Met ou pare!

“Zot osi met zot pare, akoz Fis-de-Lonm pou vini ler ki zot pa pe ekspekte li.”​—MAT. 24:44.

1, 2. (a) Ki levennman ki’n ganny predir dan profesi Labib ki kapab ganny konpare avek latak en tig? (b) Dan ki fason sa latak pou annan lefe lo ou?

POUR plizyer lannen, en zonm ti abitye trankilman egey son lodyans avek son bann tig byen antrennen. I ti dir: “Kan en zannimo i annan konfyans dan ou, ou santi ki ou’n ganny sa pli zoli kado dan lemonn.” Me, le 3 Oktob 2003, sa konfyans ti terminen. Aparaman, san okenn rezon, enn son bann zannimo, en tig blan ki pez 172 kilo ti atak li. Sirman, sa zonm pa ti pe ekspekte ganny atake e i pa ti’n prepare pour sa.

² I enteresan pour note ki Labib i predir konsernan latak en “bebet” feros e nou bezwen met nou pare. (Lir Revelasyon 17:15-18.) Lekel ki sa bebet pou atake? San ekspekte, en sel kou, i pou annan divizyon dan lemonn Satan. Sa bebet feros rouz i reprezant Nasyon-z-ini e “sa dis korn” i reprezant tou bann pouvwar politik. Menm si zot paret zanmi, zot pou vir kont Gran Babilonn sa prostitye, setadir tou fo larelizyon e detrir li dan en fason vyolan. Kan ki sa pou arive? Nou pa konn ni zour, ni ler. (Mat. 24:36) Par kont, nou konnen ki i pou ariv dan en letan kot nou pa pe ekspekte e i pa reste bokou letan avan sa latak. (Mat. 24:44; 1 Kor. 7:29) Alor, i vreman enportan ki nou met nou pare spirityelman pour ki ler sa latak i arive, e Kris i vini konman sa Enn ki egzekit zizman, i osi ava azir konman sa Enn ki pou sov nou. (Lik 21:28) Nou kapab aprann bokou avek legzanp bann serviter fidel dan lepase, si nou anvi pare pour sa zour. Zot ti met zot pare e zot ti kapab vwar lakonplisman bann promes Bondye. Eski nou pou pran aker zot legzanp?

Met ou pare parey Noe

3. Ki kondisyon ki ti kapab fer li difisil pour Noe servi Bondye fidelman?

³ Malgre move kondisyon ki ti kontinyen egziste dan sa letan ki i ti pe viv, Noe ti met li pare pour vwar bann promes Bondye ganny akonplir. Zis mazin sa defi ki Noe ti bezwen fer fas avek kan bann lanz ti pran lekor imen pour vin reste avek bann zoli madanm lo later! Vi ki sa relasyon ki sa bann lanz ti annan avek bann madanm lo later pa ti normal, zot zanfan ki ti ne ti en ras avek en lafors ekstraordiner, zot ti “bann zonm pwisan” ki ti servi zot lafors pour fer brit avek lezot. (Zen. 6:4) Mazin vyolans ki ti annan vi ki sa bann zean ti met en pake dezord partou kot zot ti pase. Alor, bann move keksoz ti kontinyen ogmante e panse ek latitid bann imen ti vin vreman move. Apre sa, Souvren Senyer Zeova ti fikse en letan pour sa lemonn ganny detrir.​—Lir Zenez 6:3, 5, 11, 12. *

4, 5. Dan ki fason, kondisyon dan nou letan i parey avek dan letan Noe?

⁴ Zezi ti dir ki kondisyon dan nou letan ti pou parey avek dan letan Noe. (Mat. 24:37) Par egzanp, nou osi nou pe vwar lenfliyans bann move lespri. (Rev. 12:7-9, 12) Dan letan Noe, sa bann demon ti pran lekor imen. Menm si la konmela zot nepli kapab pran lekor imen, zot vreman anvi kontrol tou dimoun, bann zenn e osi bann aze. San ki bann dimoun i remarke, sa bann demon ki  mazin zis seks i kontan sa bann move aksyon degradan ki sa bann ki zot annan kontrol lo la lo later i fer.​—Efe. 6:11, 12.

