Fanmir Kretyen, “reste vizilan”

“Annou reste vizilan e azen.”​—1 TESA. 5:6.

1, 2. Ki en fanmir i bezwen fer pour reisi reste vizilan spirityelman?

LER i ti pe refer avek “sa gran zour efreyan Zeova,” la sa ki zapot Pol ti ekrir bann Kretyen Tesalonik: “Mon bann frer, zot pa dan fernwanr, e sa zour pa pou sirprann zot parey en voler. Zot tou, zot bann zanfan lalimyer, bann zanfan lizour. Nou pa fer parti lannwit ni fernwanr.” Pol ti osi azoute: “Alor fodre pa ki nou dormi parey lezot, me annou reste vizilan e azen.”​—Yoel 2:31; 1 Tesa. 5:4-6.

² Konsey zapot Pol pour bann Tesalonisyen i vreman apropriye pour bann Kretyen ki pe viv dan “letan lafen.” (Dan. 12:4) Vi ki son move lemonn i pros pour ariv ver son lafen, Satan i determinen pour fer plis vre adorater posib aret servi Bondye. Alor i saz pour nou pran aker konsey Pol pour reste vizilan spirityelman. Pour en fanmir Kretyen reisi reste vizilan, i enportan ki sak manm fanmir i desarz zot responsabilite parey i’n ganny dekrir dan Labib. Alor ki rol bann msye, madanm ek zenn i zwe pour ed zot fanmir “reste vizilan”?

Bann msye, imit sa “bon berze”

3. Dapre 1 Timote 5:8, ki responsabilite en sef lakour i annan?

³ Labib i dir ki “en mari i sef son madanm.” (1 Kor. 11:3) Ki responsabilite en msye konman sef lakour i annan? Konsernan en laspe son rol konman sef, Labib i dir: “Si en dimoun i pa port swen son prop parante sirtou bann ki viv dan son lakaz, i’n abandonn lafwa e i pir ki en non-krwaryan.” (1 Tim. 5:8) I vre, en msye i devret pran swen avek son fanmir lo plan materyel. Me, pour li kapab ed son fanmir reste vizilan spirityelman, i pa zis devret travay pour okip zot. I bezwen batir son fanmir spirityelman e ed tou manm fanmir ranforsi zot relasyon avek Bondye. (Prov. 24:3, 4) Ki mannyer i kapab fer sa?

4. Kwa ki pou ed en msye reisi batir son fanmir spirityelman?

⁴ Vi ki “en mari i sef son madanm parey Kris i sef [kongregasyon],” en msye marye i devret egzamin e imit lafason ki Zezi ti diriz kongregasyon. (Efe. 5:23) Get lafason ki Zezi ti dekrir son relasyon avek son bann disip. (Lir Zan 10:14, 15.) Si en msye i anvi reisi batir son fanmir spirityelman, ki i devret fer? En keksoz enportan se: Etidye sa ki Zezi, sa “bon berze” ti fer e dir, e ‘swiv byen son legzanp.’​—1 Pyer 2:21.

5. Ki sa Bon Berze i konnen lo kongregasyon?

⁵ Dan en sans senbolik, sa relasyon ki en berze i annan avek son mouton i baze lo konnesans ek konfyans. Sa berze i konn tou lo son bann mouton e bann mouton i konn zot berze e annan konfyans dan li. Zot rekonnet son lavwa e obeir li. Zezi ti dir: “Mon konn mon bann mouton, e mon bann mouton zot konn mwan.” I pa konn kongregasyon anler anler. Sa mo Grek ki’n ganny tradwir “konn” dan sa verse, i donn sa lide ki nou konn sa dimoun vreman byen dan en fason personnel. Wi, sa Bon Berze i konn son bann mouton personnelman. I konn sa ki zot bezwen, zot febles ek pwen for. Napa  nanryen ki nou Bon Berze pa konnen lo son bann mouton e son mouton osi i konn li byen e zot annan konfyans dan son gidans.

