Vizyon lo sa ki dan lesyel

MENM si ou kontinyelman get dan lesyel pour en kantite letan, ou pa pou zanmen vwar en lanz. Menm si ou ekoute ou pa pou kapab tann li. Me ou kapab asire ki zot vreman egziste. Bann lanz i vreman entelizan e pwisan. Zot annan diferan non ek personnalite. Serten i anvi ed nou me lezot i anvi fer nou ditor. Me zot tou zot annan en lentere dan nou.

Sa vre Bondye osi i en Lespri zis parey bann lanz. (Zan 4:24) I annan en non inik ki disteng li avek tou sa bann fo bondye. Son non i Zeova. (Psonm 83:18) Sa psalmis ti ekrir: “Zeova i gran e devret ganny loue enfiniman. I pli efreyan ki tou lezot bondye. Parski tou bondye bann nasyon i bann bondye ki napa valer, me Zeova li, i’n fer lesyel. Dinyite ek splander i devan li; lafors ek labote i dan son sanktyer.”—Psonm 96:4-6.

Vizyon lo sa vre Bondye

Labib i dir nou: “Personn pa’n deza war Bondye.” (Zan 1:18) Nou pa pou kapab arive konpran son splander e ki mannyer i ete, zis parey en dimoun ki’n ne aveg pa arive konpran ki si sa kouler. Zis parey en bon ansennyan i eksplik bann zelev bann size konplike dan en fason senp ki zot pou kapab konpran, atraver son Parol Labib, Bondye i osi servi bann keksoz ki nou kapab vwar pour dekrir bann keksoz ki nou pa kapab vwar. Atraver vizyon ki bann serviter fidel dan lepase ti gannyen, Zeova i ed nou pour ganny en lide ki mannyer i ete dan lesyel e ki relasyon nou annan avek bann ki reste laba.

Par egzanp, dan en vizyon ki profet Ezekyel ti gannyen, laglwar Zeova i ganny konpare avek dife, laklerte, safir ek en larkansyel. Dan en lot vizyon, zapot Zan ti vwar Zeova lo son tronn e i ti dir ki Bondye i annan “resanblans bann pyer presyez: zasp ek sardwann.” I kontinyen pour dir ki “son tronn ti antoure avek en larkansyel ki briye parey en pyer emerod.” Sa kalite deskripsyon i montre nou ki prezans Zeova i en labote ki rar e enpresyonan, agreab e kalm.—Revelasyon 4:2, 3; Ezekyel 1:26-28.

Profet Danyel osi ti vwar Zeova dan en vizyon. I ti vwar “dis mil fwa dis mil [lanz] ki ti kontinyen debout drwat devan [Zeova].” (Danyel 7:10) Sa ti’n bezwen en leksperyans vreman enkrwayab! Pour vwar en lanz, menm dan en vizyon, i bezwen en keksoz vreman enpresyonan, me aprezan zis esey mazin plizyer milye lanz parfe!

 Lanz i ganny mansyonnen preski 400 fwa dan Labib. Zot ganny klasifye dan diferan kategori, serten konman serafen e lezot konman seriben. Sa mo Grek ek Ebre ki ganny tradwir “lanz,” i vedir “mesaze.” Sa i montre nou ki bann lanz i kapab kominik avek kanmarad, e dan lepase zot in menm kominik avek bann imen. Zot pa bann imen ki ti’n deza viv lo later avan sa, me Zeova ti kree zot bokou letan avan menm i ti kree zonm.—Zob 38:4-7.

Dan vizyon ki Danyel ti gannyen, sa gran kantite lanz ti’n rasanble ansanm pour temwanny en levennman ekstraordiner. Apre Danyel ti vwar “en dimoun parey garson zonm” pe apros tronn Zeova pour li ganny “dominasyon, dinyite ek rwayonm, pour ki bann pep, kominote nasyonal ek bann langaz, zot tou zot devret servi li.” (Danyel 7:13, 14) “Garson zonm,” i annan en rol enportan dan lesyel e li menm li Zezi Kri ki ti ganny resisite e sa enn avek ki dominasyon i ganny donnen lo later antye. Byento, son dominasyon pou ranplas tou gouvernman imen e met en lafen avek maladi, sagrinasyon, lopresyon, lapovrete e menm lanmor.—Danyel 2:44.

Sirman, kan Zezi ti ganny kouronnen konman Lerwa, sa ti’n bezwen anmenn bokou lazwa pour sa kantite lanz fidel ki anvi sa ki meyer pour limanite. Me malerezman, pa zot tou ki ti santi parey.

