Kontinyen rod son ladrwatir

“Rod plito Rwayonm Bondye ek son lazistis [oubyen “ladrwatir,” NW], e limenm i a donn zot anplis tou lezot keksoz osi.”—MAT. 6:33.

1, 2. Ki si sa ladrwatir Bondye e lo kwa i baze?

“ROD plito Rwayonm.” (Mat. 6:33) Temwen Zeova dan nou letan i konn byen sa lankourazman ki Zezi Kri ti donnen dan son Sermon lo Montanny. Nou devret fer bokou zefor dan tou laspe nou lavi pour montre ki nou kontan e anvi reste fidel avek gouvernman Bondye. Me nou bezwen osi gard antet dezyenm bout sa lekspresyon setadir, “ek son ladrwatir.” Ki si sa ladrwatir Bondye e ki savedir rod plito son ladrwatir?

² Dan langaz orizinal sa mo “ladrwatir” i kapab ganny tradwir konman “lazistis.” Alor, ladrwatir Bondye i ler keksoz i drwat ouswa i byen dapre son prop standar ek prensip. Konman Kreater, Zeova i annan drwa etablir bann standar konsernan sa ki bon e move, e sa ki byen ek mal. (Rev. 4:11) Me Bondye pa demontre son ladrwatir dan en fason dir zis par donn bann lalwa strik oubyen en ta lareg ek lord. O kontrer ladrwatir Zeova i baze lo son personnalite e enn son bann kalite prensipal i lazistis, ki osi mars ansanm avek lezot kalite parey lanmour, lasazes ek pwisans. Alor ladrwatir  Bondye i relye avek son lavolonte ek plan e osi sa ki i ekspekte avek bann dimoun ki anvi servi li.

3. (a) Ki savedir rod plito ladrwatir Bondye? (b) Akoz nou devret swiv standar ladrwatir Zeova?

³ Ki savedir rod plito ladrwatir Bondye? I senpleman vedir, fer lavolonte Bondye pour fer li plezir. Rod son ladrwatir i osi vedir fer zefor pour viv annakor avek son bann prensip ek standar me pa avek sa ki pour nou. (Lir Romen 12:2.) Sa i en fason viv ki sirman enplik nou relasyon avek Zeova. Nou pa zis obeir son lalwa akoz nou per ganny pini. Me plito, nou lanmour pour Bondye i motiv nou pour fer bokou zefor pour swiv son bann standar me pa nou prop standar. Nou rekonnet ki i sa bon fason pour azir e nou’n ganny kree pour fer egzakteman sanmenm. Nou merit kontan ladrwatir parey Zezi Kri, sa Lerwa dan Rwayonm Bondye.—Ebr. 1:8, 9.

4. Akoz i enportan pour rod ladrwatir Bondye?

⁴ Akoz i enportan pour rod ladrwatir Zeova? Annou egzamin sa realite: Sa tes ki Adan ek Ev ti gannyen dan zarden Edenn ti baze lo si zot ti pou aksepte drwa Zeova pour etablir bann standar oubyen non. (Zen. 2:17; 3:5) Lefet ki zot pa ti arive pas sa tes, sa in anmenn soufrans ek lanmor lo zot desandans. (Rom. 5:12) De lot kote, Parol Bondye i dir: “Sa enn ki pe pourswiv ladrwatir ek labonte leker pou trouv lavi, ladrwatir ek laglwar.” (Prov. 21:21) Wi, rod plito ladrwatir Bondye i fer nou annan en bon relasyon avek Zeova ki an retour pou donn nou lavi eternel.—Rom. 3:23, 24.

Sa danze pour krwar ki nou zis

5. Ki danze nou bezwen evite?

⁵ Ler zapot Pol ti ekrir bann Kretyen Ronm, i ti mansyonn en danze ki nou tou nou bezwen evite si nou anvi reisi rod plito ladrwatir Bondye. Ler i ti pe koz avek bann Zwif, Pol ti dir: “Mon kapab dir dan zot faver, ki zot ranpli avek motivasyon pour Bondye, me zot motivasyon pa baze lo en vre konnesans. Dan zot linyorans ki mannyer Bondye i rann dimoun zis devan li, zot in esey rod zot prop fason pour vin zis. Alor zot pa’n soumet zot dan fason ki Bondye i rann zonm zis.” (Rom. 10:2, 3, nou ki’n met an italik.) Dapre Pol, sa bann adorater pa ti konpran ladrwatir oubyen lazistis Bondye akoz zot ti tro okipe pour esey rod zot prop ladrwatir. *