⁵ Parol Bondye i dekrir Dyab konman “en kriminel” e i dir ki i “sa enn ki annan pouvwar donn lanmor.” (Zan 8:44; Ebr. 2:14) I napa sa sitan kantite pouvwar pour koz lanmor en dimoun direkteman. Kantmenm sa, sa lanz visye i atir oubyen anbet dimoun avek son bann taktik. I enfliyans leker ek lespri bann dimoun pour ki zot devlop sa dezir pour touy zot kanmarad. Par egzanp, 1 dan sak 142 zanfan ki ne Leta-z-ini pou vin viktim en mert. Eski ou krwar ki Zeova pa pe vwar sa kantite krim ki pe arive parey dan letan Noe? Eski i pou azir?

6, 7. Dan ki fason, Noe ek son fanmir ti demontre lafwa ek lakrent pour Bondye?

⁶ Pli tar, Noe ti ganny enformen ki Bondye ti’n deside pour anmenn en deliz lo later pour detrir tou sa ki vivan. (Zen. 6:13, 17) Zeova ti demann Noe pour konstrir en lars dan laform en gro bwat rektang. Noe ek son fanmir ti konmans zot travay. Kwa ki ti ed zot pour obeir e met pare pour sa zour ki zizman Bondye i arive?

⁷ Lafwa profon ek lakrent pour Bondye ti pous Noe ek son fanmir pour fer sa ki Bondye ti’n demann zot. (Zen. 6:22; Ebr. 11:7) Konman sef lafanmir, Noe ti reste vizilan spirityelman e i pa ti les bann move pratik sa lemonn enfliyans li. (Zen. 6:9) I ti konnen ki son fanmir ti devret protez zot lekor pour ki zot pa adopte move latitid vyolan e arogan sa bann ki ti otour zot. I ti vreman enportan pour zot pa zis preokip zot avek bann keksoz tou le zour ki ti pe pase otour zot. Bondye ti annan en travay pour zot fer e i ti vreman enportan ki sa fanmir antye i pran zot travay aker.​—Lir Zenez 6:14, 18.

Noe ek son fanmir ti pare

8. Kwa ki montre ki bann manm dan lafanmir Noe ti annan devosyon pour Bondye?

⁸ Sa resi Labib i atir nou latansyon lo Noe konman sef lafanmir, me madanm Noe, son bann garson ek zot madanm osi ti bann adorater Zeova. Profet Ezekyel i konfirm sa. I ti dir ki si Noe ek son fanmir ti viv dan son letan, son bann zanfan pa ti pou ganny delivre zis akoz zot papa ti en zonm drwat. Zot ti ase gran pour obeir ouswa dezobeir Bondye. Alor, zot ti personnelman donn laprev ki zot ti kontan Bondye ek son bann aksyon. (Ezek. 14:19, 20) Fanmir Noe ti ekout son lenstriksyon, annan menm lafwa avek li e zot pa ti les lenfliyans lezot anpes zot akonplir sa travay ki Bondye ti’n donn zot.

9. Ki legzanp dan nou letan ki kapab ganny konpare avek legzanp lafwa Noe?

⁹ Eski pa i vreman ankourazan pour vwar tou bann sef fanmir Kretyen dan lemonn antye pe fer bokou zefor pour imit Noe! Zot realize ki i pa sifi zis pour donn zot fanmir manze, lenz ek ledikasyon. Zot konsyan ki zot devret pran swen avek zot fanmir spirityelman. Kan zot fer sa, zot pe montre ki zot  pare pour sa ki Zeova pou fer byento.

10, 11. (a) Letan ki zot ti dan lars, ki mannyer Noe ek son fanmir ti’n kapab santi? (b) Ki kestyon i bon nou demann nou lekor?

¹⁰ Noe, son madanm, son bann garson ek zot madanm ti travay lo konstriksyon lars pour apepre 50 an. Anmezir zot ti konstrir lars, dwatet zot ti’n antre sorti ladan plizyer fwa. Zot ti fer sir ki delo pa ti pou antre dan lars, zot ti anmas ase nouritir e fer bann zannimo antre ladan. Mazin sa senn. Finalman sa gran zour i arive. I disetyenm zour pandan dezyenm mwan lannen 2370 A.N.L., e zot antre dan lars. Zeova i ferm laport e lapli i konmans tonbe. I pa zis en pti linondasyon dan sa landrwa. Tou sa delo ki dan lesyel i devide lo lars. (Zen. 7:11, 16) Bann dimoun ki pa dan lars pe mor, tandis ki sa bann ki ladan i sen e sof. Ki mannyer fanmir Noe ti’n petet santi zot? Sirman zot ti rekonesan anver Bondye. Me san okenn dout, tre probab zot ti mazinen: ‘Pa i vreman gou ki nou’n mars avek sa vre Bondye e met nou pare!’ (Zen. 6:9) Eski ou kapab vwar ou konman en sirvivan Armagedon avek menm lapresyasyon?