6. Ki mannyer bann msye marye i kapab imit sa Bon Berze?

⁶ Pour imit Kris, en msye i devret aprann vwar son lekor konman en berze ki pe pran swen avek son bann mouton. I devret fer bokou zefor pour konn byen son fanmir. Eski sa i posib? Wi, si i annan en bon kominikasyon avek sak manm son fanmir, i ekout zot ler zot eksprim zot santiman, i organiz bann aktivite familyal e i serye kan i fer bann desizyon an rapor avek ladorasyon an fanmir, asiste renyon, predikasyon, detant ek divertisman. En msye Kretyen i bezwen pran an konsiderasyon Parol Bondye e osi bann ki tonm anba son responsabilite, ler i organiz bann aktivite familyal. Koumsa, bann manm son fanmir pou annan konfyans dan son gidans e i pou kontan pour vwar son fanmir reste ini dan vre ladorasyon.

7, 8. Ki mannyer en msye marye i kapab imit sa Bon Berze dan lafason i demontre lafeksyon anver sa bann ki i pran swen avek?

⁷ En bon berze i osi annan lafeksyon pour son mouton. Ler nou etidye lavi ek minister Zezi dan Levanzil, nou santi nou ganny touse par sa lafeksyon ki Zezi ti demontre anver son bann disip. I ti menm donn ‘son lavi pour son bann mouton.’ Bann mari Kretyen i devret imit Zezi par demontre lafeksyon anver sa bann ki zot pran swen avek. Olye brit e fer dominer avek son madanm, en msye ki anvi ganny laprouvasyon Bondye i merit kontinyen kontan son madanm “parey Kris in kontan [kongregasyon].” (Efe. 5:25) I devret koz dan en fason zantiy e avek konsiderasyon akoz son madanm i merit ganny onore.​—1 Pyer 3:7.

⁸ Pour donn son zanfan en bon formasyon, sef fanmir i merit seryezman swiv bann prensip Bondye. Selman, i pa devret ezite pour demontre lafeksyon anver son zanfan. Menm ler zanfan i ganny disiplinen, i devret fer li avek lanmour. Serten zenn i pran plis letan pour zot konpran sa ki nou ekspekte avek zot. Dan en ka parey, en papa pou demontre plis pasyans ankor. Ler bann zonm i toultan swiv legzanp Zezi, sa i fer ki tou dimoun dan fanmir pou santi zot byen e an sekirite spirityelman parey sa psonm i koz lo la.​—Lir Psonm 23:1-6. *

9. Parey i ti le ka pour Noe, ki responsabilite bann msye Kretyen i annan e kwa ki pou ed zot desarz sa responsabilite?

⁹ Noe ti viv dan letan lafen sa lemonn ki i ti pe viv ladan. Me Zeova ti protez “lavi [set] dimoun ansanm avek Noe,” ler “i ti anvoy deliz lo bann move zabitan.” (2 Pyer 2:5) Noe ti annan sa responsabilite pour ed son fanmir sirviv Deliz. Bann sef fanmir Kretyen i dan menm sityasyon dan sa bann dernyen zour. (Mat. 24:37) Pa i vreman enportan ki zot etidye legzanp sa “bon berze” e fer bokou zefor pour imit li!

Madanm, ‘batir ou lakour’

10. Lefet ki en madanm i soumet, ki sa pa vedir?

¹⁰ Zapot Pol ti ekrir: “Bann madanm, zot devre obei zot mari, parey zot obei Senyer.” (Efe. 5:22) Sa parol pa vedir ki bann madanm napa valer. Avan ki i ti kree Ev sa premye madanm, Bondye ti dir: “I pa bon pour zonm kontinyen reste li tousel. Mon pou fer en led pour li, enn ki pou al byen avek li.” (Zen. 2:18) En madanm ki en “led” pour son msye i  soutenir son msye anmezir i desarz son responsabilite familyal e sa i en rol vreman onorab.

