Sa ki zour Zeova pou revele

“Zour Zeova pou vin parey en voler, . . . later ek bann travay ki lo la pou ganny dekouver.”—2 PYER 3:10, NW.

1, 2. (a) Ki pou finalman arive avek sa move lemonn? (b) Ki kestyon nou pou egzaminen?

LAFASON ki sa move lemonn i marse i baze lo sa premye mansonz konmkwa zonm i kapab reisi diriz later san led Zeova. (Ps. 2:2, 3) Eski okenn keksoz ki baze lo mansonz i kapab reste pour touzour? Definitivman non! Me kantmenm sa, nou pa pou bezwen espere ki lemonn Satan i detrir son lekor li menm. O kontrer, Bondye ki pou detrir li dan son letan fikse e dan son fason. Lazistis ek lanmour Bondye pou ganny demontre dan lafason ki i pou pran aksyon kont sa move lemonn.—Ps. 92:7; Prov. 2:21, 22.

² Zapot Pyer ti ekrir: “Zour Zeova pou vin parey en voler, kot lesyel pou disparet en sel kou avek en gro tapaz, me bann eleman ki’n vreman so pou fonn, e later ek bann travay ki lo la pou ganny dekouver.” (2 Pyer 3:10, NW) Ki sa “lesyel” ek “later” ki Pyer ti pe koz lo la? Ki sa “bann eleman” ki pou fonn? Ki Pyer ti pe sey dir kan i ti dir ki “later ek bann travay ki lo la pou ganny dekouver”? Si nou konn larepons sa bann kestyon, sa pou ed nou prepar nou pour bann levennman efreyan ki pou arive tre byento.

Sa lesyel ek later ki pou disparet

3. Ki sa “lesyel” ki 2 Pyer 3:10 i koz lo la e ki mannyer i pou disparet?

³ Ler Labib i servi sa term “lesyel” dan en sans senbolik, i souvan pe refer avek bann pouvwar ki pe dirize, ki parlao zot sitwayen. (Iza. 14:13, 14; Rev. 21:1, 2) Sa “lesyel [ki] pou disparet” pe reprezant dominasyon imen lo sa lemonn ki elwannyen avek Bondye. Lefet ki zot pou disparet “en sel kou avek en gro tapaz,” i montre ki zot destriksyon pa pou tarde.

4. Ki sa “later” e ki mannyer i pou ganny detrir?

⁴ “Later” i reprezant bann imen dan lemonn ki elwannyen avek Bondye. Sa lemonn ti egziste dan letan Noe e i ti ganny detrir par Deliz atraver lord Bondye. Pyer ti dir: “Me lesyel ek later in ganny prezerve par sa menm parol, pour ganny detri par dife. I’n ganny garde pour sa zour zizman kan bann move dimoun pou ganny detri.” (2 Pyer 3:7) Deliz ti detrir tou bann move dimoun ansanm, tandis ki sa destriksyon ki pe vini pou ariv progresivman pandan “gran ladetres.” (Rev. 7:14, NW) Dan premye faz sa gran ladetres, Bondye pou motiv bann dirizan politik dan sa lemonn pour detrir “Gran Babilonn,” e sa pou alor montre son mepri pour sa prostitye relizye. (Rev. 17:5, 16; 18:8) Apre, dan faz final sa gran ladetres setadir zour Armagedon, Zeova li menm pou detrir larestan lemonn Satan.—Rev. 16:14, 16; 19:19-21.

“Bann eleman . . . pou fonn”

5. Sa bann eleman senbolik i enplik kwa?

⁵ Lekel sa “bann eleman” ki “pou fonn”? En diksyonner lo Labib i dir ki sa mo “eleman” i vedir “prensip ouswa keksoz  debaz.” Par egzanp, sa diksyonner i dir ki bann let alfabet i bann eleman oubyen keksoz prensipal dan en langaz. Alor, sa “bann eleman” ki Pyer ti koz lo la pe refer avek bann keksoz prensipal ki fer sa lemonn annan son bann move karakteristik, latitid, konportman ek bi. Sa “bann eleman” i enplik “lespri dapre lemonn” ki “travay dan bann zanfan dezobeisans.” (1 Kor. 2:12; lir Efezyen 2:1-3.) Sa leta lespri i partou kote dan lemonn Satan e i pous bann dimoun pour krwar, planifye, koze e azir dan bann fason ki reflekte leta lespri Satan, sa “sef pisans dan lespas” ki vantar e agresif.

