Profit byen ou lavi selibater

“Sa ki kapab konpran sa lansennyman konpran li!”—MAT. 19:12.

1, 2. (a) Ki mannyer Zezi, Pol ek lezot ti vwar lavi selibater? (b) Akoz serten pa konsider lavi selibater konman en kado?

MARYAZ i san okenn dout en kado vreman presye ki Bondye in donn limanite. (Prov. 19:14) Pourtan, bokou Kretyen selibater osi i annan en lavi satisfezan e ere. Harold, en frer 95 an ki pa’n zanmen marye i dir: “Menm si mon kontan kan mon avek lezot e mon demontre lospitalite, kan mon tousel mon pa zanmen santi mwan tousel. Savedir mon kapab dir ki mon lavi konman en selibater i en kado.”

² Zezi Kri ek zapot Pol, tou le de ti refer avek lavi selibater konman en kado sorti kot Bondye, zis parey maryaz. (Lir Matye 19:11, 12; 1 Korentyen 7:7.) Me, i vre, pa tou sa ki pa ankor marye ki selibater akoz i zot swa. Parler sirkonstans i kapab fer li difisil pour trouv en konzwen ideal. Ouswa, apre en serten kantite lannen maryaz, serten i retrouv zot tousel akoz divors ouswa lanmor zot konzwen. Alor, dan ki sans lavi selibater i en kado? Ki mannyer bann Kretyen selibater i kapab profit byen avek zot sirkonstans?

En kado spesyal

3. Ki lavantaz bann Kretyen selibater i souvan annan?

³ En selibater i souvan annan plis letan ek plis liberte ki en dimoun ki’n marye. (1 Kor. 7:32-35) Sa i bann lavantaz spesyal ki fer li posib pour li partisip plis dan minister, demontre lanmour anver plis dimoun e vin pli pros ankor avek Zeova. Se pour sa rezon ki en kantite Kretyen in apresye byenfe ki zot kapab gannyen pour reste tousel e zot deside fer li pour omwen en serten letan. Pour lezot, i pa ti dan zot plan pour reste tousel, me kan zot sirkonstans in sanze, dan lapriyer zot in reflesir lo zot sityasyon e realize ki avek led Zeova zot osi zot pou vreman kapab fer li. Alor, zot in aksepte sa sanzman dan zot sirkonstans e zot in reste selibater.—1 Kor. 7:37, 38.

4. Akoz bann selibater i kapab santi ki zot servis pour Bondye i annan valer?

⁴ Bann Kretyen selibater i konnen ki pa fodre zot marye pour zot ganny rekonnet ouswa apresye par Zeova ouswa son lorganizasyon. Bondye i kontan nou tou personnelman. (Mat. 10:29-31) Napa personn ouswa napa nanryen ki kapab separ nou avek lanmour Bondye. (Rom. 8:38, 39) Ki swa nou’n marye ouswa nou selibater, nou annan tou rezon pour santi ki nou servis pour Bondye i annan valer.

5. Kwa ki neseser pour byen profit lavi konman en selibater?

⁵ Kantmenm sa, zis parey avek bann talan mizikal ouswa atletik ki nou annan e ki kapab ganny konsidere konman en kado, i demann bokou zefor pour ou kapab profit byen ou lavi selibater ki osi en kado. Alor, ki mannyer bann Kretyen selibater dan nou letan, ki swa zot bann frer oubyen ser, zenn ouswa aze ki selibater akoz i zot swa ouswa akoz sirkonstans, i kapab profit byen zot sityasyon? Annou egzamin serten legzanp ankourazan dan kongregasyon Kretyen dan premye syek e vwar ki nou kapab aprann.

 Selibater dan letan lazenes

6, 7. (a) Ki privilez bann fiy Filip ki ti ankor vyerz ti gannyen dan servis Bondye? (b) Dan ki fason Timote ti profit byen sa bann lannen ki i ti selibater e ki benediksyon i ti gannyen pour servi Bondye dan son zenntan?

⁶ Filip sa evanzelizater ti annan kat fiy vyerz ki ti annan menm devouman avek zot papa pour anons levanzil. (Akt 21:8, 9) Profetize ti enn parmi bann don mirakile lespri sen e sa bann zenn fiy ti servi sa don pour akonplir Yoel 2:28, 29.

