“Pran refiz dan non Zeova”
“Pran refiz dan non Zeova”
“Mon pou sertennman kit en pep ki annan limilite e ki modes . . . e zot pou vreman pran refiz dan non Zeova.”—TSEF. 3:12.
1, 2. Ki sa tanpet senbolik ki pou frap limanite byento?
ESKI in deza arive kot ou ti bezwen kasyet en gro lapli anba en langar? Si en gro divan ouswa siklonn pe aprose, i pa sifi pour kasyet anba en langar pour ganny proteze.
2 I annan en lot kalite tanpet ki pe aprose, enn ki menas legzistans limanite. I “en zour tanpet” dan en sans senbolik. Sa “gran zour Zeova” pou annan en lefe lo tou limanite. Par kont, nou kapab trouv sa landrwa kasyet oubyen refiz ki nou bezwen. (Lir Tsefanya 1:14-18. *) Ki mannyer nou kapab trouv refiz pandan “sa zour firer Zeova” ki pou konmanse byento?
Bann zour tanpet dan Labib
3. Ki sa “loraz” ki ti frap sa dis tribi Rwayonm Izrael?
3 Zour Zeova pou konmans avek destriksyon tou fo larelizyon lo later. Pour nou konnen konman pour rod refiz, nou devret revwar listwar pep Bondye dan letan pase. Izai ki ti viv dan wityenm syek A.N.L., ti konpar zizman Zeova lo sa dis tribi aposta rwayonm Izrael konman “tanpet” ki dimoun pa ti pou kapab anpes arive. (Lir Izai 28:1, 2. *) Sa profesi ti ganny akonplir an 740 A.N.L., ler bann Asiryen ti anvair pei sa bann tribi e Efraim ti sa tribi pli enportan parmi sa dis.
4. Ki mannyer sa “gran zour Zeova” ti frap Zerizalenm dan lannen 607 A.N.L.?
4 Dan lannen 607 A.N.L., apre zizman Bondye lo Izrael ki ti enfidel, Zerizalenm ek rwayonm Zida ti fer fas avek “gran zour Zeova.” Sa levennman ti arive akoz pep Zida osi ti’n tonm dan lapostazi. Bann Babilonnyen ki ti anba pouvwar Neboukadnetsar ti menas Zida ek son kapital, Zerizalenm. Bann zabitan Zida ti rod led avek “sa fo refiz” setadir avek Lezip sa pei ki zot ti’n fer en lagreman politik avek. Me, parey en tanpet lagrel ki fer bokou fraka, bann Babilonnyen ti detri sa “refiz.”—Iza. 28:14, 17.
5. Ki pou arive avek pep Bondye konman en group pandan destriksyon tou bann fo larelizyon?
5 Gran zour Zeova ki ti frap Zerizalenm ti pe montre sa zizman ki ti pou arive lo bann ki pretann ki zot Kretyen dan nou letan. Deplis, tou sa ki form parti “Gran Babilonn,” setadir tou fo larelizyon pou ganny detri. Apre sa, tou sa ki reste e ki form parti move lemonn Satan pou ganny detri. Malgre sa, pep Bondye konman en group pou sirviv akoz zot pe pran refiz dan Zeova.—Rev. 7:14; 18:2, 8; 19:19-21.
Refiz spirityel ek literal
6. Ki mannyer pep Zeova i kapab trouv refiz?
6 Ki mannyer pep Bondye i kapab trouv refiz konmela menm pandan letan lafen? Nou kapab trouv refiz spirityel si nou ‘mazin non Bondye’ ler nou priye e servi li avek devouman. (Lir Malaki 3:16-18. *) Me nou rekonnet ki nou bezwen fer plis ki zis mazin son non. Nou lir: “Tou sa ki kriy non Zeova pou ganny sove.” (Rom. 10:13, NW) I annan en konneksyon ant kriy non Zeova e ganny sove par li. En kantite dimoun senser i kapab vwar ladiferans ant bann vre Kretyen ki “mazin son non” avek respe e ki pe servi li konman son Temwen ek bann ki pa pe servi li.
7, 8. Dan ki fason bann Kretyen dan premye syek ti ganny sove e ki similarite sa i annan avek nou letan?
