“Ki kalite lavi zot devre viv?”

“Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye.”—2 PYER 3:11.

1. Akoz dezyenm let Pyer ti vin dan sa bon moman pour bann Kretyen dan son letan?

KAN zapot Pyer ti ekrir son dezyenm let enspire, kongregasyon Kretyen ti pe deza fer fas avek en kantite persekisyon, me sa pa ti pe afebli devouman ouswa ralanti progre sa kongregasyon. Alor, Dyab ti sanz taktik, i ti servi sa enn ki’n souvan marse oparavan. Parey Pyer ti montre, Satan ti pe servi bann fo ansenyan ki zot “regar [ti] ­ranpli avek dezir pour fer adilter” e “zot ­leker [ti] byen antrennen dan dezir pour ganny larzan” pour esey sali pep Bondye. (2 Pyer 2:1-3, 14; Zid 4) I byen apropriye alor ki dan son dezyenm let, Pyer ti senserman ankouraz bann Kretyen pour reste fidel.

2. Ki 2 Pyer sapit 3 i koz lo la e ki kestyon nou devret demann nou lekor?

² Pyer ti ekrir: “Mon krwar i mon devwar, toultan ki mon ankor vivan, pour fer zot rapel sa bann keksoz. Mon konnen ki byento mon pou kit sa lekor . . . Mon a fer tou mon posib pour ki menm apre mon lanmor, zot a touzour kapab rapel sa bann keksoz.” (2 Pyer 1:13-15) Wi, Pyer ti konnen ki i ti pros pour mor, me i ti anvi ki bann Kretyen i kontinyen rapel sa ki i’n dir. Sanmenm ki’n arive, parski son bann rapel i form parti Labib e nou tou nou kapab lir li ozordi. Sapit 3 dan dezyenm let Pyer i enteres nou en kantite akoz i koz bokou lo bann “dernyen zour” sa lemonn ki nou pe viv ladan e osi lo destriksyon sa lesyel ek later senbolik. (2 Pyer 3:3, 7, 10) Ki konsey Pyer i  annan pour nou? Ki mannyer nou kapab aplik son konsey pour ki nou kapab ganny laprouvasyon Zeova?

3, 4. (a) Ki Pyer ti dir e ki lavertisman i ti donnen? (b) Ki sa trwa pwen nou pou egzaminen?

³ Apre ki i ti’n koz lo destriksyon lemonn Satan, Pyer ti dir: “Zot devre anmenn en lavi sen e annan respe [oubyen “devosyon,” NW] pour Bondye.” (2 Pyer 3:11, 12) I kler ki Pyer ti pe dir en parol byen enportan. Pyer ti konnen ki zis sa bann ki fer lavolonte Zeova e demontre bann kalite ki fer li plezir ki pou kapab ganny proteze sa “zour vanzans” ki pe vini. (Iza. 61:2) Deplis, sa zapot ti azoute: “Me zot, mon bann byenneme, zot in ganny averti. Fer byen atansyon, pangar zot ganny antrennen par lerer sa bann move dimoun [bann fo ansenyan] e ki zot perdi zot pozisyon solid.”—2 Pyer 3:17.

⁴ Lefet ki Pyer ti parmi sa bann ki ti’n ganny “averti,” i ti konnen ki pandan bann dernyen zour bann Kretyen ti pou sirtou bezwen reste vizilan pour ki zot kapab gard zot lentegrite. Pli tar, zapot Zan ti klerman eksplike akoz. Dan en vizyon, i ti vwar kot Satan ti pe ganny pouse dan lesyel e osi ki i ti annan en “gran lakoler” anver sa bann ki “obei komannman Bondye e ki fidel avek temwannyaz Zezi.” (Rev. 12:9, 12, 17) Bann Kretyen swazir ki fidel, ansanm avek zot konpanyon fidel “lezot mouton” pou ranport laviktwar. (Zan 10:16, NW) Me ki pour dir lo nou endividyelman? Eski nou pou gard nou lentegrite? Nou pou kapab ganny led pour fer li si nou (1) devlop bann kalite ki Bondye i annan, (2) reste pir e san defo moralman e spirityelman, e (3) annan sa bon pwennvi lo bann leprev. Annou egzamin sa bann pwen.

Devlop bann kalite ki Bondye i annan

5, 6. Ki bann kalite nou devret fer bokou zefor pour devlope e akoz nou bezwen ‘fer tou nou zefor’ pour fer li?

