Respekte maryaz ki en kado Bondye
Respekte maryaz ki en kado Bondye
“Se pour sa rezon ki en zonm pou kit son papa ek son manman e i devret atase avek son madanm e zot devret vin en sel laser.”—ZEN. 2:24.
1. Akoz nou merit respekte Zeova?
ZEOVA, i Loter maryaz e sirman nou merit annan respe pour li. Konman nou Kreater, Souvren ek Papa dan lesyel, i vreman apropriye ki i ganny dekrir konman sa Enn ki donn “tou don ekselan, tou kado parfe.” (Zak 1:17; Rev. 4:11) Sa i laprev son gran lanmour. (1 Zan 4:8) Tou sa ki i’n ansenny nou, tou sa ki i’n demann nou pour fer e tou sa ki i’n donn nou, i pour nou prop byennet.—Iza. 48:17.
2. Ki lenstriksyon Zeova ti donn avek sa premye koup marye?
2 Labib i dekrir maryaz konman enn parmi sa bann “bon” kado ki sorti kot Bondye. (Rit 1:9; 2:12) Kan Zeova ti fer sa premye maryaz, i ti donn sa koup Adan ek Ev bann lenstriksyon spesifik lo konman pour reisi dan zot lavi maryaz. (Lir Matye 19:4-6.) Si zot ti swiv gidans Bondye, zot ti pou ere dan zot lavi maryaz pour touzour. Me, zot ti azir dan en fason bet, zot ti rezet lord Bondye e sa ti fer zot eksperyans bann move konsekans.—Zen. 3:6-13, 16-19, 23.
3, 4. (a) Dan ki fason en kantite dimoun ozordi pa pe demontre respe anver maryaz ek Zeova? (b) Ki legzanp nou pou vwar dan sa lartik?
3 Parey sa premye koup, en kantite dimoun ozordi ki fer bann desizyon dan maryaz pa pran preski ditou an konsiderasyon gidans Zeova. Serten i rezet net maryaz, tandis ki lezot i esey donn maryaz en lot definisyon ki al byen avek sa ki zot anvi. (Rom. 1:24-32; 2 Tim. 3:1-5) Zot oubliye ki maryaz i en kado sorti kot Bondye e vi ki zot napa respe pour sa kado, sa i montre ki zot napa respe pour Zeova, sa Enn ki’n ofer sa kado.
4 Parfwa, i menm annan serten parmi pep Bondye ki’n oubliy pwennvi Zeova lo maryaz. Serten koup Kretyen i deside pour separe oubyen divorse san en rezon dan Labib. Ki mannyer sa i kapab ganny evite? Ki mannyer gidans Bondye dan Zenez 2:24 i kapab ed bann Kretyen marye dan zot maryaz? Ki mannyer bann ki anvi marye i kapab prepar zot pour sa? Annou vwar legzanp trwa maryaz ki ti reisi dan letan lontan ki montre ki respe pour Zeova i en laspe vreman enportan pour ki en maryaz i dirab.
Devlop fidelite
5, 6. Ki sityasyon ki ti’n kapab teste Zakari ek Elizabet e ki mannyer zot fidelite ti ganny rekonpanse?
5 Zakari ek Elizabet ti fer tou sa ki byen. Zot tou le de zot ti’n swazir pour marye avek en serviter ki fidel avek Zeova. Zakari ti desarz son responsabilite konman pret avek fidelite e zot de son madanm zot ti fer tou sa ki zot ti kapab pour swiv Lalwa Bondye. Zot ti sertennman annan bokou rezon pour rekonesan anver Bondye. Me, si ou ti’n vizit zot lakour, Zida, ou ti pou remarke ki i ti mank zot en keksoz. Zot ti napa zanfan. Elizabet ti en madanm steril e zot de son msye zot ti annan en bon pti laz.—Lik 1:5-7.
