Nou pou demontre lentegrite dan lafason nou marse!

“Tandis ki mwan, mon pou demontre lentegrite dan lafason ki mon marse.”—PS. 26:11.

1, 2. Ki Zob ti dir konsernan lentegrite e ki nou aprann lo li dan Zob sapit 31?

DAN letan lontan, dimoun ti souvan servi en balans pour pez bann keksoz. Sa balans ki zot ti servi ti annan en bar orizontal e sa bar ti kapab pivote akoz i ti tenir lo en pti morso feray dan milye. Lo sak bout sa bar, i ti annan en resipyan. Dan enn sa resipyan, zot ti met bann lobze ki ti pou ganny peze e dan lot en pwa. Pep Bondye ti devret servi sa balans ek pwa avek lonnekte.—Prov. 11:1.

² Kan Zob sa zonm fidel ti soufer akoz Satan ti pe target li, i ti dir: “[Zeova] pou pez mwan dan en balans ki egzakt e Bondye pou kapab konn mon lentegrite.” (Zob 31:6) Dapre son leksperyans Zob ti mansyonn plizyer sityasyon ki kapab teste en dimoun ki pe gard son lentegrite. Me Zob ti arive pas sa tes, parey li menm ti fer resorti dan Zob sapit 31. Son bon legzanp i kapab motiv nou pour azir parey li e dir avek konviksyon, parey psalmis David: “Tandis ki mwan, mon pou demontre lentegrite dan lafason ki mon marse.”—Ps. 26:11.

3. Akoz i enportan pour fidel anver Bondye dan bann pti keksoz e osi dan bann gran keksoz?

³ Menm si Zob ti ganny teste severman, i ti reste fidel anver Bondye. Serten i menm kapab dir ki tes sever ki Zob ti gannyen e son lentegrite remarkab ti vreman eksepsyonnel. Nou pa pe soufer egzakteman parey Zob. Me, nou bezwen reste fidel anver Bondye dan bann pti e osi dan bann gran keksoz si nou oule demontre ki nou annan lentegrite e siport son souvrennte.—Lir Lik 16:10.

Lenportans pour reste prop moralman

4, 5. Konman en dimoun ki gard son lentegrite, ki Zob ti evite fer?

⁴ Pour gard nou lentegrite anver Zeova, nou bezwen azir an armoni avek son bann standar moral, zis parey Zob ti fer. I ti dir: “Mon’n fer en lalyans avek mon lizye. Alor, ki mannyer mon kapab kontinyen get en vyerz? . . . Si mon leker ti ganny atire ver en madanm, si mon ti kontinyen get devan laport mon vwazen, les mon madanm kraz dible pour en lot zonm, e les li kontan lezot zonm.”—Zob 31:1, 9, 10.

⁵ Vi ki Zob ti determinen pour gard son lentegrite anver Bondye, i ti evite get en madanm avek en move dezir. Konman en msye marye, i pa ti rod latraksyon avek en fiy oubyen annan en lentere romantik pour en madanm marye. Dan son Sermon lo Montanny, Zezi ti fer en deklarasyon pwisan an rapor avek limoralite seksyel ki bann dimoun ki pe gard zot lentegrite i vreman bezwen gard sa pwen antet.—Lir Matye 5:27, 28.

Pa zanmen aksepte pour vin malonnet

6, 7. (a) Parey dan ka Zob, ki Bondye i servi pour mezir nou lentegrite? (b) Akoz nou pa devret azir dan en fason malonnet oubyen tronp lezot?

⁶ Nou pa kapab azir dan en fason malonnet si nou anvi ganny konsidere konman bann dimoun ki pe gard zot lentegrite. (Lir Proverb 3:31-33. *) Zob ti dir: “Si mon’n mars avek bann  anbeter, e mon lipye i taye pour tronp lezot, [Zeova] pou pez mwan dan en balans ki egzakt e Bondye pou kapab konn mon lentegrite.” (Zob 31:5, 6) Zeova i pez tou imen dan en “balans ki egzakt.” Parey dan ka Zob, Bondye i servi son bann standar drwat pour mezir lentegrite son bann serviter fidel.

