Eski ou pran linisyativ pour onor lezot?
Eski ou pran linisyativ pour onor lezot?
“Annan en gran lafeksyon pour kanmarad parey bann frer, e setaki montre plis respe [oubyen “loner,” NW] pour kanmarad.”—ROM. 12:10.
1, 2. (a) Ki konsey Pol i donnen dan son let pour bann Romen? (b) Ki kestyon nou pou egzaminen?
DAN son let pour bann Romen, zapot Pol i met lanfaz lo sa lenportans pour nou konman Kretyen demontre lanmour dan kongregasyon. I fer nou rapel ki nou lanmour i devret “san lipokrizi.” I osi dir ki nou devret “annan gran lafeksyon pour kanmarad parey bann frer.”—Rom. 12:9, 10a.
2 Byensir, annan lanmour konman bann frer i enplik plis ki zis annan en serten lafeksyon anver lezot. Nou devret demontre sa lanmour par aksyon. Apre tou, napa personn ki pou konnen si nou annan lanmour ek lafeksyon pour zot amwen ki nou demontre li an aksyon. Se pour sa rezon ki Pol ti osi dir sa parol: “Montre plis respe [oubyen “loner,” NW] pour kanmarad.” (Rom. 12:10b) Ki savedir onor lezot? Akoz i enportan pour nou pran linisyativ pour onor nou bann frer ek ser spirityel? Ki mannyer nou kapab fer sa?
Respe ek loner
3. Dapre Labib ki “loner” i vedir?
3 Sa mo prensipal an Ebre ki’n ganny tradwir “loner” i refer avek en keksoz ki “lour.” En dimoun ki ganny onore i konmsi i annan pwa, i annan gran valer. Dan Labib, sa menm mo Ebre i souvan ganny tradwir “laglwar,” ki osi endik en gran respe pour sa enn anver ki ou pe rann loner. (Zen. 45:13) Sa mo Grek ki’n ganny tradwir “loner” dan Labib, i donn sa lide lapresyasyon, presye ek valer. (Lik 14:10) Wi, bann dimoun ki nou rann loner i presye e zot annan gran valer pour nou.
4, 5. Dan ki fason demontre loner e annan respe i relye avek kanmarad? Donn legzanp.
4 Ki savedir demontre loner anver lezot? I konmans avek respe. Anfet, sa mo “loner” ek “respe” i souvan ganny servi ansanm akoz zot annan preski menm sinifikasyon. Dan Labib, loner i plito sa fason pour demontre respe an aksyon. Andotmo, respe i refer prensipalman avek lafason ki nou vwar nou bann frer ek ser, tandis ki loner i refer avek lafason ki nou tret zot.
5 Ki mannyer en Kretyen i kapab onor son bann konpanyon Kretyen si i pa respekte zot senserman? (3 Zan 9, 10) Zis parey en plant i kapab pouse e fleri tan ki son rasin i dan en bon later, nou loner pou senser e dir pli bokou letan si selman sa respe ki nou annan i sorti dan nou leker. Si ou napa respe senser ou loner pa pou senser, to ou tar i pou fletri. I pa drol alor ki Pol i dir sa parol swivan pour montre lenportans demontre loner: “Lanmour i devre san lipokrizi.”—Rom. 12:9; lir 1 Pyer 1:22.
Onor sa bann ki’n ganny “kree dan resanblans Bondye”
6, 7. Akoz nou devret annan respe pour lezot?
6 Nou devret annan respe senser pour nou bann frer ek ser, koumsa i pou pli fasil pour nou tret zot avek loner, nou pa devret zanmen zwe sourdorey lo bann rezon akoz nou devret respe tou nou bann frer ek ser. Aprezan, annou egzamin de parmi sa bann rezon.
7 Kontrerman avek bann zannimo lo later, imen in ganny kree “dan resanblans Bondye.” (Zak 3:9) Alor, nou annan bann kalite ki Bondye i annan parey lanmour, lasazes ek lazistis. I osi annan lezot keksoz ki nou’n gannyen avek nou Kreater. En psalmis ti dir: “O Zeova . . . , ou ki ou dinyite pe ganny rakonte parlao lesyel. . . . Ou’n kree [zonm] pli ba ki bann ki parey Bondye e ou’n kouronn li avek laglwar ek splander [“loner,” King James Version].” (Ps. 8:1, 4, 5; 104:1) * Bondye i kouronn ouswa donn bann imen en serten dinyite, laglwar ek loner. Alor, kan nou tret en dimoun avek dinyite, nou pe anfet rekonnet ki Zeova ki donn nou sa dinyite. Me, si nou annan rezon valab pour demontre respe anver bann dimoun an zeneral, eski pa nou devret demontre plis ankor respe pour nou bann frer ek ser Kretyen!—Zan 3:16; Gal. 6:10.