⁷ Timote ti en zenn onm ki ti profit byen son lavi selibater. Depi lanfans i ti ganny ansennyen “Lekritir sakre” avek son manman Enis ek son granmanman Lois. (2 Tim. 1:5; 3:14, 15) Me, tre probab zot ti vin bann Kretyen pandan premye vizit ki Pol ti fer Lis, zot lavil natal apepre lannen 47 N.L. De-z-an pli tar, kan Pol ti vin vizit sa landrwa pour en dezyenm fwa, Timote ti petet dan son 19 an, 20-t-an. Malgre ki i ti ankor zenn e nouvo dan laverite, bann ansyen Lis ek Ikonyonm, ki pa ti tro lwen, ti “dir bokou dibyen lo li.” (Akt 16:1, 2) Alor, Pol ti envit Timote pour vwayaz avek li konman son konpanyon. (1 Tim. 1:18; 4:14) Nou pa kapab dir san poursan ki Timote pa ti zanmen marye. Me, nou konnen ki konman en zenn onm i ti byen kontan pour aksepte lenvitasyon Pol. Pour plizyer lannen apre sa, i ti kontan pour servi konman en misyonner e sirveyan selibater.—Fili. 2:20-22.

8. Kwa ki ti ed Zan Mark pour pourswiv bann lobzektif spirityel e ki benediksyon i ti gannyen akoz sa?

⁸ Pandan son zenes, Zan Mark osi ti profit byen son lavi selibater. Ansanm avek son manman ki ti apel Mari ek son kouzen Barnabas, zot ti parmi bann premye manm kongregasyon Zerizalenm. I paret ki fanmir Mark ti viv en lavi ase konfortab parski zot ti annan zot prop lakaz dan lavil ek en servant. (Akt 12:12, 13) Par kont, malgre sa bann lavantaz, menm konman en zenn, Mark pa ti egois ouswa mazin zis son lekor. I pa ti oule viv en lavi konfortab avek responsabilite familyal. Lefet ki depi o konmansman i ti asosye avek bann zapot, sa i fer ki i ti devlop sa dezir pour fer servis misyonner. Sanmenm sa i ti kontan pour al ansanm avek Pol ek Barnabas lo zot premye vwayaz misyonner e vin en led pour zot. (Akt 13:5) Apre sa, i ti vwayaz avek Barnabas e pli tar i ti servi Bondye ansanm avek Pyer, Babilonn. (Akt 15:39; 1 Pyer 5:13) Nou pa konnen ki kantite letan Mark ti reste selibater. Me i ti annan sa bon repitasyon konman en dimoun ki ti pare pour ed lezot e fer plis dan servis Bondye.

9, 10. Ki loportinite i annan ozordi pour bann zenn selibater fer plis dan minister? Donn en legzanp.

⁹ Dan nou letan osi, bokou zenn dan kongregasyon i pare pour servi zot letan konman selibater pour fer plis dan servis Bondye. Parey Mark ek Timote, zot kontan ki zot lavi selibater i permet zot “atas avek Senyer san rezerv.” (1 Kor. 7:35) Zot annan bokou lavantaz. Zot annan en kantite loportinite, tel ki fer pionye, servi kot i annan plis bezwen pour bann proklanmater, aprann en lot langaz, ede dan konstriksyon bann Lasal Rwayonm ek biro brans, asiste Lekol Formasyon Ministeryel e servi dan Betel. Si ou ankor zenn e pa ankor marye, eski ou pe profit byen sa sans ki ou annan?

¹⁰ En frer ki apel Mark ti konmans fer pionye ver lafen son ladolesans, i ti asiste Lekol Formasyon Ministeryel e i’n partisip dan plizyer servis dan diferan pei. Ler i reflesir lo son 25 an dan servis a plen tan, i dir: “Mon’n esey travay avek tou dimoun dan kongregasyon, partisip dan predikasyon avek zot, vizit bann frer ek ser pour ankouraz zot, envit zot kot mwan pour repa e menm organiz bann rankont ki batir manm kongregasyon spirityelman. Tousala in donn mwan en kantite lazwa.” Parey parol Mark i montre, nou ganny pli gran lazwa kan nou donnen. Kan nou  donn tou nou lavi dan servis Bondye, sa i donn nou bokou loportinite pour donn lezot. (Akt 20:35) Nenport kalite preferans, abilite ouswa leksperyans lavi ki zot annan, i annan bokou pour bann zenn konmela fer dan travay Senyer.—1 Kor. 15:58.

