Annou pran o serye nou servis pour Zeova

“Verifye sa ki pli enportan.”​—FILI. 1:10, NW.

1, 2. Akoz bokou i tay deryer plezir dan sa lemonn, e ki kestyon nou kapab demann nou lekor?

NOU pe viv dan en lemonn kot nou pe fer fas avek bann sityasyon pli tris e difisil dan listwar imen. I kapab preski enposib pour bann dimoun ki napa en relasyon pros avek Bondye fer fas avek sa “letan difisil.” (2 Tim. 3:1-5) Zot depan selman lo zot prop lekor pour fer fas avek bann sityasyon lavi sak zour, me apenn si zot reisi. Pour evite pran tou keksoz tro serye dan zot lavi, bokou i tant pour pas en kantite letan dan divertisman ek lanmizman sa lemonn.

² Pour kapab fer fas avek presyon, dimoun i tant pour met plezir premye dan zot lavi. Si zot pa fer atansyon, bann Kretyen i kapab fasilman tonm dan sa latrap zot osi. Ki mannyer nou kapab evite ki sa i arive? Eski sa i vedir ki nou bezwen toultan serye? Ki mannyer nou kapab trouv sa bon balans ant plezir ek responsabilite? Ki prensip Labib ki devret gid nou, pour ki menm si nou pran nou responsabilite o serye, nou pa bezwen vin sitan serye dan nou lavi?

Serye dan en lemonn ki kontan plezir

3, 4. Ki mannyer Labib i ed nou apresye sa lenportans pour serye dan sa ki nou pe fer?

³ I evidan ki sa lemonn i tro “kontan plezir.” (2 Tim. 3:4) Vi ki sa lemonn i met tro bokou lanfaz lo plezir, sa i kapab en danze pour nou spirityalite. (Prov. 21:17) Alor, zapot Pol ti annan rezon pour konsey Timote ek Tit dan son bann let pour montre ki zot ti devret osi serye dan sa ki zot pe fer. Si nou aplik sa konsey, nou pa pou les nou ganny enfliyanse par leta lespri sa lemonn.​—Lir 1 Timote 2:1, 2; Tit 2:2-8. *

⁴ Plizyer syek pli boner, Salomon ti ekrir akoz i pli saz parler pour reflesir seryezman lo nou lavi olye touzour konsantre lo plezir. (Ekle. 3:4; 7:2-4) An realite, vi ki lavi i kourt, nou bezwen fer bann gro zefor pour nou ganny sove. (Lik 13:23, 24) I pour sa rezon ki nou bezwen kontinyen reflesir lo “sa ki pli enportan.” (Fili. 1:10, NW) Sa i vedir ki nou bezwen vey byen tou laspe nou lavi konman en Kretyen.

5. Mansyonn en laspe dan nou lavi ki nou bezwen pran o serye.

⁵ Par egzanp, pour imit Zeova ek Zezi, bann Kretyen i pran o serye zot responsabilite pour travay dir. (Zan 5:17) Sa i fer ki zot souvan ganny felisite pour zot bon travay e konman bann travayer diny konfyans. Bann sef fanmir ki sirtou vwar li enportan pour zot travay dir pour pran swen avek zot fanmir. Apre tou, si en msye pa pran swen avek bezwen materyel son fanmir i parey en dimoun ki’n “abandonn” Zeova!​—1 Tim. 5:8.

En pwennvi serye e zwaye lo nou ladorasyon

6. Ki mannyer nou konnen ki nou devret pran nou ladorasyon pour Zeova o serye?

⁶ Zeova pa’n zanmen pran vre ladorasyon alalezer. Annou pran en legzanp. Bann  Izraelit ki ti anba Lalwa Moiz, ti sibir bann konsekans grav ler zot ti vir ledo avek ladorasyon Zeova. (Zoz. 23:12, 13) Dan premye syek N.L., bann disip Kris ti bezwen fer bokou zefor pour fer sir ki vre ladorasyon pa ti ganny kontaminen avek bann fo lansennyman ek move latitid. (2 Zan 7-11; Rev. 2:14-16) Ozordi, bann vre Kretyen i kontinyen pran zot ladorasyon o serye.​—1 Tim. 6:20.

