Zenn, reziste lenfliyans lezot

“Ki zot parol i touzour agreab e enteresan, pour zot kapab donn bann repons valab tou dimoun.”—KOL. 4:6.

1, 2. Ki mannyer bokou zenn i santi lefet ki zot diferan e akoz?

SAN okenn dout lezot dimoun in deza met presyon lo ou. Dan en moman ou en lot, petet en dimoun in deza met presyon lo ou pour ou fer en keksoz ki ou konnen i mal. Ki mannyer ou santi kan sa i arive? Christopher ki annan 14 an i dir: “Enn ler mon zis anvi disparet ouswa fer parey tou leres manrmay kot lekol, koumsa mon pa ti pou bezwen diferan avek zot.”

² Eski lezot zenn i annan bokou lenfliyans lo ou? Si wi, akoz? Eski i posib ki ou ki anvi zot aksepte ou? I normal pour annan sa kalite santiman. Anfet, bann adilt osi i anvi ki lezot adilt i aksepte zot. Ki swa nou zenn ouswa aze, napa enn parmi nou ki kontan ganny rezete. I vre toudmenm ki si ou refize fer sa ki mal, serten dimoun pa pou kontan ou. Zezi osi ti bezwen fer fas avek menm zafer. Kantmenm sa, Zezi ti touzour fer sa ki byen. Menm si serten ti swiv li e vin son disip, lezot ti ay Garson Bondye e “konsider li konman en nanryen ditou.”—Iza. 53:3.

Pouvwar ki presyon i annan

3. Akoz i pa bon pour fer sa ki lezot zenn i demann ou pour fer?

³ Parler, ou kapab ganny tante pour fer parey lezot zenn, zis pour zot aksepte ou. Sa pou en gro fot. Bann Kretyen pa devret “parey bann zanfan ki ganny trennen par laroul.” (Efe. 4:14) I fasil pour bann pti manrmay ganny enfliyanse avek lezot. Par kont, konman en zenn, ou lo sa semen pour vin en adilt. Alor, si ou krwar ki bann standar Zeova i bon, aksepte son konsey e viv an armoni avek ou konviksyon. (Det. 10:12, 13) Si ou fer lekontrer, i konmsi ou perdi kontrol lo ou lavi. Anfet, kan ou les lezot met presyon lo ou e ou fer parey zot, ou vin parey en maryonnet dan zot lanmen.—Lir 2 Pyer 2:19.

4, 5. (a) Dan ki fason Aaron ti les lezot met presyon lo li e ki leson nou aprann atraver sa? (b) Ki lezot zenn i kapab fer pour met presyon lo ou?

⁴ En fwa, Aaron, frer Moiz ti les lezot met presyon lo li. Kan bann Izraelit ti ensiste ki i fer en bondye pour zot, i ti fer. Aaron ti en zonm kouraze. Pli boner, i ti’n siport Moiz kan zot ti koz avek Faraon, sa zonm pli pwisan Lezip. Aaron pa ti per pour pas mesaz Bondye avek li. Me kan son bann kanmarad Izraelit ti met presyon lo li, Aaron ti sede. Eski pa lenfliyans lezot i kapab annan en gran lefe lo en dimoun? Aaron ti vwar li pli fasil pour fer fas avek lerwa Lezip, ki reziste son bann konpatriyot.—Egz. 7:1, 2; 32:1-4.

 ⁵ Parey legzanp Aaron i montre, tou dimoun i ganny enfliyanse par lezot, pa zis bann zenn, e i pa zis en problenm ki zis pour bann ki ganny atire par sa ki mal. Presyon sorti kot lezot i kapab annan lefe menm lo sa bann ki senserman anvi fer sa ki byen, enkli ou osi. Ou bann kanmarad i kapab esey fer ou fer sa ki mal par sifok ou, akiz ou ouswa sikann ou. Tou fason i pa fasil pour fer fas avek presyon lezot. Pour reisi reziste presyon lezot, premyerman ou bezwen annan konfyans dan sa ki ou krwar.

“Kontinyen prouve sa ki zot ete”

6, 7. (a) Akoz i enportan pour annan konviksyon dan sa ki ou krwar e ki mannyer ou kapab devlop li? (b) Ki kestyon ou kapab demann ou lekor pour ou annan plis konviksyon?