7 Kantmenm sa, pour nou kapab ganny sove, i pa sifi zis pour trouv en refiz spirityel. Pep Bondye in ganny promet ki zot pou ganny sove dan en sans literal. Sa i evidan ler nou egzamin sa ki ti arive dan lannen 66 N.L. apre ki larme Romen anba komann Sestis Galis ti atak Zerizalenm. Zezi ti predir ki sa bann zour ladetres pou “ganny diminyen.” (Mat. 24:15, 16, 21, 22) Sa ti arive kan larme Romen ti kit lavil Zerizalenm ki zot ti’n anserkle san ekspekte, e sa ti permet serten dimoun, sirtou bann Kretyen, pour ganny “sove.” Zot ti kapab kit sa lavil e bann rezyon dan zalantour. Serten ti travers larivyer Zourden e trouv refiz dan bann montanny lo kote les sa larivyer.
8 Nou kapab trouv bann similarite ant bann Kretyen dan sa letan ek pep Bondye ozordi. Dan lepase, bann Kretyen dan premye syek ti rod refiz e bann serviter Bondye ozordi pou fer parey. Me sa voyaz, i pa pou enplik sove dan en sans literal pour al dan en lot landrwa spesifik, vi ki bann vre Kretyen i reste en pe partou dan lemonn. Kantmenm sa, si “son pep ki in swazir” ek zot konpanyon fidel i pran refiz dan Zeova ek son lorganizasyon ki parey en montanny, zot pou ganny proteze dan en sans literal kan bann ki pretann ki zot Kretyen pou ganny detri.
9. Lekel ki’n esey fer non Zeova ganny oubliye? Donn en legzanp.
9 De lot kote, bann ki pretann ki zot Kretyen i merit sa destriksyon ki pe vini byento akoz zot pa’n ansenny zot bann fidel laverite lo Bondye ek son bann prensip e zot in demontre laenn pour son non. Dan lepok Mwayennaz, bokou dimoun Lerop ti konn non prop Bondye. Sa non, ki ganny reprezante par kat let Ebre apele Tetragram e ki souvan ganny tradwir par YHWH (oubyen JHVH), ti ganny trouve lo bann pyes larzan, fasad bann lakaz, dan bann liv, Labib e menm dan serten legliz Katolik ek Protestan. Me, i komen ozordi pour tir non Bondye dan bann tradiksyon Labib e pa servi sa non menm dan lezot sirkonstans. Sa let ki ti ganny adrese avek bann Levek dan sa konferans lo ‘Non Bondye,’ ki date le 29 Zen 2008, pibliye par Kongregasyon pour Ladorasyon Bondye ek Disiplin bann Sakreman i en legzanp. Dan sa let, Legliz Katolik Romen ti donn lord pour aret servi Tetragram dan nenport ki form ki i ganny ekrir e ki i devret ganny ranplase par “Senyer.” Vatikan ti donn lord ki non Bondye pa devret ganny servi oubyen prononse dan bann kantik ek lapriyer pandan bann servis relizye ki Legliz Katolik i fer. Bann sef relizye ki pretann ki zot Kretyen ensi ki lezot larelizyon in osi kasyet lidantite sa vre Bondye avek plizyer milyon adorater.
Proteksyon pour bann ki pe sanktifye non Bondye
10. Ki mannyer non Bondye pe ganny onore ozordi?
10 Kontrerman avek sa ki lezot larelizyon pe fer, Temwen Zeova i onor e glorifye non Bondye. Zot sanktifye son non par servi sa non avek respe. Zeova i pran plezir dan bann dimoun ki annan konfyans dan li e i kapab vin sa ki i anvi vini pour beni e protez son pep. “I konn bann ki pe rod refiz dan li.”—Nao. 1:7; Akt 15:14.
11, 12. Lekel ki ti soutenir non Zeova Zida dan letan lontan, e lekel ki’n fer li dan nou letan?
11 Menm si lamazorite dimoun dan ansyen Zida ti vin aposta, i ti annan serten ki ti pran “refiz dan non Zeova.” (Lir Tsefanya 3:12, 13. *) Wi, kan Bondye ti pini Zida akoz zot enfidelite par les bann Babilonnyen defet sa pei e anmenn son pep an egzil, i ti annan serten dimoun ki ti ganny eparnyen, par egzanp Zeremi, Barouk ek Ebed-melek. Zot ti viv “parmi” en nasyon aposta. Lezot ti reste fidel pandan ki zot ti an egzil. An 539 A.N.L., bann Med ek Pers ki ti pe ganny komande par Siris ti ranport laviktwar lo Babilonn. Pa tro lontan apre, Siris ti pas en lord ki ti permet serten Zwif pour retourn dan zot pei.
