Konfyans total dan Zeova i fer nou santi nou an sekirite
Konfyans total dan Zeova i fer nou santi nou an sekirite
“Zeova li menm pou tande kan mon apel li.”—PS. 4:3.
1, 2. (a) Ki sityasyon difisil David ti bezwen fer fas avek? (b) Ki psonm nou pou egzaminen?
DAVID in lerwa Izrael pour serten letan, me aprezan i fer fas avek en sityasyon difisil. Absalonm in pran son plas konman lerwa e David i oblize kit Zerizalenm pardfors. Son konseye ek zanmi in trai li, e aprezan i pe mars nipye an pleran lo Montanny Zoliv avek serten dimoun fidel. Pli tar, Simei, ki sorti dan en fanmir kot lakaz Lerwa Sail i anvoy ros ek lapousyer lo David e maltret li.—2 Sam. 15:30, 31; 16:5-14.
2 Eski David pou eksperyans laont ek latristes e finalman mor? Non, akoz i annan konfyans dan Zeova. Sa i evidan dan trwazyenm Psonm ki David ti konpoze ler i ti pe sove. I ti osi ekrir katriyenm Psonm. Dan tou le de psonm, David ti eksprim son konviksyon ki Bondye i ekoute e reponn lapriyer. (Ps. 3:4; 4:3) Sa de psonm i asir nou ki Zeova i avek son bann serviter fidel lizour konman aswar, par donn zot son sipor ek lape e fer zot santi zot an sekirite. (Ps. 3:5; 4:8) Annou vwar ki mannyer sa bann psonm pou ed nou santi nou an sekirite e annan konfyans dan Bondye.
Kan ‘bokou i lev kont mwan’
3. Parey Psonm 3:1, 2 i montre, ki sityasyon David ti ladan?
3 En mesaze ti dir: “Leker bann zonm Izrael in al pour Absalonm.” (2 Sam. 15:13) David ti demann son lekor ki mannyer Absalonm in reisi ganny sipor sa kantite dimoun, alor i ti dir Zeova: “O Zeova, akoz mon lennmi in vin bokou? Akoz bokou zot pe lev kont mwan? Bokou pe dir sa lo mwan: ‘Bondye pa pou sov li.’” (Ps. 3:1, 2) Plizyer Izraelit pa ti krwar si Zeova ti pou delivre David dan lanmen Absalonm ek son bann siporter.
4, 5. (a) Ki lasirans David ti annan? (b) Ki sa lekspresyon “sa Enn ki lev mon latet” i vedir?
4 Me David pa ti enkyet akoz i ti annan en konfyans total dan Bondye. I ti sante: “Pourtan ou, O Zeova, ou en boukliye otour mwan, ou mon laglwar e sa Enn ki lev mon latet.” (Ps. 3:3) David ti asire ki Zeova ti pou protez li zis parey en boukliye i protez en solda. I vre ki sa lerwa aze ti bezwen sove, i ti kouver e bes son latet akoz i ti’n ganny imilye. Me Bondye Tre O ti pou sanz sityasyon David e redonn li son laglwar. Zeova ti pou fer David debout byen drwat e lev son latet ankor parey avan. David ti kriy Zeova avek konfyans akoz i ti konnen ki Bondye ti pou reponn li. Eski ou annan menm konfyans dan Zeova?
5 Ler David ti servi sa lekspresyon “sa Enn ki lev mon latet,” i ti oule dir ki Zeova ti vreman sa led ki i bezwen. Today’s English Version i dir: “Me, ou O SENYER, ou’n touzour mon boukliye kont danze; ou’n donn mwan laviktwar e redonn mwan kouraz.” En diksyonner i dir: “Ler Bondye i lev . . . ‘latet’ en dimoun, I fer li reganny lespwar e santi li an sekirite.” Apre ki i ti’n bezwen sorti lo tronn pardfors, i ti normal pour David santi li dekouraze. Selman, ler Bondye ti ‘lev son latet,’ sa ti fer li reganny kouraz ek konfyans e santi li an sekirite.
‘Zeova pou reponn!’
