‘Lasazes Bondye i vreman profon’!

“Larises Bondye i vreman gran, son konnesans ek son lasazes i vreman profon. Lekel ki kapab eksplik son bann desizyon? Lekel ki kapab konpran son bann plan?”​—ROM. 11:33.

1. Ki pli gran privilez en Kretyen batize i kapab gannyen?

KI PLI gran privilez ou’n deza gannyen? Premye kou petet ou pou mazin en kek responsabilite ouswa loner ki ou’n gannyen. Me pour bann Kretyen batize, sa pli gran privilez ki nou kapab gannyen se sa relasyon pros ki nou annan avek Zeova, sa vre Bondye. Sa i fer ki Bondye in ‘konn nou.’​—1 Kor. 8:3; Gal. 4:9.

2. Akoz i en gran privilez pour Zeova konn nou e pour nou konn li?

² Akoz i en gran privilez ki Zeova i konn nou e nou nou konn li? Parski, i pa zis sa pli  gran Personnaz dan liniver, me i osi sa Enn ki protez sa bann ki i kontan. Profet Naoum ti ganny enspire pour ekrir: “Zeova i bon, en landrwa proteksyon dan zour ladetres. E i konn bann ki pe rod refiz dan li.” (Nao. 1:7; Ps. 1:6) Anfet, nou lespwar pour ganny lavi eternel i depan antyerman lo nou konnesans lo Bondye ek Zezi Kri son Garson.​—Zan 17:3.

3. Ki savedir konn Bondye?

³ Konn Bondye i pa zis vedir konn son non. Nou devret konn li konman en Zanmi, konpran sa ki i kontan e sa ki i pa kontan. Si nou viv an armoni avek sa konnesans, sa i en bon fason pour montre ki nou konn Bondye byen. (1 Zan 2:4) Me en lot keksoz i neseser si nou vreman anvi konn Zeova. Nou pa devret konn zis sa ki i’n fer, me osi ki mannyer e akoz i ti azir koumsa. Pli nou konpran plan Zeova, pli nou pou santi nou emerveye ki lasazes ‘Bondye i vreman profon.’​—Rom. 11:33.

En Bondye ki annan en plan

4, 5. (a) Dan Labib, ki sa mo “plan” i vedir? (b) Donn legzanp pour montre ki mannyer nou kapab akonplir en plan dan diferan fason.

⁴ Zeova i en Bondye ki annan en plan e Labib i koz lo son “plan eternel.” (Efe. 3:10, 11) Ki sa mo i vedir? Letan sa mo “plan” i ganny servi dan Labib, i pe refer avek en bi spesifik, en lobzektif ki nou kapab atenn dan diferan fason.

⁵ Annou pran en legzanp: En dimoun i anvi vwayaze pour al en serten landrwa. Sa landrwa i son lobzektif oubyen son plan. Kekfwa i annan diferan swa lo kalite transpor i pou servi ouswa semen ki i pou pran. Ler i lo sa larout ki i’n swazir, i kapab rankontre serten difikilte parey movetan, bokou trafik e semen fermen, alor i pou bezwen pran en lot larout. Me, nenport ki sanzman i bezwen fer dan semen, i pou’n akonplir son lobzektif oubyen plan ler i’n ariv lo son destinasyon.

6. Ki mannyer Zeova in montre ki i kapab adapte pour akonplir son plan?

⁶ Pareyman, Zeova in montre ki i kapab adapte en kantite dan lafason i realiz son plan eternel. Vi ki i pran an konsiderasyon ki bann imen ek lanz i lib, i pare pour aziste lafason ki i akonplir son plan. Par egzanp, get lafason ki Zeova ti akonplir son plan konsernan sa Desandans ki ti’n ganny promet dan Labib. O konmansman, Zeova ti’n dir avek sa premye koup imen: “Fer zanfan e vin bokou, ranpli later e domin li.” (Zen. 1:28) Eski sa rebelyon dan zarden Edenn ti kas plan Zeova? Ditou! Deswit apre ki sa nouvo sityasyon ti leve, Zeova ti reazir. I ti konmsi i ti servi en lot “larout” pour akonplir son plan. I ti predir ki en “desandans” ti pou vini pour repar tou sa domaz ki bann rebel ti’n fer.​—Zen. 3:15; Ebr. 2:14-17; 1 Zan 3:8.

7. Ki nou aprann par lafason ki Zeova ti dekrir son lekor dan Egzod 3:14?

⁷ Anmezir son plan pe ganny realize, Zeova i annan sa abilite pour li adapte avek bann nouvo sityasyon. Sa i al tre byen avek lafason i dekrir son lekor dan Labib. Ler Moiz ti donn bann diferan rezon akoz i ti vwar li difisil pour desarz son responsabilite, Zeova ti reasir li an dizan: “‘Mon pou vin sa ki mon oule vini.’ I ti azoute: ‘La sa ki ou pou dir bann garson Izrael, “Sa ki mon oule vini in anvoy mwan kot zot.”’” (Egz. 3:14) Wi, Zeova i kapab vin sa ki i anvi vini pour li akonplir son plan konpletman. Dan let ki zapot Pol ti ekrir bann Romen dan sapit 11 i annan en zoli legzanp sa abilite ki Bondye i annan. Dan sa sapit, i koz lo en pye zoliv senbolik. Sa legzanp pou ed nou pli byen apresye ki kantite Zeova i saz, ki swa nou annan lespwar pour viv dan lesyel ouswa lo later.