6. Ki mannyer nou kapab idantifye lespri dapre lemonn?

⁶ Alor, ki swa zot konnen ouswa pa konnen, sa bann dimoun i les zot lespri ek leker ganny kontrole par Satan e sa i fer ki zot reflekte son fason panse ek latitid. Pour fini kont, zot fer sa ki zot oule e pa ni fatig zot avek lavolonte Bondye. Dan nenport sityasyon, zot azir avek lafyerte ouswa legoizm, zot demontre en latitid rebel anver lotorite e zot les ‘dezir natir imen, e dezir atraver lizye’ kontrol zot.—Lir 1 Zan 2:15-17. *

7. Akoz nou devret “protez [nou] leker”?

⁷ Eski pa i enportan alor ki nou “protez [nou] leker” par demontre lasazes sorti kot Bondye kan nou pe swazir nou zanmi, bann keksoz ki nou lir, divertisman ek bann sit ki nou al lo la lo Internet? (Prov. 4:23) Zapot Pol ti ekrir: “Fer atansyon ki zot pa tonm dan pyez personn avek zot bann fo largiman filozofi, ki pa baze lo Kris, me lasazes imen, e ki fonde lo tradisyon zonm, ek bann lespri ki kontrol lemonn.” (Kol. 2:8) Sa lord i vin pli irzan anmezir zour Zeova i aprose akoz sa ‘lasaler’ ekstraordiner pou fer fonn tou “bann eleman” lemonn Satan e zot pa pou kapab fer nanryen pour sap lasaler lakoler Zeova. Sa i fer nou rapel sa parol dan Malaki 4:1 ki dir: “Sa zour ki pe brile parey four pe vini, e tou bann ki annan lodas e tou bann ki pe fer sa ki mal i bezwen vin parey lapay. E sa zour ki pe vini pou sirman devor zot.”

“Later ek bann travay ki lo la pou ganny dekouver”

8. Ki mannyer later ek bann travay ki lo la pou ganny “dekouver”?

⁸ Ki Pyer ti pe dir kan i ti ekrir ki “later ek bann travay ki lo la pou ganny dekouver”? Sa mo “dekouver” i osi kapab ganny tradwir konman en keksoz “ki’n ganny devwale,” “ki nepli kasyet.” Pyer ti pe dir ki pandan gran ladetres, lemonn Satan pou nepli kapab kasyet nanryen, Zeova pou devwal son bann aksyon akoz i opoz Li ek Son Rwayonm e pour sa i merit destriksyon. Dan en sans profetik, ler pe koz lo sa letan, Izai 26:21 i dir: “Zeova pe sorti dan son plas pour fer zabitan sa pei rann kont pour zot lerer kont li, e sa pei pou sirman devwal disan ki’n ganny verse e pou nepli kouver bann ki’ganny touye.”

9. (a) Ki nou devret rezete e akoz? (b) Ki nou devret devlope e akoz?

⁹ Pandan zour Zeova, sa bann ki’n les sa lemonn ek son leta lespri kontrol zot pou montre sa ki zot vreman ete, zot pou menm touy kanmarad. Anfet, i kapab ki sa bann divertisman vyolan ki popiler dan nou letan pe enfliyans zot lespri e met zot pare pour sa letan kan sak dimoun “pou lev son lanmen kont son kanmarad.” (Zeka. 14:13) Eski pa i vreman enportan alor ki nou rezet okenn keksoz, ki swa film, liv, bann zwe video ek lezot ankor pour ki nou pa devlop bann move tre koumsa ki Zeova i  deteste tel ki vantardri ek lanmour pour vyolans! (2 Sam. 22:28; Ps. 11:5) O kontrer, annou devlop fri lespri, akoz bann kalite koumsa pou reziste lasaler sa dife senbolik.—Gal. 5:22, 23.

“En nouvo lesyel ek en nouvo later”

10, 11. Ki sa “nouvo lesyel” ek “nouvo later”?