11. Ki mannyer en madanm egzanpler i kapab “batir son lakour”?

¹¹ En madanm egzanpler i fer sa ki byen pour son fanmir. (Lir Proverb 14:1. *) Lekontrer avek en madanm bet ki napa respe pour sa laranzman konsernan lotorite, en madanm saz i annan en gran respe pour sa laranzman. Olye demontre en latitid dezobeisan e endepandan ki komen dan sa lemonn, i soumet avek son msye. (Efe. 2:2) En madanm ki bet pa ezite pour mal koz lo son msye, tandis ki en madanm ki saz pou fer tou pour ki son zanfan ek lezot i annan respe pour son msye. En madanm saz pa pou mank respe pour lotorite son msye par toultan fatig li oubyen dispit avek li. I annan osi lafason ki nou servi larzan. En madanm bet i pare pour depans tou larzan ki son fanmir in travay dir pour gannyen. En madanm ki siport son fanmir pa pou fer sa. I pou korpere avek son msye kot larzan i konsernen. I reflesir avan fer en desizyon, i pa depans larzan an bonnavini. I pa pou fors son msye pour fer overtaym.

12. Ki en madanm i kapab fer pour ed son fanmir “reste vizilan”?

¹² En madanm egzanpler i ed son fanmir pour “reste vizilan“ kan i korpere avek son msye pour donn en formasyon spirityel zot zanfan. (Prov. 1:8) I siport sa laranzman Ladorasyon an fanmir. An plis ki sa i siport son msye kan i pe konsey e disiplin zot zanfan. Pa i vreman diferan avek en madanm ki pa korpere avek son msye e ki son bann zanfan i soufer fizikman e spirityelman!

13. Akoz i enportan pour en madanm siport son msye dan son bann responsabilite dan kongregasyon?

¹³ Ki mannyer en madanm ki siport son msye i santi ler i vwar li pe desarz byen son rol dan kongregasyon? I zwaye, pa i vre! I vreman kontan privilez ki son msye i annan, ki swa i en asistan ministeryel, en ansyen, oubyen petet manm Komite Lyezon Lopital ouswa Komite Konstriksyon Rezyonal. I pou bezwen fer serten sakrifis ler i fer son mye pour siport son msye an parol ek aksyon. Me selman i realize ki ler son msye i byen okipe dan bann keksoz spirityel, sa i ed lafanmir pour reste vizilan spirityelman.

14. (a) Kwa ki kapab en defi pour en madanm ki anvi siport son msye e ki mannyer i kapab sirmont sa defi? (b) Ki mannyer en madanm i kapab ede pour ki son fanmir antye i benefisye?

¹⁴ En madanm egzanpler i kapab vwar li difisil pour siport en desizyon ki son msye in fer si i pa dakor avek. Kantmenm sa, i  demontre en “lespri bon e trankil” e i korpere avek li pour ki son desizyon i mars byen. (1 Pyer 3:4) En bon madanm i esey swiv legzanp bann madanm fidel dan letan lontan parey Sara, Rit, Abigail ek Mari, manman Zezi. (1 Pyer 3:5, 6) I osi imit legzanp bann madanm aze dan nou letan ki “konport zot konman dimoun ki pe viv en lavi sen.” (Tit 2:3, 4) En madanm egzanpler ki kontan e respekte son msye i ede pour ki son maryaz i reisi e ki lafanmir antye i benefisye. Dan son lakour, tou dimoun i santi zot rekonforte e an sekirite. Pour en zonm spirityel, en madanm koumsa i vreman presye.​—Prov. 18:22.

Zenn, reste konsantre lo ‘sa ki ou pa vwar’

15. Ki mannyer bann zenn i kapab korpere avek zot paran pour ki zot fanmir i “reste vizilan”?

¹⁵ Zenn, ki ou kapab fer pour korpere avek ou paran pour ki lafanmir i “reste vizilan” spirityelman? Mazin rekonpans ki Zeova in met devan ou. Petet, ler ou ti ptipti ou paran ti montre ou bann portre lo lavi dan Paradi. Anmezir ou ti grandi, tre probab, zot in servi Labib ek bann piblikasyon Kretyen pour montre ou ki mannyer lavi pou ete dan nouvo lemonn. Reste konsantre lo ou servis pour Zeova e fer en bon plan dan ou lavi pou ed ou “reste vizilan.”

16, 17. Ki bann zenn i kapab fer pour reisi ranport laviktwar dan sa lakours pour lavi?