7. Ki mannyer Pol ti prepar li pour son minister?

⁷ Nou minister i en sours lazwa pour nou. Me pour ki nou kapab kontinyen annan lazwa dan nou minister, nou bezwen byen reflesir lo li e fer en bon preparasyon davans. Pol ti eksplike ki mannyer i ti pran an konsiderasyon bann dimoun ki i ti ansennyen. I ti ekrir: “Mon fer mwan vin tou avek tou dimoun pour mwan sov de-trwa parmi zot par tou mannyer posib. Mon fer tousala pour Levanzil, pour mwan ganny en par dan son bann benediksyon.” (1 Kor. 9:22, 23) I ti en plezir pour Pol ed bann dimoun spirityelman e i ti reflesir seryezman lo konman i ti pou konble bezwen spesifik sak dimoun ki ti ekout li. Alor, i ti kapab ankouraz e motiv zot pour ador Zeova.

8. (a) Ki latitid nou devret annan anver dimoun ki nou ansennyen dan nou minister? (b) Ki mannyer kondwir en letid Labib i kapab en sours lazwa dan nou minister?

⁸ Ki kantite Pol ti pran son minister o serye? I ti pare pour fer li vin en “lesklav” pour servi Zeova e bann ki ti ekout sa mesaz laverite. (1 Kor. 9:19; Rom. 12:11) Kan nou pran nou responsabilite pour ansenny Parol Bondye ki swa dan en letid Labib, en renyon kongregasyon oubyen Ladorasyon an fanmir, eski nou konsyan ki nou annan en responsabilite anver sa bann ki nou pe ansennyen? Petet nou vwar li en fardo pour nou konmans kondwir en letid Labib dan en fason regilye. I vre ki normalman nou bezwen pran letan lo bann lezot aktivite personnel pour ed bann dimoun. Me pa sa i an armoni avek parol Zezi ki ti dir: “I annan plis lazwa pour donnen ki pour resevwar”? (Akt 20:35) Nou pou ganny plis lazwa ki dan okenn lezot aktivite kan nou ansenny lezot lo ki mannyer pour ganny sove.

9, 10. (a) Eski en dimoun serye pa kapab relakse e kontan pas letan avek lezot? Eksplike. (b) Kwa ki pou ed en ansyen vin ankourazan e fasil pour lezot apros li?

⁹ Kan nou serye, sa pa vedir ki nou pa kapab annan bann moman detant agreab avek lezot dimoun. Zezi in kit en legzanp parfe pour pran letan pa zis pour ansenny lezot me osi pour relakse e devlop en relasyon pros avek lezot. (Lik 5:27-29; Zan 12:1, 2) I pa vedir osi ki en dimoun serye i devret toultan annan en laparans sever. Si Zezi ti annan en figir sever e sitan serye, dimoun pa ti pou santi zot atire anver li. Menm bann zanfan ti santi zot alez avek li. (Mark 10:13-16) Ki mannyer nou kapab imit latitid byen balanse ki Zezi ti annan?

¹⁰ Ler i ti pe koz konsernan en ansyen, en frer ti dir: “I ekspekte bokou avek son lekor me i pa zanmen ekspekte ki lezot i parfe.” Eski lezot i kapab dir menm parey lo ou? I normal pour ekspekte serten keksoz avek lezot. Par egzanp, zanfan i aksepte ki paran i fikse bann lobzektif rezonnab e ed zot pour atenn sa bann lobzektif. Pareyman, bann ansyen i kapab ankouraz bann frer ek ser dan kongregasyon pour devlop plis zot spirityalite e donn zot bann sizesyon spesifik lo konman pour fer li. Deplis, ler en ansyen i annan en pwennvi ekilibre lo son prop lekor, i pou en dimoun ankourazan e i pou fasil pour lezot apros li. (Rom. 12:3) En ser ti dir: “Mon pa anvi en ansyen i pran tou keksoz konman en dyok. Me si i toultan serye, i difisil pour apros li.” En lot ser ti dir ki i santi ki serten ansyen “i kapab fer lezot vreman per akoz zot vreman serye.” Bann ansyen pa ti pou zanmen anvi ki bann frer ek ser i perdi sa leta lespri zwaye ki zot devret annan  vizavi ladorasyon pour Zeova, “sa Bondye ere.”​—1 Tim. 1:11, NW.

