“Lespri i egzamin . . . bann keksoz profon Bondye”

“Lespri i egzamin tou keksoz, menm bann keksoz profon Bondye.”—1 KOR. 2:10, NW.

1. Ki rol lespri sen i zwe ki Pol ti met lanfaz lo la dan 1 Korentyen 2:10 e ki kestyon ki ganny souleve?

PA NOU vreman kontan led lespri sen Zeova! Labib i koz lo lespri sen konman en konseye oubyen led, konman en kado, en temwen e i osi dir ki i pled pour nou. (Zan 14:16; Akt 2:38; Rom. 8:16, 26, 27) Zapot Pol ti met lanfaz lo en lot rol enportan ki lespri sen i zwe kan i ti dir: “Lespri i egzamin tou keksoz, menm bann keksoz profon Bondye.” (1 Kor. 2:10, NW) Vreman alor, Zeova i servi son lespri sen pour revel bann laverite ki vreman profon. San sa led, ki mannyer nou ti pou arive konpran bann plan Zeova? (Lir 1 Korentyen 2:9-12, NW) Par kont, plizyer kestyon i ganny souleve: Ki mannyer ‘lespri i egzamin bann keksoz profon Bondye’? Atraver lekel Zeova ti revel sa bann keksoz dan premye syek Nou Lepok? Dan ki fason e atraver lekel lespri sen pe egzamin bann keksoz profon dan nou letan?

2. Ki sa de fason lespri sen i travay?

² Zezi ti montre ki lespri sen i travay dan de fason. En pti pe letan avan son lanmor, i ti dir son bann zapot: “Konseyer, [oubyen “sa led,” NW] Lespri-sen ki mon Papa pou anvoye an mon non, pou ansenny zot tou keksoz, e fer zot rapel tou sa ki mon’n dir zot.” (Zan 14:26) Lespri sen ti pou alor azir konman en ansenyan e fer zot rapel sa ki zot in aprann. Konman en ansenyan, i ti pou ed bann Kretyen pour konpran bann keksoz ki zot pa ti pe konpran oparavan. I ti pou osi ed zot rapel e aplik sa ki’n ganny eksplike parey i devret.

Dan premye syek

3. Ki parol Zezi ti dir ki montre ki “bann keksoz profon Bondye” ti pou ganny revele ptitapti?

³ Zezi li menm ti ansenny son bann disip en kantite nouvo keksoz. Kantmenm sa, zot ti annan ankor en kantite pour aprann.  Zezi ti dir son bann zapot: “Mon annan ankor en kantite keksoz pou dir zot, me zot pa kapab siport tousala pour le moman. Kan Lespri laverite i vini, i pou gid zot dan laverite an antye.” (Zan 16:12, 13) La Zezi ti pe montre ki atraver lespri sen, bann keksoz profon ti pou ganny revele progresivman.

4. Zour Lapannkot lannen 33 Nou Lepok, ki mannyer lespri sen ti azir konman en ansenyan e ed bann disip rapel sa ki zot ti’n aprann?

⁴ Zour Lapannkot lannen 33 Nou Lepok, “Lespri laverite” ti arive e i ti ganny verse lo apepre 120 Kretyen ki ti’n rasanble Zerizalenm. I ti annan laprev vizib e konkret ki sa ti leka. (Akt 1:4, 5, 15; 2:1-4) Bann disip ti koz lo “bann mervey ki Bondye in fer,” dan diferan langaz. (Akt 2:5-11) La ti lemoman pour en nouvo keksoz ganny revele. Profet Yoel ti’n deza fini predir ki lespri sen ti pou ganny verse. (Yoel 2:28-32) Bann ki ti pe get sa ki ti pe pase ti pe vwar lakonplisman sa profesi dan en fason ki ni enn parmi zot pa ti pe ekspekte, e zapot Pyer ti pran laparol pour eksplik sa ki ti pe pase. (Lir Akt 2:14-18.) Dan sa fason, lespri sen ti pe azir konman en ansenyan, i ti fer Pyer konpran klerman ki sa ki bann disip ti pe pas atraver ti pe akonplir sa profesi ki lontan ti’n ganny predir. Lespri sen ti ed Pyer pour pa zis rapel e sit sa ki Yoel ti’n ekrir, me i ti osi fer li sit de psonm David. (Ps. 16:8-11; 110:1; Akt 2:25-28, 34, 35) Sa ki sa bann ki ti prezan ti vwar e tande ti vreman bann keksoz profon Bondye.

5, 6. (a) Apre Lapannkot 33 Nou Lepok, ki kestyon enportan konsernan nouvo lalyans ki ti merit ganny reponn? (b) Lekel ki ti soulev sa bann kestyon e ki mannyer desizyon ti ganny pran?

