“Fri Lespri” i glorifye Bondye

“Mon Papa i ganny glorifye ler zot raport bokou fri.”​—ZAN 15:8.

1, 2. (a) Ki loportinite nou annan pour ankouraz lezot? (b) Ki kado sorti kot Zeova ki pou ed nou amelyor nou abilite pour servi li?

ANNOU egzamin sa de sityasyon: En ser Kretyen i remarke ki en zenn ser i paret pe trakase konsernan en keksoz. I fer laranzman pour travay avek li dan predikasyon. Anmezir ki zot koz koze apre ki zot in fini fer en lakaz, sa zenn ser i konmans rakonte kwa ki pe fatig li. Pli tar sa zour, sa zenn ser i remersye Zeova dan lapriyer pour lanmour senser ki sa ser matir in demontre anver li, vi ki sanmenm sa ki i ti bezwen. Dan en lot landrwa, en koup fek retourn kot zot apre ki zot ti’n al prese dan en lot pei. Pandan ki zot rakont zot leksperyans avek lantouzyasm, dan en pti rankont ki’n ganny organize, en zenn frer i ekout zot atantivman. Detrwa lannen pli tar, pandan ki li menm sa zenn frer pe prepare pour al dan sa pei kot i’n ganny demande pour servi, i rapel sa koup ek sa konversasyon ki ti donn li lanvi pour vin en misyonner.

² Petet sa de sityasyon i fer ou rapel en dimoun ki’n ed ou pour fer en bon swa dan ou lavi oubyen ou prop legzanp in annan en bon lefe lo en lot dimoun. Byensir, i rar ki en dimoun i fer en sanzman dan son lavi zis apre en senp konversasyon ki i’n gannyen avek en lot. Me sak zour, nou annan sa loportinite pour ankouraz e fortifye lezot. Zis mazinen, pa i ti pou vreman gou si ou ti kapab fer en keksoz pour devlop ou bann abilite ek kalite ki ti pou permet ou ed ou bann frer ek ser pli byen e vin pli itil dan servis Bondye? An realite, Zeova i donn nou en kado e sa i son lespri sen. (Lik 11:13) Anmezir ki nou les lespri sen diriz nou, nou pou devlop bann zoli kalite ki pou ed nou amelyor tou laspe nou servis pour Bondye. Pa lespri sen i en kado merveye!​—Lir Galat 5:22, 23. *

3. (a) Akoz ler nou devlop “fri Lespri” sa pou anmenn laglwar pour Bondye? (b) Ki kestyon nou pou egzaminen?

³ Bann kalite ki lespri sen i ed nou devlope i reflekte personnalite Zeova, sa enn ki Sours lespri sen. (Kol. 3:9, 10) Zezi ti montre sa rezon prensipal akoz bann Kretyen i devret fer bokou zefor pour imit Bondye ler i ti dir avek son bann zapot: “Mon Papa i ganny glorifye ler zot raport bokou fri.” * (Zan 15:8) Anmezir nou devlop “fri Lespri,” i pou evidan dan lafason ki nou koze e azir, an retour sa pou anmenn laglwar pour Bondye. (Mat. 5:16) Dan ki fason fri lespri i diferan avek bann tre sa lemonn Satan? Ki mannyer nou kapab devlop fri lespri? Akoz nou kapab vwar li difisil pour devlop fri lespri? Nou pou egzamin sa bann kestyon anmezir ki nou diskit sa trwa premye laspe fri lespri, setadir lanmour, lazwa ek lape.

Lanmour ki baze lo en prensip siperyer

4. Ki kalite lanmour Zezi ti ansenny son bann disip pour demontre?

⁴ Sa lanmour ki lespri sen i fer nou devlope i vreman diferan avek sa kalite lanmour ki komen dan lemonn. Ki mannyer sa? I baze lo en prensip siperyer. Zezi ti met lanfaz lo sa diferans dan son Sermon lo Montanny. (Lir Matye 5:43-48.) I ti fer remarke ki menm bann peser pou annan sa tandans pour tret lezot  byen si lezot i fer li anver zot. Sa kalite “lanmour” pa enplik en vre sakrifis me plito en dimoun i fer en faver en lot zis pour li benefisye avek en faver an retour. Si nou oule ‘vin garson nou Papa ki dan lesyel,’ nou pa devret annan sa kalite latitid. Olye tret lezot parey zot tret nou, nou devret vwar lezot parey Zeova i vwar zot e tret zot parey i tret zot. Alor, ki mannyer i posib pour kontan nou lennmi parey Zezi i demann nou pour fer?