Pran ou responsabilite dan kongregasyon

11. Ki en frer i bezwen fer si i oule desarz plis responsabilite dan kongregasyon?

¹¹ Ler Pol ti ankouraz bann zonm dan kongregasyon pour fer zefor pour aksepte plis responsabilite, i pa ti pe ankouraz personn pour satisfer zot prop lanbisyon. O kontrer, i ti ekrir: “Si en dimoun i swete ganny plas dirizan dan [kongregasyon], i dezir en fonksyon nob.” (1 Tim. 3:1, 4, nou ki’n met an italik.) Bann frer dan kongregasyon ki “swete” desarz plis responsabilite i bezwen devlop en gran dezir pour travay dir pour annan bann kalite spirityel neseser pour servi zot bann frer ek ser. Si en frer in batize pour omwen enn an e i ranpli sa bann kondisyon dan 1 Timote 3:8-13 dan en fason rezonnab, pour kapab vin asistan ministeryel, i kapab ganny rekomande. Remarke ki i dir dan verse 8: “Bann dyak [oubyen “asistan ministeryel,” NW] osi, zot devret serye.”​—Nou ki’n met an italik.

12, 13. Dekrir lafason ki bann zenn frer i kapab kalifye pour desarz plis responsabilite dan kongregasyon.

¹² Eski ou en frer batize, serye, dan ou 19 an 20-t-an? I annan plizyer fason ou kapab kalifye pour desarz bann responsabilite dan kongregasyon. En fason i ler ou amelyor ou partisipasyon dan predikasyon. Eski ou sa kalite dimoun ki kontan travay avek bann frer ek ser diferan laz dan predikasyon? Eski ou pe esey rod en dimoun ki ou kapab konmans etidye Labib avek? Ler ou kondwir en letid Labib par swiv bann sizesyon ki ganny donnen dan renyon, ou pou amelyor ou abilite pour ansennyen. Deplis, ou pou arive konpran santiman sa enn ki ou pe etidye Labib avek. Ler ou etidyan i konmans vwar sa nesesite pour fer bann sanzman, ou pou ed li avek pasyans ek bon zizman pour aplik bann prensip Labib.

¹³ Zenn frer, ou kapab fer ou disponib pour ed bann aze dan nenport ki fason posib. Ou kapab donn lanmen pran swen avek Lasal Rwayonm, par egzanp ede pour gard li prop e annord. Ler ou ofer ou led dan nenport ki fason ki ou kapab, ou leta lespri volonter i donn laprev ki ou serye konsernan ou minister. Parey Timote, ou kapab aprann pour vreman pran aker bezwen kongregasyon.​—Lir Filipyen 2:19-22.

14. Ki mannyer bann zenn frer i kapab ganny “teste” pour pran plis responsabilite dan kongregasyon?

¹⁴ Ansyen, i annan bann zenn frer dan kongregasyon ki pe fer bokou zefor pour ‘gard zot lekor kont bann pasyon lazenes’ e ki pe pourswiv “lazistis, lafwa, lanmour, lape” enkli bann lezot bon kalite. Mazinen pour donn zot bann travay dan kongregasyon. (2 Tim. 2:22) Kan zot fer sa bann zenn frer partisip dan bann travay kongregasyon, sa i kapab “teste zot” pour ki zot pran plis responsabilite e “tou dimoun i a war [zot] progre.”​—1 Tim. 3:10; 4:15.

Serye dan kongregasyon e dan fanmir

15. Dapre 1 Timote 5:1, 2, si en dimoun i serye, ki sa i enplike dan lafason ki i konsider lezot?

¹⁵ Ler en dimoun i serye, sa i osi enplik respekte dinyite son bann frer ek ser. Ler Pol  ti konsey Timote, i ti montre ki i neseser pour annan respe pour lezot. (Lir 1 Timote 5:1, 2.) Sa i ankor pli neseser dan nou relasyon avek bann dimoun lot sèks. Zob ti donn en bon legzanp dan lafason ki i ti respekte dinyite bann madanm, sirtou son konzwen. I ti vwar li enportan pour li pa get en lot madanm avek en move dezir. (Zob 31:1) Si nou montre nou serye avek nou bann frer ek ser, nou pa pou rod latraksyon avek zot ouswa annan okenn lezot konportman ki ti kapab anbaras zot. Ler de Kretyen pe pwente avek lentansyon pour marye, i vreman enportan ki zot respekte dinyite kanmarad. En Kretyen ki serye pa pou zwe avek santiman son kanmarad.​—Prov. 12:22.

16. Ki diferans i annan dan lafason ki Labib ek lemonn i vwar rol bann msye ek Papa?

¹⁶ Nou osi bezwen pran o serye bann diferan rol ki Bondye in donn sakenn dan lafanmir. Lemonn Satan pa pe pran o serye rol ki en msye ek papa i annan dan lafanmir. Medya i kontan abes e fer dyok lo rol ki en sef fanmir i annan. Par kont, Labib i donn bann msye Kretyen en gran responsabilite konman ‘sef zot madanm.’​—Efe. 5:23; 1 Kor. 11:3.