⁵ Lo konmansman son dezyenm let, Pyer ti ekrir: “Fer tou zot zefor pour azout avek zot lafwa, bonn kondwit, avek bonn kondwit, konnesans. Azout avek konnesans, disiplin lo zot lekor, avek disiplin lo zot lekor, perseverans, e avek perseverans latasman pour Bondye. Azout avek latasman pour Bondye, lafeksyon fraternel, e avek lafeksyon fraternel lanmour. Se sa bann kalite ki zot devre posede, e si zot posed tousala an labondans i ava rann zot aktif e prodiktif dan konnesans nou Senyer Zezi-Kri.”—2 Pyer 1:5-8.

⁶ I vre, nou devret ‘fer tou nou zefor’ pour partisip dan bann aktivite ki pou ed nou devlop bann kalite ki Bondye i annan. Par egzanp, i demann bokou zefor pour asiste bann renyon, lir Labib tou le zour e annan en bon progranm letid personnel ki regilye. I osi demann en kantite travay ek bon planifikasyon pour ki nou ador Bondye an fanmir lo en baz regilye, ki nou fer sa moman gou e kot fanmir antye i benefisye. Me enn fwa ki nou’n pran labitid, i pou pli fasil pour fer li e nou pou sirman ganny bann byenfe.

7, 8. (a) Ki serten in dir lo sa zour pour ador Bondye an fanmir? (b) Ki byenfe ou gannyen avek ou ladorasyon an fanmir?

⁷ Konsernan sa laranzman pour ador Bondye an fanmir, en ser ti ekrir: “I permet nou aprann bokou lo en kantite size.” En lot i dir: “Onnetman, mon pa ti anvi ki letid liv i arete. Mon ti pli kontan sa renyon. Me aprezan, la ki nou annan nou sware pour ador Bondye an fanmir, mon realize ki Zeova i konnen kwa ki nou bezwen e kan ki nou bezwen li.” En sef fanmir i dir: “Ladorasyon an fanmir i ed nou en kantite. I vreman gou pour annan en renyon kot nou kapab adapte avek nou bezwen spesifik konman en koup! Nou tou le de nou santi ki nou pe amelyore dan nou zefor pour demontre fri lespri, e dan nou minister, nou ganny plis lazwa ki oparavan.” En lot sef fanmir i dir: “Bann zanfan pe fer zot prop resers e zot pe aprann en kantite, zot kontan fer sa. Sa laranzman i fer nou annan plis konfyans ki  Zeova i konnen kwa ki fatig nou e i reponn nou lapriyer.” Eski ou osi ou santi parey anver sa laranzman merveye ki sorti kot Bondye?

⁸ Pa les bann pti keksoz enterfer avek ou ladorasyon an fanmir. En koup marye ti dir: “Pour sa kat dernyen semenn ki’n pase, tou le Zedi swar, en keksoz ti arive dan nou fanmir ki ti pros pour anpes nou fer nou letid, me nou pa ti les sa enterfer avek nou progranm.” Byensir, parler i kapab neseser pour aziste ou progranm. Me kantmenm sa, reste determinen pour pa zanmen kennsel sa zour pour ador Bondye an fanmir, pa les ni menm en semenn pase san ki ou fer li!

9. Ki mannyer Zeova ti soutenir Zeremi e ki nou kapab aprann avek son legzanp?

⁹ Profet Zeremi i en bon legzanp pour nou. I ti bezwen sa nouritir spirityel ki i ti gannyen avek Zeova e i ti apresye li en kantite. Sa nouritir ti permet li pres avek landirans avek en pep ki pa ti enterese. I ti dir: “Parol Zeova . . . ti parey en dife ki pe brile anndan dan mon lezo.” (Zer. 20:8, 9) I ti osi ed li pour andir bann moman difisil ki ti termin avek destriksyon Zerizalenm. Denozour nou annan Parol Bondye antye an ekrir. Kan nou etidye li seryezman e annan menm panse avek Bondye lo en sityasyon, parey Zeremi, nou pou kapab apresye plis nou minister, reste fidel dan bann leprev e reste pir moralman e spirityelman.—Zak 5:10.

Reste ‘pir e san defo’

10, 11. Akoz nou devret fer tou sa ki nou kapab pour reste ‘pir e san defo’ e ki nou merit fer pour kapab fer sa?

¹⁰ Konman Kretyen, nou konnen nou pe viv dan letan lafen. Alor, nou pa sirprann ki sa lemonn i obsede avek bann keksoz ki Zeova i deteste parey vorasite, limoralite seksyel ek vyolans. Taktik ki Satan i servi i kapab ganny rezimen koumsa: ‘Si nou pa kapab fer per bann serviter Bondye, petet nou kapab fer zot fer sa ki mal.’ (Rev. 2:13, 14) Se pour sa rezon ki nou bezwen pran aker konsey Pyer ki ranpli avek lanmour: “Fer tou zefor posib, pour Bondye trouv zot pir, san defo e dan lape avek li.”—2 Pyer 3:14, nou ki’n met an italik.

