“Lalwa labonte leker” pou kontrol ou lalang

“I’n ouver son labous avek lasazes, e lalwa labonte leker i lo son lalang.”—PROV. 31:26.

1, 2. (a) Ki kalite bann adorater Zeova i ganny ankouraze pour devlope? (b) Ki pou ganny diskite dan sa lartik?

DAN sa mesaz pwisan ki Lerwa Lemouel ti gannyen avek son manman, i ti annan en kalite enportan ki en bon madanm marye i devret annan. I ti ganny dir ki sa madanm in “ouver son labous avek lasazes, e lalwa labonte leker i lo son lalang.” (Prov. 31:1, 10, 26) Labonte leker i atiran lo lalang en madanm ki saz ensi ki lo lalang tou sa bann ki anvi fer plezir Zeova. (Lir Proverb 19:22. *) Tou vre adorater i devret absoliman demontre labonte leker dan zot fason koze.

² Ki si sa labonte leker? Anver lekel i devret ganny demontre? Kwa ki pou ed nou pour met “lalwa labonte leker” lo nou lalang? Si nou fer sa, ki lefe i pou annan lo lafason ki nou kominik avek nou fanmir ek bann frer ek ser dan kongregasyon?

Kan labonte i ganny motive par lanmour fidel

3, 4. (a) Ki si sa labonte leker? (b) Ki diferans i annan ant labonte leker ek sa labonte ki ganny demontre an zeneral par bann imen?

³ Parey sa mo li menm i montre, labonte leker i enplik bann kalite parey lanmour ek labonte. I enplik labonte, setadir, pran lentere personnel dan lezot e demontre ki nou konsernen avek zot atraver bann bon aksyon ek parol ankourazan. Vi ki lanmour osi i enplike, ler ou pran lentere dan byennet lezot akoz ou lanmour pour zot, sa i montre ki ou pe demontre labonte leker anver zot. Par kont, sa mo orizinal ki’n ganny tradwir labonte leker i vedir plis ki en aksyon labonte ki ganny demontre akoz sa lanmour ki nou annan pour lezot. Labonte leker i ganny demontre kan en dimoun i demontre labonte volonterman e fidelman, ziska ki sa labonte i atenn son bi.

⁴ Labonte leker i diferan avek labonte dan ankor en lot fason. Labonte ki ganny demontre an zeneral ouswa sa labonte ki imen i demontre i kapab ganny demontre menm anver bann enkoni. Bann zabitan lo zil Malt ti demontre sa kalite labonte anver zapot Pol ek sa 275 lezot dimoun ki ti dan aksidan bato avek li, bann dimoun ki sa bann zabitan pa ti’n deza zwenn oparavan. (Akt 27:37-28:2) De lot kote, labonte leker i annan pour fer avek en latasman fidel ant bann dimoun ki’n deza devlop en bon relasyon avek kanmarad. * Sanmenm sa ki bann Kenit ti demontre anver “bann garson Izrael lemoman ki zot ti vini sorti Lezip.”—1 Sam. 15:6.

Meditasyon ek lapriyer i enportan

5. Kwa ki pou ed nou kontrol nou lalang?

⁵ I pa sitan fasil pour demontre labonte leker dan nou fason koze. Ler i ti pe refer avek lalang, disip Zak ti ekrir: “Me personn pa  kapab dont lalang. Lalang i en fleo aktif, ranpli avek pwazon vyolan.” (Zak 3:8) Kwa ki pou ed nou met en labrid senbolik avek sa parti lekor ki vreman difisil pour kontrole? Parol ki Zezi ti dir bann sef relizye dan son letan i donn nou en lendikasyon. I ti dir: “Labous i koz sa ki deborde dan leker.” (Mat. 12:34) Pour ki labonte leker i kontrol nou lalang, nou bezwen devlop sa kalite dan nou leker, setadir dan sa dimoun ki nou ete anndan. Annou vwar ki mannyer meditasyon ek lapriyer i ed nou fer sa.

