou prop leksperyans, ou konnen ki renyon kongregasyon i anmenn bokou lazwa. Dan renyon nou kapab ansanm benefisye avek lankourazman ek lafwa lezot. (Rom. 1:12) Nou bann frer ek ser pa zis bann dimoun ki nou bat avek ouswa ki nou zis zwenn detanzaot. Zot bann vre zanmi, nou kontan zot e respekte zot. Kan nou zwenn ansanm regilyerman dan renyon, nou ganny bokou lazwa ek rekonfor.—Filem. 7.

5. Ki mannyer nou kapab rekonfort kanmarad dan bann lasanble?

⁵ Nou osi ganny rekonfor atraver nou bann diferan lasanble tou le-z-an. Apard donn nou sa delo laverite ki donn lavi dan Parol Bondye, sa bann gran rasanbleman i donn nou loportinite pour ‘ouver gran nou leker’ e fer zanmi avek lezot. (2 Kor. 6:12, 13) Me si nou kanmi ouswa vwar li difisil pour al kot lezot dimoun? En fason nou kapab aprann konn plis nou bann frer ek ser se kan nou depans nou letan ek lenerzi dan preparasyon pour lasanble. Apre ki i ti’n ede dan en lasanble enternasyonal, en ser ti dir: “Apard mon fanmir ek en pti group zanmi, mon pa ti konn bokou dimoun laba. Me kan mon ti ede dan netwayaz, mon ti zwenn en kantite frer ek ser! I ti vreman gou!”

6. Nonm en fason nou kapab ganny rekonfor kan nou’n pran en vakans.

⁶ Bann Izraelit ti abitye vwayaze pour al Zerizalenm pour partisip dan trwa lafet relye avek ladorasyon sak lannen. (Egz. 34:23) Zot ti souvan bezwen kit zot plantasyon ek magazen deryer e mars pour plizyer zour apye lo bann semen ranpli avek lapousyer. Kantmenm sa, i ti annan en ‘kantite lazwa’ kot tanp anmezir bann ki ti la ti “loue Zeova.” (2 Kron. 30:21) Pareyman, bokou serviter Zeova ozordi i ganny bokou lazwa kan zot vwayaz avek zot fanmir pour vizit Betel oubyen bann biro brans Temwen Zeova ki pros avek zot. Eski ou kapab enkli en vizit parey dan ou prosen vakans an fanmir?

7. (a) Ki mannyer bann rankont sosyal i kapab anmenn byenfe pour nou? (b) Kwa ki kapab ede pour annan en rankont ki memorab e ankourazan?

⁷ I osi ankourazan kan nou pas bann moman detant ansanm avek nou fanmir ek zanmi. Lerwa Salomon, sa zonm saz ti dir: “Napa nanryen pli meyer pour en zonm ki i manze e menm bwar e vwar rezilta akoz i’n travay dir.” (Ekle. 2:24) Bann rankont sosyal i pa zis rekonfort nou me i osi ranforsi nou lanmour pour nou bann frer ek ser Kretyen anmezir nou konn zot pli byen. Pour annan en bon souvenir e pas en bon moman ankourazan, i pli bon pour fer en rankont sosyal kot napa bokou dimoun e fer sir i annan en bon sipervizyon sirtou si lalkol pe ganny servi.

Predikasyon i donn rekonfor

8, 9. (a) Ki diferans i annan ant mesaz Zezi avek sa ki pour bann profeser Lalwa ek Farizyen? (b) Ki byenfe nou gannyen ler nou partaz sa mesaz ki dan Labib?

⁸ Zezi ti devoue dan minister e i ti ankouraz son bann disip pour fer parey. Sa ti evidan dan son parol: “I annan en gran rekolt  ki’n pare me napa ase zouvriye. Pour sa rezon, sipliy met rekolt pour anvoy zouvriye.” (Mat. 9:37, 38) Sa mesaz ki Zezi ti ansennyen ti vreman rekonfortan parski i ti en ‘bon nouvel.’ (Mat. 4:23; 24:14) Son mesaz ti diferan avek sa bann lareg difisil ki bann Farizyen ti pe enpoze lo bann dimoun.—Lir Matye 23:4, 23, 24.

⁹ Kan nou pe anons sa bon nouvel avek lezot, nou pe ofer zot sa rekonfor spirityel e an menm tan, nou pe fer antre dan nou lespri ek leker laverite dan Labib. En psalmis ti annan rezon dir: “Loue Ya zot lepep, akoz i gou pour sant pour nou Bondye; i en bon keksoz pour fer.” (Ps. 147:1) Eski ou kapab ogmant ou lazwa ki ou gannyen par loue Zeova avek ou prosen?