¹⁰ Lir 2 Pyer 3:13. Sa “nouvo lesyel” i reprezant Rwayonm Bondye dan lesyel, ki ti ganny etablir an 1914 kan “letan bann nasyon” ti terminen. (Lik 21:24) Kris Zezi ek sa 144,000 ki pou rennyen ansanm avek li, ki laplipar in fini ganny zot rekonpans dan lesyel, zot ki form sa Rwayonm. Dan liv Revelasyon, sa bann Kretyen swazir i ganny dekrir konman en “lavil sent, Nouvel-Zerizalenm ki’n abiye pour son msye” sorti dan lesyel kot Bondye. (Rev. 21:1, 2, 22-24) Zis parey Zerizalenm lo later ti landrwa kot bann gouvernman dan ansyen Izrael ti rennyen, Nouvel Zerizalenm ek Nouvo marye pou form sa gouvernman dan nouvo lemonn. Sa lavil “sorti dan lesyel kot Bondye” pou diriz later.

¹¹ Sa “nouvo later” pe refer avek sa nouvo sosyete imen lo later ki pou’n demontre ki zot volonterman soumet avek Rwayonm Bondye. Sa paradi spirityel ki pep Bondye pe deza eksperyanse la konmela pou a lafen dizour pran son vre plas dan sa zoli “monn nouvo ki pe vini.” (Ebr. 2:5) Ki nou bezwen fer pour form parti sa nouvo lemonn?

Prepare pour gran zour Zeova

12. Akoz zour Zeova pou sirprann bann dimoun dan lemonn?

¹² Pol ek Pyer ti predir ki zour Zeova pou vin “konman en voler,” ansousekre e san ekspekte. (Lir 1 Tesalonisyen 5:1, 2.) Menm bann vre Kretyen ki pe ekspekte sa zour pou sirprann akoz i pou vin en sel kou. (Mat. 24:44) Par kont, bann dimoun dan lemonn zot, zot pou plis ki sirprann. Pol ti ekrir: “Kan dimoun [ki elwannyen avek Bondye] i ava pe dir: ‘Tou i an-pe e an sekirite,’ alor en sel kou destriksyon pou tonm lo zot, parey douler lakousman ki sezi en madanm ansent, e personn pa pou sape.”—1 Tesa. 5:3.

13. Ki mannyer nou kapab evite les nou ganny anbete par sa parol “tou i an-pe e an sekirite”?

¹³ Sa parol ki dir “tou i an-pe e an sekirite” i zis ankor en lot mansonz ki bann demon in envante; me sa pa pou anbet bann serviter Zeova. Pol ti ekrir: “Zot pa dan fernwanr, e sa zour pa pou sirprann zot parey en voler. Zot tou, zot bann zanfan lalimyer, bann zanfan lizour.” (1 Tesa. 5:4, 5) Alor, annou reste dan lalimyer, lwen avek lemonn Satan ki dan fernwanr. Pyer ti ekrir: “Me zot, mon bann byenneme, zot in ganny averti. Fer byen atansyon, pangar zot ganny antrennen par lerer sa bann move dimoun [bann fo ansenyan dan kongregasyon Kretyen] e ki zot perdi zot pozisyon solid.”—2 Pyer 3:17.

14, 15. (a) Ki mannyer Zeova i donn nou loner? (b) Ki parol enspire nou devret gard antet?

 ¹⁴ Remarke ki Zeova pa zis dir nou “fer byen atansyon” e se tou. O kontrer, i donn nou loner par “averti” nou davans sa ki pou arive an zeneral dan lavenir.

¹⁵ I malere pour dir toudmenm ki serten pa ni fatig zot ouswa zot menm kritik bann rapel konsernan lenportans pour reste eveye. Zot kapab menm dir: ‘I fer en pake lannen depi ki nou pe tann menm zafer.’ Par kont, sa bann dimoun i devret gard antet ki ler zot pe fer sa bann kalite remark, zot pa pe zis kestyonn sa lesklav fidel, me zot pe osi kestyonn Zeova ek son Garson. Zeova ti dir: “Kontinyen esper li.” (Aba. 2:3) Pareyman, Zezi ti dir: “Veye alor, akoz zot pa konnen ki zour zot Senyer pou arive.” (Mat. 24:42) Deplis, Pyer ti ekrir: “Parski tousala pou ganny detri, ki kalite lavi zot devre viv? Zot devre anmenn en lavi sen e annan respe pour Bondye, letan zot pe esper sa zour, an fezan zot mye pour fer sa zour vin pli vit.” (2 Pyer 3:11, 12) Lesklav fidel ek son Konsey Direkter pa pou zanmen pran sa bann parol serye alalezer!