6. Akoz David ti dir ki Zeova ti’n reponn son lapriyer sorti kot son montanny sen?
6 Akoz son konfyans dan Zeova, David ti konnen ki I pou ekout son lapriyer ler i ti dir: “Mon pou kriy Zeova avek mon lavwa e i pou reponn mwan sorti kot son montanny sen.” (Ps. 3:4) Lars lalyans ki ti reprezant prezans Zeova ti ganny anmennen kot Montanny Siyon parey David ti’n demande. (Lir 2 Samyel 15:23-25. *) Sanmenm sa rezon ki David ti dir ki son lapriyer in ganny reponn sorti kot montanny sen Zeova.
7. Akoz David pa ti per?
7 Avek lasirans ki son lapriyer pa ti anven, David pa ti per. I ti sante: “Tandis ki mwan, mon anvi alonze pour mwan kapab dormi; wi, mon pou sirman leve, akoz Zeova pe kontinyen soutenir mwan.” (Ps. 3:5) Menm pandan lannwit, la kot i annan plis danze pour ganny atake san ekspekte, David pa ti per pour li al dormi. I ti konnen i pou leve akoz i ti asire ki i kapab met konfyans total dan Zeova ki’n toultan siport li dan lepase. Alor, nou osi nou kapab fer parey si nou swiv “bann semen Zeova” e pa zanmen reste lwen avek li.—Lir 2 Samyel 22:21, 22. *
8. Ki mannyer Psonm 27:1-4 i montre ki David ti annan konfyans dan Bondye?
8 David ti santi li an sekirite e i ti annan en konfyans total dan Zeova. Sa i evidan dan en lot psonm ki i ti konpoze an dizan: “Zeova i mon lalimyer e sa enn ki sov mwan. Lekel mon pou per? Zeova i mon proteksyon tou dilon mon lavi. Lekel ki pou efrey mwan? . . . Menm si zot pik zot latant pour atak mwan, mon pa pou per. . . . Mon’n demann Zeova en keksoz, sanmenm ki mon pou rode, se pour mwan kapab reste dan lakaz Zeova tou mon lavi, pour vwar labote Zeova e pour get son tanp avek ladmirasyon.” (Ps. 27:1-4) Si ou annan sa menm santiman, ou pou zwenn ansanm avek ou bann frer ek ser pour ador Zeova dapre ou sirkonstans.—Ebr. 10:23-25.
9, 10. Malgre parol ki annan dan Psonm 3:6, 7, akoz nou kapab dir ki David pa ti anvi revanze?
9 Menm si David ti bezwen fer fas avek traizon Absalonm ek enfidelite bokou lezot, i ti sante: “Mon pa pou per plizyer dizenn milye dimoun ki toultour, zot in ralye kont mwan. Leve, O Zeova! Sov mwan, O mon Bondye! Akoz ou devret tap mon bann lennmi dan zot lanmaswar. Ou devret kas ledan bann move dimoun.”—Ps. 3:6, 7.
10 David pa ti anvi revanze. Si son bann lennmi ti ganny ‘tape dan lanmaswar,’ savedir Bondye ki ti pou’n fer li. Lerwa David ti annan en kopi personnel Lalwa Bondye e i ti konnen ki Zeova ti’n dir: “Se mwan ki pou revanze e ki pou fer peye.” (Det. 17:14, 15, 18; 32:35) Bondye ki konnen si i pou “kas ledan bann move dimoun.” Kas ledan bann move dimoun i vedir ki zot nepli kapab fer ditor zot kanmarad. Zeova i konnen lekel sa bann move dimoun akoz i “vwar sa ki dan leker.” (1 Sam. 16:7) Pa nou vreman rekonesan ki Zeova i donn nou lafwa ek lafors pour reziste Satan, sa enn mesan ki byento pou ganny zete dan labim parey en lyon ki kriye me ki napa ledan, e ki zis bon pour ganny detrir!—1 Pyer 5:8, 9; Rev. 20:1, 2, 7-10.