12 Ler Tsefanya ti pe koz konsernan bann dimoun ki ti pou benefisye avek restorasyon vre ladorasyon, i ti predir ki Zeova ti pou sov zot e pou dan lazwa akoz zot. (Lir Tsefanya 3:14-17. *) Sa in vin vre dan nou letan osi. Apre ki Rwayonm Bondye ti ganny etablir dan lesyel, Zeova ti delivre bann Kretyen swazir ki ti ankor lo later dan lesklavaz Gran Babilonn. Zeova i dan lazwa akoz zot, ziska ozordi.
13. Ki mannyer bann dimoun dan tou nasyon pe ganny libere?
13 Bann dimoun ki annan lespwar pour viv pour touzour lo later in bezwen osi sorti dan Gran Babilonn e zot in ganny libere dan en sans spirityel avek bann fo lansennyman. (Rev. 18:4) Alor Tsefanya 2:3 pe trouv son pli gran lakonplisman dan nou letan: “Rod Zeova, zot tou ki annan limilite lo later.” Bann dimoun ki annan limilite dan tou nasyon, ki swa zot annan lespwar pour viv dan lesyel oubyen lo later, pe aprezan pran refiz dan non Zeova.
Non Bondye pa en gardkor
14, 15. (a) Ki serten dimoun in servi konman gardkor? (b) Kwa ki nou pa devret servi konman en portboner?
14 Serten Izraelit ti konsider tanp konman en gardkor, en landrwa kot zot ti pou ganny proteze kont zot bann lennmi. (Zer. 7:1-4) Pli boner, bann Izraelit ti vwar lars lalyans konman en portboner ki ti pou protez zot ler zot al lager. (1 Sam. 4:3, 10, 11) Constantine ti met sa let Grek khi e rho, sa de premye let dan non “Kris” dan langaz Grek lo boukliye son bann solda an krwayan ki sa ti pou protez son bann solda dan batay. Lerwa Gustav Adolph 2 sorti Laswed e ki ti partisip dan en lager ki ti apel Lager Trant An ti met sa proteksyon batay ki nou trouve lo paz 15. Remarke ki sa non Iehova ti byen evidan lo sa proteksyon.
15 I annan serten parmi pep Bondye ki’n ganny atake par bann demon e zot in trouv refiz dan non Zeova ler zot in kriy for son non. Kantmenm sa, nou pa devret konsider en lobze ki annan non Bondye lo la konman en gardkor oubyen servi li konman en portboner, konmsi i annan serten pouvwar mazik pour protez nou. Sa pa vedir pran refiz dan non Zeova.
Rod refiz ozordi
16. Dan en sans spirityel, ki mannyer nou kapab pran refiz ozordi?
16 Nou trouv refiz ozordi dan sa lanvironnman spirityel kot pep Bondye konman en group i santi zot an sekirite. (Ps. 91:1) Atraver “sa lesklav fidel e pridan” ek bann ansyen dan kongregasyon, nou’n ganny averti kont bann sanzman dan lemonn ki kapab met an danze sa sekirite. (Mat. 24:45-47, NW; Iza. 32:1, 2) Zis mazin sa kantite fwa ki nou’n ganny averti konsernan materyalizm e esey vwar ki mannyer sa bann lavertisman in protez nou kont bann maler ki ti pou’n kapab afekte nou spirityalite. Ki pour dir konsernan sa danze pour devlop en latitid ensousyan ki kapab fer nou vin inaktif dan servis Zeova? Parol Bondye i dir: “Bann enbesil pou ganny detri akoz zot in azir dan en fason ensousyan. Me sa enn ki pe ekout mwan, pou reste an sekirite e i pou viv dan trankilite san per maler.” (Prov. 1:32, 33) Ler nou fer bokou zefor pour reste moralman pir sa i osi ed nou pour protez nou spirityalite.
17, 18. Kwa ki pe ed plizyer milyon dimoun pour pran refiz dan non Zeova ozordi?