⁶ Pour reisi fer fas avek presyon sorti kot lezot, premyerman ou bezwen konvenk ou lekor ki sa ki ou krwar, ensi ki bann standar Zeova i byen. (Lir 2 Korentyen 13:5.) Konviksyon pou ed ou annan lardyes, menm si natirelman ou timid. (2 Tim. 1:7, 8) Me, menm si en dimoun pa per fasilman, i kapab en pe difisil pour li siport oubyen fer en keksoz ki i pa antyerman krwar ladan. Alor, akoz ou pa konvenk ou lekor ki sa ki ou’n aprann dan Labib i vreman laverite? Konmans par egzamin bann krwayans de baz. Par egzanp, ou krwar dan Bondye e ou’n tann lezot dir akoz zot krwar ki i egziste. Prezan, demann ou lekor: ‘Kwa ki konvenk mwan ki Bondye i egziste?’ Bi sa kestyon se pa pour senm dout dan ou lespri, me plito pour ranforsi ou lafwa. Dan menm laliny, demann ou lekor: ‘Ki mannyer mon konnen ki Labib in ganny enspire par Bondye?’ (2 Tim. 3:16) ‘Akoz mon konvenki ki nou pe viv dan “bann dernyen zour”?’ (2 Tim. 3:1-5) ‘Kwa ki fer mwan asire ki standar Zeova i pour mon prop byennet?’—Iza. 48:17, 18.

⁷ Petet ou ezite pour demann ou lekor sa bann kestyon akoz ou per pangar ou pa pou kapab konn larepons. Me, eski pa sa i pou konmsi ou pe ezite get zegwir ki endik kantite bennzin ki i annan dan ou loto zis akoz ou per ki zegwir i lo vid! Si napa bennzin dan tenk, ou pou bezwen konnen pour ou kapab met bennzin. Pareyman, i pou byen pour ou rekonnet akoz ou napa ase konviksyon e travay dir pour devlop li.—Akt 17:11.

8. Eksplike ki mannyer ou kapab annan plis konfyans ki sa ki Bondye i dir konsernan limoralite seksyel i saz.

⁸ Egzamin en legzanp. Labib i ankouraz nou pour “elwanny [nou] avek bann pratik [seksyel] imoral.” Demann ou lekor: ‘Akoz i bon pour mwan obeir sa komannman?’ Mazin tou rezon akoz ou bann kanmarad i pratik limoralite seksyel. Reflesir osi lo diferan rezon akoz en dimoun ki pratik limoralite seksyel “i fer pese kont son prop lekor.” (1 Kor. 6:18) Aprezan, egzamin bann rezon e demann ou lekor: ‘Kwa ki pli bon pour fer? Eski i vreman vo lapenn pour pratik limoralite seksyel?’ Reflesir ankor en pe plis lo la e demann ou lekor: ‘Ki mannyer mon pou santi mwan si mon pratik limoralite seksyel?’ Definitivman ou pou ganny aksepte par serten zenn, me ki mannyer ou pou santi ou pli tar kan ou pou avek ou paran oubyen bann manm kongregasyon kot Lasal Rwayonm? Ki santiman ou pou annan kan ou pou esey priy Bondye? Eski ou vreman pare pour sakrifye ou bon relasyon avek Bondye zis pour fer plezir ou bann kanmarad lekol?

9, 10. Ki mannyer konfyans dan ou krwayans i kapab ed ou pour annan plis lasirans dan ou lekor ler ou avek lezot zenn?

⁹ Si ou en adolesan, ou dan en peryod letan dan lavi kot ou “lentelizans” pe devlop plis ki oparavan. (Lir Romen 12:1, 2.) Servi sa letan pour reflesir seryezman konsernan lenportans pour ou konnen ki savedir vin  en Temwen Zeova. Sa kalite refleksyon pou ed ou pour annan plis konfyans dan ou krwayans. Koumsa, kan ou pou fer fas avek presyon lezot, ou pa pou tarde pour reponn zot e ou pou fer li avek lasirans. Ou pou santi parey en zenn ser ki ti dir: “Kan mon reziste presyon lezot, mon pe zis fer zot konnen ki mon ete. Mon pa zis dan en ‘kek larelizyon.’ I mon fason panse, mon lobzektif, mon prensip ek mon fason viv.”

