Ki mannyer ranson i sov nou
Ki mannyer ranson i sov nou
“Tou dimoun ki krwar dan son Garson i ganny lavi eternel. Tou dimoun ki pa obei son Garson pa pou war lavi, me i ekspoz li anba lakoler Bondye.”—ZAN 3:36.
1, 2. Nonm en rezon akoz Zion’s Watch Tower ti ganny pibliye.
DAN katriyenm edisyon magazin Latour Veyer an Angle ki ti sorti an Oktob 1879, nou kapab trouv sa parol swivan: “Napa en etidyan Labib vreman serye ki pa pou enpresyonnen par sa lanfaz ki ganny mete lo lanmor Kris.” Sa lartik ti konklir avek sa refleksyon serye: “Nou devret rezet okenn lansennyman ki dir ki lanmor Kris pa en lofrann e pa permet ki pese i ganny pardonnen.”—Lir 1 Zan 2:1, 2.
2 Enn parmi bann rezon akoz Zion’s Watch Tower ti premyerman ganny pibliye an Zilyet 1879 ti pour defann sa lansennyman Labib lo ranson. Sa magazin ti donn “manze kan i ler” akoz ver lafen bann lannen 1800 bann dimoun ki ti dir zot Kretyen, ki ti pe ogmante ti konmans demande ki mannyer lanmor Zezi ti kapab kouver nou pese. (Mat. 24:45) Dan sa letan, en kantite dimoun ti’n konmans krwar dan sa teori lo evolisyon, en lide ki pa annakor avek larealite, setadir ki imen in gradyelman perdi zot leta parfe. Bann dimoun ki krwar dan evolisyon i ansennyen ki imen pe vin pli meyer lo zot menm e zot pa bezwen okenn ranson. Alor, i pour sa rezon ki zapot Pol ti konsey Timote: “Gard byen sa ki ou’n ganny konfye. Evit bann konversasyon vid e kontrer avek lafwa, ek bann fo largiman ki zot apel konnesans. Annefe, i annan serten, ki afors proklanm bann tel konnesans zot in fini par ekarte avek lafwa.”—1 Tim. 6:20, 21.
3. Ki kestyon ki pou ganny egzaminen?
3 San dout, ou determinen pour pa “ekarte avek lafwa.” Pour kapab gard ou lafwa for, i ti pou byen si ou konsider sa bann kestyon: Akoz mon bezwen sa ranson? Kwa ki ti enplike? Ki byenfe mon kapab gannyen atraver sa provizyon presye ki kapab sov mwan avek lakoler Bondye?
Nou kapab ganny delivre avek lakoler Bondye
4, 5. Kwa ki prouve ki sa move lemonn i anba lakoler Bondye?
4 Labib ek listwar limanite i montre ki depi ki Adan ti fer pese, bann imen ‘in ekspoz zot’ anba lakoler Bondye. (Zan 3:36) Sa i evidan akoz ziska aprezan napa en imen ki’n kapab sap lanmor. Dominasyon Satan ki opoz dominasyon Bondye pa’n arive protez imen kont tou bann maler, e napa en gouvernman ki’n kapab konble bann bezwen debaz tou zot sitwayen. (1 Zan 5:19) Alor lager, krim ek lapovrete i kontinyen ravaz limanite.
5 I kler alor, ki Zeova pa pe beni sa move lemonn. Pol ti dir: “Bondye i montre son lakoler depi lesyel pour tou bann pese” lo later. (Rom. 1:18-20) Alor, bann dimoun ki pa repantir e ki kontinyen viv en lavi ki pa fer plezir Bondye pa pou ganny eparnyen avek konsekans zot kondwit. Dimoun pe ganny enformen lo lakoler Bondye ozordi atraver sa mesaz zizman ki senbolikman pe ganny vide parey bann fleo lo lemonn Satan e nou vwar sa bann lenformasyon dan plizyer piblikasyon ki nou annan baze lo Labib.—Rev. 16:1.
6, 7. Ki travay bann Kretyen swazir pe dirize e ki posibilite sak dimoun ki form parti lemonn Satan i annan?
6 Eski sa i vedir ki i tro tar pour bann dimoun sorti anba dominasyon Satan e ganny laprouvasyon Bondye? Non, i touzour posib pour zot rekonsilye avek Zeova. Bann Kretyen swazir, ki “bann lanbasader Kris,” pe diriz sa travay predikasyon kot bann dimoun sorti dan tou nasyon i ganny envite pour “rekonsilye avek Bondye.”—2 Kor. 5:20, 21.