⁷ Si nou pe azir dan en fason malonnet oubyen nou pe tronp lezot, nou pa pe gard nou lentegrite anver Bondye. Bann dimoun ki gard zot lentegrite in “rezet tou sa bann keksoz, ki fer onte e ki fer dan kasyet” e zot “pa anbet dimoun.” (2 Kor. 4:1, 2) Me ki nou pou dir si nou pe azir dan en fason malonnet par nou parol oubyen aksyon ki fer nou frer ek ser sipliy Bondye pour ganny led? Alor sa pou move pour nou! En psalmis ti sante: “Mon’n kriy ver Zeova dan mon ladetres, e i’n reponn mwan. O Zeova, delivre mwan avek labous bann manter, e lalang bann triker.” (Ps. 120:1, 2) I byen pour rapel ki Bondye i kapab get o pli profon dan nou pour “egzamin [nou] leker ek ronnyon” pour vwar si nou vreman bann dimoun ki gard nou lentegrite.—Ps. 7:8, 9.

Donn legzanp dan lafason ki nou tret lezot

8. Ki mannyer Zob ti tret lezot?

⁸ Pour gard nou lentegrite, nou bezwen vin parey Zob, i ti zis, annan limilite ek konsiderasyon pour lezot. I ti dir: “Si mon ti abitye refiz zizman dan zafer ankour ant mwan ek mon lesklav zonm oubyen fanm, alors ki mon pou fer kan Bondye i vin devan mwan? E ler i demann mwan pour rann kont, ki mon pou reponn li? Sa enn ki’n fer mwan dan vant, pa i’n fer li osi e pa li menm ki’n fer nou dan matris.”—Zob 31:13-15.

9. Ki bann kalite Zob ti demontre dan lafason ki i ti azir anver son bann serviter e ki mannyer nou devret azir dan sa domenn?

⁹ Aparaman, i ti napa okenn prosedir konplike pour ziz en zafer ankour dan letan Zob. Bann zizman ti ganny fer dan en fason annord e menm bann lesklav ti kapab met zot zafer ankour. Zob ti tret son bann serviter dan en fason zis e i ti demontre mizerikord anver zot. Si nou oule mars dan en fason ki montre ki nou annan lentegrite, nou bezwen demontre sa bann kalite, sirtou si nou en ansyen dan kongregasyon.

Demontre zenerozite, non pa groker

10, 11. (a) Ki mannyer nou konnen ki Zob ti zenere e kontan ede? (b) Zob 31:16-25 i fer nou rapel ki konsey Labib ki ti ganny ekrir plitar?

¹⁰ Zob ti zenere e kontan ede, me i pa ti egois e groker. I ti dir: “Si . . . mon fer lizye en vev paret tris, si mon ti abitye manz mon morso dipen tousel, tandis ki sa garson ki napa papa pa’n manz en bout . . . Si mon ti abitye vwar en dimoun pe mor akoz i napa lenz . . . Si mon ti lev mon lanmen pour menas en garson ki napa papa, ler mon ti vwar ki i ti bezwen mon led kot baro, alor ki mon zepol i dekloke e mon lebra i dezwenn avek son bout anler.” Zob pa ti pou gard son lentegrite si i ti dir avek lor: “Mon’n met mon konfyans dan ou!”—Zob 31:16-25.

¹¹ Sa bann lekspresyon poetik i kapab fer nou rapel sa parol ki disip Zak ti dir: “La sa ki Bondye nou Papa i konsider konman en larelizyon pir e san defo: Pran swen bann orfelen ek bann vev dan zot soufrans, e pa les zot ganny sali par move lenfliyans sa monn.” (Zak 1:27) Nou kapab osi rapel lavertisman Zezi: “Fer atansyon, lavaris [oubyen “groker,” NW] akoz lavi en zonm pa depann lo larises ki i posede.” Apre Zezi ti donn en legzanp lo en zonm ris groker ki ti mor, me ki “pa ti ris devan Bondye.” (Lik 12:15-21) Pour kontinyen gard nou lentegrite, nou bezwen evite vin groker oubyen voras. Groker i ganny konsidere konman idolatri akoz sa keksoz ki en dimoun voras i vreman anvi gannyen i fer li aret konsantre son latansyon lo Zeova e sa keksoz i alor vin konman en zidol pour sa dimoun. (Kol. 3:5) Lentegrite ek vorasite i de keksoz ki pa mars ansanm!

 Pa ekarte avek vre ladorasyon

12, 13. An rapor avek idolatri, ki legzanp Zob in kite?

¹² Bann dimoun ki gard zot lentegrite i pa ekarte avek vre ladorasyon. Zob pa ti fer sa, i ti dir: “Si mon ti abitye vwar zetwal pe klere ek sa zoli lalin pe marse, e mon ti konmans devlop en dezir ansousekre dan mon leker e mon ti anvoy beko avek zot, sa ti pou en fot ki ti pou merit ganny latansyon bann ziz, akoz mon ti pou’n renye sa vre Bondye ki anler.”—Zob 31:26-28.