¹¹ Sa lekspresyon “fer tou zefor posib” i parey avek sa lankourazman ki Pyer ti donnen pli boner pour “fer tou zot zefor.” I kler ki Zeova, sa enn ki ti enspir Pyer pour eksprim sa bann santiman, i konnen ki nou bezwen fer bokou zefor pour reste “pir, san defo,” setadir fer sir ki napa okenn tras bann salte dan lemonn Satan ki’n tase lo nou. Fer bokou zefor i enplik protez nou leker pour ki i pa ganny anvair avek bann move dezir. (Lir Proverb 4:23; * Zak 1:14, 15.) I osi vedir tenir ferm kont sa bann ki kestyonn nou fason viv konman Kretyen e ki ‘kritik nou.’—1 Pyer 4:4.

12. Ki lasirans nou gannyen dan Lik 11:13?

¹² Lefet ki nou enparfe, i vreman difisil pour fer sa ki byen. (Rom. 7:21-25) Nou pou vreman kapab reisi si nou rod led Zeova, sa enn ki zenerezman donn son lespri sen tou bann ki demann li avek senserite. (Lik 11:13) An retour, sa lespri sen i fer nou devlop bann kalite ki fer nou ganny laprouvasyon Bondye e ki ed nou fer fas avek bann tantasyon dan lavi e osi bann leprev ki kapab vin plis anmezir zour Zeova i aprose.

 Les leprev fortifye ou

13. Kan nou rankontre leprev, kwa ki pou ed nou andire?

¹³ Osi lontan ki nou viv dan sa vye lemonn, nou pou kontinyen ganny bann leprev ki vin dan diferan fason. Me olye dekouraze, akoz ou pa vwar sa bann leprev konman en loportinite pour ou prouv ou lanmour pour Zeova e ranforsi ou lafwa dan li ek son Parol? Disip Zak ti ekrir: “Mon bann frer, konsider konman en lazwa, tou bann leprev ki zot bezwen pas ladan. Parski zot konnen ki si zot lafwa i reste ferm dan bann leprev, sa i prodwi pasyans [oubyen “landirans,” NW].” (Zak 1:2-4) Rapel osi ki “Bondye i konnen ki mannyer i pou delivre bann dimoun ki atase avek li dan difikilte.”—2 Pyer 2:9.

14. Ki mannyer legzanp Zozef i ankouraz ou?

¹⁴ Egzamin legzanp Zozef, garson Zakob ki ti ganny vann konman lesklav par son bann frer. (Zen. 37:23-28; 42:21) Eski lafwa Zozef ti afebli akoz sa martir ki i ti pas atraver? Eski i ti ankoler avek Zeova akoz i ti’n les li pas atraver sa move leksperyans? Parol Bondye i montre klerman ki larepons i non. Deplis, pa se tou leprev ki Zozef ti gannyen. Pli tar, i ti ganny akize lo fo sarz pour vyol e i ti ganny anprizonnen. Ankor enn fwa, i ti kontinyen gard son devosyon pour Bondye. (Zen. 39:9-21) Sa bann leprev ti fortifye li e i ti ganny rekonpanse en kantite pour sa.

15. Ki nou kapab aprann avek legzanp Naomi?

¹⁵ I vre, leprev i kapab sagrin nou ouswa menm fer nou tonm dan depresyon. Petet Zozef osi ti santi parey parler. Lezot serviter fidel Zeova ti santi koumsa zot osi. Egzamin legzanp Naomi ki ti perdi son msye ek son de garson. I ti dir: “Pa apel mwan Naomi. Apel mwan Mara [ki vedir “Anmer”], akoz Tou Pwisan in fer keksoz vreman anmer pour mwan.” (Rit 1:20, 21, not anba lo paz.) Nou kapab konpran reaksyon Naomi. Me, parey Zozef, i pa ti tonbe spirityelman ouswa pa gard son lentegrite. An retour, Zeova ti rekonpans sa madanm spesyal. (Rit 4:13-17, 22) An plis ki sa, dan sa Paradi lo later ki pe vini, i pou repar tou domaz ki Satan ek son move lemonn in fer. Izai i dir: “Bann keksoz dan lepase pa pou vin dan nou lespri, zot pa pou ni vin dan leker.”—Iza. 65:17.