“Se Zeova ki sov nou”
11. Akoz nou devret priy pour nou bann frer ek ser dan kongregasyon?
11 David ti realize ki zis Zeova ki kapab sov li ler i vreman bezwen son led. Me i pa ti zis mazin son prop lekor. Ki Zeova ti pou fer pour son pep an zeneral? David ti annan rezon fini sa psonm an dizan: “Se Zeova ki sov nou. Ou benediksyon i lo ou pep.” (Ps. 3:8) I vre ki David ti pas dan bann gro problenm, me i ti mazin pep Zeova an zeneral e i ti annan konfyans ki Bondye ti pou beni zot. Eski pa nou osi nou devret mazin nou bann frer ek ser dan kongregasyon? I byen si nou mazin zot dan nou lapriyer e nou demann Zeova pour donn zot son lespri sen pour ki zot kapab annan plis kouraz e anons sa bon nouvel avek konfyans.—Efe. 6:17-20.
12, 13. Ki ti arive avek Absalonm e ki mannyer David ti reazir?
12 Absalonm ti mal fini, e sa i en lavertisman pour bann ki fer ditor lezot, sirtou bann ki Bondye in swazir parey David. (Lir Proverb 3:31-35. *) Dan en batay, larme Absalonm ti sibir defet. Absalonm li i ti lo en bourik kan son gran seve ti pri dan fourka en brans en pe anba dan en gran pye dibwa. I ti ankor vivan, anpandan dan pye, kan Yoab ti pik li avek trwa baton pwent dan son leker.—2 Sam. 18:6-17.
13 Eski David ti kontan ler i ti tann sa ki ti’n arive avek son garson? Non. I ti ale vini an pleran e i ti kriye: “Mon garson Absalonm, mon garson, mon garson Absalonm, Ar, plito mwan ki ti’n mor dan ou plas, Absalonm mon garson, mon garson!” (2 Sam. 18:24-33) Zis parol Yoab ki ti kapab fer David sorti dan son gran latristes. Pa i fer lapenn pour vwar ki mannyer Absalonm ti fini akoz son lanbisyon egois ki ti fer li lager avek son papa ki pourtan ti’n ganny swazir par Zeova e anmenn maler lo li menm!—2 Sam. 19:1-8; Prov. 12:21; 24:21, 22.
Ankor enn fwa David ti demontre konfyans dan Zeova
14. Dan ki sirkonstans Psonm 4 ti ganny konpoze?
14 Parey sa trwazyenm Psonm, sa enn katriyenm i en lapriyer senser ki montre ki David ti annan en konfyans total dan Zeova. (Ps. 3:4; 4:3) Petet David ti konpoz sa psonm pour eksprim son soulazman ek lapresyasyon pour Bondye vi ki Absalonm pa ti reisi dan son konplo. Ouswa petet i ti konpoz sa kantik pour bann Levit sante. An tou ka, ler nou medit lo sa psonm, sa pou ranforsi nou konfyans dan Zeova.
15. Akoz nou kapab priy Zeova avek konfyans atraver Zezi?
15 Ankor enn fwa David ti demontre en konfyans total dan Bondye e i ti asire ki Bondye ti ekout e reponn son lapriyer. I ti sante: “Kan mon kriy ou, reponn mwan, O mon Bondye ki drwat! Dan mon ladetres, donn mwan plis lespas. Donn mwan ou faver e ekout mon lapriyer.” (Ps. 4:1) Nou osi nou kapab annan sa menm lasirans si nou anmenn en lavi drwat. Vi ki nou konnen ki Zeova, sa “Bondye ki drwat” pou beni son pep, nou kapab priy li atraver Zezi, avek konfyans ek lafwa dan sakrifis Garson Bondye. (Zan 3:16, 36) Pa sa i fer nou santi nou anpe!
16. Akoz David ti’n kapab dekouraze parler?
16 Parler, nou kapab enkyet akoz nou fer fas avek bann sityasyon dekourazan. Kekfwa David osi ti santi koumsa parler, akoz i ti sante: “Zot, garson zonm, zot pe kontinyen kontan bann keksoz vid, zot pe kontinyen rod en mansonz, ziska ki tan zot pou ensilte mwan akoz mon laglwar?” (Ps. 4:2) Sa lekspresyon “garson zonm” i aparaman pe refer avek limanite ki elwannyen avek Bondye. Bann lennmi David ti “kontan bann keksoz vid.” New International Version i tradwir sa verse koumsa: “Ziska ki tan zot pou kontan mansonz e rod bann fo bondye?” Menm si nou kapab dekouraze akoz sa ki lezot i fer, annou touzour kontinyen priy senserman e demontre en konfyans total dan sa sel vre Bondye.