11. Ki serten byenfe i annan pour pa taye pour marye?

¹¹ Menm si laplipar zenn ti pou kontan marye en zour, i annan bokou rezon akoz zot pa devret taye pour fer li. Pol i ankouraz bann zenn pour omwen espere ziska ki sa letan kot zot ‘dezir seksyel i for’ i pase avan zot marye. (1 Kor. 7:36) I pran letan pour konpran ou lekor e ganny bann leksperyans lavi ki neseser pour swazir en bon konzwen. Fer en ve maryaz i en desizyon serye, enn ki devret dir pour touzour.—Ekle. 5:2-5.

En selibater plitar dan lavi

12. (a) Ki mannyer Ann sa vev ti fer fas avek son sityasyon ki ti’n sanze? (b) Ki privilez i ti gannyen?

¹² Ann, ki Levanzil Lik i koz lo la, ti petet sagren kan son msye ti mor en sel kou apre zis set an maryaz. Nou pa konnen si zot ti annan zanfan ouswa si i ti mazin pour remarye. Me Labib i dir ki a laz 84 an, Ann ti ankor en vev. Dapre sa ki Labib i dir, nou kapab tonm lo sa konklizyon ki Ann ti servi byen son sirkonstans ki ti’n sanze pour apros pli pros avek Zeova. I “pa ti kit Tanp. I ti kontinyen servi Bondye, nwit-e-zour dan lapriyer e dan zenn.” (Lik 2:36, 37) Bann keksoz spirityel ti premye dan son lavi. I ti demann bokou determinasyon ek zefor pour li fer sa, me i ti ganny rekonpanse en kantite. I ti annan sa privilez pour vwar Zezi ler i ti ankor ptipti e i ti rann temwannyaz avek lezot konsernan delivrans ki Mesi ti pou anmennen.—Lik 2:38.

13. (a) Kwa ki montre ki Dorkas ti vreman devoue dan kongregasyon? (b) Ki rekonpans Dorkas ti gannyen akoz son labonte?

¹³ En madanm ki ti apel Dorkas ouswa Tabita, ti reste Zope, en ansyen por, norwas avek Zerizalenm. Vi ki Labib pa dir si i ti annan en msye, tre probab i pa ti ankor marye sa letan. Dorkas “ti touzour okipe pe fer dibyen.” Aparaman i ti koud en kantite lenz pour bann vev ek lezot ki ti dan bezwen e zot ti kontan li bokou akoz sa. Alor, kan i ti tonm malad en sel kou e mor, kongregasyon antye ti anvoy apel Pyer e sipliy li pour resisit zot ser ki zot ti kontan en kantite. Anmezir ki nouvel lo son rezireksyon ti fannen Zope, bokou dimoun ti vin krwayan. (Akt 9:36-42) Par sa gran labonte ki i ti demontre, manke Dorkas li menm ti’n ed bokou parmi zot.

14. Kwa ki motiv bann Kretyen selibater pour apros pli pros avek Zeova?

¹⁴ Parey Ann ek Dorkas, bokou dimoun dan kongregasyon dan nou letan i retrouv zot tousel pli tar dan lavi. Serten petet pa’n zanmen trouv sa konzwen ideal. Lezot in divorse ouswa zot vev. Lefet ki zot napa en konzwen pour koz zot problenm avek, bann Kretyen selibater i souvan aprann pour depan en kantite lo Zeova. (Prov. 16:3) Silvia, en ser selibater ki’n servi dan Betel pour plis ki 38 an, i vwar sa konman en benediksyon. I admet: “Parler mon fatige vin sa enn ki ankouraz lezot. Mon mazinen: ‘Lekel ki pou ankouraz mwan?’” Me apre i azoute: “Lefet ki mon annan konfyans ki Zeova i pli konnen ki mon bezwen, sa i ed mwan vin pli pros avek li. Mon touzour ganny sa lankourazman, parfwa menm dan en fason ki mon pa pe ekspekte.” Nenport ler ki nou apros pli pros avek Zeova, i touzour reazir dan en fason dous e i reasir nou.

15. Ki mannyer bann Kretyen ki pa ankor marye i kapab demontre lanmour anver plis dimoun ankor?

¹⁵ En selibater i annan sa loportinite spesyal pour demontre lanmour anver bokou plis dimoun. (Lir 2 Korentyen 6:11-13.) Jolene, en ser selibater ki’n pas sa 34 dernyen lannen dan servis a plen tan i dir: “Mon’n  esey travay dir pour devlop bann lanmitye tre pros, pa zis avek bann dimoun mon laz, me avek diferan kalite dimoun. Lavi selibater i donn ou sa bon loportinite pour servi Zeova, ou fanmir, ou bann frer ek ser e osi ou prosen. Pli mon vin pli vye, mon santi mwan pli ere konman en selibater.” Bann aze, andikape, paran tousel, zenn ek lezot dan kongregasyon i sirman apresye sa sipor ki sa bann selibater i donn zot. I vre, letan nou demontre lanmour anver lezot, nou santi nou pli byen. Eski ou osi ou kapab demontre lanmour anver plis dimoun ankor?