17 Mazin osi sa lankourazman sorti kot lesklav fidel ki demann nou pour swiv lord Zezi pour pres sa bon nouvel Rwayonm partou dan lemonn. (Mat. 24:14; 28:19, 20) Tsefanya ti mansyonn en sanzman ki ti pou ed dimoun pran refiz dan non Bondye. Nou lir: “Mon pou sanz langaz sa pep e fer zot koz en langaz pir, pour ki zot tou zot kriy o non Zeova, pour zot kapab servi li zepol kont zepol.”—Tsef. 3:9.
18 Ki si sa sa langaz pir? Langaz pir i laverite lo Zeova ek son plan ki trouve dan son Parol enspire. Dan en sans ou pe servi sa langaz ler ou ed lezot pour annan sa bon konprenezon lo Rwayonm Bondye, ler ou montre zot konman i pou sanktifye son non, ler ou met lanfaz lo zistifikasyon souvrennte Bondye e ler avek lazwa ou koz lo bann benediksyon dirab ki bann imen fidel pou gannyen. Lefet ki bokou dimoun pe koz sa langaz senbolik, i annan deplizanpli dimoun ki pe “kriy o non Zeova” e “servi li zepol kont zepol.” Wi, konmela menm i annan plizyer milyon dimoun dan lemonn antye ki pe rod refiz dan Zeova.—Ps. 1:1, 3.
19, 20. Ki mannyer serten ki ti met konfyans dan “fo refiz” pa ti reisi dan letan Labib?
19 Bann dimoun partou dan lemonn i bezwen fer fas avek bann problenm ki paret difisil pour sirmonte. Telman zot anvi rezourd zot problenm, en kantite i rod led avek bann zonm enparfe oubyen zot met zot lespwar dan bann lorganizasyon politik pour trouv solisyon pour zot problenm. Zis parey bann Izraelit parler ti rod sipor e fer bann lalyans avek bann nasyon ki ti dan zot zalantour. Me, nou konnen ki sa pa ti anmenn okenn byenfe pour nasyon Izrael. Napa okenn lorganizasyon politik ozordi e ni menm lorganizasyon Nasyon-z-ini pa pou kapab totalman rezourd bann problenm limanite. Alor, eski i fer sans pour en dimoun vwar bann lorganizasyon politik oubyen bann lalyans konman en refiz? Dan Labib zot ganny apele dan en fason profetik en “fo refiz.” Ou annan rezon konsider zot dan sa fason akoz tou bann dimoun ki annan lespwar dan zot pou vreman dezapwente.—Lir Izai 28:15, 17. *
20 Byento tanpet lagrel senbolik, zour Zeova, pou frap later. Bann lorganizasyon imen pa pou kapab donn okenn proteksyon, ni okenn landrwa kasyet kont zarm nikleer e ni larises. Izai 28:17 i dir: “Fodre lagrel i balye sa fo refiz e delo i kouver sa landrwa kasyet.”
21. Ki byenfe nou kapab retire par swiv sa teks pour lannen 2011?
21 Konmela menm e pandan ki sa bann levennman pou arive, pep Bondye pou trouv vre sekirite dan zot Bondye, Zeova. Non Tsefanya i vedir “Zeova in kasyet,” e sa parol i met lanfaz lo sa vre landrwa kasyet. I apropriye ki nou teks pour lannen 2011 i donn nou sa konsey saz: “Pran refiz dan non Zeova.” (Tsef. 3:12) Depi konmela menm, nou kapab e devret pran refiz dan non Zeova e annan konfyans total dan li. (Ps. 9:10) Annou sak zour gard antet lasirans ki sa parol enspire i donn nou, konmkwa “non Zeova i en latour for. Bann dimoun drwat i tay ladan e zot ganny proteksyon.”—Prov. 18:10.