6 Dan letan lontan Izrael, i ti en gran loner pour annan zanfan e souvan zot ti annan bann gran fanmir. (1 Sam. 1:2, 6, 10; Ps. 128:3, 4) Petet en msye Izraelit dan sa letan ti pou divorse avek son madanm si i pa ti kapab fer zanfan. Me, Zakari ti reste fidel avek Elizabet. I pa ti rod en laport sorti pour kit son madanm e ni son madanm pa ti fer sa. Kantmenm zot ti tris akoz zot ti napa zanfan, zot ti kontinyen servi Zeova ansanm, fidelman. Dan en fason mirakile, Zeova ti rekonpans zot e fer zot ganny en zanfan dan zot vye zour.—Lik 1:8-14.
7. Ki sa lot fason Elizabet ti demontre fidelite anver son msye?
7 Elizabet ti demontre en fidelite remarkab dan en lot fason ankor. Ler son garson Zan ti ne, Zakari pa ti kapab koze akoz i ti’n vin koz pa vi ki i pa ti krwar sa ki lanz Bondye ti’n dir li. Me Zakari ti’n bezwen deza trouv en mwayen pour fer son madanm konnen ki lanz Zeova ti’n dir li apel sa zanfan “Zan.” Zot vwazen ek fanmir ti oule apel sa pti garson dapre non son papa. Me, Elizabet ti fidelman soutenir gidans ki son msye ti’n donn li. I ti dir: “Non, i pou apel Zan.”—Lik 1:59-63.
8, 9. (a) Ki mannyer fidelite i ranforsi maryaz? (b) Ki serten fason spesifik en msye ek madanm i kapab demontre fidelite?
8 Parey Zakari ek Elizabet, bann koup marye ozordi pe fer fas avek dezapwentman ek lezot defi. En maryaz kot napa fidelite pa pou dire. Rod latraksyon avek en lot dimoun apard ou konzwen, pornografi, adilter ek lezot keksoz ankor i kapab vin en danze e detrir net konfyans ant de dimoun marye. Ler sa konfyans ki egziste dan maryaz i kase, lanmour i konmans diminyen. Dan serten fason, fidelite i parey en baraz otour lakour en fanmir ki protez zot avek bann danze e fer bann ki pe viv dan sa lakour santi zot an sekirite. Alor, ler en msye ek madanm i fidel avek kanmarad, zot kapab viv ansanm an sekirite e eksprim zot panse ek santiman pli profon. Sa i ranforsi zot lanmour pour kanmarad. Wi, fidelite i vreman enportan!
9 Zeova ti dir avek Adan: “En zonm pou kit son papa ek son manman e i devret atase avek son madanm.” (Zen. 2:24) Ki sa parol i vedir? Relasyon ki en dimoun ti annan avan avek son bann zanmi ek fanmir pa pou parey. Sa de konzwen i bezwen donn letan ek latansyon kanmarad an premye. Zot nepli kapab fer zot zanmi oubyen fanmir pas avan sa fanmir ki zot fek formen. Zot pa devret les zot paran enterfer dan zot bann desizyon oubyen dezakor. Sa koup i merit reste atase avek kanmarad. Sa i dapre gidans sorti kot Bondye.
10. Kwa ki pou ed bann konzwen devlop fidelite?
10 Fidelite i anmenn byenfe menm dan bann fanmir ki divize lo plan relizye. En ser ki son msye pa Temwen i dir: “Mon remersye Zeova ki’n ansenny mwan ki mannyer pour soumet avek mon msye e annan en profon respe pour li. Vi ki mon’n reste fidel, nou’n kapab pas 47 an ansanm kot nou’n touzour demontre lanmour ek respe pour kanmarad.” (1 Kor. 7:10, 11; 1 Pyer 3:1, 2) Alor, fer bokou zefor pour fer ou konzwen santi li an sekirite. Par ou parol ek aksyon, rod fason pour reasir ou konzwen ki pour ou i sa dimoun pli enportan lo later. Pour otan ki sa i depan lo ou, pa les personn oubyen okenn keksoz vin en baryer ant ou ek ou konzwen. (Lir Proverb 5:15-20. *) Ron ek Jeanette ki pe viv en lavi maryaz ere depi plis ki 35 an, i dir: “Lefet ki nou’n fidelman fer sa ki Bondye i demann nou pour fer, nou annan en lavi maryaz ere e ki mars byen.”