Lennmi Bondye ek zonm

Depi o konmansman listwar imen, enn sa bann lanz ti devlop en dezir pour li ganny adore. Sa dezir ti pous li pour rebel kont Zeova e sa ti fer li vin Satan, ki vedir “Opozan.”  Satan i sa pli move lanz ki egziste e i konpletman opoz Zeova, sa enn ki ranpli avek lanmour. Lezot lanz ti zwenn ansanm avek Satan dan son rebelyon. Labib i apel zot bann demon. Parey Satan, bann demon in vin bann lennmi kriyel limanite. Zot responsab pour lamazorite soufrans ki nou pe fer fas avek lo later, lenzistis, maladi, lapovrete ek lager.

Menm si bokou larelizyon Kretyen nepli koz lo Satan parey zot ti fer oparavan, liv Zob dan Labib i fer nou konpran ki kalite personnaz sa lanz rebel i ete e ki son motivasyon. I dir: “Sa zour ti arive kan bann garson sa vre Bondye ti antre e pran zot pozisyon devan Zeova e menm Satan osi ti antre parmi zot.” Dan sa konversasyon ki ti swiv apre, dan en fason ensolan, Satan ti akiz Zob konmkwa i pe servi Bondye zis pour sa ki i gannyen an retour. Pour li prouve ki son lakizasyon i vre, Satan ti fer Zob pas dan en kantite maler, i ti touy son bann zannimo ek tou le dis son bann zanfan. Apre, i ti frap Zob avek bann klou tre danzere partou lo son lekor. Malgre tou sa maler ki i ti fer Zob pas ladan, Satan pa ti reisi prouve ki son lakizasyon ti vre.—Zob 1:6-19; 2:7.

I annan bann bon rezon akoz Zeova in toler Satan pour tou sa letan, me i pa pou toler li pour touzour. Byento Satan pou ganny detrir. Bann premye pa in fini ganny pran, e sa i ganny dekrir dan liv Revelasyon. Sa liv i devwal en levennman enportan ki ti pase dan lesyel e ki nou pa ti pou zanmen kapab vwar. Nou lir: “Ti annan lager dan lesyel, Misel [Zezi Kri ki’n resisite] avek son bann lanz ti lager kont dragon [Satan]. Dragon avek son bann lanz ti lager, me dragon pa ti ganny laviktwar, e li avek son bann lanz pa ti kapab reste ankor dan lesyel. Sa gro dragon, ti ganny zet ater. Limenm li sa serpan lantikite, ki apel dyab ou satan, e ki tronp lemonn antye. I ti ganny zete lo later, e son bann lanz ansanm avek li.”—Revelasyon 12:7-9.

Remarke ki in ganny dir ki Satan pe “tronp lemonn antye.” I tronp dimoun par promot bann mansonz relizye pour fer zot elwannyen avek Zeova ek son Parol. Enn sa bann mansonz i tou dimoun ki mor i al dan lesyel. I annan plizyer fason ki sa lide i ganny eksplike. Par egzanp, bokou dimoun Lafrik ek Lazi i krwar ki kan en dimoun i mor i al dan en landrwa kot tou zot bann zanset i ale. Sa lansennyman lo pirgatwar ek lanfer i osi baze lo sa lide ki en dimoun i kontinyen viv apre lanmor.

Eski dimoun i al dan lesyel apre lanmor?

Ki nou pou dir alor lo sa krwayans ki plizyer milyon dimoun dan lemonn i krwar ladan ki dir ki tou bon dimoun i al dan lesyel? I vre ki serten bon dimoun i al laba, me lakantite ki al laba i ptigin konpare avek lakantite dimoun ki’n mor. Labib i revele ki 144,000 dimoun pou “ganny sove lo later.” Zot pou servi konman bann “pret” e zot pou “rennyen lo later.” (Revelasyon 5:9, 10; 14:1, 3) Ansanm avek Garson zonm, Zezi Kri, zot pou form en gouvernman dan lesyel, Rwayonm Bondye. Sa gouvernman pou met en lafen avek Satan ek son bann demon e fer later vin en paradi. Laplipar dimoun ki mor pou reganny lavi dan lavenir avek sa lespwar pour viv pour touzour dan sa Paradi lo later.—Lik 23:43.

Alor pour fer en pti rezimen, Zeova Kreater tou form lavi i sa enn ki siprenm dan lesyel. I osi annan plizyer milyon lanz ki pe fidelman servi li dan lesyel. Par kont, i annan lezot lanz ki ti ganny enfliyanse par Satan, zot osi zot ti rebel kont Zeova e zot pe travay pour tronp bann imen. Deplis, i annan en pti group imen ki’n ganny “sove” oubyen swazir lo later pour ganny en responsabilite spesyal dan lesyel. Avek sa antet, annou vwar lekel ki nou kapab kominik avek e ki mannyer nou devret fer li.