Sekre 5

Satisfer ou bezwen spirityel

KI LABIB I DIR? “Byennere bann ki pov an-espri [oubyen “ki konsyan zot bezwen spirityel,” NW] akoz rwayonm lesyel i pour zot.”—Matye 5:3

KI SA DEFI? I annan bokou parmi sa plizyer milye diferan larelizyon ki ansenny bann fason pour satisfer nou bezwen spirityel me zot bann lansennyman pa an armoni avek kanmarad. Ki mannyer ou kapab konnen lekel parmi ki pe ansenny laverite e ki pe vreman fer plezir Bondye? Serten ekriven renonmen i dir ki i pa fer sans e i menm danzere pour krwar dan Bondye e pour annan devosyon pour li. Magazin Maclean’s i rezim pwennvi en msye renonmen ki pa krwar dan Bondye: “Sa lide ki bann Kretyen i annan, ki i annan en keksoz ki lasyans pa kapab eksplike e ki i annan en lot keksoz dan nou apard ki nou bann sans . . . i fer sa sel lavi ki nou annan napa valer e fer nou annan sa tandans pour vin vyolan.”

KI OU KAPAB FER? Egzamin bann ­levidans ki prouv legzistans Bondye. (Romen 1:20; Ebre 3:4) Pa bezwen les personn dekouraz ou pour rod larepons bann kestyon ki enportan, tel parey: Akoz nou la lo later? Eski i annan lavi apre lanmor? Akoz i annan en kantite soufrans? Ki Bondye i ekspekte avek mwan? I enportan pour ganny larepons satisfezan lo sa bann kestyon si ou anvi toultan kontant ou avek sa ki ou annan.

Par kont, pa otomatikman aksepte tou sa ki dimoun i dir ou. Parol Bondye i ankouraz ou pour “reflesir” e servi “ou lentelizans pour konpran” ki si sa lavolonte Bondye. (2 Timote 2:7) Ou zefor pou ganny rekonpanse. Si ou fer letan pour etidye Labib e aplik son bann konsey pratik, ou pou kapab evit problenm, ou pou nepli enkyet parey avan, e ou pou pli ere. Sa promes pa anven. Plizyer milyon dimoun ki sorti dan diferan lanvironnman in benefisye par aprann laverite lo Bondye ek son plan. Par egzanp, lir sa fe lo lavi sa dimoun ki dan Latour Veyer le 1 Novanm 2010 an Angle, lo paz 18 ziska 21.

Anmezir ki ou tir byenfe ler ou aplik bann konsey saz ki sorti dan Labib, ou pou annan plis devosyon pour Bondye. Akoz ou pa aksepte sa lenvitasyon pour etidye Labib avek en Temwen Zeova? Si ou fer sa, ou pou sirman dakor avek zapot Pol ki ti ekrir: “Lafwa dan Bondye i en gran sours larises pour en dimoun si i kontant li avek sa ki i annan.”—1 Timote 6:6.

[Portre lo paz 8]

Reflesir e servi ou lentelizans pour konpran ki si sa lavolonte Bondye