Linite i ranforsi maryaz
11, 12. Ki mannyer Akilas ek Prisil ti korpere avek kanmarad (a) kot lakour, (b) dan zot travay e (c) dan zot minister Kretyen?
11 Kan zapot Pol ti koz lo son bann zanmi pros, Akilas ek Prisil, i pa ti mansyonn enn san ki i mansyonn lot. Sa koup ki ti ini avek kanmarad, i en bon legzanp pour konpran sa ki Bondye ti oule fer resorti ler i ti dir ki en msye ek en madanm i devret vin “en sel laser.” (Zen. 2:24) Zot ti souvan travay ansanm kot zot lakour, dan zot travay e dan predikasyon. Par egzanp, premye fwa ler Pol ti ariv Korent, Akilas ek Prisil ti zantiman ofer li pour reste kot zot. Aparaman, sanmenm sa landrwa ki zapot Pol ti servi en serten letan apre pour fer serten son bann aktivite. Plitar Efez, zot ti servi zot lakour pour fer bann renyon kongregasyon e zot ti travay ansanm pour ed bann nouvo parey Apolos pour progrese spirityelman. (Akt 18:2, 18-26) Apre sa, sa koup byen devoue ti al Ronm, laba osi zot ti ofer zot lakour pour fer renyon kongregasyon. Plitar, zot ti retourn Efez pour fortifye zot bann frer.—Rom. 16:3-5.
12 Akilas ek Prisil ti osi travay avek Pol pour en serten letan dan sa menm metye pour fer latant. La ankor, nou vwar sa koup pe travay ansanm san fer okenn konpetisyon oubyen annan dezakor. (Akt 18:3) Sertennman, sa letan ki zot ti pase ansanm dan bann aktivite Kretyen ti fer zot maryaz reste for lo plan spirityel. Ki swa Korent, Efez, oubyen Ronm, zot ti byen koni konman bann “koleg travay pour Kris Zezi.” (Rom. 16:3) Zot ti travay kot a kot pour fer avanse sa travay predikasyon lo Rwayonm dan nenport landrwa ki zot ti ete.
13, 14. (a) Kwa ki kapab detri sa linite dan maryaz? (b) Ki serten keksoz bann koup marye i kapab fer pour ranforsi zot linyon konman “en sel laser”?
13 Byensir, lefet ki zot ti annan menm lobzektif e fer menm aktivite, sa ti ranforsi zot maryaz. (Ekle. 4:9, 10) Malerezman, en kantite koup ozordi i pas en ptigin letan ansanm. Sakenn i pas en kantite letan dan zot prop travay. Lezot i vwayaz en kantite akoz zot travay oubyen zot al travay dan lezot pei pour anvoy larzan pour zot fanmir. Menm kot lakour, serten msye ouswa madanm marye pa pas letan avek kanmarad akoz zot pas letan devan televizyon, dan detant, sport, zwe video oubyen lo Internet. Eski i koumsa kot ou lakour? Si wi, eski zot kapab revwar zot sirkonstans pour ki zot pas plis letan ansanm? Ki ou pou dir konsernan bann louvraz parey prepar manze, lav bann zafer sal oubyen balye deor? Eski zot kapab travay ansanm ler zot pe okip bann manrmay oubyen ed zot bann paran aze?