7 Zapot Pol ti dir ki Zezi pou “delivre nou avek lakoler Bondye ki pe vini.” (1 Tesa. 1:10) Finalman, Zeova pou eksprim son lakoler par detrir eternelman bann peser ki pa oule repantir. (2 Tesa. 1:6-9) Lekel ki pou ganny sove? Labib i dir: “Tou dimoun ki krwar dan son Garson i ganny lavi eternel. Tou dimoun ki pa obei son Garson pa pou war lavi, me i ekspoz li anba lakoler Bondye.” (Zan 3:36) Wi, tou dimoun ki vivan e ki demontre lafwa dan Zezi e dan sa ranson pa pou ganny detrir kan sa move lemonn i ariv ver son lafen lo sa dernyen zour lakoler Bondye.
Ki mannyer ranson i marse
8. (a) Ki sa gran lespwar Adan ek Ev ti annan? (b) Ki mannyer Zeova ti prouve ki i en Bondye ki annan lazistis parfe?
8 Adan ek Ev ti ganny kree parfe. Si zot ti’n reste obeisan anver Bondye, later ti pou aprezan ranpli avek zot bann desandans ki ti pou viv ere avek zot dan Paradi. Me malerezman, nou premye paran ti volonterman dezobeir komannman Bondye. Konman konsekans, zot ti ganny santans lanmor eternel e zot ti ganny pouse dan Paradi. Letan Adan ek Ev ti ganny zanfan, sa premye koup ti’n fini ganny afekte avek pese e zot ti finalman vin vye e mor. Sa i montre ki Zeova i touzour fer sa ki i dir i pou fer. Deplis, i en Bondye ki demontre en lazistis parfe. Zeova ti averti Adan ki si i ti manz sa fri ki i ti defann li manze i ti pou mor, e sanmenm ki ti arive.
9, 10. (a) Akoz desandans Adan i mor? (b) Ki mannyer nou kapab sap lanmor eternel?
9 Konman bann desandans Adan, nou’n erit en lekor enparfe ki annan sa tandans pour fer pese e avek letan nou mor. Kan Adan ti fer pese nou osi nou ti vin bann peser, vi ki nou son desandans. Alor nou osi nou’n ganny sa santans lanmor. Si Zeova ti’n kennsel sa santans lanmor san fourni sa ranson, i pa ti pou’n azir an armoni avek son parol. Anfet, Pol ti koz pour nou tou kan i ti dir: “Nou konnen ki lalwa i spirityel, me mwan, mon zis en dimoun avek en lekor mortel ki’n ganny vann konman en lesklav pese. Malere! La sa ki mon ete! Lekel ki pou delivre mwan avek sa lekor lanmor?”—Rom. 7:14, 24.
10 Zis Zeova ki legalman annan sa drwa pour pardonn pese dan en fason zis e fer sa laranzman pour tir nou anba sa santans lanmor eternel. I ti fer sa par anvoy son Garson byenneme sorti dan lesyel pour ne lo later konman en imen parfe, ki ti pou donn son lavi konman en ranson pour nou. Kontrerman avek Adan, Zezi ti reste parfe. An realite, “i pa’n zanmen fer okenn pese.” (1 Pyer 2:22) Alor, Zezi ti’n kapab vin en papa setadir fer bann zanfan parfe. Me, o kontrer i ti les bann lennmi Bondye met li a mor pour ki i kapab adopte bann desandans Adan ki’n erit pese. Sa i permet bann dimoun ki demontre lafwa dan li ganny lavi eternel. Labib i dir: “I annan en sel Bondye e en sel medyater ant Bondye ek zonm; sa zonm se Kris Zezi, ki’n donn son prop lekor konman pri pour sov limanite.”—1 Tim. 2:5, 6.
11. (a) Donn en legzanp pour eksplik byenfe ki ranson i anmennen. (b) Ziska ki degre sa ranson i benefisye nou?