Nou sorti dan menm fanmir
8, 9. Ki rezon nou annan pour demontre respe anver nou bann frer ek ser ki Pol i koz lo la?
8 Pol i koz lo en lot rezon akoz nou annan respe pour kanmarad. Zis avan ki i ti donn sa konsey pour onor lezot, i ti dir: “Annan en gran lafeksyon pour kanmarad parey bann frer.” Sa lekspresyon Grek ki’n ganny tradwir “gran lafeksyon” i refer avek sa relasyon solid ki ini en fanmir ki kontan kanmarad e siport kanmarad. Alor, atraver sa lekspresyon ki i ti servi, Pol ti pe montre ki bann manm dan kongregasyon i devret annan en relasyon for e ranpli avek lanmour antre zot, zis parey i egziste dan en fanmir ki ini. (Rom. 12:5) Deplis, gard antet ki Pol ti ekrir sa parol pour bann Kretyen swazir e ki zot tou zot ti’n ganny adopte konman zanfan menm Papa, Zeova. Alor, i fer sans pour dir ki sa bann Kretyen swazir ti bann fanmir pros. Sa i fer ki bann Kretyen swazir dan letan Pol ti vreman annan tou rezon pour zot respekte kanmarad. I menm parey pour bann Kretyen swazir ozordi.
9 Me ki pour dir konsernan “lezot mouton”? (Zan 10:16, NW) Menm si zot pa ankor ganny adopte konman zanfan Bondye, dan en fason apropriye zot kapab apel kanmarad frer ek ser akoz zot form en fanmir Kretyen ki ini dan lemonn antye. (1 Pyer 2:17; 5:9) Se pour sa rezon ki si sa bann ki form parti lezot mouton i konpran lenportans pour kriy kanmarad “frer” ek “ser,” alor, zot osi zot annan tou rezon pour annan en respe senser pour zot bann konpanyon Kretyen.—Lir 1 Pyer 3:8.
Akoz i vreman enportan?
10, 11. Akoz i enportan pour onor lezot e respekte zot?
10 Akoz i vreman enportan pour annan respe e onor lezot? La son rezon: Ler nou onor nou bann frer ek ser, nou kontribye en kantite anver byennet ek linite dan kongregasyon antye.
11 Byensir, nou rekonnet ki konman Kretyen, en bon relasyon avek Zeova ensi ki sipor ki nou gannyen atraver son lespri sen i sa sours lafors pli pwisan ki nou annan. (Ps. 36:7; Zan 14:26) An menm tan, nou ganny ankouraze kan lezot frer ek ser i montre ki zot apresye nou. (Prov. 25:11) Nou ganny batir ler lezot i montre ki zot apresye nou e respekte nou. Nou ganny plis kouraz ankor pour kontinyen mars lo sa semen lavi dan lazwa ek determinasyon. Sirman ou osi ou’n annan sa santiman.
12. Dan ki fason sakenn antre nou i kapab ede pour ki i annan lanmour ek en bon lantant dan kongregasyon?
12 Alor, vi ki Zeova i konnen ki nou’n ne avek sa dezir pour lezot respekte nou, dan son Parol i ankouraz nou pour devlop “sa dezir pour demontre respe anver kanmarad.” (Rom. 12:10, Today’s English Version; lir Matye 7:12.) Tou Kretyen ki pran sa konsey serye aker i ede pour ki i annan sa bon lantant ek lanmour antre bann frer ek ser Kretyen. Se pour sa rezon ki i bon pour nou aret en kou e demann nou lekor: ‘Ki dernyen fwa mon ti demontre respe senser anver mon bann frer ek ser dan kongregasyon, ki swa an parol ouswa an aksyon?’—Rom. 13:8.