¹¹ Napa nanryen ki kapab anpes sa Enn Tou Pwisan akonplir son promes e met en lafen avek sa move lemonn ki Satan pe kontrole. Demann ou lekor: ‘Eski mon annan konfyans total ki napa okenn promes Bondye ki pa pou reisi e ki zot tou zot pou ganny akonplir dan zot letan fikse?’ Si wi, met ou pare par gard antet zour Zeova ki pe aprose byen vit.​—2 Pyer 3:12.

Moiz ti reste vizilan

12. Kwa ki ti’n kapab anpes Moiz reste konsantre lo bann keksoz spirityel?

¹² Annou aprezan egzamin en lot legzanp. Dapre pwennvi en imen, pozisyon ki Moiz ti annan Lezip ti annan en gran lavantaz. Konman garson adoptif fiy Faraon, tre probab Moiz ti ganny byen respekte e ti manz bann bon bon manze, annan bann pli meyer lenz e antoure avek tou bann pli bon keksoz. I ti ganny byen edike. (Lir Akt 7:20-22.) I kapab ki i ti pou ganny en gran leritaz.

13. Dan ki fason Moiz ti reste konsantre lo promes Bondye?

¹³ Aparaman, ledikasyon ki i ti gannyen depi byen zenn avek son paran ti permet Moiz konpran ki i ti bet pour fer parey bann Ezipsyen e ador zidol. (Egz. 32:8) Sistenm ledikasyon Lezip ek bann zoli keksoz materyel dan lakour rwayal pa ti en lobstak pour fer Moiz abandonn vre ladorasyon. Dwatet i ti’n vreman pran byen aker bann promes ki Bondye ti’n fer avek son zanset e i ti’n devlop en gran dezir pour met li pare pour fer lavolonte Bondye. Apre tou, Moiz ti dir bann Izraelit: “Zeova . . . Bondye Abraam, Bondye Izaak ek Bondye Zakob, in anvoy mwan kot zot.”​—Lir Egzod 3:15-17.

14. Dan ki fason lafwa ek kouraz Moiz ti ganny teste?

 ¹⁴ Lekontrer avek bann zidol ki ti napa lavi dan zot, e ki ti pe reprezant bondye bann Ezipsyen, pour Moiz, Zeova sa vre Bondye ti vreman egziste. I ti viv son lavi konmsi i ti kapab “war sa enn ki envizib.” Moiz ti annan lafwa ki pep Bondye ti pou ganny libere, me i pa ti konnen kan i ti pou arive. (Ebr. 11:24, 25, 27) Son gran lanvi pour vwar bann Ebre ganny libere ti ganny demontre dan lafason ki i ti defann en lesklav Izraelit ki ti pe ganny bate. (Egz. 2:11, 12) Par kont, lefet ki i pa ti ankor ler pour Zeova azir, alor, Moiz ti bezwen viv konman en refizye dan en pei lwenten. San okenn dout, i ti vreman difisil pour li kit en lanvironnman konfortab dan lakour bann Ezipsyen pour al viv dan dezer. Kantmenm sa, Moiz ti pare pour ekout tou lenstriksyon ki Zeova ti donn li. Sanmenm rezon ki Bondye ti pou servi li pour soulaz son bann frer apre ki i ti’n pas 40 an Madyann. Moiz ti retourn Lezip apre ki Bondye ti’n donn li lord. Sa letan ti’n arive pour Moiz akonplir en misyon sorti kot Bondye e fer li dan lafason ki Bondye ti oule. (Egz. 3:2, 7, 8, 10) Ler i ti retourn Lezip, Moiz ki ti “annan plis limilite ki tou zonm,” ti bezwen annan lafwa ek kouraz pour kapab debout devan Faraon. (Nom. 12:3) I ti fer li, pa zis enn fwa, me plizyer fwa, anmezir bann fleo ti kontinyen. I pa ti konnen konbyen fleo ti pou annan e konbyen fwa i ti pou bezwen al koz avek Faraon.