¹⁶ Pran aker sa ki zapot Pol ti dir dan 1 Korentyen 9:24. (Lir.) Tay sa lakours avek lide pour ganny sa pri. Fer bann swa dan lavi ki pou ed ou ganny rekonpans lavi eternel. Pour bokou, tay deryer keksoz materyel in anpes zot reste konsantre lo sa pri. Pa sa i vreman bet! Si ou pe mazin viv ou lavi zis pour akimil larises, ou pa pou ganny vre boner. Sa ki larzan i aste i tanporer. Ou selman, reste konsantre lo ‘sa ki ou pa vwar.’ Akoz? Parski bann keksoz ki “nou pa war i pour touzour.”​—2 Kor. 4:18.

¹⁷ Bann keksoz ki “nou pa war” i enkli bann benediksyon ki relye avek Rwayonm. Alor, fer en plan dan ou lavi ki pou ed ou ganny sa bann benediksyon. Ou lavi pou vreman gou si ou servi li pour Zeova. Dan servis Bondye, ou pou annan loportinite pour etablir bann lobzektif ki ou kapab atenn la konmela oubyen pli tar. * Bann lobzektif spirityel ki adapte avek ou pou ed ou reste konsantre lo servis Bondye e gard antet rekonpans lavi eternel.​—1 Zan 2:17.

18, 19. Ki mannyer en zenn i kapab montre ki i’n pran laverite o serye?

¹⁸ Zenn, premye keksoz pour ou sot dan sa lakours pour lavi, se ler ou pran laverite o serye. Eski sanmenm ki ou pe fer? Demann ou lekor: ‘Eski mon en dimoun spirityel? Eski mon fer bann aktivite spirityel zis akoz mon paran? Eski mon pe devlop bann kalite ki fer plezir Bondye? Eski mon fer zefor pour gard en bon progranm regilye dan mon ladorasyon pour Zeova parey annan labitid priye, etidye, asiste renyon e partisip dan predikasyon? Eski mon pe vin deplizanpli pros avek Bondye par ranforsi mon relasyon personnel avek li?’​—Zak 4:8.

 ¹⁹ Pran letan pour reflesir lo legzanp Moiz. Menm si i ti bezwen adapte avek en lot kiltir, i ti fer sa swa pour ganny rekonnet konman en adorater Zeova olye konman garson fiy Faraon. (Lir Ebre 11:24-27.) Zenn, ou osi ou devret determinen pour servi Zeova fidelman. Si ou fer sa, ou pou vreman ere, ou lavi pou gou la konmela e ou “ava ganny vre lavi.”​—1 Tim. 6:19.

20. Dan sa lakours pour lavi, lekel ki ranport sa pri?

²⁰ Dan bann paryaz taye lontan, zis en dimoun ki ti ganny lakours. Sa i pa le ka dan sa lakours pour lavi. I lavolonte Bondye ki “tou dimoun i ganny sove e ganny konnesans laverite.” (1 Tim. 2:3, 4) Plizyer dimoun avan ou in reisi ranport laviktwar dan sa lakours e bokou pe tay ansanm avek ou la konmela. (Ebr. 12:1, 2) Tou bann ki pa aret taye pou ranport sa pri. Pour sa rezon, ou devret determinen pour ranport laviktwar.

21. Ki nou pou egzaminen dan sa lot lartik?

²¹ Personn pa pou kapab anpes “gran zour efreyan Zeova” arive. (Mal. 4:5) Sa zour pa devret sirprann bann fanmir Kretyen. I vreman enportan ki tou dimoun dan fanmir i desarz son responsabilite devan Bondye. Eski i annan lezot keksoz nou kapab fer pour reste vizilan e ranforsi nou relasyon avek Bondye? Dan lot lartik, nou pou egzamin trwa fakter ki annan en lefe lo byennet spirityel lafanmir antye.

[Not anba lo paz]

Ki ou’n aprann?

• Akoz i enportan pour bann fanmir Kretyen “reste vizilan”?

• Ki mannyer en msye i kapab imit sa Bon Berze?

• Ki mannyer en madanm egzanpler i kapab siport son msye?

• Ki mannyer bann zenn i kapab ede pour ki zot fanmir i reste vizilan spirityelman?

[Kestyon]

[Portre lo paz 12]

Pour en msye spirityel, en madanm ki siport li i vreman presye