¹⁰ Wi, i demann bokou zefor pour reste ferm pour sa ki ou konnen i byen. (Lik 13:23, 24) Parler ou kapab mazinen si i vo lapenn. Me zis rapel sa: Si ou ezite ouswa kanmi pour fer lezot konn ou pozisyon e zot santi sa, zot pou met plis presyon ankor lo ou. Par kont, si ou koz avek konviksyon, ou kapab reste ebete pour vwar ki zot pou aret met presyon lo ou.—Konpar Lik 4:12, 13.

“Reflesir pour kapab reponn”

11. Ki byenfe ou gannyen kan ou byen prepare pour fer fas avek presyon lezot?

¹¹ En bon preparasyon i en lot pa enportan ki ede pour reziste presyon lezot. (Lir Proverb 15:28. *) En dimoun ki byen prepare i enn ki pe mazin davans lo en sityasyon ki kapab leve. Parler, en bon preparasyon davans i kapab anpese ki ou eksperyans bann gro difikilte. Par egzanp, meton ou vwar detrwa ou kanmarad lekol dan lwen pe fimen. Eski pa tre probab zot pou ofer ou en sigaret? Sa pou en problenm, ki ou pou fer? Proverb 22:3 i dir: “En dimoun pridan i al kasyet li ler i’n vwar maler.” Si ou sanz semen ou pa pou bat avek zot. I pa vedir ki ou per zot, me i zis ki i sa pli bon keksoz pour fer.

12. Ki ou kapab fer kan en kanmarad i met presyon lo ou?

¹² Me si i arive ki ou bat dan en sityasyon en sel kou? Meton en lot zenn i pa oule krwar ki ou napa en bouldou e i dir ou: “Ou pa ankor sorti avek en garson, ou?” Pli bon keksoz pour fer se swiv sa konsey dan Kolosyen 4:6: “Ki zot parol i touzour agreab e enteresan, pour zot kapab donn bann repons valab tou dimoun.” Parey sa verse i montre, lafason ou reponn en kestyon parey pou depan lo sirkonstans. Petet i pa pou neseser pour donn bann gran leksplikasyon baze lo Labib. Zis en larepons senp e ferm i kapab sifi. Par egzanp, si ou ganny demande si ou pa ankor sorti avek en garson oubyen en fiy, ou kapab zis dir: “Non,” ouswa: “Eskize, me sa pa konsern ou.”

13. Akoz bon zizman i neseser kan en lot zenn i demann ou en kestyon ki pa konsern li?

¹³ Zezi ti souvan donn en larepons bref kan i ti remarke ki si i dir bokou i pa ti pou abouti dan nanryen. Anfet, kan Erod ti kestyonn li, Zezi pa ti dir nanryen. (Lik 23:8, 9) I pli bon reste trankil si en dimoun i demann ou en bann kestyon ki pa konsern li. (Prov. 26:4; Ekle. 3:1, 7) De lot kote, petet ou kapab santi si en dimoun i senser ler i pe demann ou en kestyon, akoz petet i zis anvi konn keksoz lo ou krwayans tel ki ou pwennvi lo seks, menm si oparavan i ti mal koz avek ou. (1 Pyer 4:4) Dan sa ka, i pou byen pour ou donn li en pli gran leksplikasyon lo ou pozisyon baze lo Labib. Si sa i leka, pa per pour koze. Fer sir ki ou “touzour pare pour donn en repons bann ki demann [ou] leksplikasyon.”—1 Pyer 3:15.

14. Avek bon zizman, ki mannyer ou kapab tir presyon lo ou e anvoy li lo sa enn ki pe met presyon lo ou?

¹⁴ Dan serten sityasyon, ou kapab tir sa presyon lo ou e anvoy li lo sa dimoun. Par kont, ou devret esey fer li avek bon zizman. Par egzanp, meton en kanmarad lekol pe fors ou pour pran en sigaret ki i pe ofer ou, ou kapab dir: “Non mersi,” e apre sa dir:  “Mon ti krwar dimoun parey ou pa fimen mwan!” Ou vwar ki mannyer ou’n tir presyon lo ou e anvoy lo li? Olye bezwen eksplik li akoz ou pa fimen, ou parol pou motiv li pour demann son lekor akoz li i pe fimen. *

15. Kan i apropriye pour ou kit sa landrwa e ale ler lezot i esey met presyon lo ou e akoz?

¹⁵ Me ki ou pou fer si malgre sa zefor ki ou fer, zot kontinyen met presyon lo ou? Dan sa ka, i pou pli bon si ou kit zot e ale. Pli ou reste lontan, i pou annan plis sans ki ou pou fer konpromi dan en fason ou en lot. Alor, pa reste la, ale. Ou kapab fer li san ki ou santi ki ou’n perdi sa batay. Apre tou, ou ki’n annan kontrol lo sityasyon. Ou pa’n les zot manipil ou e ou’n fer leker Zeova kontan.—Prov. 27:11.

