Partisip plennman dan sa gran rekolt spirityel

“Montre touzour plis lentere dan travay Senyer.”—1 KOR. 15:58.

1. Ki Zezi ti envit son bann disip pour fer?

PANDAN ki i ti pe vwayaze dan rezyon Samari ver lafen lannen 30 Nou Lepok, Zezi ti aret en kou kot en pwi o bor lavil Sikar pour li repoze. I ti dir son bann disip: “Lev lizye e get byen bann plantasyon, bann lagrenn in mir e in pare pour larekolt.” (Zan 4:35) Zezi pa ti pe refer avek sa rekolt ki ganny fer normalman, me i ti pe refer avek sa rekolt senbolik, setadir rasanbleman bann dimoun ki annan sa bon kondisyon leker ki ti pou vin son bann disip. Anfet, son parol ti pe montre ki aksyon ti devret ganny pran. I ti annan bokou travay pour fer e ti napa bokou letan pour fer sa travay.

2, 3. (a) Kwa ki montre ki nou pe viv dan letan larekolt? (b) Ki nou pou egzaminen dan sa lartik?

² Parol Zezi konsernan en rekolt i annan en sinifikasyon spesyal dan nou letan. Nou pe viv dan en letan kot sa plantasyon, setadir limanite i “mir pour larekolt.” Tou le-z-an, plizyer milyon dimoun i ganny envite pour aprann laverite ki donn lavi e en kantite nouvo disip i ganny batize. Nou, nou annan sa gran privilez pour partisip dan sa travay rekolt pli enportan ki tou, anba sipervizyon Zeova, Met larekolt. Eski ou pe “montre touzour plis lentere” dan travay rekolt?—1 Kor. 15:58.

³ Pandan sa trwa-z-an edmi ki i ti pase pour akonplir son minister lo later, Zezi ti prepar son bann disip pour zot travay konman bann zouvriye larekolt. Sa lartik pou egzamin trwa parmi bann leson enportan ki Zezi ti ansenny son bann disip. Sak leson i met lanfaz lo en kalite ki annan gran valer anmezir nou fer bokou zefor pour fer tou sa ki nou kapab dan sa travay pour rekolte bann disip dan en fason senbolik dan nou letan. Annou egzamin sa bann kalite enn par enn.

Limilite i vreman enportan

4. Ki legzanp Zezi ti servi pour montre lenportans limilite?

⁴ Esey vwar sa senn dan ou lespri: Bann disip fek pe dispit antre zot konsernan lekel ki pli enportan. Zot ankor annan dout lo zot figir e i evidan ki zot ankor ankoler. Alor, Zezi i kriy en pti zanfan pour vin debout parmi zot. I atir zot latansyon lo sa zanfan e i dir: “Sa ki pli gran dan Rwayonm lesyel i sa enn ki abes li [oubyen “sa ki fer li ptipti,” Byington] e vin parey sa zanfan.” (Lir Matye 18:1-4.) Olye mazin parey lemonn ki ziz en dimoun dapre son pouvwar, larises ek pozisyon, bann disip Zezi ti devret konpran ki zot lenportans ti tou depan lo si zot ti pe montre ki zot “ptipti” dan lizye lezot. Zeova ti pou beni zot e servi zot si zot ti annan vre limilite.

5, 6. Akoz ou devret annan limilite pour partisip plennman dan travay rekolt? Donn en legzanp.

⁵ Ziska aprezan, bokou dimoun dan lemonn i pas tou zot letan tay deryer pouvwar, larises ek pozisyon. Pour fini kont, zot napa bokou letan ouswa napa ditou letan pour bann keksoz spirityel. (Mat. 13:22) De lot kote, pep Zeova i ere pour ‘fer zot ptipti’ dan lizye lezot pour ki zot ganny benediksyon ek laprouvasyon Met larekolt.—Mat. 6:24; 2 Kor. 11:7; Fili. 3:8.