5. Ki mannyer nou kapab demontre lanmour pour bann ki persekit nou?

⁵ Annou egzamin en legzanp dan Labib. Pandan ki Pol ek Silas ti pe prese dan lavil Filip, zot ti ganny arete, ganny en bon bate, ganny zete dan en kaso dan fon prizon e zot lipye ti ganny mete dan blok dibwa. Petet pandan sa letan, zot ti osi ganny maltrete fizikman par sa zofisye prizon. Kan zot lasenn ti kase san ekspekte apre en tranblemandter, eski zot ti sezi sa loportinite pour revanze kont sa zonm? Non. Zot lanmour senser ti fer zot pas lentere sa gardyen prizon avan sa ki pour zot e deswit zot ti azir pour ed li. Finalman, sa gardyen prizon ek tou son fanmir ti vin krwayan. (Akt 16:19-34) En kantite nou bann frer ek ser in swiv menm legzanp par “beni bann ki persekit zot.”​—Rom. 12:14.

6. Dan ki fason nou kapab demontre lanmour ki fer pase lentere nou bann frer ek ser avan sa ki pour nou? (Vwar bwat lo paz 25.)

⁶ Nou lanmour pour nou bann konpanyon Kretyen i al pli lwen ki sa ankor. “Nou osi nou devre donn nou lavi pour nou frer.” (Lir 1 Zan 3:16-18.) Me nou pli souvan kapab demontre lanmour dan bann pti keksoz. Par egzanp, si nou dir oubyen fer en keksoz ki ofans en frer oubyen en ser, nou kapab demontre lanmour par pran linisyativ pour fer lape. (Mat. 5:23, 24) Me si en dimoun i ofans nou? Eski nou “pare pour pardonnen” oubyen parfwa nou annan sa tandans pour gard rankin? (Ps. 86:5) Sa gran lanmour ki lespri sen i fer nou devlope i kapab ed nou pour kouver bann pti lofans e pardonn lezot volonterman “parey [Zeova i] pardonn” nou.​—Kol. 3:13, 14; 1 Pyer 4:8.

7, 8. (a) Dan ki fason lanmour ki nou annan pour Bondye i relye avek lanmour pour lezot dimoun? (b) Ki mannyer nou kapab ogmant nou lanmour pour Zeova? (Vwar portre pli ba.)

⁷ Ki mannyer nou kapab devlop sa lanmour kot nou fer pase lentere nou bann frer ek ser avan sa ki pour nou? Par ogmant nou lanmour pour Bondye. (Efe. 5:1, 2; 1 Zan 4:9-11, 20, 21) Letan ki nou pase personnelman avek Zeova pour lir Labib, medite e priye pou  ankouraz nou e ogmant nou lanmour pour nou Papa dan lesyel. Par kont, nou bezwen fer letan pour apros avek Bondye.

⁸ Pour donn en legzanp: Meton ki i ti posib pour ou lir Parol Bondye, medit lo la e priy Zeova zis en serten ler sak zour. Pa sa letan ti pou presye pour ou e ou pa ti pou les nanryen anpes ou profit byen sa letan ki ou’n met dekote pour pas avek Zeova? Byensir, napa personn ki kapab anpes nou priy Bondye e laplipar nou i kapab lir Labib nenport ler ki nou anvi. Me nou bezwen pran bann pa neseser pour ki nou pa les nou bann aktivite sak zour anpes nou servi byen sa letan ki nou’n met dekote pour pas avek Bondye. Eski ou fer zefor pour pas plis letan ki ou kapab avek Zeova pour vin pli pros avek li?