10. Eski sikse dan predikasyon i depan lo si dimoun i byen reazir anver sa mesaz? Eksplike.

¹⁰ I vre ki dan serten teritwar bann dimoun i pli pare pour aksepte sa bon nouvel ki dan lezot teritwar. (Lir Akt 18:1, 5-8.) Si ou pe viv dan en landrwa kot pa bokou dimoun ki aksepte sa mesaz lo Rwayonm, esey konsantre lo sa bon keksoz ki ou pe fer dan minister. Rapel byen ki sa zefor ki ou pe kontinyen fer pour proklanm non Zeova i pa anven. (1 Kor. 15:58) Deplis, bon rezilta ki nou gannyen dan predikasyon pa depan lo reaksyon bann dimoun anver sa bon nouvel. Nou kapab asire ki Zeova pou fer tou pour ki sa bann ki annan sa bon kondisyon leker i ganny sa loportinite pour aksepte sa bon nouvel lo Rwayonm.—Zan 6:44.

Ladorasyon an fanmir i donn rekonfor

11. Ki responsabilite Zeova in donn bann paran e ki mannyer zot kapab desarz sa responsabilite?

¹¹ Bann paran ki annan lakrent pour Bondye i responsab pour enstrir zot zanfan lo Zeova ek son gidans. (Det. 11:18, 19) Si ou en paran, eski ou met letan dekote pour ansenny ou zanfan konsernan nou Papa lanmour ki dan lesyel? Pour ed ou desarz sa responsabilite enportan e pran swen avek bezwen ou fanmir, Zeova in fourni en kantite nouritir spirityel atraver bann piblikasyon, film ek bann lanrezistreman odyo.

12, 13. (a) Ki mannyer fanmir i kapab benefisye avek sa zour pour ador Bondye an fanmir? (b) Ki mannyer paran i kapab fer sir ki ladorasyon an fanmir i en sours rekonfor?

¹² Deplis, lesklav fidel e pridan in fer laranzman pour ki nou ganny en zour pour ador Bondye an fanmir. Sa i en zour ki’n ganny met dekote sak semenn pour etidye Labib an fanmir. Bokou i santi ki sa laranzman in fer zot vin pli pros avek kanmarad e ogmant zot lanmour pour kanmarad e sa in ranforsi zot relasyon avek Zeova. Me ki mannyer bann paran i kapab fer sir ki sa ladorasyon an fanmir i rekonfort zot fanmir spirityelman?

¹³ Sa zour pour ador Bondye an fanmir pa devret en moman annwiyan ouswa enn ki tro serye. Apre tou, nou ador sa “Bondye ere” e i anvi ki nou zwaye kan nou ador li. (1 Tim. 1:11, NW; Fili. 4:4) I vreman en gran benediksyon pour annan en zour an plis pour dekouver bann pyer presye spirityel dan Labib. Bann paran i kapab fleksib dan zot metod lansennyman, zot devret servi byen zot limazinasyon ek kreativite. Par egzanp, en fanmir ti les zot pti garson di-z-an ki apel Brandon prezant en rapor ki ti annan pour tit “Akoz Zeova ti servi en serpan pour reprezant Satan?” Sa size ti trouble Brandon en pe akoz i ti kontan bann serpan e i pa ti kontan ki zot ti ganny asosye avek Satan. Serten fanmir in parfwa met an senn serten resi Labib dan laform en pti pyes teat kot sak manm lafanmir i zwe rol en dimoun, i lir son porsyon dan Labib ouswa zot met an senn en levennman ki ti pase. Sa bann metod lansennyman pa zis gou, me i permet bann zanfan partisipe e sa i  kree loportinite pour ki sa prensip dan Labib i tous zot leker. *

Evit bann fardo

14, 15. (a) Dan ki fason presyon ek mankman sekirite in ogmante dan sa bann dernyen zour? (b) Ki lezot presyon nou kapab fer fas avek?

¹⁴ Mankman sekirite ek presyon pe kontinyelman ogmante pandan bann dernyen zour sa move lemonn. Plizyer milyon dimoun napa en lanplwa ouswa pe fer fas avek bann difikilte ekonomik. Menm bann ki annan en louvraz i souvan santi konmsi sa larzan ki zot gannyen i ganny anmennen dan en pos ki ranpli avek trou, e sa i fer ki zot fanmir pa ganny preski nanryen. (Konpar Agai 1:4-6.) Bann politisyen ek lezot sef leta pa kapab fer preski nanryen pour konbat kont terorism ek lezot move aksyon. Bokou dimoun i dekouraze akoz zot febles personnel.—Ps. 38:4.