Selibater pour lavi

16. (a) Akoz Zezi ti reste selibater pour lavi? (b) Dan ki fason Pol ti profit byen son lavi selibater?

¹⁶ Zezi pa ti marye. I ti bezwen prepar li e akonplir son minister ki i ti’n ganny demande pour fer. I ti vwayaz en kantite, akonplir son minister depi byen granmaten ziska tar aswar, e finalman i ti mor konman en sakrifis. Lavi selibater ti en lavantaz pour li. Zapot Pol ti vwayaz plizyer santenn kilomet e rankontre bokou leprev dan son minister. (2 Kor. 11:23-27) Menm si petet i ti’n deza marye dan lepase, Pol ti swazir pour reste selibater apre ki i ti’n ganny swazir konman en zapot. (1 Kor. 7:7; 9:5) Pour kapab akonplir byen zot minister, Zezi ek Pol ti ankouraz lezot pour imit zot legzanp si i posib. Me, ni enn ant zot pa ti dir ki pour vin en minis Kretyen fodre absoliman ou en selibater.—1 Tim. 4:1-3.

17. Ki mannyer serten in swiv lepa Zezi ek Pol e akoz nou kapab asire ki Zeova i apresye sa bann ki fer bann sakrifis koumsa?

¹⁷ Pareyman, serten dan nou letan in osi swazir pour reste selibater pour ki zot kapab fer plis ankor dan minister. Harold, ki nou’n mansyonnen o konmansman in pas plis ki 56 an dan Betel. I dir: “Letan mon ti’n pas di-z-an dan Betel, mon ti vwar bann koup marye kit Betel akoz maladi ouswa akoz zot in bezwen al pran swen avek zot paran aze. Tou le de mon paran ti’n mor. Mon ti sitan kontan Betel ki mon pa ti anvi met sa privilez an danze par marye.” Pareyman, en pe letan pase, Margaret, en ser ki’n pionye pour en kantite letan ti fer sa remark: “Mon’n ganny sans pour mwan marye, me mon ti telman okipe dan mon servis ki sa pa ti en priyorite dan mon lavi. O kontrer, mon’n kapab servi mon liberte an plis ki mon annan konman en selibater pour reste okipe dan minister e sa in donn mwan en kantite lazwa.” Sirman, Zeova pa pou zanmen oubliy nenport ki ki fer sa kalite sakrifis senser pour promot vre ladorasyon.—Lir Izai 56:4, 5. *

Profit byen ou sityasyon

18. Ki mannyer lezot i kapab ankouraz e siport bann Kretyen selibater?

¹⁸ Nou merit senserman felisit e ankouraz bann Kretyen ki pa ankor marye e ki pe fer zot mye pour servi Zeova. Nou kontan zot pour sa ki zot ete e sa led vreman spesyal ki zot pe ofer kongregasyon. Zot pa pou zanmen bezwen santi zot tousel si nou vreman vin zot  ‘bann frer, ser, manman, ek zanfan’ spirityel.—Lir Mark 10:28-30.

19. Ki ou kapab fer pour profit byen ou lavi selibater?

¹⁹ Ki swa ou selibater akoz i ou swa, oubyen i senpleman akoz sirkonstans, nou swete ki sa bann legzanp dan Labib e dan nou letan i asir ou ki ou kapab viv en lavi ere e satisfezan. Lavi selibater i kapab parey en kado ki nou pe ekspekte, ouswa enn ki nou pa pe ekspekte gannyen. Serten kado ou apresye li deswit, me lezot i ganny apresye avek letan. Kantmenm sa, tou i depan lo ou latitid. Ki ou kapab fer pour profit byen ou lavi selibater? Apros pli pros avek Zeova, partisip plennman dan servis Bondye e demontre lanmour anver plis dimoun ankor. Parey maryaz, lavi selibater i anmenn satisfaksyon ler ou vwar li lafason ki Bondye i vwar li e servi byen sa kado.

[Not anba lo paz]

Eski ou rapel?

• Dan ki fason lavi selibater i en kado?

• Ki mannyer lavi selibater i en benediksyon dan letan lazenes?

• Ki loportinite bann Kretyen selibater i annan pour apros avek Zeova e demontre lanmour anver plis dimoun ankor?

[Kestyon]