6. Ki latitid nou pa devret annan e akoz?

⁶ I annan en fason ki nou kapab tonm dan sa latrap, sa i ler nou konsider nou servis pour Bondye konman en konpetisyon e konpar nou avek lezot. Sa latitid i kapab fasilman fer nou annan tro bokou konfyans dan nou menm ek nou bann abilite. Me, si nou azir koumsa, nou pe oubliy ladrwatir Zeova. (Gal. 6:3, 4) Nou lanmour pour Zeova i sa bon motivasyon ki fer nou fer sa ki drwat. Si nou dir nou kontan Bondye me an menm tan nou fer zefor pour prouve ki nou zis, nou pa vreman kontan Bondye.—Lir Lik 16:15.

7. Ki mannyer Zezi ti adres sa problenm konsernan bann dimoun ki krwar zot parfe?

⁷ Zezi ti konsernen avek sa tandans kot bann “dimoun . . . ti krwar zot zis e . . . mepriz lezot.” I ti koz konsernan sa tandans dan sa legzanp ki nou pou vwar. I ti dir: “De zonm ti mont dan Tanp pour priye. Enn ti en Farizyen e lot ti en Kolekter taks. Sa Farizyen ti debout e i ti priy dan limenm: ‘Bondye mon remersi ou ki mon pa parey leres bann zonm, ki eksplwater, enzis, adilter, ou menm parey sa Kolekter taks. Mon fer karenm de fwa par semenn, mon donn en di zyenm parti lo tou mon reveni.’ Me sa Kolekter taks li ti reste lwen deryer e i pa ti menm oze lev son lizye pour get lesyel, me i ti tap son lestoman konman en siny repantans e dir, ‘Bondye, pran pitye pour mwan, en peser!’” Zezi ti konklir an dizan: “Mon dir zot, sa Kolekter taks ti retourn kot li son pese pardonnen, me sa Farizyen non. Parski tou dimoun ki esey pas pour pli enportan pou ganny abese e bann ki abes zot pou vin pli enportan.”—Lik 18:9-14.

En lot danze: vin “tro zis”

8, 9. Ki i vedir vin “tro zis” e ki i kapab fer nou fer?

⁸ En lot danze ki nou bezwen evite i ganny dekrir dan Eklezyast 7:16: “Pa vin tro zis e pa fer konmsi ou tro saz. Akfer ou bezwen anmenn dezolasyon lo ou menm?” Parey nou vwar dan verse 20, sa ekriven Labib ti kontinyen par donn nou en rezon akoz nou pa devret annan sa kalite latitid: “Napa okenn zonm zis lo later ki fer touzour sa ki byen e pa fer pese.” En dimoun ki vin “tro zis” i etablir son prop standar ladrwatir e ziz lezot dapre sa standar. Me i pa realize ki ler i fer sa, i pe fer son prop standar pas parlao standar Bondye e dan lizye Bondye i parey en dimoun ki napa ladrwatir.

⁹ Ler nou vin “tro zis” oubyen parey serten Labib i dir, “nou krwar nou tro byen,” sa i menm kapab fer nou kestyonn fason ki Zeova i tret bann sityasyon. Alor, nou bezwen mazinen ki si nou kestyonn desizyon Zeova pour vwar si i zis oubyen drwat, an realite nou pe konmans fer nou prop standar ladrwatir pas parlao standar Zeova. I konmsi nou pe teste Zeova e ziz li dapre nou prop standar konsernan sa ki byen e mal. Me se Zeova ki annan drwa met sa standar pour ladrwatir, pa nou!—Rom. 14:10.

10. Zis parey dan ka Zob, kwa ki kapab fer nou ziz Bondye?

¹⁰ Kantmenm napa personn parmi nou ki ti pou anvi ziz Bondye par ekspre, nou natir enparfe i kapab fer nou fer sa. I fasil pour nou fer sa sirtou ler nou vwar en keksoz enzis oubyen ler nou menm nou pas dan difikilte. Menm Zob, en zonm ki ti fidel ti fer sa fot. O konmansman Zob ti ganny dekrir konman en zonm ki “ti san repros e drwat, annan lakrent pour Bondye e rezet sa ki mal.” (Zob 1:1) Me apre sa, maler ti frap Zob enn deryer lot e pour li sa ti paret enzis. Sa ti fer Zob dir “ki li i pli drwat ki Bondye.” (Zob 32:1, 2) I ti neseser ki Zob i koriz son pwennvi. Alor nou pa devret sirprann si parler nou kapab vwar nou dan menm sityasyon. Si sa i arive, kwa ki kapab ed nou pour sanz nou pwennvi?