En rol pour nou tou zwe
13. (a) Lekel ki devret pran linisyativ pour onor lezot? (b) Ki parol Pol dan Romen 1:7 i montre?
13 Lekel ki devret pran linisyativ pour demontre respe? Labib i dir ki bann ansyen i devret servi konman en “model” pour kongregasyon. (1 Pyer 5:3) I vre, i annan en kantite aktivite kot bann ansyen i devret en legzanp. Me, kantmenm sa, konman berze troupo, zot devret vreman pran linisyativ pour demontre loner anver nou bann frer ek ser Kretyen e menm anver lezot ansyen. Par egzanp, kan bann ansyen i zwenn pour egzamin bezwen spirityel kongregasyon, zot onor kanmarad kan zot ekout atantivman remark ki okenn lezot ansyen i fer. An plis ki sa, kan i annan en desizyon pour fer, zot onor kanmarad kan zot pran an konsiderasyon pwennvi ek sizesyon tou ansyen. (Akt 15:6-15) Nou devret rapel toudmenm ki let Pol pour bann Romen pa ti ganny adrese zis avek bann ansyen me avek kongregasyon antye. (Rom. 1:7) Alor, sa konsey pour pran linisyativ pour onor lezot i aplik pour nou tou osi ozordi.
14. (a) Donn legzanp pour montre ladiferans ant onor lezot e pran linisyativ pour onor lezot. (b) Ki kestyon nou kapab demann nou lekor?
14 Remark osi sa enn laspe dan konsey Pol. I ti ankouraz son bann konpanyon Kretyen pour pa zis demontre respe pour lezot, me pour montre plis ouswa pran linisyativ pour demontre respe. Akoz sa i fer en diferans? Egzamin sa legzanp. Eski en ansenyan pou ankouraz bann etidyan ki konn lir pour aprann lir? Non. Zot deza konn lir. Plito, sa ansenyan pou anvi ed sa bann zelev pour lir pli byen ankor. Pareyman, letan nou annan lanmour pour kanmarad, ki deza sa mark ki idantifye vre Kretyen, sa lanmour i motiv nou pour onor lezot. (Zan 13:35) Par kont, zis parey en etidyan ki konn lir i kapab fer plis progre kan i amelyor son abilite pour lir, nou osi nou kapab fer plis progre kan nou pran linisyativ pour onor lezot. (1 Tesa. 4:9, 10) Nou tou nou annan sa rol spesifik pour zwe. Nou kapab demann nou lekor: ‘Eski mon pe fer sa? Eski mon pe vreman pran linisyativ pour onor mon bann frer ek ser dan kongregasyon?’
Onor “bann dernyen dimoun”
15, 16. (a) Kan nou pe demontre loner, lekel nou pa devret oubliye e akoz? (b) Kwa ki pou montre ki nou annan en respe senser pour tou nou bann frer ek ser?
15 Lekel ki nou pa devret oubliye pour onore dan kongregasyon? Parol Bondye i dir: “Sa ki rann faver bann dernyen dimoun pe pret Zeova, e I pou rekonpans li pour son aksyon.” (Prov. 19:17) Ki mannyer prensip par deryer sa parol i devret annan lefe lo nou anmezir nou fer bokou zefor pour pran linisyativ pour onor lezot?
16 Ou pou dakor ki laplipar dimoun i arive kapab onor bann dimoun pli o plase ki zot, me sanmenm sa bann dimoun i kapab napa ditou respe pour sa bann ki zot konsider konman enferyer. Me Zeova par kont i pa koumsa. I dir: “Mon pou onor sa bann ki onor mwan.” (1 Sam. 2:30; Ps. 113:5-7) Zeova i onor tou sa bann ki servi li e onor li. I pa inyor “bann dernyen dimoun.” (Lir Izai 57:15 *; 2 Kron. 16:9) San okenn dout, nou anvi imit Zeova. Alor, si nou anvi vwar ki degre senser nou senser kan nou pe onor lezot, i byen pour nou demann nou lekor: ‘Ki mannyer mon tret bann dimoun ki pa popiler ouswa napa kek responsabilite dan kongregasyon?’ (Zan 13:14, 15) Larepons sa kestyon pou montre kantite respe senser nou annan pour lezot.—Lir Filipyen 2:3, 4.