11 Pour montre ki mannyer sa ranson i marse, nou kapab servi en legzanp kot bann dimoun ki’n met zot larzan dan en move labank i ganny vole tou zot lekonomi e finalman zot andete. Bann propriyeter sa labank i ganny kondannen pour plizyer lannen dan prizon pour sa ki zot in fer. Me, ki pou arive avek bann viktim inosan? Zot dan lamizer e i difisil pour zot sorti dan sa sityasyon ki zot ladan, amwen ki en bon zonm ris i aste sa labank e rann zot tou larzan ki zot in perdi pour tir zot dan sa det. Pareyman, Zeova ek son Garson byenneme in aste desandans Adan e kennsel tou zot det pese lo baz disan ki Zezi in verse. I pour sa rezon alor ki Zan Batis ti kapab dir sa lo Zezi: “La Lanyo Bondye ki efas pese lemonn.” (Zan 1:29) Pa zis dimoun vivan ki ganny pardonnen zot pese me bann ki’n mor osi.
Ki sa ranson ti kout Zeova ek Zezi
12, 13. Ki nou kapab aprann avek legzanp Abraam ki ti pare pour ofer Izaak?
12 Nou pa vreman kapab konpran egzakteman ki kantite sa ranson ti kout nou Papa dan lesyel ek son Garson byenneme. Me Labib i rakont bann leksperyans ki kapab ed nou pour medit lo sa size. Par egzanp, zis mazinen ki mannyer Abraam ti’n bezwen santi kan i ti mars pandan trwa zour pour al sa landrwa ki apel Moriya pour obeir komannman Bondye ki ti dir: “Silvouple, pran ou garson, ou sel garson Izaak ki ou vreman kontan, e al dan pei Moriya e laba ofer li konman en lofrann brile lo enn sa bann montanny ki mon pou montre ou.”—Zen. 22:2-4.
13 Finalman Abraam ti ariv sa landrwa kot Zeova ti montre li. Zis mazin sa latristes ki Abraam ti’n bezwen santi ler i ti anmar lanmen ek lipye Izaak e fer li dormi lo sa lotel ki li menm i ti’n fer. Pa leker Abraam ti’n bezwen fermal ler i ti lev sa kouto pour touy son garson avek! Aprezan, mazinen ki mannyer Izaak ti santi ler i ti dormi lo sa lotel, pe esper sa douler ki i ti pou resanti ler i ganny sa koud kouto ki ti pou touy li. Lanz Zeova ti aret Abraam zis atan. Sa ki Abraam ek son garson ti fer sa zour i ed nou konpran ki mannyer Zeova ti santi ler i ti les bann ki swiv Satan touy Son Garson. Lafason ki Izaak ti korpere avek Abraam i montre klerman ki Zezi ti pare pour soufer e mor pour nou.—Ebr. 11:17-19.
14. Ki ti arive dan lavi Zakob ki ed nou apresye sa ki sa ranson ti kout Zezi?
14 Nou kapab osi vwar ki kantite sa ranson ti koute ler nou egzamin sa ki ti arive dan lavi Zakob. Parmi tou son bann garson, Zakob ti pli kontan Zozef. Malerezman, bann frer Zozef ti zalou li e annan laenn pour li. Me, ler Zakob ti anvoy Zozef al gete ki mannyer son bann frer ti ete, i ti pare pour ale. Sa letan, zot ti pe vey mouton Zakob apepre 100 kilomet Nor avek Ebronn, sa landrwa kot zot ti reste. Zis mazinen ki mannyer Zakob ti santi ler son bann garson ti retournen avek lenz Zozef kouver avek disan. I ti kriye: “Sa i gran lenz mon garson! En bebet sovaz in bezwen manz li! Sirman Zozef in ganny desir desire!” Sa lensidan ti annan en gran lefe lo Zakob e pour plizyer zour i ti sagren pour Zozef. (Zen. 37:33, 34) Zeova pa reazir parey bann imen enparfe dan bann sityasyon koumsa. Par kont, ler nou medit lo sa lensidan dan lavi Zakob, sa i kapab ed nou konpran lo en serten degre santiman Bondye ler son Garson byenneme ti ganny maltrete dan en fason kriyel e ganny met a mor konman en zonm lo later.
Ki byenfe nou gannyen atraver sa ranson
15, 16. (a) Ki mannyer Zeova ti montre ki i aksepte sa ranson? (b) Ki byenfe nou gannyen atraver sa ranson?