 Plan Zeova konsernan sa Desandans

8, 9. (a) Ki sa kat pwen ki pou ed nou konpran legzanp pye zoliv? (b) Larepons ki kestyon ki montre ki Zeova i adapte pour realiz son plan?

⁸ Avan ki nou kapab konpran sa legzanp lo pye zoliv, nou bezwen konn kat keksoz konsernan lafason ki Zeova pou realiz son plan an rapor avek sa desandans. Premyerman, Zeova ti promet Abraam ki “tou nasyon lo later [ti] pou sirman ganny beni” atraver son desandans. (Zen. 22:17, 18) Dezyenmman, nasyon Izrael ki ti desandans Abraam ti ganny ofer sa posibilite pour vin “en rwayonm pret.” (Egz. 19:5, 6) Trwazyenmman, kan lamazorite Zwif pa ti aksepte Mesi, Zeova ti fer lezot laranzman pour ki kantmenm sa sa “rwayonm pret” i vin an egzistans. (Mat. 21:43; Rom. 9:27-29) Finalman, menm si Zezi ti parti prensipal desandans Abraam, lezot osi ti ganny sa privilez pour form parti sa desandans.​—Gal. 3:16, 29.

⁹ Deplis, apard ki sa kat pwen, nou osi aprann dan liv Revelasyon ki 144,000 dimoun an tou pou diriz ansanm avek Zezi dan lesyel konman lerwa ek pret. (Rev. 14:1-4) Sa group i osi ganny apele “pep Izrael.” (Rev. 7:4-8) Me, eski sa i vedir ki tou sa 144,000 i bezwen bann Zwif oubyen bann Izraelit? Larepons sa kestyon i montre ki Zeova i kapab adapte pour li realiz son plan. Aprezan annou gete ki mannyer let zapot Pol pour bann Romen i ed nou ganny larepons.

“En rwayonm pret”

10. Ki lespwar ki zis nasyon Izrael ti annan?

¹⁰ Parey nou ti dir pli boner, zis bann dimoun dan pep Izrael ki ti annan lespwar pour form “en rwayonm pret ek en nasyon sen.” (Lir Romen 9:4, 5.) Me, ler sa Desandans ti vini, ki ti pou arive? Eski i ti pou annan 144,000 Zwif sorti dan pep Izrael ki ti pou annan lespwar pour al dan lesyel, form Izrael spirityel e vin dezyenm parti desandans Abraam?

11, 12. (a) Kan ki bann premye dimoun ki ti pou form sa Rwayonm dan lesyel ti konmans ganny swazir e ki mannyer laplipar Zwif ti reazir anver sa lenvitasyon? (b) Ki mannyer Zeova in nobou ganny sa “sif konplet” bann ki ti pou vin desandans Abraam?

¹¹ Lir Romen 11:7-10. Konman en nasyon, bann Zwif dan premye syek ti rezet Zezi. Finalman, zot ti perdi sa privilez pour zot tousel form parti desandans Abraam. Toudmenm, ler bann ki ti pou form sa “rwayonm pret” dan lesyel ti konmans ganny swazir Lapannkot lannen 33 N.L., i ti annan bann Zwif fidel ki ti aksepte sa lenvitasyon. Sa detrwa mil Zwif ti zis en “pti group dimoun” konpare avek nasyon Izrael an antye.​—Rom. 11:5.

¹² Me, alor, ki mannyer Zeova ti pou kapab ganny sa “sif konplet” bann ki ti pou vin desandans Abraam? (Rom. 11:12, NW, 25) La larepons ki zapot Pol i donnen: “Mon pa pe dir ki promes Bondye pa’n reisi. Pa tou desandan pep Izrael ki vre pep Izrael. Parski pa tou desandan Abraam ki son zanfan, [oubyen ki form parti desandans Abraam] . . . Setadir, pa tou bann zanfan natirel Abraam ki zanfan Bondye, me zis bann zanfan ki dapre promes Bondye ki ganny konsidere konman vre desandan Abraam.” (Rom. 9:6-8) Alor, pour kapab realiz son plan, Zeova pa ti ekspekte ki en dimoun i absoliman bezwen en Zwif pour form parti desandans Abraam.

Sa pye zoliv senbolik

13. Kwa ki ganny reprezante par (a) sa pye zoliv, (b) son rasin, (c) son tron ek (d) son bann brans?

¹³ Zapot Pol ti konpar sa bann ki ti pou form parti desandans Abraam avek bann brans lo en pye zoliv senbolik. * (Rom.  11:21) Sa pye zoliv i reprezant lakonplisman plan Bondye an rapor avek sa lalyans ki Zeova ti fer avek Abraam. Rasin sa pye zoliv i sen e i reprezant Zeova konman sa enn ki donn lavi Izrael spirityel. (Iza. 10:20; Rom. 11:16) Sa tron i reprezant Zezi konman sa parti prensipal desandans Abraam. Bann brans i reprezant sa “sif konplet” bann ki form par sa dezyenm parti desandans Abraam.