“Lazwa prodwi par Lespri Sen”

9. Ki karakteristik sa lazwa prodwir par lespri sen i annan?

⁹ En karakteristik enportan fri lespri se ki i toultan reste stab. Lazwa, sa dezyenm laspe fri lespri ki nou pou egzaminen i en laprev sa stabilite. Lazwa i parey serten plant ki kapab sirviv menm dan bann landrwa difisil. Dan lemonn antye en kantite serviter Bondye ‘in resevwar parol Bondye avek lazwa prodwi par Lespri Sen, menm si zot in bokou soufer.’ (1 Tesa. 1:6) Lezot i fer fas avek bann difikilte e mank serten keksoz lo plan materyel. Me kantmenm sa, Zeova i donn zot lafors atraver son lespri sen “pour ki zot a kapab siport tou avek pasyans [“dan lazwa,” NW].” (Kol. 1:11) Kote sa lazwa i sorti?

10. Kote nou lazwa i sorti?

¹⁰ Kontrerman avek “larises enserten” dan lemonn Satan, bann trezor spirityel ki nou’n resevwar avek Zeova pou dir pour touzour. (1 Tim. 6:17; Mat. 6:19, 20) I donn nou sa lespwar merveye pour lavenir kot nou pou viv pour touzour. Nou annan sa lazwa pour form parti sa lasosyasyon frer ek ser dan lemonn antye. Nou lazwa i sirtou baze lo nou relasyon avek Bondye. Nou annan sa menm santiman ki David ti eksprimen dan en kantik. Kantmenm i ti oblize mars an tayan, i ti loue Zeova par dir: “Akoz ou labonte leker i pli meyer ki lavi, mon pou loue ou avek mon labous. Alor mon pou beni ou tou dilon mon lavi.” (Ps. 63:3, 4) Menm kan nou pas dan bann moman difisil, nou leker i ranpli avek louanz pour Bondye.

11. Akoz i enportan ki nou servi Bondye avek lazwa?

¹¹ Zapot Pol ti ankouraz bann Kretyen an dizan: “Rezoui zot dan Senyer; mon repete, rezoui zot.” (Fili. 4:4) Akoz i enportan pour bann Kretyen akonplir zot servis pour Zeova dan lazwa? Sa i akoz sa kestyon ki Satan ti souleve an rapor avek souvrennte Zeova. Satan i pretann ki personn pa pou servi Zeova volonterman. (Zob 1:9-11) Si nou ti pou servi Zeova zis akoz nou oblize fer li, me nou pa ti pe fer li avek lazwa, nou sakrifis louanz pa ti pou konplet. Alor nou devret fer bokou zefor pour swiv konsey sa psalmis: “Servi Zeova dan lazwa. Vin devan li e kriye avek lazwa.” (Ps. 100:2) Ler nou akonplir nou servis volonterman e avek lazwa, nou pe glorifye Bondye.

12, 13. Ki nou kapab fer pour lalit avek bann santiman negatif?

¹² Selman, i toutafe normal ki menm bann serviter Zeova ki devoue pou santi zot dekouraze parler e zot pou bezwen lite pour gard en pwennvi pozitif. (Fili. 2:25-30) Kwa ki kapab ed zot dan sa bann moman parey? Efezyen 5:18, 19 i dir: “Zot devre ranpli avek Lespri. Ankouraz kanmarad par bann Psonm, par bann kantik; sant bann Psonm ek kantik sakre, e remersi Bondye dan zot leker.” Ki mannyer nou kapab aplik sa konsey?

¹³ Kan nou ganny anvair par bann santiman negatif, nou kapab enplor Zeova dan lapriyer e fer bokou zefor pour medit lo bann keksoz ki merit felisitasyon. (Lir Filipyen 4:6-9.) Serten i vwar ki ler zot sant bann kantik Rwayonm dousman, zot ganny lafors e i ed zot remazin  keksoz dan en fason pozitif. En frer ki ti pas dan en move leksperyans ki ti fer li santi li souvan fristre e dekouraze i dir: “An plis ki fer bann lapriyer senser regilyerman, mon ti aprann detrwa kantik parker. Mon leker ti anpe ler mon ti sant sa bann zoli kantik avek Zeova ki swa for oubyen dousman dan mwan menm. An plis ki sa, sa liv Apros avek Zeova ti sorti apepre menm letan. Mon ti lir sa liv de fwa son lannen answit. I ti parey en latizann ki ti kalme sa douler dan mon leker. Mon konnen ki Zeova pe beni mon bann zefor.”

