Lekel ki pe anons sa bon nouvel?

“ . . . pou ganny anonse partou dan lemonn.”​—MATYE 24:14.

SA BON nouvel pe ganny anonse partou dan lemonn par Temwen Zeova. Zot fer sa dan plizyer fason. En fason se par . . .

Koz lo la. Parey Zezi ek son bann disip, Temwen Zeova i al kot bann dimoun pour partaz sa bon nouvel avek zot. (Lik 8:1; 10:1) Zot pa zis ekspekte dimoun vin kot zot. Donn temwannyaz lo Rwayonm Bondye i en keksoz ki sa plis ki set milyon Temwen Zeova i fer. Zot pres portanport, dan semen, par telefonn e lezot fason. Lannen pase, bann Temwen ti pas plis ki enn edmi bilyon erdtan dan sa aktivite.

Zot pa ansenny lezot zis lo Rwayonm Bondye me osi lo “tou sa ki [Zezi in] komande.” (Matye 28:20) Zot kondwir plis ki wit milyon letid Labib regilyerman e zot fer li gratwitman.

Bann Temwen i pres partou dan lemonn, dan 236 pei. Zot pres avek tou kalite dimoun. Zot pres dan lakanpanny ek lavil, lafore Amazonn ek Siberi, dan bann dezer Lafrik e dan bann montanny Himalaya. Zot pa ganny peye pour fer sa travay. Zot servi zot prop larzan ek letan akoz sa lanmour ki zot annan pour Bondye ek zot prosen. Zot osi fer lezot konn sa bon nouvel atraver . . .

Bann piblikasyon. Sa magazin, ki son tit an antye i: Latour Veyer pe anons Rwayonm Zeova, i aprezan ganny pibliye dan 185 langaz e plis ki 42 milyon kopi sak magazin ki sorti tou le mwan i ganny distribye. Awake! ki osi anons sa Rwayonm, i ganny pibliye dan 83 langaz e apepre 40 milyon kopi i ganny distribye tou le mwan.

Bann liv, brosir, trak, CD/MP3 ek DVD ki eksplik lansennyman Labib i disponib dan apepre 540 langaz. Temwen Zeova in fer e distribye plis ki 20 bilyon kopi dan sa dernyen di-z-an ki’n pase, ki i apepre trwa kopi par dimoun lo later antye.

Temwen Zeova in osi enprim oubyen fer laranzman pour ki plizyer tradiksyon Labib i ganny enprimen. New World Translation of the Holy Scriptures ki’n ganny tradwir, enprimen e distribye par Temwen Zeova i aprezan disponib an antye oubyen zis en parti dan 96 langaz. Plis ki 166 milyon kopi in ganny distribye. Temwen Zeova i osi partaz sa bon nouvel Rwayonm atraver bann . . .

Renyon Kretyen. Renyon ki ganny fer tou le semenn kot Lasal Rwayonm i pa zis bann servis relizye me i avek bi pour edik dimoun. Bann diskour ki ganny fer i baze lo Labib, e Latour Veyer ek lezot piblikasyon i ganny servi pour etidye Labib. Dan renyon,  bann Temwen i osi aprann pour vin bann bon proklanmater sa bon nouvel.

Bann Temwen i etidye sa menm lenformasyon dan plis ki 107,000 kongregasyon dan lemonn antye e sa i kontribye pour annan linite parmi zot. Tou dimoun i ganny envite pour vin asiste sa bann renyon. Zot pa zanmen pas laket. Byensir, tousala ti pou anven si bann Temwen pa ti pratik sa ki zot pres lo la. Alor, zot esey montre lenportans sa bon nouvel . . .

Par zot prop legzanp. Zot fer en kantite zefor pour vin en bon legzanp atraver zot kondwit e zot fer zot mye pour tret lezot parey zot ti a kontan lezot i tret zot. (Matye 7:12) Menm si zot enparfe e parfwa zot fer fot, zot senserman anvi azir avek lanmour anver tou dimoun, pa zis par partaz sa bon nouvel me osi par ed zot dan lezot fason, kan i posib.

Temwen Zeova pa pe esey konverti lemonn atraver sa travay pour anons sa bon nouvel. Me o kontrer, kan Zeova i satisfe avek sa travay ki pe ganny fer, lafen pou arive zis parey Zezi ti predir. Ki sa pou vedir pour later e bann dimoun ki lo la?

[Portre lo paz 7]

Sa bon nouvel pe ganny anonse partou dan lemonn par Temwen Zeova