14 Pli enportan ankor, regilyerman zot devret pas letan ansanm dan bann aktivite ki annan pour fer avek zot ladorasyon pour Zeova. Diskit lo sa brosir Egzamin Labib sak zour e partisip dan ladorasyon an fanmir i donn bann bon loportinite ou fanmir pour annan menm fason panse ek lobzektif. I ti a byen osi ki zot partisip dan predikasyon ansanm. Si posib, esey fer pionye ansanm, menm si zot sirkonstans i permet zot pour fer li zis en mwan oubyen enn an. (Lir 1 Korentyen 15:58.) En ser ki ti fer pionye avek son msye i dir: “Predikasyon ti enn parmi bann mwayen kot nou ti kapab pas letan ansanm e vreman koze. Vi ki nou tou le de nou ti annan sa menm lobzektif pour ed kanmarad spirityelman, mon ti santi ki nou ti en vre lekip. Mon ti santi mwan pli pros avek li pa zis konman son madanm me osi konman en bon zanmi.” Ler zot travay ansanm pour pourswiv bann lobzektif ki vo lapenn, zot pou gradyelman devlop menm lentere, priyorite ek labitid ki kanmarad, e parey Akilas ek Prisil, zot pou deplizanpli mazinen, santi e azir konman “en sel laser.”
Les keksoz spirityel gid ou
15. Kwa ki fer en maryaz reisi? Eksplike.
15 Zezi ti konn sa lenportans pour met Bondye premye dan maryaz. I ti vwar ler Zeova ti fer sa premye maryaz. I ti kapab obzerve ki Adan ek Ev ti ere ler zot ti swiv gidans Bondye e i ti vwar par li menm ki problenm zot ti fer fas avek ler zot ti rezet son gidans. Alor, ler Zezi ti ansenny lezot, i ti repet lenstriksyon ki son Papa ti donnen dan Zenez 2:24. I ti osi azoute: “Sa ki Bondye in ini ansanm zonm pa devre separe.” (Mat. 19:6) Alor, respe pour Zeova i touzour sa lakle pour ki en maryaz i ere e mars byen. Dan sa domenn, paran Zezi, Zozef ek Mari ti kit en legzanp remarkab.
16. Ki mannyer Zozef ek Mari ti montre dan zot lavi fanmir ki zot ti bann dimoun spirityel?
16 Zozef ti zantiy e annan respe pour Mari. Ler i ti’n fek aprann ki Mari ti ansent, i pa ti oule azir san pran okenn pitye pour li, kantmenm lanz Bondye pa ti ankor eksplik li sa ki ti’n arive avek Mari. (Mat. 1:18-20) Konman en koup, zot ti obeir lord Sezar e zot ti osi swiv byen Lalwa Moiz. (Lik 2:1-5, 21, 22) Menm si zis bann zonm ki ti ganny demande pour asiste sa bann lafet relizye enportan ki ti ganny fer Zerizalenm, Zozef ek Mari avek leres manm zot fanmir ti asiste sa bann lafet sak lannen. (Det. 16:16; Lik 2:41) Dan sa fason ek lezot ankor, sa koup ki ti serviter Bondye ti fer bokou zefor pour fer plezir Zeova e demontre en gran respe pour bann keksoz spirityel. I pa etonan alor ki Zeova ti swazir zot pour pran swen avek son Garson, o konmansman son lavi lo later.
17, 18. (a) Dan ki fason en koup i kapab met bann keksoz spirityel an premye dan zot fanmir? (b) Ki mannyer sa pou benefisye zot?
17 Pareyman, eski bann keksoz spirityel i pas premye dan ou lavi fanmir? Par egzanp, ler ou pe pran bann desizyon enportan, eski ou fer resers lo bann prensip Labib, priy lo sa size e apre rod konsey avek en Kretyen matir? Oubyen eski ou tant pour ou rezourd ou problenm par ou menm dapre ou santiman oubyen dapre santiman ou fanmir ek zanmi? Eski ou fer zefor pour met an pratik sa kantite sizesyon ki ganny pibliye par lesklav fidel e pridan lo maryaz ek lavi fanmir? Oubyen eski ou trouv ou pe senpleman swiv bann koutim lokal oubyen bann konsey ki sa lemonn i ofer? Eski ou priye e etidye regilyerman ansanm, fikse bann lobzektif spirityel e koz lo sa ki pli enportan pour zot fanmir?