6. Akoz nou devret medit avek lapresyasyon lo bann fason ki Zeova in demontre labonte leker?

⁶ Labib i dir ki Zeova i “annan en kantite labonte leker.” (Egz. 34:6) En psalmis ti sante: “O Zeova, ou labonte leker in ranpli later.” (Ps. 119:64) Dan Labib i annan en kantite resi kot Zeova ti demontre labonte leker anver son bann adorater. Si nou pran letan pour medit avek lapresyasyon lo ‘mannyer ki Zeova ti azir,’ sa i kapab fer nou annan sa dezir pour devlop sa kalite ki Bondye i annan.—Lir Psonm 77:12. *

7, 8. (a) Ki mannyer Zeova ti demontre labonte leker anver Lot ek son fanmir? (b) Ki mannyer David ti santi anver sa labonte leker ki Bondye ti demontre anver li?

⁷ Par egzanp, mazin lo lafason ki Zeova ti delivre neve Abraam ki ti apel Lot ek son fanmir, kan I ti pe al detrir Sodonm, sa lavil kot zot ti pe reste. Anmezir sa letan ti aprose, bann lanz ki ti’n vin kot Lot ti ensiste ki i pran son fanmir e kit sa lavil deswit. Labib i dir: “Ler i ti pe kontinyen tarde, Zeova ti demontre konpasyon anver li, sa bann [lanz] ti tyonbo son lanmen, lanmen son madanm ek lanmen son de fiy, e zot ti fer li sorti e met li an deor lavil.” Eski pa sa i tous nou leker kan nou reflesir lo sa fason ki Zeova ti sov zot? Eski pa i pous nou pour aksepte ki sa ti en fason ki Bondye ti demontre son labonte leker?—Zen. 19:16, 19.

⁸ Egzamin osi legzanp Lerwa David dan ansyen Izrael ki ti sante: “[Zeova] i pardonn tou ou fot, [i] geri tou ou maladi.” Eski pa David ti’n bezwen apresye ki Zeova ti’n pardonn li pour sa pese ki i ti’n komet avek Batseba! I ti loue Zeova an dizan: “Zis parey lesyel i pli o ki later, son labonte leker i pli siperyer anver bann ki annan lakrent pour li.” (Ps. 103:3, 11) Kan nou medit lo sa resi ek lezot resi Labib, nou leker i ranpli avek rekonesans pour labonte leker Zeova e nou santi nou ganny pouse pour loue e remersye li. Pli nou annan rekonesans dan nou leker, pli nou pou anvi imit sa vre Bondye.—Efe. 5:1.

9. Ki rezon pwisan bann adorater Zeova i annan pour demontre labonte leker dan zot lavi tou le zour?

⁹ Bann legzanp dan Labib i montre ki Zeova i demontre son labonte leker, andotmo son lanmour fidel, anver sa bann ki deza annan en relasyon pros avek li. Me ki nou pou dir konsernan sa bann ki napa sa relasyon pros avek sa Bondye vivan? Eski Zeova i dir ouswa i pa demontre labonte anver zot? Pa ditou. Lik 6:35 i dir: “[Bondye] i bon anver bann dimoun engra e move.” “I fer leve son soley lo bann ki move parey lo bann ki bon, e i fer tonbe lapli lo bann ki fer dibyen parey lo bann ki fer dimal.” (Mat. 5:45) Avan ki nou ti aprann laverite e aplik li dan nou lavi, Bondye ti pe deza demontre labonte anver nou, sa labonte ki i demontre an zeneral. Me, konman son bann adorater, i kontinyelman demontre son lanmour fidel ek son labonte leker anver nou. (Lir Izai 54:10. *) Eski pa nou devret vreman rekonesan pour sa? Eski pa nou annan en kantite rezon pour de montre labonte leker dan nou fason koze, ensi ki dan lezot laspe nou lavi tou le zour?

10. Akoz lapriyer i en led enportan pour nou devlop labonte leker dan nou personnalite?

¹⁰ Lapriyer i ed nou en kantite kan nou pe devlop labonte leker. Sa i akoz lanmour ek labonte i bann laspe dan labonte leker e zot form parti fri lespri sen Zeova. (Gal. 5:22) Nou kapab devlop labonte leker dan nou, kan nou les lespri sen diriz nou. Fason pli direk ki nou kapab ganny lespri sen Zeova i kan nou demann li dan lapriyer. (Lik 11:13) I byen pour nou kontinyelman priye pour ganny lespri sen Bondye e aksepte son gidans. Wi, meditasyon ek lapriyer i vreman enportan si nou anvi annan lalwa labonte leker lo nou lalang.