⁵ I ti annan bokou keksoz osi ki ti merit ganny eklersi pour sa bann Kretyen dan premye syek. Par egzanp, i ti annan kestyon lo sa nouvo lalyans ki ti konmans pran lefe sa zour Lapannkot. Eski zis bann Zwif ek bann ki ti’n konverti dan larelizyon Zwif ki ti form parti dan sa nouvo lalyans? Eski bann ki pa ti Zwif ti kapab ganny aksepte zot osi e ganny swazir avek lespri sen? (Akt 10:45) Eski bann zonm ki pa ti Zwif ti merit ganny sirkonsi avan e soumet avek Lalwa Moiz? (Akt 15:1, 5) Sa ti bann kestyon vreman enportan. Lespri sen Zeova ti devret egzamin sa bann keksoz profon. Me, atraver lekel i ti pou travay?

⁶ Se atraver bann frer responsab ki sak sa bann kestyon ti ganny demande avek konsey direkter. Pyer, Pol ek Barnabas ti kot renyon konsey direkter e zot ti rakonte konman Zeova ti pe tret bann non-Zwif ki pa ti sirkonsi. (Akt 15:7-12) Apre ki zot ti’n egzamin levidans konkret dan sa ki Lekritir Ebre i dir e avek led lespri sen, konsey direkter ti fer en desizyon. Apre sa, zot ti enform bann kongregasyon lo zot desizyon atraver let.—Lir Akt 15:25-30; 16:4, 5; Efe. 3:5, 6.

7. Atraver kwa bann laverite profon ti ganny revele?

⁷ Lezot size ti ganny eklersi atraver bann lekritir enspire ki Zan, Pyer, Zak ek Pol ti ekrir. Me en serten letan apre ki Lekritir Kretyen ti konplete, don pour profetize e revel konnesans atraver mirak ti arete. (1 Kor. 13:8) Eski lespri sen ti pou kontinyen azir konman en ansenyan e ed zot rapel sa ki zot ti’n aprann? Eski i ti pou kontinyen ed bann Kretyen pour egzamin bann keksoz profon Bondye? Profesi i montre ki i ti pou kontinyen.

Pandan letan lafen

8, 9. Lekel ki ti pou “briye” avek konprenezon spirityel pandan letan lafen?

⁸ Ler i ti pe koz lo letan lafen, en lanz ti dir: “Bann ki annan bon zizman pou briye konman lalimyer dan latmosfer; e bann ki pe anmenn bokou ver ladrwatir, pou briye parey zetwal, pour en letan endefini, wi pour touzour. . . . Sa vre konnesans pou  annabondans.” (Dan. 12:3, 4) Lekel sa bann ki ti pou annan bon zizman e lekel ki ti pou briye? Zezi ti donn en lide dan son parabol lo dible ek move zerb. Ler i ti pe koz lo “lafen” sa lemonn i ti dir: “Alor, sa bann ki obei Bondye pou briye parey soley dan Rwayonm zot Papa.” (Mat. 13:39, 43) Dan son leksplikasyon, Zezi ti dir ki sa “bann ki drwat” i “bann garson rwayonm,” setadir bann Kretyen swazir.—Mat. 13:38, NW.

⁹ Eski tou Kretyen swazir ti pou “briye”? Dan en sans, wi, parski tou Kretyen i merit partisip dan predikasyon, fer disip e batir kanmarad dan renyon. Bann Kretyen swazir ti pou donn legzanp. (Zeka. 8:23) Par kont, an plis ki sa, bann keksoz profon ti pou ganny revele diran letan lafen. Menm sa profesi ki Danyel ti ekrir ti ganny “sele” ziska sa letan. (Dan. 12:9) Dan ki fason e atraver lekel lespri sen ti pou egzamin sa bann keksoz profon?

10. (a) Atraver lekel lespri sen i revel bann laverite profon pandan bann dernyen zour? (b) Eksplike ki mannyer laverite lo gran tanp spirityel Zeova ti ganny eklersi.

¹⁰ Dan nou letan, kan in ler pour eklersi en pwen spirityel, lespri sen i ed bann reprezantan sa “lesklav fidel e pridan” kot  biro prensipal Temwen Zeova pour konpran bann laverite o profon ki oparavan zot pa ti konpran. (Mat. 24:45, NW; 1 Kor. 2:13) Tou manm Konsey Direkter i egzamin bann leksplikasyon ki ganny aziste. (Akt 15:6) Sa ki zot aprann zot pibliye apre pour ki nou tou nou benefisye. (Mat. 10:27) Anmezir letan i pase, lezot leksplikasyon i kapab neseser e sa osi i ganny eksplike onnetman.—Vwar bwat “Konman ki lespri sen in revel sinifikasyon tanp spirityel.”

