Aprann avek Parol Bondye

Ki sennla Bondye?

Sa lartik i soulev bann kestyon ki ou’n petet reflesir lo la e i montre kote ou kapab trouv larepons sa bann kestyon dan ou Labib. I pou en plezir pour Temwen Zeova ed ou pour trouv larepons sa bann kestyon.

1. Ki sennla Bondye?

Sa vre Bondye i Kreater tou keksoz. Labib i apel li “Lerwa leternite,” ki vedir i napa konmansman e i pa pou zanmen annan en finisyon. (Revelasyon 15:3, NW) Vi ki Bondye i Sours lavi, nou devret ador zis li.​—Lir Revelasyon 4:11.

2. Ki mannyer Bondye i ete?

Napa personn ki’n deza vwar Bondye akoz i en Lespri, setadir i annan en form lavi pli siperyer ki tou sa ki viv lo later. (Zan 1:18; 4:24) Nou vwar personnalite Bondye atraver bann keksoz ki i’n fer. Par egzanp, ler nou admir laform e osi sa varyete fri ek fler ki egziste, nou kapab vwar ki kantite lanmour ek lasazes Bondye i annan. Grander liniver i fer nou konnen ki Bondye i pwisan.​—Lir Romen 1:20.

Nou kapab aprann bokou plis ankor lo personnalite Bondye atraver Labib. Par egzanp, Labib i dir nou sa ki Bondye i kontan, sa ki i pa kontan, ki mannyer i tret dimoun e ki mannyer i reazir dan diferan sityasyon.​—Lir Psonm 103:7-10.

3. Eski Bondye i annan en non?

Zezi ti dir: ‘Nou Papa ki dan lesyel ki ou non sen i ganny glorifye.’ (Matye 6:9) Menm si Bondye i annan en kantite tit, i annan zis en non. Dan sak langaz, sa non i ganny prononse diferaman. Normalman an Kreol nou pronons li “Zeova.”​—Lir Psonm 83:18.

Dan bokou Labib zot in tir non Bondye e ranplas li par Senyer oubyen Bondye. Me, ler Labib ti ganny ekrir, son non ti aparet apepre 7,000 fwa ladan. Zezi ti fer konnen non Bondye par servi sa non ler i ti eksplik bann dimoun Parol Bondye. I ti ed bann dimoun pour konn non Bondye.​—Lir Zan 17:26.

  4. Eski Zeova i enterese avek nou?

Zeova i demontre lentere dan nou par ekout personnelman nou lapriyer. (Psonm 65:2) Lefet ki i annan sa kantite soufrans, eski sa i vedir ki Bondye pa enterese avek nou? Serten dimoun i dir ki Bondye i fer nou soufer pour teste nou, me sa pa vre. Labib i dir: “Zanmen sa vre Bondye pou azir dan en move fason.”​—Zob 34:10; lir Zak 1:13.

Bondye in demontre respe pour imen par donn zot sa liberte pour swazir. Eski pa nou apresye sa liberte ki nou annan pour swazir pour servi Bondye? (Zozye 24:15) Soufrans i kontinyen ogmante akoz bokou dimoun i swazir pour fer ditor lezot. Leker Zeova i fermal kan i vwar sa kalite lenzistis.​—Lir Zenez 6:5, 6.

Byento, Zeova pou servi Zezi pour elimin soufrans ek bann ki responsab pour sa bann soufrans. Pour lemoman, Zeova i annan bon rezon pour permet soufrans pour en pti pe letan. Dan en lot leson dan sa seri nou pou aprann akoz Bondye i permet soufrans.​—Lir Izai 11:4.

5. Ki Bondye i oule nou fer?

Zeova in kree nou avek sa abilite pour nou aprann konn li e kontan li. I anvi ki nou aprann laverite lo li. (1 Timote 2:4) Si nou etidye Labib, nou pou kapab arive konn Bondye konman en Zanmi.​—Lir Proverb 2:4, 5.

Vi ki Zeova in donn nou lavi, nou devret kontan li plis ki okenn lezot dimoun. Nou kapab montre Bondye ki nou kontan li par koz avek li dan lapriyer e fer sa ki i demann nou. (Proverb 15:8) Zeova i demann nou pour tret lezot avek lanmour.​—Lir Mark 12:29, 30; 1 Zan 5:3.

Pour plis lenformasyon, vwar sapit 1 dan liv Ki Labib i vreman dir? pibliye par Temwen Zeova.

[Portre lo paz 23]

Eski i kapab annan en bon rezon pour permet soufrans pour en pti pe letan?