17. Eksplike ki mannyer nou kapab azir an armoni avek Psonm 4:3.
17 Konfyans David dan Bondye i klerman evidan dan sa parol: “Mazinen ki Zeova pou sirman rekonnet sa enn ki fidel avek li; Zeova li menm pou tande kan mon apel li.” (Ps. 4:3) Fodre nou annan kouraz ek konfyans total dan Zeova pour kapab reste fidel anver li. Par egzanp, bann fanmir Kretyen i bezwen demontre sa bann kalite kan en manm zot fanmir ki pa repantir i ganny ekskli dan kongregasyon. Bondye i beni sa bann ki fidel anver li ek son bann lalwa. An retour, fidelite ek konfyans total dan Zeova i kontribye pour ki i annan lazwa parmi son pep.—Ps. 84:11, 12.
18. An armoni avek Psonm 4:4, ki nou devret fer si nou ganny ensilte oubyen en dimoun i mal azir anver nou?
18 Me si en dimoun i dir oubyen fer en keksoz ki ofans nou? Nou kapab gard nou lazwa si nou fer sa ki David ti dir: “Zot kapab nerve, me pa fer pese. Koz dan ou leker, lo ou lili, me pa koz lo la avek lezot.” (Ps. 4:4) Si nou ganny ensilte oubyen en dimoun in mal azir anver nou, annou pa fer pese par revanze. (Rom. 12:17-19) Nou kapab koz dan nou leker lo nou lili. Si nou priy lo sa size, nou pou kapab annan en pwennvi diferan e lanmour pou motiv nou pour pardonnen. (1 Pyer 4:8) Konsey zapot Pol an rapor avek sa size, i aparaman baze lo Psonm 4:4: “Si zot pran lakoler fer atansyon pour zot pa tonm dan pese, e fer atansyon pa les zot lakoler dire ziska aswar. Pa les dyab pran lavantaz lo zot.”—Efe. 4:26, 27.
19. Ki mannyer Psonm 4:5 i kapab ed nou an rapor avek nou sakrifis spirityel?
19 David ti met lanfaz lo lenportans met konfyans dan Zeova, ler i ti sante: “Sakrifye bann sakrifis ladrwatir e met zot konfyans dan Zeova.” (Ps. 4:5) Si bann Izraelit ti napa bon motivasyon, sakrifis ki zot ti ofer ti napa valer. (Iza. 1:11-17) Si nou oule ki nou bann sakrifis spirityel i akseptab pour Bondye, nou osi nou devret annan en bon motivasyon ek en konfyans total dan li.—Lir Proverb 3:5, 6 *; Ebre 13:15, 16.
20. Ki byenfe nou gannyen kan nou annan konfyans dan Zeova?
20 David ti azoute: “Bokou i dir: ‘Lekel ki pou fer nou vwar sa ki byen?’ Donn nou ou faver, O Zeova!’” (Ps. 4:6) Sa lekspresyon “donn nou ou faver” i kapab ganny tradwir literalman konman “anvoy lalimyer ou figir lo nou” dapre langaz Ebre. ‘Lalimyer figir’ Zeova i reprezant son faver. (Ps. 89:15) Lefet ki nou annan konfyans dan Zeova, nou annan son faver ek gran lazwa anmezir nou kontinyen fer son lavolonte avek konfyans.
21. Ki nou kapab asire ler nou partisip plennman dan travay rekolt spirityel?
21 David ti vreman enpasyan pour eksperyans lazwa ki Zeova i donnen ki pli gran ki lazwa ki dimoun ti annan dan letan rekolt. I ti sante: “Sirman ou pou met lazwa dan mon leker, en lazwa pli gran ki sa letan kot lagrenn ek diven i annabondans.” (Ps. 4:7) Nou kapab asire ki nou pou ganny bokou lazwa si nou partisip plennman dan sa travay rekolt spirityel. (Lik 10:2) Avek sa gran nasyon bann Kretyen swazir ki pe organiz sa travay, nou kontan pour vwar lakantite ‘travayer rekolt’ pe kontinyelman ogmante. (Iza. 9:3) Eski ou osi ou partisip avek tou ou leker dan sa travay rekolt?