Nou pa touzour konn tou laverite lo en sityasyon

11, 12. (a) Si nou santi ki en keksoz i enzis, ki nou bezwen rapel? (b) Akoz en dimoun i kapab santi ki sa legzanp ki Zezi ti donnen konsernan bann travayer dan plantasyon rezen i demontre lenzistis?

¹¹ Premyerman nou bezwen rapel ki nou pa touzour konn tou keksoz lo en sityasyon. Sa ti leka pour Zob. I pa ti konn konsernan sa renyon ki ti pase dan lesyel avek bann garson Bondye e kot Satan ti’n akiz li an  mal. (Zob 1:7-12; 2:1-6) Zob pa ti realize ki Satan ki ti lakoz son bann problenm. Anfet, nou pa asire si Zob ti vreman konnen lekel Satan! Alor i ti mal ler i ti mazinen ki Bondye ki ti responsab pour bann problenm ki i ti pe pas ladan. Wi, i fasil pour tonm lo en move konklizyon ler nou pa konn tou detay lo en sityasyon.

¹² Annou vwar legzanp Zezi konsernan bann travayer dan plantasyon rezen. (Lir Matye 20:8-16.) Dan sa legzanp Zezi ti dekrir en propriyeter ki ti pey menm sonm larzan tou son bann travayer, ki swa zot ti’n travay en lazournen antye oubyen zis enn erdtan. Ki ou pwennvi lo sa size? Eski ou vwar sa zis? Petet la deswit ou met ou dan plas sa bann travayer ki ti’n travay dir en lazournen antye dan sa gro ker soley. Sirman ou santi ki zot ti merit ganny peye plis! Si koumsanmenm ki ou santi, sa propriyeter i kapab alor pas pour en dimoun ki ti azir dan en fason enzis e ki ti napa lanmour. Menm dan lafason ki i ti reponn son bann travayer ki ti konplent i kapab paret ki i ti pe abiz son lotorite. Me eski nou konn tou detay lo sa sityasyon?

13. Ki lezot pwennvi nou kapab annan an rapor avek legzanp ki Zezi ti donnen konsernan bann travayer dan plantasyon rezen?

¹³ Aprezan annou egzamin sa legzanp avek en lot pwennvi. San dout sa propriyeter dan sa legzanp ti realize ki tou sa bann zonm ti bezwen nouri zot fanmir. Dan letan Zezi, bann travayer agrikol ti ganny peye par zournen. Zot fanmir ti depan lo sa saler ki zot ti gannyen sak zour. Avek sa lide antet, mazin sityasyon sa bann travayer ki sa propriyeter ti vwar tar dan lazournen e ki ti travay zis pour enn erdtan. Petet zot pa ti pou kapab nouri zot fanmir si zot ti ganny peye zis pour enn erdtan travay. Me zot ti pare pour travay e zot ti esper en lazournen antye pour zot ganny anploye. (Mat. 20:1-7) I pa ti zot lafot si zot pa ti’n ganny aksepte pour travay pour en lazournen antye. Napa nanryen ki montre ki zot ti fer ekspre pour zot pa travay. Zis mazinen, si ou ti bezwen esper en lazournen antye akoz ou konnen ki lezot pou depan lo sa ki ou ti pou gannyen sa zour, pa ou ti pou rekonesan pour ganny en pti zournen e pa ou ti pou menm etonnen si ou ti ganny ase byen peye pour nouri ou fanmir!

14. Ki leson enportan nou kapab tire avek sa legzanp an rapor avek plantasyon rezen?

¹⁴ Aprezan annou reegzamin fason ki sa propriyeter ti azir. I pa ti mal pey personn. O kontrer, i ti tret tou bann travayer konman bann dimoun ki ti annan drwa ganny ase larzan pour fer viv zot fanmir. Lefet ki sa propriyeter ti annan sifizaman travayer, i ti kapab profit lo bann dimoun par pey zot pli ptigin larzan, me i pa ti fer sa. Tou son travayer ti retourn kot zot avek ase larzan pour nouri zot fanmir. Ler nou pran an konsiderasyon bann lezot detay sa i kapab sanz nou  pwennvi lo fason ki Bondye i azir. I ti annan en rezon pour pran sa desizyon, i pa ti abiz son lotorite e son desizyon ti baze lo lanmour. Ki nou kapab aprann? Si nou egzamin zis serten fakter sa i kapab fer nou tonm lo en move konklizyon. I vre, sa parabol i met lanfaz lo siperyorite ladrwatir Bondye ki pa baze zis lo bann lalwa e sa ki imen i merite.