15. Malgre problenm ek dezapwentman, kwa ki ti ed Moiz pour vey byen bann loportinite pour onor son Papa ki dan lesyel?

¹⁵ Pour sa plis ki 40 an ki ti swiv apre, depi 1513 A.N.L. ziska 1473 A.N.L., Moiz ti fer fas avek dezapwentman. Pourtan, i ti rod loportinite pour li onor Zeova e senserman ankouraz son bann kanmarad Izraelit pour fer parey. (Det. 31:1-8) Akoz? Parski i ti kontan non ek souvrennte Zeova plis ki son non. (Egz. 32:10-13; Nom. 14:11-16) Malgre problenm ek dezapwentman, nou osi nou devret kontinyen siport dominasyon Bondye, avek konfyans ki lafason ki i fer keksoz i touzour pli saz e drwat, e i pli meyer ki okenn lezot. (Iza. 55:8-11; Zer. 10:23) Eski koumsa ki ou santi?

Reste eveye!

16, 17. Akoz Mark 13:35-37 i annan gran sinifikasyon pour nou?

¹⁶ “Fer atansyon, veye, [oubyen “reste eveye,” NW] parski zot pa konnen kan sa ler pou arive.” (Mark 13:33) Zezi ti donn sa lavertisman ler i ti pe koz konsernan sa siny ki ti pou mark letan lafen sa move lemonn. Annou egzamin sa ki Zezi ti dir ver lafen sa profesi remarkab ki dan Mark. Nou lir: “Veye alor, akoz zot pa konnen kan zot met pou arive, si i pou vin dan lasware, minwi, kok-sante oubyen soley-leve. I kapab vini san ki zot pe ekspekte, e war zot pe dormi. Sa ki mon dir avek zot, mon dir avek tou dimoun: Veye.”​—Mark 13:35-37.

¹⁷ Parol Zezi i fer nou reflesir en kantite. I ti pe refer avek kat diferan moman dan lannwit. Vi ki sa dernyen moman i konmans depi trwa-z-er bomaten ziska soley leve, i ti pou vreman difisil pour reste eveye sa ler.  Bann dimoun ki planifye lager i dir ki sa moman i sa enn pli apropriye pour atak kan en lennmi, akoz i annan plis sans pour trouv zot pe “dormi.” Pareyman ozordi, lefet ki bann dimoun dan lemonn i dan en profon sonmey spirityelman, nou nou pe lite pour reste eveye. Eski nou annan okenn dout ki nou devret “fer atansyon” e “veye” pour vwar sa lafen ki’n ganny predir e osi nou delivrans?

18. Konman Temwen Zeova, ki privilez merveye nou annan?

¹⁸ Sa zonm ki antrenn zannimo ki nou’n mansyonnen o konmansman ti sirviv latak sa tig. Me profesi Labib i montre ki ni fo larelizyon, ni lezot parti sa move lemonn pa pou kapab sov sa lafen ki pe vini. (Rev. 18:4-8) Konman serviter Bondye, zenn ouswa aze, annou fer tou sa ki nou kapab pour met nou pare pour gran zour Zeova parey Noe ek son fanmir. Nou pe viv dan en lemonn ki dezonor Bondye, kot bann ansenyan fo larelizyon, bann ki pa krwar oubyen ki konfize lo Bondye i monk nou Kreater par zot parol. Nou pa kapab pran risk pour les nou ganny afekte. Annou pran byen aker bann legzanp ki nou’n vwar e vey byen bann loportinite kot nou kapab defann e onor Zeova “Bondye bann bondye” wi, “sa Bondye gran, pwisan e efreyan.”​—Det. 10:17.

[Not anba lo paz]

Eski ou rapel?

• Akoz Noe ti devret donn priyorite bezwen spirityel son fanmir?

• Dan ki fason sa letan ki nou pe viv ladan i vreman parey avek letan Noe?

• Malgre dezapwentman, akoz Moiz ti reste konsantre lo promes Zeova?

• Ki profesi Labib ki pous ou pour reste eveye spirityelman?

[Kestyon]

[Portre lo paz 25]

Noe ek son Fanmir ti reste konsantre lo travay Zeova

[Portre lo paz 26]

Promes Bondye ti ed Moiz pour reste vizilan