¹⁵ Bann vre Kretyen osi i pas atraver sa bann problenm e osi fer fas avek presyon ki sa lemonn ki dan pouvwar Satan i anmennen. (1 Zan 5:19) Dan serten ka, bann disip Kris i petet bezwen fer fas avek lezot presyon ankor anmezir zot fer bokou zefor pour reste fidel avek Zeova. Zezi ti dir: “Si zot in persekit mwan, zot osi, zot pou ganny persekite.” (Zan 15:20) Par kont, menm kan nou “ganny persekite” nou pa “ganny abandonnen.” (2 Kor. 4:9) Akoz sa?

16. Kwa ki pou ed nou gard nou lazwa?

¹⁶ Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo.” (Mat. 11:28) Si nou annan lafwa total dan ranson Kris, dan en sans nou pe met nou lekor dan lanmen Zeova. Dan sa fason nou ganny “sa pisans ki napa son parey.” (2 Kor. 4:7) Lespri sen Bondye i en “Konseyer” oubyen led ki ede pour ranforsi nou lafwa pour ki nou pa zis andir bann leprev ek persekisyon ki nou gannyen, me ki nou osi gard nou lazwa.—Zan 14:26; Zak 1:2-4.

17, 18. (a) Ki leta lespri nou merit evite? (b) Ki kapab arive si nou tro met lenportans lo nou bann dezir natir imen?

¹⁷ Bann vre Kretyen ozordi i bezwen protez zot lekor avek lenfliyans bann dezir ek lanvi ki fer bokou dimoun pourswiv plezir atoupri. (Lir Efezyen 2:2-5.) De lot kote, nou kapab tonm dan pyez “dezir natir imen, dezir atraver nou lizye ek lorgey dan lavi toulezour.” (1 Zan 2:16) Ouswa, san fer atansyon nou kapab krwar ki si nou satisfer nou bann dezir sa pou rekonfort nou. (Rom. 8:6) Par egzanp, serten dimoun in servi drog, abiz lalkol, get pornografi, fer bann sport danzere ouswa plizyer lezot aktivite degradan dan zot zefor pour satisfer zot bann dezir. Satan i servi “bann riz” pour tronp bann dimoun par donn zot en fo rekonfor.—Efe. 6:11.

¹⁸ I vre, napa nanryen mal dan manze, bwar e partisip dan bann bon divertisman kan i ganny fer avek moderasyon. Me pourtan, nou pa devret les sa bann keksoz vin priyorite dan nou lavi. Bon balans ek kontrol lo nou lekor i enportan, sirtou an rapor avek sa  letan ki nou pe viv ladan. Bann keksoz ki nou tay deryer personnelman i kapab vin en fardo lo nou ziska en degre ki nou pa pou ni “aktif e prodiktif dan konnesans nou Senyer Zezi-Kri.”—2 Pyer 1:8.

19, 20. Kote nou kapab ganny vre rekonfor?

¹⁹ Si nou fason panse i annakor avek bann lalwa Zeova, nou pou rekonnet ki tou sa ki sa lemonn pe ofer an sa ki konsern plezir, i zis tanporer. Nou osi nou devret rekonnet sa parey Moiz. (Ebr. 11:25) Vre rekonfor, setadir sa kalite ki anmenn lazwa ek satisfaksyon eternel i posib kan nou fer lavolonte nou Papa ki dan lesyel.—Mat. 5:6.

²⁰ Annou kontinyen trouv rekonfor dan bann keksoz spirityel. Si nou fer sa, nou pou “abandonn nou move lavi ek son bann move dezir, . . . an atandan sa gran Zour, kan laglwar nou gran Bondye ek nou Sover Zezi-Kri pou paret.” (Tit 2:12, 13) Alor, annou touzour determinen pour reste anba zoug Zezi par soumet avek son lotorite ek gidans. Si nou fer sa, nou pou trouv vre boner ek rekonfor!

[Not anba lo paz]

Ki ou pou reponn?

• Ki mannyer pep Zeova i trouv rekonfor ozordi?

• Dan ki fason predikasyon i rekonfort nou e bann ki nou koz avek?

• Ki bann sef fanmir i kapab fer pour fer sir ki sa zour pour ador Bondye an fanmir i anmenn rekonfor pour lafanmir?

• Kwa ki kapab met en fardo lo nou spirityelman?

[Kestyon]