Fer ‘bann plan ki anmenn lavantaz’

16. Ki mannyer serten ki pretann zot Kretyen i kapab met presyon lo ou?

¹⁶ Parler, lezot zenn ki pretann pe servi Zeova i kapab met presyon lo ou pour fer bann keksoz mal. Par egzanp, meton ou’n ariv kot en rankont ki en dimoun parey in fer e dekouver ki napa okenn sipervizyon en adilt. Ouswa, en zenn ki pretann i en Kretyen, i anmenn bwar dan en rankont e zot tou, ensi ki ou osi, zot napa laz pour bwar lalkol. Ki ou pou fer? En kantite sityasyon pou leve kot ou pou bezwen swiv ou konsyans ki’n ganny antrennen par Labib. En Kretyen adolesan ti rakonte: “Nou de mon pti ser nou ti kit lasal sinema akoz i ti annan en kantite zoure dan sa film. Lezot ki ti avek nou ti reste. Nou paran ti felisit nou pour sa ki nou ti fer. Par kont, sa bann lezot zenn ti ankoler, akoz dapre zot nou ti’n fer zot ganny gro latet.”

17. Kan ou dan en rankont, ki aksyon ou kapab pran pour obeir standar Bondye?

¹⁷ Parey sa leksperyans i montre, ou kapab vwar ou dan en sityasyon difisil si ou swiv ou konsyans ki’n ganny antrennen par Labib. Me ou, fer sa ki ou konnen i byen. Prepar ou pour fer fas avek nenport kwa. Si ou pe al en rankont, touzour mazinen ki ou pou fer si keksoz pa deroul parey ou ti pe ekspekte. Pour serten zenn, zis en koudtelefonn i sifi pour zot retourn kot zot boner e sa i en desizyon ki zot in pran avek zot paran. (Ps. 26:4, 5) Bann tel ‘plan i anmenn lavantaz.’—Prov. 21:5.

‘Rezwir dan ou zenes’

18, 19. (a) Akoz ou kapab asire ki Zeova i anvi ou ere? (b) Ki mannyer Bondye i santi anver sa bann ki reziste presyon lezot?

¹⁸ Zeova in kree ou avek sa dezir pour rezwir lavi e i anvi ki ou ere. (Lir Eklezyast 11:9. *) Rapel byen ki sa ki bokou zenn pe fer se ki zot pe “zouir pese pandan en pti pe letan.” (Ebr. 11:25) Sa vre Bondye i anvi ou ganny en keksoz ki pli meyer ki sa. I anvi ou ere pour touzour. Alor, kan ou ganny tante pour fer en keksoz ki ou konnen i mal devan lizye Zeova, rapel byen ki a lafen di zour, sa  ki Zeova i demann ou pour fer i touzour pour ou prop dibyen.

¹⁹ Konman en zenn, ou devret realize ki menm si ou ganny laprouvasyon lezot zenn, dan ankor en pe letan, laplipar zot pa ni pou menm rapel ou non. De lot kote, kan ou reziste presyon lezot, Zeova i remarke e i pa pou zanmen oubliy ou ek ou fidelite. I pou “ouver lesyel e [i pou] devid en ­benediksyon lo [ou] ziska ki i ava nepli annan ankor bezwen.” (Mal. 3:10) An plis ki sa, i pou donn ou son lespri sen pour sirmont okenn febles ki ou vwar difisil pour fer fas avek. Wi, Zeova i kapab ed ou reziste tantasyon ki ou kapab gannyen avek lezot zenn!

[Not anba lo paz]

Eski ou rapel?

• Ki pouvwar presyon lezot i kapab annan?

• Akoz i bon annan konviksyon ler ou pe reziste presyon lezot?

• Ki preparasyon ou bezwen fer pour fer fas avek presyon lezot?

• Ki mannyer ou konnen ki ou fidelite i annan gran valer pour Zeova?

[Kestyon]