¹³ Zob pa ti ador bann keksoz ki pa vivan. Si dan son leker, i ti konmans devlop en dezir pour admir bann keksoz ki dan lesyel tel parey lalin e si ‘i ti anvoy beko’ avek li, i ti pou komet idolatri e ganny konsidere konman en adorater zidol ki renye Bondye. (Det. 4:15, 19) Pour gard nou lentegrite anver Bondye, nou bezwen evite fer okenn keksoz ki annan pour fer avek idolatri.—Lir 1 Zan 5:21.

Pa rankinen oubyen vin ipokrit

14. Akoz nou kapab dir ki Zob pa ti en dimoun ki kontan fer ditor son kanmarad?

¹⁴ Zob pa ti ni en dimoun kriyel, ni en dimoun ki kontan fer ditor son kanmarad. I ti konnen ki sa kalite tandans ti pou montre ki i pa ti pe gard son lentegrite akoz i ti dir: “Si mon ti abitye selebre ler en dimoun ki vreman ay mwan i mor oubyen i ti gou pour mwan akoz i ti ariv li en maler . . . , mon pa’n permet mon labous fer pese par fer en serman kont li.”—Zob 31:29, 30.

15. Akoz i mal pour kontan kan en maler i ariv avek en dimoun ki ay nou?

¹⁵ Zob pa ti zanmen dan lazwa ler en maler ti ariv avek en dimoun ki ay li. Plitar en proverb ti averti: “Pa selebre ler ou lennmi i tonbe, e ki ou leker i pa dan lazwa ler i fer en fo pa, pangar Zeova i vwar e i trouv sa mal e ki i vreman aret ankoler avek li.” (Prov. 24:17, 18) Vi ki Zeova i kapab lir dan leker, i konnen si nou kontan ler en maler i ariv avek en lot dimoun e definitivman i pa aksepte en latitid koumsa. (Prov. 17:5) Bondye i kapab pran aksyon neseser avek nou, akoz i dir: “Se mwan ki pou revanze e ki pou fer peye.”—Det. 32:35.

16. Menm si nou pa ris, ki mannyer nou kapab demontre lospitalite?

¹⁶ Zob ti en dimoun ki ti demontre lospitalite anver lezot. (Zob 31:31, 32) Menm si petet nou pa ris, nou kapab “pratik lospitalite.” (Rom. 12:13) Nou kapab partaz en keksoz senp avek lezot, par gard antet ki “pli vomye en pla legim, la kot i annan lanmour, ki en toro byen gra kot i annan laenn.” (Prov. 15:17) Ler nou pran en repa avek en frer oubyen ser dan en latmosfer kot i annan lanmour, sa i kapab fer nou apresye menm en repa vreman senp e sa pou sirman anmenn byenfe lo plan spirityel.

17. Akoz nou pa devret esey kasyet en pese grav?

¹⁷ Bann dimoun ki Zob ti demontre lospitalite avek ti bezwen byen benefisye lo plan spirityel, akoz Zob pa ti en dimoun ipokrit. I pa ti parey sa bann zonm enfidel ki ti antre dan kongregasyon Kretyen dan premye syek e ki ti pe “flat dimoun pour zot prop lentere.” (Zid 3, 4, 16) Zob pa ti ni menm kouver son lofans oubyen ‘kasyet son fot dan son pos semiz,’ akoz i ti per pangar lezot i mepriz li si zot konn sa ki i’n fer. I ti pare pour les Bondye egzamin li e dir li kwa ki i’n fer mal letan i ti neseser. (Zob 31:33-37) Si i arive ki nou komet en pese grav, annou pa esey kasyet sa ki nou fer zis pour pa sali nou repitasyon. Ki mannyer  nou kapab montre ki nou pe esey gard nou lentegrite? Par aksepte nou fot, repantir, rod led spirityel e fer tou sa ki nou kapab pour repar sa fot.—Prov. 28:13; Zak 5:13-15.

En dimoun ki annan lentegrite i ganny zize

18, 19. (a) Akoz nou kapab dir ki Zob pa ti zanmen eksplwat personn? (b) Ki Zob ti pare pour fer si i ti mal azir?