Benefisye avek rol lespri sen dan nou letan

11. Ki mannyer bann Kretyen ozordi i benefisye avek lespri sen ler i pe revel bann keksoz profon Bondye?

¹¹ Tou Kretyen fidel i benefisye avek rol ki lespri sen i annan pour revel bann keksoz profon Bondye. Parey bann Kretyen dan premye syek, nou osi ozordi nou etidye e plitar rapel e aplik bann lenformasyon ki lespri sen i ed nou konpran. (Lik 12:11, 12) I pa neseser ki nou fer bann gran gran letid pour konpran bann laverite profon ki’n ganny pibliye. (Akt 4:13) Ki mannyer nou kapab konpran pli byen ankor bann keksoz profon Bondye? Egzamin detrwa sizesyon.

12. Kan ki nou devret priye pour ganny lespri sen?

¹² Priye pour ganny lespri sen. Zis avan nou egzamin en lenformasyon baze lo Labib, nou premyerman bezwen priye pour lespri sen gid nou. Sa i vre, menm kan nou tousel ouswa nou napa bokou letan. Bann lapriyer koumsa ki demontre limilite i sirman fer leker Zeova kontan. Parey Zezi ti montre, Zeova pou donn son lespri sen gratwitman si nou demann li avek senserite.—Lik 11:13.

13, 14. Ki rol preparasyon renyon i zwe pour nou konpran bann keksoz profon Bondye?

¹³ Prepar ou bann renyon. Lesklav fidel i donn nou nou “manze kan i ler.” Sa “lesklav” i akonplir son travay kan i donn nou bann lenformasyon baze lo Labib e organiz bann progranm letid ek renyon. I annan bann bon rezon akoz zot demann “tou lasosyasyon bann frer” pour egzamin serten lenformasyon. (1 Pyer 2:17, NW; Kol. 4:16; Zid 3) Nou korpere avek lespri sen kan nou fer tou sa ki nou kapab pour obeir sa ki nou ganny demande pour fer.—Rev. 2:29.

¹⁴ Kan nou pe prepare pour renyon kongregasyon, i byen pour nou get bann verse Labib ki pa’n ganny site e esey konpran konman ki sak verse i relye avek sa size ki pe ganny egzaminen. Si nou fer sa, ptitapti nou pou pli byen konpran Labib. (Akt 17:11, 12) Ler nou get sa bann verse, sa i annan en lefe lo nou lespri e lespri sen pou kapab ed nou rapel apre. Deplis, si nou get sa verse dan Labib li menm, i pou pli fasil rapel kote sa verse i ete.

15. Akoz nou devret reste azour avek bann lenformasyon ki ganny pibliye e ki mannyer nou kapab fer sa?

¹⁵ Reste azour. Serten lenformasyon ki ganny enprimen pa ganny egzaminen dan renyon, me in ganny fer pour nou byennet.  Menm bann lartik dan nou bann magazin ki ganny distribye avek manm piblik in ganny prepare avek nou antet. Dan sa lemonn konplike, souvan nou bezwen esper en dimoun ouswa en keksoz. Si nou mars avek en piblikasyon ki nou pa ankor lir ouswa ki nou’n lir zis en bout, nou pou kapab sezi sa bann loportinite pour lir en bout dan sa piblikasyon. Serten i gard zot azour par ekout lanrezistreman sa bann piblikasyon anmezir zot pe marse ouswa pe vwayaze dan en transpor. Tou sa bann resers profon ki’n ganny prezante dan en fason senp, i ogmant nou lapresyasyon pour bann keksoz spirityel.—Aba. 2:2.

16. Ki byenfe nou gannyen kan nou pran not ouswa rod larepons bann kestyon ki vin dan nou lespri?

¹⁶ Medite. Kan ou pe lir Labib ouswa en piblikasyon ki baze lo Labib pran letan pour reflesir. Anmezir ou swiv sa lide ki pe ganny devlope, i kapab ki ou pou annan serten kestyon. Ou kapab ekrir sa bann kestyon e rod lenformasyon lo zot pli tar. Souvan ler nou rod plis lenformasyon lo en keksoz ki nou’n vwar enteresan, se la ki nou pe vreman etidye o profon. Sa konprenezon ki nou gannyen pou form parti nou trezor personnel ki nou kapab tir ladan kan i neseser.—Mat. 13:52.