Kontinyen met konfyans total dan Bondye
22. Dapre Psonm 4:8, ki ti arive avek bann Izraelit ler zot ti gard Lalwa Bondye?
22 David ti fini sa psonm avek sa parol: “Mon pou alonze e osi dormi anpe, parski zis ou tousel, O Zeova, ki fer mwan viv an sekirite.” (Ps. 4:8) Kan bann Izraelit ti gard Lalwa Zeova, zot ti santi zot anpe e an sekirite. Par egzanp, ‘Zida ek Izrael ti reste an sekirite’ pandan renny Salomon. (1 Rwa. 4:25) Bann ki ti met zot konfyans dan Bondye ti santi zot anpe menm ler lezot nasyon ti anvi lager avek zot. Parey David, nou dormi byen parski Zeova i fer nou santi nou an sekirite.
23. Ki santiman nou pou annan si nou met nou konfyans total dan Zeova?
23 Annou kontinyen progrese avek konfyans dan nou servis pour Zeova. Annou osi priye avek lafwa pour nou resevwar “lape Bondye ki depas tou konpreansyon imen.” (Fili. 4:6, 7) Pa nou vreman ere ler nou mazin tou sa la! Vreman nou pou kapab santi nou an sekirite si nou kontinyen annan konfyans total dan Zeova.
[Not anba lo paz]
^ par. 6 2 Samyel 15:23-25: “E tou bann dimoun dan pei ti pe plere byen for, e lepep antye ti pe traverse e lerwa ti debout o bor vale toransyel Kidronn, e lepep antye ti traverse pour al lo sa gran semen ki al dan dezer. 24 E la ti osi annan Tsadok ansanm avek tou bann Levit ki ti pe anmenn lars lalyans sa vre Bondye; e zot ti depoz lars sa vre Bondye o bor Abyatar ziska ki tou lepep ki ti sorti dan lavil ti’n fini traverse. 25 Me lerwa ti dir Tsadok: ‘Retourn avek lars sa vre Bondye dan lavil. Si mon trouv faver dan lizye Zeova, alor i pou osi fer mwan retournen pour vwar lars e sa landrwa kot i ete.’”
^ par. 7 2 Samyel 22:21, 22: “Zeova i rekonpans mwan dapre mon ladrwatir. I rann mwan dapre bann bon aksyon ki mon lanmen in fer. 22 Akoz mon’n swiv semen Zeova, e mon pa’n kit mon Bondye pour fer sa ki mal.”
^ par. 12 Proverb 3:31-35: “Pa anvi vin parey en dimoun vyolan, ni menm anvi fer nanryen parey li. 32 Parski Zeova i deteste en dimoun rize, me i pros avek bann ki drwat. 33 Zeova i modi lakaz sa enn move, me i beni landrwa reste sa bann ki drwat. 34 Me si i annan pour fer avek bann moker, i pou monk zot; me i pou montre son faver anver sa bann ki annan limilite. 35 Bann ki saz pou ganny onore, me bann ki bet pou ganny dezonore.”
^ par. 19 Proverb 3:5, 6: “Met ou konfyans dan Zeova avek tou ou leker e pa apiy lo ou prop konprenezon. 6 Dan tou ou semen pran li an konsiderasyon, e li i pou fer drwat ou bann santye.”
Ki ou pou reponn?
• Ki problenm David ti fer fas avek akoz Absalonm?
• Ki mannyer Psonm 3 i kapab ed nou santi nou an sekirite?
• Ki mannyer Psonm 4 i kapab ranforsi nou konfyans dan Zeova?
• Ki byenfe nou kapab gannyen ler nou annan en konfyans total dan Bondye?
[Kestyon]
[Portre lo paz 32]
Eski ou annan en konfyans total dan Zeova?