16. Ki latitid nou devret annan anver lapriyer e akoz?

¹⁶ Malgre nenport leprev nou pas atraver, lanmour Bondye i la pour soutenir nou. (Lir Romen 8:35-39.) Menm si Satan pou kontinyen esey dekouraz nou, i pa pou reisi si nou “viv en fason rezonnab avek en lespri vizilan pour kapab priye.” (1 Pyer 4:7) Zezi ti dir: “Veye alor e priye tou letan, pour zot ganny lafors pour pas atraver tou sa bann keksoz ki pou arive, e ki zot ava tenir debout devan Fis-de-Lonm.” (Lik 21:36) Remarke ki Zezi i ankouraz nou pour “priye tou letan.” Nou devret sipliy Bondye senserman e avek tou nou leker. Par dir sa, Zezi ti pe montre nou ki la i lemoman pour nou annan en bon relasyon avek li ek son Papa. Zis sa bann ki annan laprouvasyon Bondye ki pou annan sa posibilite pour sirviv zour Zeova.

Reste aktif dan servis pour Zeova

17. Si teritwar kot ou prese i difisil, ki byenfe ou kapab gannyen atraver legzanp bann profet dan lepase?

¹⁷ Ler nou partisip dan bann aktivite spirityel, nou ganny rekonforte. Sa i fer nou rapel parol Pyer: “Parski tousala pou ganny detri, ki  kalite lavi zot devre viv? Zot devre anmenn en lavi sen e annan respe pour Bondye!” (2 Pyer 3:11, nou ki’n met an italik.) Sa bann lekspresyon i enplik aksyon. Anons sa bon nouvel i premye parmi sa bann keksoz ki nou devret fer. (Mat. 24:14) I vre, dan serten teritwar i en defi pour prese, petet akoz bann dimoun pa enterese ouswa zot opoz nou oubyen zot senpleman vreman preokipe avek bann keksoz dan lavi tou le zour. Bann serviter Zeova dan lepase osi ti bezwen fer fas avek sa bann kalite mantalite. (Lir 2 Kronik 36:15, 16; * Zer. 7:24-26) Me pourtan, zot pa ti zanmen abandonnen, o kontrer zot ti kontinyen anons mesaz Bondye “ankor e ankor.” Kwa ki ti ed zot andire? Zot ti napa menm pwennvi avek lemonn an rapor avek zot responsabilite, plito zot ti annan menm pwennvi avek Zeova. Zot ti osi konsider li en loner pour port non Bondye.—Zer. 15:16.

18. Ki travay predikasyon pou akonplir a lavenir an rapor avek sanktifikasyon non Bondye?

¹⁸ Nou osi nou annan sa privilez pour koz lo non Zeova ek son plan. Mazin sa: Rezilta prensipal ki nou ­travay predikasyon i anmennen se ki bann lennmi Bondye pa pou kapab dir ki zot pa ti konnen letan zot pou bezwen rann kont avek li fas a fas pandan son gran zour. Vreman alor, parey Faraon dan lepase, zot pou konnen ki se Zeova ki pe azir kont zot. (Egz. 8:1, 20; 14:25) An menm tan, Zeova pou onor son bann serviter fidel e montre klerman ki zot ti vreman son bann reprezantan.—Lir Ezekyel 2:5; 33:33. *

19. Ki mannyer nou kapab montre ki nou pe profit byen avek pasyans Zeova?

¹⁹ Ver lafen son dezyenm let, Pyer ti ekrir son bann konpanyon Kretyen: “Konsider pasyans nou Senyer konman en mwayen pour sov nou.” (2 Pyer 3:15) Wi, annou kontinyen profit byen pasyans Zeova. Ki mannyer? Devlop bann kalite ki fer li plezir, reste ‘pir e san defo,’ annan sa bon latitid anver bann leprev e reste preokipe pour pres lo Rwayonm. Si nou fer sa, nou pou parmi sa bann ki pou ganny bann benediksyon eternel ki pou posib atraver sa ‘nouvo lesyel ek nouvo later.’—2 Pyer 3:13.

[Not anba paz]

Eski ou rapel?

• Ki mannyer nou kapab devlop bann kalite ki Bondye i annan?

• Dan ki fason nou kapab reste ‘pir e san defo’?

• Ki nou kapab aprann avek Zozef ek Naomi?

• Akoz i en gran privilez pour partisip dan predikasyon?

[Kestyon]

[Portre lo paz 21]

Kwa ki pou ed en msye marye ek son fanmir devlop bann kalite ki Bondye i annan?

[Portre lo paz 23]

Ki nou aprann avek lafason ki Zozef ti fer fas avek leprev?