Lo lalang bann koup marye

11. (a) Ki mannyer nou konnen ki Zeova i ekspekte ki bann msye i demontre labonte leker anver zot madanm? (b) Dan ki fason lalwa labonte leker i ed en msye pour kontrol son lalang?

¹¹ Zapot Pol i sipliy bann msye pour kontinyen “kontan zot madanm parey Kris in kontan [“kongregasyon,” NW] e in donn son lavi pour li.” (Efe. 5:25) Pol ti osi fer zot rapel sa ki Zeova ti dir avek Adan ek Ev. Sa zapot ti ekrir: “En zonm [pou] kit son papa ek son manman pour viv avek son madanm e tou le de [pou] vin en sel.” (Efe. 5:31) I kler ki Zeova i ekspekte ki bann msye marye i reste fidel avek zot madanm e touzour demontre labonte leker anver zot. En msye ki les lanmour fidel kontrol son lalang pa pou zanmen ekspoz defo son madanm dan dimoun ouswa koz dan en zar pour abes li. I kontan pour felisit son madanm. (Prov. 31:28) Si pour en serten rezon i annan dispit ki leve dan sa relasyon, labonte leker pou pous sa msye pour pa servi son lalang pour imilye son madanm.

12. Ki mannyer parol en madanm marye i montre ki lalwa labonte leker i kontrol son lalang?

¹² En madanm osi i devret les lalwa labonte leker kontrol son lalang. I pa devret koz parey bann dimoun dan lemonn. Si i “respekte son mari,” i pou koz an byen lo li dan dimoun e i pou fer lezot annan plis respe ankor pour son msye. (Efe. 5:33) I pa pou anvi son bann zanfan i mank respe pour zot papa, alor i pa pou argimant avek li ouswa kestyonn son pwennvi devan zot. I pou rezourd sa bann problenm koumsa an prive. Labib i dir: “En madanm ki vreman saz in batir son lakour.” (Prov. 14:1) Son lakour i enn ki agreab e konfortab pour son fanmir antye.

13. Dan ki domenn i neseser pour annan labonte leker e ki mannyer i kapab ganny demontre?

¹³ Menm dan bann landrwa prive dan zot lakour, bann koup marye i devret kontinyen servi zot lalang dan en fason ki montre ki zot annan respe pour kanmarad. Pol ti ekrir: “Debaras zot avek tousala: lakoler, pasyon ek malis. Pa les okenn parol kalonmni ek parol obsenn sorti dan zot labous.” I ti osi azoute: “Zot devre ranpli avek konpasyon, labonte, limilite, ladouser ek pasyans. . . . Annan lanmour ki soud tou keksoz parfetman  ansanm dan larmoni.” (Kol. 3:8, 12-14) Zanfan ki abitye tann bann parol dous e zantiy kot lakour, pa pou zis santi zot byen dan zot lapo, me zot pou sirman imit lafason ki zot paran i koze.

14. Dan ki fason bann sef fanmir i kapab servi zot lalang pour rekonfort sa bann ki zot pran swen avek?

¹⁴ En psalmis ti ekrir sa lo Zeova: “Silvouple, rekonfort mwan avek ou labonte leker.” (Ps. 119:76) En fason remarkab ki Zeova i rekonfort son pep i kan i ankouraz zot e gid zot. (Ps. 119:105) Ki mannyer bann sef fanmir i kapab benefisye avek legzanp nou Papa ki dan lesyel e servi zot lalang pour rekonfort sa bann ki zot pe okipe? Zot kapab fer sa par donn gidans ek lankourazman neseser. Eski pa Ladorasyon an fanmir i en bon loportinite pour dekouver bann trezor spirityel?—Prov. 24:4.