[Not anba lo paz]
^ par. 2 Tsefanya 1:14-18: “Gran zour Zeova i pros. I pros, e i pe vin byen vit. Zour Zeova pou vin avek en tapaz terib. En zonm for pou fer en kriye sa zour. 15 Sa zour i en zour firer, en zour ladetres ek langwas, en zour tanpet ek dezolasyon, en zour fernwanr ek teneb, en zour nyaz ek teneb epe. 16 En zour kot tapaz korn ek alarm pou rezonnen kont bann lavil fortifye e kont bann gran latour dan bann kwen miray. 17 Mon pou koz ladetres pour limanite, e zot pou sertennman mars parey bann zonm aveg; parski se kont Zeova ki zot in fer pese. E zot disan pou sirman ganny verse parey lapousyer, e zot trip parey malpropte. 18 Ni zot larzan ni zot lor pa pou kapab delivre zot zour firer Zeova; me par dife son devouman, later antye pou ganny devore akoz i pou anmenn en destriksyon vreman terib lo tou zabitan later.”
^ par. 3 Izai 28:1, 2: “I pou terib pour kouronn sa bann soular Efraim e sa fler fannen ki dekor sa lavil ki par lao sa vale fertil kot bann ki’n sou avek diven i reste. 2 Gete! Zeova i annan en dimoun ki for e pwisan. Parey tanpet, lagrel ek loraz, en tanpet destriksyon, parey tanpet, loraz ek gro linondasyon, i pou sertennman zet zot ater avek lafors.”
^ par. 6 Malaki 3:16-18: “Sa letan, bann ki annan lakrent pour Zeova ti koz avek kanmarad, sakenn avek son konpanyon, e Zeova ti kontinyen port latansyon e ekoute. En liv souvenir ti konmans ganny ekrir devan li pour bann ki annan lakrent pour Zeova e pour bann ki mazin son non. 17 Zeova bann larme in dir, ‘Zot pou sirman vin pour mwan, zour ki mon pe prodwir en propriyete spesyal. Mon pou montre zot konpasyon, zis parey en zonm i montre konpasyon anver son garson ki pe servi li.’ 18 Ankor enn fwa zot pou vwar ladiferans ant en dimoun drwat ek enn mesan, ant enn ki pe servi Bondye ek enn ki pa’n servi li.”
^ par. 11 Tsefanya 3:12, 13: “Mon pou sertennman kit en pep ki annan limilite ek ki modes parmi ou, e zot pou vreman pran refiz dan non Zeova. 13 Konsernan sa bann ki pou ganny lese an Izrael, zot pa pou fer sa ki move, ni koz en mansonz, ni en lalang rize pa pou ganny trouve dan zot labous; akoz zot pou manze e vreman alonze, e pou napa personn ki pou fer zot tranble.”
^ par. 12 Tsefanya 3:14-17: “Kriye avek lazwa, O fiy Siyon! Kriye avek lakontantman, O Izrael! Rezwir e eksprim ou lazwa avek tou ou leker, O fiy Zerizalenm! 15 Zeova in retir kondannasyon lo ou. I’n fer disparet ou lennmi. Zeova, Lerwa Izrael, i parmi ou. Ou pa pou per okenn maler. 16 Sa zour i pou dir avek Zerizalenm: ‘Pa bezwen per, O fiy Siyon. Pa bes lebra. 17 Zeova ou Bondye i parmi ou. Konman sa Enn ki for, i pou delivre ou. I pou dan lazwa akoz ou. I pou reste trankil akoz son lanmour. I pou dan lazwa e kriye avek lazwa akoz ou.’”
^ par. 19 Izai 28:15, 17: “Akoz zot in dir: ‘Nou’n fer en lalyans avek Lanmor; e avek Seol nou’n akonplir en vizyon; sa ta delo ki deborde, si i pase i pa pou arive kot nou, akoz nou fer sa ki fo vin nou refiz e nou’n kasyet nou dan sa ki pa vre.’” “Wi, mon pou fer ladrwatir vin en latres e lazistis vin en nivo; fodre ki lagrel i balye sa fo refiz e delo i kouver sa landrwa kasyet.”
Eski ou rapel?
• Ki mannyer nou kapab pran refiz dan non Zeova ozordi?
• Akoz nou pa devret annan konfyans dan “sa fo refiz”?
• Ki refiz nou asire nou pou gannyen dan lavenir?
[Kestyon]
[Ekstre lo paz 14]
Teks pour lannen 2011 i: “Pran refiz dan non Zeova.”—Tsefanya 3:12.
[Portre sorti kot lo paz 15]
Thüringer Landesmuseum Heidecksburg Rudolstadt, Waffensammlung “Schwarzburger Zeughaus”