Nou pa touzour annan sa bon pwennvi

15. Akoz nou bezwen rekonnet ki nou pwennvi i kapab pa toultan bon oubyen nou pa konn tou keksoz?

¹⁵ Sa dezyenm fakter ki nou dwatet rapel ler nou pe fer fas avek en sityasyon ki paret enzis i ki petet nou napa en bon pwennvi oubyen nou konn en ptigin lo en sityasyon. Nou kapab napa en bon pwennvi akoz nou lenperfeksyon, bann fo konsep oubyen nou lorizin. Nou napa sa abilite pour konn motivasyon e kwa ki dan leker en dimoun. Me sa pa leka pour Zeova ek Zezi.—Prov. 24:12; Mat. 9:4; Lik 5:22.

16, 17. Kwa ki ti fer Zeova pa aplik son lalwa lo adilter kan David ek Batseba ti fer pese?

¹⁶ Annou egzamin resi David ler i ti komet adilter avek Batseba. (2 Sam. 11:2-5) Dapre Lalwa Moiz, zot ti merit ganny touye. (Lev. 20:10; Det. 22:22) Menm si Zeova ti pini zot, i pa ti azir dapre son prop lalwa. Eski sa ti enzis delapar Zeova? Eski i ti fer lapliferans pour David e kas Son prop standar drwat? Serten lekter Labib i santi koumsa.

¹⁷ Me, Zeova ti donn sa Lalwa lo adilter avek bann ziz enparfe ki pa ti kapab lir dan leker. Malgre ki zot pa ti kapab konn tou lo en sityasyon, lalwa ti permet zot pour toultan ziz byen. De lot kote, Zeova i kapab lir dan leker. (Zen. 18:25; 1 Kron. 29:17) Alor nou pa devret ekspekte ki Zeova ti pou swiv lalwa ki i’n donn avek bann ziz enparfe. Si i ti fer sa, pa sa ti pou konmsi en dimoun ki vwar byen pe ganny forse pour met linet ki’n ganny fer pour dimoun ki pa vwar byen kler! Zeova ti kapab lir dan leker David ek Batseba e i ti vwar ki zot ti’n vreman repantir. I pour sa rezon ki ler i ti ziz zot i ti demontre mizerikord ek lanmour anver zot.

Kontinyen rod ladrwatir Zeova

18, 19. Kwa ki kapab ed nou pour pa zanmen ziz Zeova dapre nou prop standar konsernan ladrwatir?

¹⁸ Alor, si parler kan ou pe lir Labib oubyen akoz ou prop leksperyans dan lavi ou vwar en keksoz ki fer ou santi ki Zeova in azir dan en fason enzis, pa zanmen ziz Bondye dapre ou prop standar ladrwatir. Rapel byen ki nou pa touzour konn tou detay lo en sityasyon e petet nou napa en bon pwennvi ouswa nou konn zis en ptigin lo sa sityasyon. Pa zanmen oubliye ki “lakoler en dimoun pa realiz plan lazistis Bondye.” (Zak 1:19, 20) Dan sa fason, nou pa pou zanmen vin “vreman ankoler avek Zeova.”—Prov. 19:3.

¹⁹ Parey Zezi, annou touzour rekonnet ki zis Zeova tousel ki annan drwa etablir bann standar konsernan sa ki byen ek mal. (Mark 10:17, 18) Fer bokou zefor pour ganny “vre konnesans” lo son bann standar. (Rom. 10:2; 2 Tim. 3:7) Si nou aksepte e viv an armoni avek lavolonte Zeova, nou montre ki nou pe rod plito “son lazistis [oubyen “ladrwatir,” NW].”—Mat. 6:33.

[Not anba lo paz]

Eski ou rapel?

• Akoz i enportan pour rod ladrwatir Zeova?

• Ki sa de danze ki nou bezwen evite?

• Ki mannyer nou kapab rod plito ladrwatir Bondye?

[Kestyon]

[Portre lo paz 17]

Ki nou aprann atraver legzanp ki Zezi ti donnen konsernan de zonm ki ti pe priye dan tanp?

[Portre lo paz 18]

Eski i ti enzis pour pey bann travayer ki ti vin travay 5 er parey lezot ki ti travay lazournen antye?