 ⁶ Egzamin legzanp Francisco, en ansyen Sid Lanmerik. Ler i ti en zenn onm, i ti kit liniversite pour li vin en pionye. I rapel: “Pli tar, apre mon fiyansay, mon ti’n kapab ganny en louvraz ki ti pou anmenn en kantite benefis finansyel pour mwan ek mon madanm. Me o kontrer, nou ti deside pour viv en lavi senp e kontinyen antreprann servis a plen tan ansanm. Pli tar, nou ti ganny zanfan e sa ti anmenn lezot defi ankor. Me Zeova in ed nou pour reste ferm avek nou desizyon.” Francisco i konklir: “Pour plis ki 30 an, mon’n kontan pour servi konman en ansyen an plis ki lezot responsabilite spesyal ki mon’n annan. Mon pa’n zanmen regrete ki mon’n swazir pour viv en lavi senp.”

7. Ki ou’n fer pour aplik sa konsey dan Romen 12:16?

⁷ Si ou rezet bann keksoz dan sa lemonn ki kapab fer ou devlop “lorgey,” e frekant sa ki “pti-pti,” ou osi ou kapab ganny lezot benediksyon ek privilez dan sa travay rekolt.—Rom. 12:16; Mat. 4:19, 20; Lik 18:28-30.

Devouman i anmenn bon rezilta

8, 9. (a) Fer en rezimen lo parabol Zezi konsernan bann talan. (b) Lekel ki sirtou ganny ankouraze avek sa parabol?

⁸ Devouman i en lot kalite ki neseser pour nou partisip plennman dan sa travay rekolt. Zezi ti montre sa dan son parabol lo bann talan. * Sa parabol i koz lo en zonm ki avan i ti al en vwayaz i ti konfye son byen avek trwa son serviter. Sa premye serviter ti ganny senk talan, sa dezyenm ti ganny de e sa trwazyenm enn. Apre ki zot met ti’n ale, sa de premye serviter ti prouv zot devouman e deswit zot ti al “fer komers” avek zot talan. De lot kote, sa trwazyenm serviter li, i ti “pares.” I ti kasyet son talan dan later. Ler met ti retournen, i ti rekonpans sa de premye serviter par met zot “ansarz en pli gran sonm.” I ti pran sa talan ki i ti’n donn sa trwazyenm serviter e pous li se li.—Mat. 25:14-30.

⁹ San okenn dout, ou annan sa dezir dan ou leker pour imit devouman sa de premye serviter dan parabol Zezi e partisip plennman dan sa travay pour fer disip. Me si ou sirkonstans pa permet ou fer plis ki ou pe deza fer? Petet problenm ekonomik grav i fors ou pour travay plis letan pour pran swen avek ou fanmir. Ouswa petet ou nepli annan sa lafors ek lasante ki ou ti annan kan ou ti ankor zenn. Si sa i leka, sa parabol lo talan i annan en mesaz ankourazan pour ou.

10. Ki mannyer sa met dan sa parabol ti montre ki i ti rezonnab e akoz sa i ankourazan pour ou?

 ¹⁰ Remarke ki sa met dan sa parabol ti konnen ki sak serviter ti annan diferan abilite. I ti endik sa kan i ti donn zot zot talan “sakenn selon son kapasite.” (Mat. 25:15) Parey i ti pe ekspekte, sa premye serviter ti prodwir plis ki sa enn dezyenm. Par kont, sa met ti rekonnet devouman sa de serviter, i ti dir ki zot ti “bon e fidel” e i ti donn zot menm rekonpans. (Mat. 25:21, 23) Pareyman, Zeova, Met rekolt i konnen ki nou sirkonstans i annan lefe lo sa ki nou nobou fer dan servis pour li. I pou sirman rekonnet zefor ki nou fer avek tou nou leker pour servi li e i pou rekonpans nou dapre sa ki nou kapab fer.—Mark 14:3-9; lir Lik 21:1-4.

11. Donn legzanp pour montre ki devouman dan moman difisil i kapab anmenn bon rezilta.

¹¹ Legzanp Selmira, en ser Brezil i montre ki devouman dan servis Bondye pa depan lo si nou dan byen. Ven-t-an pase, msye Selmira ti ganny fiziye a mor dan en vol e sa in kit li deryer avek trwa zanfan pour sonnyen. I ti travay byen dir konman en nennenn e fer bann vwayaz fatigan dan bann transpor plen avek dimoun. Malgre sa bann difikilte, i ti aranz son progranm pour ki i kapab servi konman en pionye ordiner. De parmi son trwa fiy ti pli tar zwenn ansanm avek li dan servis pionye. I ti rakonte: “Pandan bann lannen ki’n pase, mon’n etidye Labib avek plis ki 20 dimoun e zot in form par mon ‘fanmir.’ Ziska aprezan, mon apresye zot lanmour ek lanmitye. I en trezor ki larzan pa kapab aste.” Met larekolt in sirman rekonpans Selmira pour son devouman!