‘Par lape zot ini ansanm avek kanmarad’

14. Ki sa laspe remarkab sa lape ki lespri sen i prodwir i ed nou devlope?

¹⁴ Kot nou bann lasanble enternasyonal, bann delege sorti dan diferan pei i kontan pour asosye avek zot bann frer ek ser Kretyen. Sa lasosyasyon i santre lo en laspe enportan sa lape ki egziste parmi pep Zeova ozordi, nou linite mondyal. Bann ki pe obzerv nou i etonnen pour vwar bann dimoun ki ti kapab annan laenn pour kanmarad pe “fer tou pour prezerv linite ki Sent-Espri i donnen par lape ki ini zot ansanm avek kanmarad.” (Efe. 4:3) Sa linite i vreman remarkab malgre bann santiman ki bokou in bezwen sirmonte.

15, 16. (a) Ki ti lorizin Pyer e dan ki fason sa ti vin en defi pour li? (b) Ki mannyer Zeova ti ed Pyer pour sanz son latitid?

¹⁵ I en defi pour fer dimoun sorti dan diferan lorizin viv ansanm dan linite. Pour ed nou konpran sa ki nou bezwen sirmonte pour arive viv dan linite, annou egzamin legzanp zapot Pyer dan premye syek. Nou remark latitid ki i ti annan anver bann dimoun ki pa ti Zwif e ki pa ti’n sirkonsi ler i ti dir: “Zot konnen ki i defann pour en Zwif frekant en dimoun en lot nasyon oubyen antre dan son lakaz. Me Bondye in montre mwan ki mon pa devre konsider  personn konman enpir.” (Akt 10:24-29; 11:1-3) Dapre pwennvi ki ti komen sa letan, aparaman Pyer ti grandi avek sa krwayans ki dapre Lalwa i ti devret kontan zis son bann konpanyon Zwif. Petet pour li, i ti toutafe normal pour ay bann ki pa ti Zwif e konsider zot konman lennmi. *

¹⁶ Zis mazinen ki mannyer Pyer ti’n bezwen santi li anbarase ler i ti antre dan lakaz Korney. Eski en zonm ki oparavan ti annan bann pwennvi negatif lo bann ki pa ti Zwif ti pou arive ‘byen ini ansanm’ avek zot dan “lape ki ini zot ansanm avek kanmarad”? (Efe. 4:3, 16) Wi, akoz detrwa zour pli boner, lespri sen Bondye ti ouver leker Pyer, sa ti ed li pour sanz son latitid e sirmont son move pwennvi lo lezot. Atraver en vizyon, Zeova ti fer kler avek li ki lafason ki Bondye i vwar bann dimoun, pa baze lo zot ras oubyen nasyonalite. (Akt 10:10-15) Alor, Pyer ti kapab dir Korney: “Aprezan, mon vreman konpran ki Bondye pa fer preferans pour personn, me dan nenport ki nasyon tou dimoun ki annan respe pour li e ki fer sa ki byen Bondye i kontan li.” (Akt 10:34, 35) Pyer ti sanze e i ti vreman vin ini avek tou “bann frer dan lafwa.”​—1 Pyer 2:17.