15 Zeova ti resisit son Garson fidel konman en lespri. (1 Pyer 3:18) Apre ki Zezi ti’n resisite, pandan 40 zour i ti aparet avek son bann disip pour ranforsi zot lafwa e prepar zot pour sa gran travay predikasyon ki zot ti pou akonplir. Answit, i ti mont dan lesyel, kot i ti ofer Bondye valer son disan ki i ti’n verse pour ki sa disan i ganny servi an faver son bann vre disip ki demontre lafwa dan valer son sakrifis oubyen ranson. Zeova ti montre ki i ti aksepte sakrifis Zezi ler i ti donn li sa privilez pour devers lespri sen lo son bann disip ki ti’n rasanble ansanm Zerizalenm zour Lapannkot lannen 33 N.L.—Akt 2:33.
16 Deswit bann disip swazir Kris ti konmans ankouraz zot konpanyon pour ganny batize o non Zezi Kri pour ki zot pese i ganny pardonnen afen ki zot ava kapab sov lakoler Bondye. (Lir Akt 2:38-40.) Depi sa moman dan listwar ziska aprezan, plizyer bilyon dimoun sorti dan tou nasyon in annan en relasyon pros avek Bondye akoz zot in demontre lafwa dan sakrifis Zezi. (Zan 6:44) Aprezan i lemoman pour nou egzamin de lezot kestyon: Eski i annan parmi nou ki’n ganny sa lespwar lavi eternel akoz sa bon travay ki nou fer? Enn fwa ki nou’n ganny sa lespwar merveye, eski nou kapab perdi li?
17. Ki mannyer nou devret vwar sa privilez merveye pour vin en zanmi Bondye?
17 Personn pa merit sa ranson. Me akoz zot demontre lafwa dan sa sakrifis, plizyer milyon dimoun ozordi in vin zanmi Bondye e zot annan sa lespwar pour viv pour touzour dan paradi lo later. Me ler nou vin zanmi avek Zeova, sa pa en garanti ki nou pou touzour reste zanmi avek li. Pour ki nou arive sap lakoler Bondye, nou bezwen kontinyen demontre en gran lapresyasyon pour “sa ranson ki Kris Zezi in peye.”—Rom. 3:24, NW; lir Filipyen 2:12.
Kontinyen demontre lafwa dan sa ranson
18. Annan lafwa dan ranson Zezi i enplik kwa?
18 Teks tenm sa lartik, Zan 3:36, i fer vwar ki demontre lafwa dan Senyer Zezi Kri i osi vedir obeir li. Lapresyasyon pour ranson i devret motiv nou pour viv an armoni avek lansennyman Zezi e osi sa ki i ansennyen lo moralite. (Mark 7:21-23) “Bondye pou montre son lakoler” anver tou dimoun ki kontinyen komet bann pratik parey fornikasyon, servi bann parol grosye e vilger e “tou form aktivite seksyel imoral,” sa i enkli menm sa labitid pour get pornografi.—Efe. 5:3-6.
19. Ki mannyer nou kapab demontre nou lafwa dan ranson Zezi?
19 Nou lapresyasyon pour sa ranson i devret fer nou “annan respe pour Bondye.” (2 Pyer 3:11) Annou met letan dekote pour fer bann lapriyer profon regilyerman, letid personnel, ladorasyon an fanmir, asiste renyon e pres avek devouman. Annou “pa manke fer dibyen e ed kanmarad, parski se bann sakrifis koumsa ki fer plezir Bondye.”—Ebr. 13:15, 16.
20. Ki benediksyon tou bann dimoun ki kontinyen demontre lafwa dan sakrifis Zezi i kapab ekspekte dan lavenir?
20 Pa nou pou kontan ki nou’n demontre lafwa dan sa ranson e ki nou’n kontinyen demontre lapresyasyon pour sa sakrifis ler Bondye pou montre son lakoler anver sa move lemonn! Dan nouvo lemonn ki Bondye in promet, nou pou toultan annan lapresyasyon pour sa provizyon merveye ki pou’n sov nou avek lakoler Bondye.—Lir Zan 3:16; Revelasyon 7:9, 10, 13, 14.
Ki ou pou reponn?
• Akoz nou bezwen sa ranson?
• Ki kantite sa ranson ti koute?
• Ki byenfe nou gannyen atraver sa ranson?
• Ki mannyer nou demontre lafwa dan sakrifis Zezi?
[Kestyon]
[Portre lo paz 19]
I touzour posib pour rekonsilye avek Zeova
[Portre lo paz 21]
Ler nou medit lo sa ki’n ariv Abraam, Izaak ek Zakob, sa i kapab ed nou apresye ki kantite sa ranson ti koute