12. Ki mannyer nou kapab demontre devouman dan predikasyon?

¹² Si ou sityasyon aktyel pa permet ou pas bokou letan dan minister, ou kapab esey ogmant ou partisipasyon dan sa travay rekolt par fer ou minister pli prodiktif. Si ou aplik bann sizesyon pratik ki ganny donnen dan Renyon Servis, sa pou ed ou amelyor ou abilite e rod bann nouvo loportinite pour rann temwannyaz. (2 Tim. 2:15) Si i posib osi, ou kapab sanz ou progranm ouswa aret fer bann keksoz ki pa enportan pour ki ou kapab siport kongregasyon dan predikasyon regilyerman.—Kol. 4:5.

13. Kwa ki pou ed nou devlop e gard nou devouman?

¹³ Gard antet ki devouman i sorti dan en leker rekonesan. (Ps. 40:8) Sa trwazyenm serviter dan parabol Zezi ti per son met, i ti vwar son met konman en dimoun ki demann tro bokou e ki pa rezonnab. Pour fini kont, i ti kasyet sa talan ki i ti’n gannyen olye servi li pour ogmant byen son met. Pour evit en tel latitid neglizan, nou devret devlop e gard en bon relasyon avek Zeova, Met rekolt. Met letan dekote pour etidye e medit lo son bann kalite atiran parey son lanmour, pasyans ek mizerikord. Dan sa fason ou pou santi ou ganny motive avek tou ou leker pour fer ou mye dan servis pour li.—Lik 6:45; Fili. 1:9-11.

“Vin sen”

14. Ki bann ki anvi vin en travayer rekolt i bezwen fer?

¹⁴ Zapot Pyer ti sit Lekritir Ebre e eksprim lavolonte Bondye pour son bann serviter fidel lo later an dizan: “Parey Bondye ki’n apel zot i sen, zot osi, vin sen dan tou zot kondwit. Annefe, Lekritir i dir, ‘Vin sen parey mwan mon sen.’” (1 Pyer 1:15, 16; Lev. 19:2; Det. 18:13) Sa parol i met lanfaz lo sa lenportans pour bann zouvriye larekolt reste prop moralman e spirityelman. Si nou pran sa bann pa neseser, nou pou reisi ganny lave dan en sans senbolik. Ki mannyer sa i kapab ganny fer? Avek led parol Bondye.

15. Parol Bondye i annan pouvwar pour fer kwa pour nou?

¹⁵ Parol Bondye ki laverite i ganny konpare  avek delo ki pirifye. Par egzanp, zapot Pol ti ekrir ki kongregasyon bann Kretyen swazir i prop dan lizye Bondye, parey en nouvel marye ki pir pour Kris, ki ti lav zot “par delo ek son parol . . . , [pour ki i] sen, san defo.” (Efe. 5:25-27) Pli boner, Zezi osi ti’n koz lo pouvwar ki parol Bondye ki i ti anonse i annan pour pirifye. Ler i ti pe koz avek son bann disip, Zezi ti dir: “Lansennyman ki mon’n donn zot, in deza pirifye zot.” (Zan 15:3) Alor, Parol Bondye ki laverite i annan sa pouvwar pour pirifye en dimoun moralman e spirityelman. Pour Bondye aksepte nou ladorasyon, fodre absoliman nou les son parol pirifye nou.