17. Ki progranm ou swiv pour ou letid an fanmir ouswa letid personnel?

¹⁷ Fikse en letan pour ador Bondye an fanmir. Konsey Direkter in ankouraz nou tou pour met en zour swar dekote oubyen en lot moman dan lasemenn pour etidye personnelman ouswa an fanmir. Sanzman ki’n ­arive dan nou renyon in fer li posib pour nou aplik sa konsey. Ki ou diskite sa zour ki ou pe ador Bondye an fanmir? Serten i lir Labib, fer resers lo bann verse ki soulev bann kestyon dan zot lespri e met en pti not dan zot Labib pour eksplik sa pwen. Bokou fanmir i pran letan pour gete ki mannyer ­lenformasyon ki zot etidye i aplik avek zot. Serten sef fanmir in swazir bann lenformasyon ki zot in santi i merit ganny egzaminen ouswa size ki merit ganny adrese ouswa ­kestyon ki lafanmir in demande pour egzaminen. San okenn dout, ou pou mazin lezot size pour egzaminen anmezir letan i pase. *

18. Akoz nou pa devret ezite pour etidye bann keksoz profon dan parol Bondye?

¹⁸ Zezi ti dir ki lespri sen ti pou azir konman en konseye oubyen led. Alor, nou pa devret ezite pour etidye bann laverite profon ki dan Parol Bondye. Bann tel laverite i form parti bann “konnesans konsernan Bondye” ki presye e ki nou ganny ankouraze pour egzaminen. (Lir Proverb 2:1-5. *) Zot revel bann keksoz ki “Bondye in prepare pour bann ki kontan li.” Anmezir nou fer bokou zefor pour aprann plis lo Parol Zeova, lespri sen pou ed nou, akoz “lespri i egzamin tou keksoz, menm bann keksoz profon Bondye.”—1 Kor. 2:9, 10, NW.

[Not anba lo paz]

Ki ou pou reponn?

• Ki sa de fason lespri sen i ed nou pour egzamin “bann keksoz profon Bondye”?

• Atraver lekel lespri sen ti revel bann laverite profon dan premye syek?

• Ki mannyer lespri sen i travay pour eklersi bann pwen dan nou letan?

• Ki ou kapab fer pour benefisye avek rol lespri sen?

[Kestyon]

[Bwat lo paz 30]

Konman ki lespri sen in revel sinifikasyon tanp spirityel

Parmi bann “keksoz profon Bondye” ki’n ganny revele dan premye syek, i annan tabernak e pli tar bann tanp, ki ti pe reprezant en pli gran keksoz spirityel ki zapot Pol ti apel sa ‘vre latant ki’n ganny etabli non pa par lanmen en zonm, me par Senyer.’ (Ebr. 8:2) Sa ti en gran tanp spirityel, i ti en laranzman pour nou annan sa posibilite pour apros Bondye gras a sakrifis ek rol Zezi Kri konman Gran Pret.

Sa ‘vre latant’ ti vin an egzistans lannen 29 N.L. kan Zezi ti ganny batize e Zeova ti aksepte li konman sa enn ki ti pou vin en sakrifis parfe. (Ebr. 10:5-10) Apre ki Zezi ti mor e resisite, i ti antre dan Tre Sen sa tanp spirityel e prezant valer son sakrifis “devan Bondye.”—Ebr. 9:11, 12, 24.

Dan en lot verse, zapot Pol ti ekrir ki bann Kretyen swazir ti pe “grandi pour form en Tanp sen ini avek Senyer [“Zeova,” NW].” (Efe. 2:20-22) Eski sa tanp ti parey avek sa ‘vre latant’ ki i ti dekrir pli tar dan son let pour bann Ebre? Pour plizyer dizenn lannen bann serviter Zeova ti panse ki i ti leka. I ti paret ki bann Kretyen swazir ti pe ganny prepare lo later pour zot kapab vin “bann ros” dan tanp Zeova ki dan lesyel.—1 Pyer 2:5.

Par kont, ver lannen 1971, bann reprezantan sa lesklav ti konpran ki sa tanp ki Pol ti pe koz lo la avek bann Efezyen pa ti kapab gran tanp spirityel Zeova. Si bann Kretyen swazir ki ti’n resisite ki ti form sa ‘vre latant,’ i ti pou’n premyerman bezwen vin an egzistans apre ki zot rezireksyon ti konmanse pandan “retour [oubyen “prezans,” NW] Senyer.” (1 Tesa. 4:15-17) Me ler i ti pe refer avek tabernak, Pol ti ekrir: “Sa [tanp] i senbol ki reprezant letan prezan.”—Ebr. 9:9, nou ki’n met an italik.

Ler nou konpar byen sa bann verse ek lezot ankor, i ti vin pli kler pour nou ki sa tanp spirityel pa pe ganny konstrir la konmela e bann Kretyen swazir pa “bann ros” ki pe ganny prepare lo later pour form parti sa tanp. O kontrer, bann Kretyen swazir pe servi dan lakour tanp e dan konpartiman Sen dan sa tanp spirityel, tou le zour zot “rann glwar” oubyen ofer Bondye sakrifis louanz.—Ebr. 13:15.

[Portre lo paz 31]

Ki mannyer nou kapab ogmant nou konprenezon lo “bann keksoz profon Bondye”?