16. Ki kalite latitid nou pa devret annan e akoz?

¹⁶ Vreman alor, sa lesklav ki “pa en bon serviter” pou tonm lo sa konklizyon ki son Met pe tarde. (Mat. 24:48) Sa move serviter i parmi sa group ki ganny dekrir dan 2 Pyer 3:3, 4. Pyer ti ekrir: “Dan dernyen zour pour annan bann moker” ki “an swivan zot prop dezir” pou sikann sa bann ki pe fidelman gard zour Zeova dan zot lespri. Wi, olye konsantre lo lentere Rwayonm, sa bann moker i konsantre lo zot lekor ek zot bann dezir egois. Annou pa zanmen devlop sa latitid dezobeisan e danzere! O kontrer, annou “konsider pasyans nou Senyer konman en mwayen pour sov nou,” par reste preokipe dan sa travay predikasyon Rwayonm e fer disip e pa enkyet tro bokou konsernan kan sa bann levennman pou arive akoz zis Zeova ki konnen.—2 Pyer 3:15; lir Akt 1:6, 7.

Annan konfyans dan sa Bondye delivrans

17. Ki mannyer bann Kretyen fidel ti reakte anver lord Zezi pour kit Zerizalenm e akoz?

¹⁷ Apre ki larme Romen ti anvair Zide an 66 N.L., premye loportinite ki zot ti gannyen, bann Kretyen fidel ti swiv lord Zezi pour sove dan lavil Zerizalenm. (Lik 21:20-23) Pour ki rezon zot pa ti ezite pour azir deswit? San dout, zot ti’n gard antet lavertisman Zezi. Sirman, zot ti pe ekspekte ki zot ti pou rankontre serten difikilte akoz zot desizyon, parski Zezi  ti’n fini dir zot sa. Me an menm tan, zot ti konnen ki Zeova pa zanmen abandonn sa bann ki fidel avek li.—Ps. 55:22.

18. Ki lefe parol Zezi dan Lik 21:25-28 i annan lo ou pwennvi konsernan gran ladetres?

¹⁸ Nou osi nou devret met tou nou konfyans dan Zeova, akoz zis li tousel ki kapab delivre nou kan sa lemonn ki nou pe viv ladan i pas atraver sa pli gran ladetres dan listwar imen. En serten letan apre konmansman gran ladetres, me avan ki Zeova i egzekit zizman lo larestan sa move lemonn, bann dimoun pou “tonm feb avek lafreyer dan lenkyetid konsernan sa ki pou arive lo later.” Par kont, letan ki bann lennmi Bondye pou tranble avek lafreyer, son bann serviter fidel zot, zot pou rezwir akoz zot pou konnen ki zot delivrans i pros.—Lir Lik 21:25-28.

19. Ki pou ganny egzaminen dan prosen lartik?

¹⁹ Wi, eski pa en lavenir merveye pe esper sa bann ki reste separe avek sa lemonn ek son “bann eleman”! Par kont, parey lot lartik pou montre, si nou anvi ganny lavi, nou bezwen fer plis ki zis evit bann move keksoz. Nou bezwen devlop bann kalite ki fer plezir Zeova e fer bann keksoz ki akseptab devan li.—2 Pyer 3:11.

[Not anba paz]

Eski ou kapab eksplike?

• Kwa ki ganny reprezante par . . .

sa ‘lesyel ek later’ aktyel?

“bann eleman”?

sa ‘nouvo lesyel ek nouvo later’?

• Akoz nou met tou nou konfyans dan Bondye?

[Kestyon]

[Portre lo paz 17]

Ki mannyer ou kapab “protez ou leker” e reste separe avek sa lemonn?

[Portre lo paz 18]

Ki mannyer nou montre ki nou pe “konsider pasyans nou Senyer konman en mwayen pour sov nou”?