16. Dan ki fason nou kapab reste pir moralman e spirityelman?

¹⁶ Alor, pour nou vin bann zouvriye dan rekolt Zeova, nou premyerman bezwen aret pratik bann move keksoz ki kapab sali nou moralman e spirityelman. Wi, pour arive kapab kontinyen kalifye pour sa privilez konman en zouvriye larekolt, nou bezwen kontinyen siport standar moral e spirityel Zeova ki tre o nivo. (Lir 1 Pyer 1:14-16.) Zis parey nou abitye pran swen avek nou lekor, nou bezwen regilyerman les parol Bondye pirifye nou. Sa i enkli, lir Labib e asiste bann renyon. I osi vedir fer zefor senser pour aplik bann rapel Zeova dan nou lavi. Si nou fer sa, sa pou ed nou lalit avek nou tandans pour fer pese ek lenfliyans sa lemonn ki kapab kontamin nou. (Ps. 119:9; Zak 1:21-25) Wi, eski pa i rekonfortan pour konnen ki avek led parol Bondye nou bann pese grav i kapab “ganny lave”!—1 Kor. 6:9-11.

17. Pour reste pir, ki konsey Labib nou merit swiv?

¹⁷ Eski ou les Labib pirifye ou dan ou lavi? Par egzanp, ki ou reaksyon kan ou ganny averti konsernan danze bann divertisman degradan ki sa lemonn i ofer? (Ps. 101:3) Eski ou evite annan lanmitye tro pros avek bann kanmarad lekol ek koleg travay ki napa menm krwayans avek ou? (1 Kor. 15:33) Eski ou pe fer bokou zefor senser pour sirmont ou bann febles ki kapab fer ou paret enpir dan lizye Zeova? (Kol. 3:5) Eski ou evite mel dan bann konfli politik e evit sa leta lespri patriyotik ki egziste dan bann konpetisyon sportif?—Zak 4:4.

18. Si nou reste pir moralman e spirityelman, ki mannyer sa pou ed nou pour vin bann zouvriye larekolt ki efikas?

¹⁸ Si ou obeir fidelman dan sa bann domenn, sa pou anmenn bon rezilta. Ler i ti pe konpar son bann disip swazir avek brans en pye rezen, Zezi ti dir: “Tou brans ki raporte [mon Papa] i tay zot pour fer zot raport ankor plis fri.” (Zan 15:2, nou ki’n met an italik.) Anmezir ou les lansennyman Labib pirifye ou, ou pou prodwir plis fri ankor.

Benediksyon la konmela e dan lavenir

19. Dan ki fason bann disip Zezi ti ganny beni konman bann zouvriye larekolt?

¹⁹ Bann disip fidel ki ti met an pratik sa formasyon ki Zezi ti donn zot ti resevwar lespri sen zour Lapannkot lannen 33 N.L. e zot ti pou vin bann Temwen “ziska tou bann landrwa pli elwannyen lo later.” (Akt 1:8) Zot ti servi konman manm konsey ­direkter, misyonner ek ansyen, e zot ti zwe en gran rol pour pres sa bon nouvel “avek tou dimoun  dan lemonn antye.” (Kol. 1:23) Sirman zot ti’n bezwen ganny bann gran benediksyon e anmenn lazwa pour lezot!

20. (a) Ki benediksyon ou’n gannyen ler ou partisip dan sa travay rekolt? (b) Ki ou determinen pour fer?

²⁰ Wi, si nou demontre limilite, annan devouman e siport bann standar moral o nivo dan Parol Bondye, nou pou kontinyen partisip plennman dan sa travay rekolt spirityel ki pe deza ganny fer. Menm si i annan bokou ki pe soufer e fristre akoz fason viv sa lemonn ki tay deryer bann keksoz materyel ek plezir, nou, nou ganny bokou lazwa ek lakontantman. (Ps. 126:6) Sa ki pli enportan ankor se ki “dan Senyer [nou] travay pa anven.” (1 Kor. 15:58) Zeova, Met rekolt pou rekonpans nou eternelman ‘pour travay ki nou fer e lanmour ki nou demontre’ pour son non.—Ebr. 6:10-12.

[Not anba paz]

Eski ou rapel?

Anmezir ou fer bokou zefor pour partisip aktivman dan travay rekolt . . .

• akoz i enportan pour demontre limilite?

• ki mannyer ou kapab devlop e kontinyen reste devoue?

• akoz i enportan pour reste pir moralman e spirityelman?

[Kestyon

[Portre lo paz 25]

Limilite i kapab ed ou pour annan en lavi senp ki santre lo lentere Rwayonm