¹⁸ Zob ti onnet e zis. Alor i ti kapab dir: “Si mon prop later i kriy o sekour akoz mwan, si tou son bann transe i plere, si mon’n manz son fri pour nanryen, si mon’n rent son bann propriyeter akoz mon pe esey pran zot later avek zot, alor ki pikan i pouse dan plas dible e zerb pi dan plas lorz.” (Zob 31:38-40) Zob pa ti zanmen pran later lezot dimoun e i pa ti eksplwat bann travayer. Parey li, nou devret gard nou lentegrite anver Zeova ki swa dan bann pti oubyen gran keksoz.

¹⁹ Devan sa trwa zonm ensi byen ki Eliou, Zob ti koz lo lafason ki i ti’n viv son lavi. Zob ti envit nenport dimoun ki ti annan en keksoz kont li pour pourswiv li ankour e i ti pare pour siny sa depozisyon. Si i ti annan laprev ki Zob ti koupab, i ti pare pour aksepte pinisyon. Alor i ti anmenn son ka devan lazistis Bondye e i ti espere ki sa lakour i pronons zizman. ‘Parol Zob ti termin’ lanmenm.—Zob 31:35, 40.

Ou kapab gard ou lentegrite

20, 21. (a) Akoz Zob ti kapab gard son lentegrite? (b) Ki mannyer nou kapab devlop lanmour pour Bondye?

²⁰ Zob ti kapab gard son lentegrite akoz i ti kontan Bondye e Zeova ti kontan li e i ti ed li. Zob ti dir: “[Zeova] ou’n donn mwan lavi ek labonte leker [“lanmour fidel,” not.], e swen ki ou’n pran avek mwan in gard mon lespri.” (Zob 10:12) Deplis, Zob ti demontre lanmour anver lezot, i ti realize ki nenport dimoun ki pa demontre lanmour fidel anver lezot pou nepli annan lakrent pour sa enn Tou Pwisan. (Zob 6:14) Bann dimoun ki gard zot lentegrite i kontan Bondye ek zot prosen.—Mat. 22:37-40.

²¹ Nou kapab devlop lanmour pour Bondye par lir son parol sak zour e medit lo sa ki Labib i dir nou lo li. Nou kapab loue Zeova e remersye li pour tou son byenfe anver nou par priy li senserman. (Fili. 4:6, 7) Nou kapab sant pour Zeova e tir benefisye ler nou zwenn ansanm avek son pep. (Ebr. 10:23-25) Alor, nou lanmour pour Bondye osi pou ogmante ler nou partisip dan predikasyon pour anons “sa bon nouvel son delivrans.” (Ps. 96:1-3) Si nou fer keksoz dan sa fason nou pou kapab gard nou lentegrite, zis parey sa psalmis ti sante: “I bon pour mwan apros avek Bondye. Mon’n pran refiz dan Souvren Senyer Zeova.”—Ps. 73:28.

22, 23. Konman bann dimoun ki siport souvrennte Zeova, ki mannyer nou aktivite i parey avek bann Kretyen premye syek?

²² Diran bann syek ki’n pase, Zeova ti donn bann dimoun ki ti gard zot lentegrite diferan responsabilite. Noe ti konstrir lars e i ti “en predikater lazistis.” (2 Pyer 2:5) Zozye ti gid bann Izraelit dan Later Promiz, me i ti reisi zis akoz i ti lir sa “liv lalwa . . . lizour konman aswar.” (Zoz. 1:7, 8) Bann Kretyen dan premye syek ti fer disip e zwenn ansanm regilyerman pour etidye Labib.—Mat. 28:19, 20.

²³ Nou siport souvrennte Zeova e gard nou lentegrite ler nou pres konsernan lazistis, fer disip, aplik bann konsey Labib e zwenn ansanm avek nou bann frer ek ser Kretyen dan bann renyon e dan diferan lasanble. Sa bann aktivite i ed nou vin bann dimoun kouraze, annan en bon spirityalite e reisi fer lavolonte Bondye. I pa tro difisil pour nou fer sa bann aktivite akoz nou ganny sipor nou Papa dan lesyel ek son Garson. (Det. 30:11-14; 1 Rwa. 8:57) Deplis, nou annan sipor nou bann frer ek ser dan lemonn antye ki zot osi zot pe mars dan lentegrite e pe onor zot Souvren Senyer, Zeova.—1 Pyer 2:17.

[Not anba lo paz]

Ki nou pou reponn?

• Ki mannyer nou devret konsider bann prensip moral sorti kot Zeova?

• Ki bann kalite ou pli kontan dan Zob?

• Parey Zob 31:29-37 i fer resorti, dan ki fason Zob ti azir?

• Akoz i posib pour nou gard nou lentegrite anver Bondye?

[Kestyon]