17. Eksplike ki mannyer nou kapab montre ki nou pe pran o serye nou responsabilite an sa ki konsern nou Ladorasyon an fanmir.

¹⁷ En msye ki pran swen avek son fanmir lo plan materyel, me ki pa pran swen avek son fanmir lo plan spirityel, i demontre ki i napa lasazes ek bon zizman. (Det. 6:6, 7) Sanmenm rezon ki 1 Timote 3:4 i dir ki si ou en sef fanmir e ou anvi annan plis responsabilite dan kongregasyon, ou devret en zonm serye kot i konsern ‘byen diriz ou lakour, e gard ou zanfan dan lobeisans ek respe dan tou sort fason.’ Ou kapab demann ou lekor: ‘Eski mon abitye met letan dekote pour ador Bondye an fanmir?’ Serten madanm Kretyen i bezwen preski sipliy zot msye pour pran swen spirityelman avek zot lakour. Sak mari i devret analiz son lekor pour vwar si i pe pran o serye son responsabilite familyal. Byensir, en madanm Kretyen i bezwen korpere avek son msye e siport Ladorasyon an fanmir pour fer li vin en sikse.

18. Ki mannyer zanfan i kapab aprann pour pran keksoz o serye dan zot lavi?

¹⁸ Zanfan osi i ganny ankouraze pour pran keksoz o serye dan zot lavi. (Ekle. 12:1) Napa nanryen mal pour bann zanfan aprann travay dir, fer bann louvraz lakour ki rezonnab dapre zot laz ek abilite. (Lam. 3:27) Kan Lerwa David ti ankor en zenn garson, i ti aprann konman pour vin en bon berze. Vi ki i ti osi aprann pour vin en mizisyen ek konpoziter talante, finalman i ti servi devan lerwa Izrael. (1 Sam. 16:11, 12, 18-21) San okenn dout, ler David ti ankor zanfan i ti kontan anmize, me i ti osi aprann bann keksoz ki ti pou vreman itil pour li  loue Zeova pli tar. I ti’n aprann pour vin en bon berze, sa ti ed li pour diriz nasyon Izrael avek pasyans. Zenn, ki diferan keksoz ou pe aprann la konmela ki pou ed ou servi ou Kreater e desarz plis responsabilite a lavenir?

Annan en pwennvi ekilibre

19, 20. Ki pwennvi ekilibre nou devret determinen pour annan anver nou lekor ek nou ladorasyon?

¹⁹ Nou tou nou kapab fer bokou zefor pour annan en pwennvi ekilibre lo nou lekor, e pa krwar ki nou bezwen toultan sitan serye. Nou pa pou anvi vin “tro zis.” (Ekle. 7:16) En dimoun ki kontan fer en pti fars parler, i kapab ede pour tir tansyon dan serten sityasyon kot lakour, dan travay ouswa dan nou relasyon avek nou bann frer ek ser. Kot lakour, nou pa ti pou anvi kritik lezot tro bokou, akoz sa ti pou gat sa lape ek bon lantant dan fanmir. Dan kongregasyon, tou dimoun i kapab riye parler e apresye konpanni lezot. Alor, nou fason ansennyen ek nou konversasyon pou reste ankourazan e pozitif.​—2 Kor. 13:10; Efe. 4:29.

²⁰ Nou pe viv dan en lemonn ki pa pe pran Zeova ek son bann lalwa o serye. Par kont, pour pep Zeova, i vreman enportan pour obeir e reste fidel avek Bondye. Pa i en plezir pour nou form parti en gran lafoul frer ek ser ki pran o serye zot ladorasyon pour Zeova! Annou determinen pour kontinyen demontre sa menm latitid dan nou lavi ek nou ladorasyon.

[Not anba lo paz]

Ki ou pou reponn?

• Akoz nou pa devret les nou ganny enfliyanse par lespri sa lemonn ki tay deryer plezir?

• Ki mannyer nou kapab zwaye e an menm tan serye dan nou minister?

• Ki mannyer nou kapab montre ki nou serye dan lafason ki nou vwar nou bann responsabilite?

• Eksplike akoz respekte dinyite lezot i en keksoz serye.

[Kestyon]

[Portre lo paz 16]

En msye i devret pran swen avek son fanmir lo plan materyel e spirityel