Demontre lanmour fidel anver bann frer ek ser Kretyen

15. Ki mannyer bann ansyen ek lezot Kretyen matir i kapab servi zot lalang pour protez lezot dan kongregasyon?

¹⁵ Lerwa David ti priye: “Ou labonte leker ek ou laverite pou kontinyen protez mwan.” (Ps. 40:11) Ki mannyer bann ansyen ek Kretyen matir dan kongregasyon i kapab imit legzanp Zeova dan sa domenn? Sirman, si nou servi nou lalang pour atir latansyon lo bann lenformasyon sorti Labib, sa i en fason pour demontre labonte leker.—Prov. 17:17.

16, 17. Ki serten fason nou kapab montre dan nou fason koze ki nou pe les nou ganny kontrole par lalwa labonte leker?

¹⁶ Ki nou devret fer si nou vwar en Kretyen pe al dan en semen ki kont prensip Labib? Eski pa labonte leker pou pous nou pour servi nou lalang pour esey koriz li? (Ps. 141:5) Si nou aprann ki en frer oubyen ser in fer en pese grav, lanmour fidel i pous nou pour ankouraz sa enn ki’n fer sa ki mal pour “apel bann ansyen dan [“kongregasyon,” NW]” pour ki zot ava kapab “priy pour li e zot a vers delwil lo li o non Senyer.” (Zak 5:14) Si sa enn ki’n fer sa ki mal pa al kot bann ansyen e nou pa raport sa ki’n arive avek bann ansyen, nou pa pe demontre labonte leker. I kapab ki serten parmi nou i dekouraze, tousel, santi ki nou pa vo nanryen ouswa nou dezapwente. En bon fason pour montre ki lalwa labonte leker i lo nou lalang i kan nou “koz dan en fason konsolan avek bann ki dan depresyon.”—1 Tesa. 5:14, NW.

¹⁷ Ki mannyer nou devret reazir kan bann lennmi Bondye pe fann rimer lo nou bann frer ek ser Kretyen? Olye kestyonn zot lente grite, plito nou devret inyor sa bann remark ouswa si sa dimoun i ase rezonnab, demann li si i asire ki i annan laprev pour son lakizasyon. Si bann lennmi Bondye i anvi konn lenformasyon lo nou bann frer ek ser pour fer zot ditor, nou lanmour fidel pour zot pou pous nou pour pa donn sa lenformasyon.—Prov. 18:24.

Sa zonm ki annan “labonte leker pou trouv lavi”

18, 19. Akoz lalwa labonte leker pa devret elwannyen avek nou lalang dan lafason nou tret lezot adorater Zeova?

¹⁸ Lanmour fidel i devret evidan dan tou sa ki nou fer anver lezot adorater Zeova. Menm dan bann moman difisil, lalwa labonte leker pa devret elwannyen avek nou lalang. Zeova ti mekontan kan labonte leker bann Izraelit ti vin “parey laroze ki en pti kou i disparet.” (Ose. 6:4, 6) De lot kote, Zeova i pran plezir kan labonte leker i ganny demontre regilyerman. Egzaminen ki mannyer i beni bann ki anvi devlop labonte leker.

¹⁹ Proverb 21:21 i dir: “Sa enn ki pe pourswiv ladrwatir ek labonte leker pou trouv lavi, ladrwatir ek laglwar.” Parmi bann benediksyon ki sa dimoun pou gannyen i ki i pou trouv lavi, pa zis vivan pour en pti kou, me en lavi ki pa pou zanmen fini. Zeova i ed li pour “sezi lavi eternel.” (1 Tim. 6:12, 19) Alor, annou fer tou sa ki nou kapab pour “demontre labonte leker anver kanmarad.”—Zeka. 7:9.

[Not anba lo paz]

Eski ou kapab eksplike?

• Ki mannyer ou pou dekrir labonte leker?

• Kwa ki pou ed nou annan labonte leker lo nou lalang?

• Ki mannyer bann koup marye i kapab demontre lanmour fidel dan zot fason koze?

• Kwa ki montre ki lalwa labonte leker i lo nou lalang dan lafason nou tret nou bann frer ek ser Kretyen?

[Kestyon]

[Portre lo paz 25]

David ti loue Zeova pour son labonte leker

[Portre lo paz 26]

Eski ou ador Bondye an fanmir regilyerman?