18 An rapor avek zot 50 an lannen maryaz ere, Ray i dir: “Nou pa’n zanmen annan okenn problenm ki nou pa’n kapab sirmonte, akoz nou’n fer Zeova form parti nou ‘lakord ki’n tres an trwa.’” (Lir Eklezyast 4:12. *) Danny ek Trina i dakor avek zot. Zot dir: “Lefet ki nou’n servi Bondye ansanm, nou maryaz in vin pli for.” Zot annan en lavi maryaz ere depi plis ki 34 an. Si ou touzour met Zeova an premye dan ou maryaz, i pou ed ou reisi e i pou beni ou en kantite.—Ps. 127:1.
Kontinyen annan respe pour kado Bondye
19. Akoz Bondye ti donn maryaz konman en kado?
19 Pour en kantite dimoun ozordi, sa sel keksoz ki enportan pour zot se zot prop boner. Me en serviter Zeova i vwar keksoz dan en lot fason. Zot konnen ki Bondye in donn maryaz konman en kado pour akonplir Son plan. (Zen. 1:26-28) Si Adan ek Ev ti’n respekte sa kado, later antye ti pou’n vin en paradi ranpli avek bann serviter Bondye ki ere e drwat.
20, 21. (a) Akoz nou devret vwar maryaz konman en laranzman sakre? (b) Ki kado nou pou koz lo la lot semenn?
20 Par lao tou keksoz, bann serviter Bondye i vwar maryaz konman en loportinite pour rann glwar Zeova. (Lir 1 Korentyen 10:31.) Parey nou’n vwar, fidelite, linite ek spirityalite i bann kalite sorti kot Bondye ki fer en maryaz vin solid. Alor, ki swa nou pe prepare, ouswa ranforsi oubyen esey sov nou maryaz, nou merit avan tou vwar maryaz konman en laranzman sakre sorti kot Bondye. Si nou gard sa laverite antet, sa pou pous nou pour fer nou mye pour pran desizyon ki baze lo Parol Bondye dan maryaz. Dan sa fason, nou montre respe pa zis pour sa kado setadir maryaz, me osi pour Zeova, sa Enn ki’n ofer sa kado.
21 Byensir maryaz, i pa sa sel kado ki Zeova in donn nou. I pa zis sa sel semen ki anmenn ver boner dan lavi. Dan lot lartik, nou pou vwar ankor en lot kado presye sorti kot Bondye, sa kado pour reste selibater.
[Not anba lo paz]
^ par. 10 Proverb 5:15-20: “Bwar delo ki sorti dan ou sitern, e sa ki koule sorti dan milye ou pwi. 16 Eski ou bann fontenn i devret eparpiye partou an deor, e ou bann larivyer dan bann landrwa piblik? 17 Zot devret vin pour ou tousel, e pa pour bann etranze avek ou. 18 Ki ou sours delo i beni, e ou trouv lazwa avek madanm ou zenntan, 19 en femel serf atiran ek en zoli kabri montanny. Les son tete satisfer ou toultan. Pran plezir konstaman dan son lanmour. 20 Alor, mon garson, akoz ou devret rod plezir avek en fanm etranze oubyen may en fanm etranze?”
^ par. 18 Eklezyast 4:12: “Si en dimoun i pli for ki enn ki tousel, de ansanm pou kapab reziste kont li. En lakord ki’n tres an trwa pa fasil pour kas an de.”
Ki ou pou reponn?
• Ki mannyer fidelite i devret enfliyans bann Kretyen ki’n marye?
• Akoz ler de konzwen i travay ansanm dan linite, sa i ranforsi linite dan maryaz?
• Ki serten fason bann dimoun ki’n marye i kapab les zot ganny gide par zot spirityalite?
• Ki mannyer nou kapab demontre respe pour Zeova, Loter maryaz?
[Kestyon]
[Portre lo paz 18]
Kan bann koup i travay ansanm sa i ed zot pour reste ini