17. Ki mannyer sa linite ki pep Zeova i annan antre zot i remarkab?

¹⁷ Leksperyans Pyer i ed nou apresye sa sanzman remarkab ki pe arive parmi pep Bondye ozordi. (Lir Izai 2:3, 4. *) Plizyer milyon dimoun “sorti dan tou nasyon, tribi, pep ek lalang” in sanz zot fason panse pour fer “sa ki bon, sa ki fer [Bondye] plezir, sa ki parfe.” (Rev. 7:9; Rom. 12:2) Bokou parmi sa bann dimoun ti pe ganny enfliyanse par laenn, diskord ek divizyon ki lemonn Satan i promote. Me atraver en letid lo Parol Bondye e avek led lespri sen, zot in aprann pour “rod sa bann keksoz ki prodwi lape.” (Rom. 14:19) Sa linite i anmenn louanz pour Bondye.

18, 19. (a) Ki mannyer nou tou nou kapab kontribye pour promot lape ek linite dan kongregasyon? (b) Ki nou pou egzaminen dan sa lot lartik?

¹⁸ Ki mannyer nou tou nou kapab kontribye pour gard sa lape ek linite ki egziste parmi pep Bondye? Dan en kantite kongregasyon i annan bann dimoun ki sorti dan diferan pei. Petet serten napa menm koutim ki nou oubyen pa koz byen nou langaz. Eski nou fer zefor pour konn zot pli byen? Sanmenm sa ki Parol Bondye i ankouraz nou pour fer. Dan sa let ki Pol ti ekrir kongregasyon Ronm kot ti annan bann krwayan Zwif e osi bann non Zwif, i ti dir: “Resevwar kanmarad parey Kris in resevwar zot, pour laglwar Bondye.” (Rom. 15:7) Eski i annan en dimoun dan ou kongregasyon ki ou kapab aprann konn pli byen?

¹⁹ Ki nou kapab fer ankor pour les lespri sen diriz nou lavi? Sa lot lartik pou egzamin sa kestyon anmezir ki nou diskit lo lezot laspe fri lespri.

[Not anba lo paz]

Ki ou pou reponn?

• Ki mannyer nou kapab demontre lanmour ki fer pase lentere nou bann frer ek ser avan sa ki pour nou?

• Akoz i enportan ki nou akonplir nou servis pour Bondye avek lazwa?

• Ki mannyer nou kapab kontribye pour anmenn lape ek linite dan kongregasyon?

[Kestyon]

[Bwat lo paz 25]

“Zot ki bann vre Kretyen”

Sa liv Between Resistance and Martyrdom​—Jehovah’s Witnesses in the Third Reich i sit parol en zenn garson Zwif ki ti ganny anprizonnen. Dan son komanter, sa garson i rakont sa premye fwa ki i ti zwenn Temwen Zeova ler i ti ariv dan kan konsantrasyon Neuengamme:

“Deswit apre ki nou, bann Zwif ki ti sorti Dachau ti ariv dan bann barak sa kan, lezot Zwif ti konmans kasyet tou zot keksoz pour pa partaz avek nou. . . . An deor [sa kan konsantrasyon], nou ti la pour ed kanmarad. Me isi, kot nou ti dan en sityasyon ant lavi ek lanmor, sak dimoun ti mazin sov son prop lavi avan e oubliy lezot. Me zis mazinen ki bann Etidyan Labib ti pe fer. Sa letan zot ti bezwen travay vreman dir pour aranz bann tiyo delo. I ti fer fre e zot ti pe debout en lazournen antye dan delo ki ti fre parey ays. Personn pa ti konpran ki mannyer zot ti arive fer sa. Zot ti dir ki se Zeova ki ti donn zot lafors. Zot ti vreman bezwen dipen zis parey nou akoz zot ti lafen. Me ki zot ti pe fer? Zot ti pe anmas tou dipen ki zot ti gannyen, lanmwatye zot ti pran pour zot e sa lot lanmwatye zot ti donn avek zot bann konpanyon ki ti fek arive sorti Dachau. Zot ti swet zot labyenveni e anbras zot. Avan ki zot ti manze, zot ti fer lapriyer. Apre, zot tou zot ti satisfe e ere. Zot ti dir ki zot ti nepli lafen. Ou vwar, se la ki mon ti dir dan mwan menm: Zot ki bann vre Kretyen.”

[Portre lo paz 23]

Eski ou pran letan dan lezot aktivite, sak zour, pour vin pli pros avek Zeova?