Onor lezot par donn zot ou letan
17. Ki fason pli remarkab nou kapab pran linisyativ pour onor lezot e akoz?
17 Ki pli meyer fason nou kapab pran linisyativ pour onor tou dimoun dan kongregasyon? Nou fer sa kan nou donn zot nou letan. Akoz? Konman Kretyen, nou vreman okipe, e nou partisip dan plizyer aktivite kongregasyon ki pran bokou nou letan. Alor, i pa sirprann nou ki nou letan i presye. Nou osi realize ki nou pa ekspekte ki nou bann frer ek ser i donn nou en gran kantite zot letan. Nou osi apresye kan lezot dan kongregasyon i konpran ki zot pa merit tro egzazere kan zot pe demann nou en pe nou letan.
18. Ki mannyer nou kapab montre ki nou pare pour donn serten letan nou bann frer ek ser Kretyen?
18 Toutfwa, nou osi rekonnet (sirtou sa bann ki servi konman berze dan kongregasyon) ki si nou volonterman pare pour kas nou progranm e donn nou letan nou bann konpanyon Kretyen, i en fason pour montre ki nou respekte zot. Dan ki fason? Ler nou aret fer sa ki nou ti pe fer e donn nou bann frer ek ser serten poursantaz nou letan, nou pe dir zot: ‘Ou sitan presye pour mwan ki i pli enportan pour mwan pas en serten letan avek ou olye kontinyen fer sa ki mon pe fer.’ (Mark 6:30-34) Lekontrer i osi vre. Si nou ezite pour aret nou bann aktivite pour ki nou donn nou bann frer ek ser en pe nou letan, nou kapab fer zot santi ki zot napa gran valer pour nou. Byensir, nou devret konpran ki parfwa i annan sirkonstans kot en ka irzan pa kapab ganny enteronpe. Kantmenm sa, ki swa nou donn nou letan volonterman ouswa ezite, sa pou montre ki kantite respe nou annan dan nou leker pour nou bann frer ek ser Kretyen.—1 Kor. 10:24.
Reste determinen pour pran linisyativ pour onor lezot
19. Dan ki fason, apard donn nou letan, nou kapab onor nou bann frer ek ser?
19 I annan lezot fason kot nou kapab onor nou bann frer ek ser Kretyen. Par egzanp, kan nou pe donn zot nou letan, nou devret osi donn zot nou latansyon. Ankor enn fwa, Zeova in kit sa legzanp. Psalmis David ti dir: “Lizye Zeova i lo bann ki drwat e son zorey i tann zot lapel o sekour.” (Ps. 34:15) Nou fer bokou zefor pour imit Zeova kan nou ekoute e get nou bann frer, setadir, donn zot tou nou latansyon, sirtou sa bann ki vin rod led avek nou. Si nou fer sa, nou pe onor zot.
20. Ki rapel konsernan demontre loner nou anvi gard antet?
20 Parey nou’n vwar, nou anvi gard antet lenportans pour annan respe senser pour nou bann frer ek ser. Deplis, nou rod loportinite pour pran linisyativ pour demontre loner anver lezot, enkli bann dernyen dimoun. Si nou swiv sa bann konsey, nou pou ogmant nou lanmour pour nou bann frer ek ser e ranforsi nou linite dan kongregasyon. Alor, annou pa zis demontre respe ek loner anver lezot, me sirtou annou kontinyen pran linisyativ pour onor lezot? Eski ou determinen pour fer sa?
[Not anba lo paz]
^ par. 7 Parol David dan wityenm Psonm i osi en parol profetik ki pe refer avek Zezi Kri sa zonm parfe.—Ebr. 2:6-9.
^ par. 16 Izai 57:15: “Se sa ki sa enn gran e siperyer, ki reste pour touzour e ki son non i sen, in dir: ‘Mon reste anler e dan en landrwa sen, me osi avek sa enn ki’n ganny kraze e ki lespri i fatige, pour relev moral bann ki annan limilite e pour soulaz leker bann ki pe ganny kraze.’”
Eski ou rapel?
• Dan ki fason loner ek respe i relye avek kanmarad?
• Ki rezon nou annan pour onor nou bann frer ek ser Kretyen?
• Akoz i enportan pour onor lezot?
• Dan ki fason nou kapab demontre loner anver nou bann frer ek ser Kretyen?
[Kestyon]