14, 15. Lekel ki ti ganny “koupe” avek sa bon pye zoliv e lekel ki ti ganny grefe lo sa pye?

¹⁴ Dan sa legzanp lo pye zoliv, bann Zwif ki ti rezet Zezi i ganny konpare avek bann brans ki ti ganny “koupe” lo sa pye. (Rom. 11:17) Alor, zot ti perdi sa loportinite pour form parti desandans Abraam. Me lekel ki ti pou ranplas zot? Pour bann Zwif ki ti sitan fyer ki zot ti desandans Abraam, larepons ti’n kapab paret enposib. Pourtan, Zan Batis ti’n deza averti zot ki si Zeova ti oule, i ti’n kapab servi ros pour fer vin desandans Abraam.​—Lik 3:8.

¹⁵ Alor, ki Zeova ti fer pour realiz son plan? Zapot Pol ti eksplike ki bann brans sorti lo en pye zoliv maron ti ganny grefe lo sa pye zoliv dan plas bann brans ki ti’n ganny koupe. (Lir Romen 11:17, 18) Alor, bann Kretyen swazir ki ti sorti dan lezot nasyon, parey sa bann dan kongregasyon Ronm, ti ganny grefe lo sa pye zoliv senbolik. Dan sa fason, zot ti form parti desandans Abraam. Avan sa, zot ti parey bann brans lo en pye zoliv maron akoz zot ti napa okenn sans pour form parti sa lalyans spesyal. Me Zeova ti fer li posib pour zot vin bann Zwif spirityel.​—Rom. 2:28, 29.

16. Ki zapot Pyer ti dir lo nouvo nasyon spirityel?

¹⁶ Zapot Pyer ti eksplik sityasyon dan sa fason: “Alor, pour zot [Izrael spirityel, enkli bann Kretyen non Zwif] ki krwar, sa ros [Zezi Kri] i annan en gran valer, me pour  bann ki pa krwar, ‘Sa ros ki bann konstrikter ti’n rezete in vin ros kwen prensipal.’ . . . ‘Sa i en ros ki pou fer dimoun ganny konnyen, I en ros ki pou fer dimoun tonbe.’ Me zot, zot en ras ki’n ganny swazir, en group pret rwayal, en nasyon sen, en pep ki pour Bondye, ki i’n swazir pour proklanm bann keksoz merveye konsernan sa enn ki’n apel zot pour sorti dan fernwanr pour vin dan son lalimyer merveye. Ti annan en letan ki zot pa ti son pep, me aprezan zot in vin pep Bondye. Ti annan en letan ki zot pa ti konn konpasyon Bondye, me aprezan zot in resevwar li.”​—1 Pyer 2:7-10, nou ki’n met an italik.

17. Ki mannyer Zeova ti fer en keksoz ki ‘kontrerman avek natir’?

¹⁷ Zeova ti fer en keksoz ki bokou pa ti pou’n ekspekte. Pol ti dekrir li konman en keksoz ‘kontrerman avek natir.’ (Rom. 11:24) Ki mannyer sa ti le ka? I ti kapab paret drol, kekfwa kontrer avek sa ki natirel pour gref en brans sorti lo en pye zoliv maron, lo en bon pye. Pourtan, sanmenm sa ki serten fermye ti fer dan premye syek. * Dan menm fason, Zeova ti fer en keksoz ekstraordiner. Dapre pwennvi bann Zwif, bann non Zwif pa ti kapab raport en bon fri. Toudmenm, Zeova ti servi zot menm pour form en “nasyon” ki ti pou prodwir fri Rwayonm. (Mat. 21:43) Lannen 36 N.L., Korney, premye Zwif ki pa ti sirkonsi ti konverti, e ganny swazir atraver lespri sen. Depi sanmenm sa letan ki bann non Zwif ki pa ti sirkonsi ti konmans ganny grefe lo sa pye zoliv senbolik.​—Akt 10:44-48. *

18. Ki loportinite bann Zwif ti annan menm apre lannen 36 N.L.?

¹⁸ Eski sa i vedir ki apre lannen 36 N.L., bann Zwif ti nepli kapab form parti desandans Abraam? Non. Pol ti eksplike: “Alor bann Zwif zot osi, si zot aret persiste dan zot landirsisman, zot a ganny regrefe dan zot plas. Annefe, si ou ki pa Zwif, ou en brans zoliv maron, ou’n ganny koupe e grefe lo en pye zoliv fran, kontrerman avek ou natir, i pli fasil pour bann Zwif, zot ki bann brans natirel pye zoliv fran, ki zot ava ganny regrefe lo zot prop pye.” *​—Rom. 11:23, 24.

“Pep Izrael antye pou ganny sove”

19, 20. Ki mannyer sa pye zoliv senbolik i montre konman Zeova i akonplir son plan?

¹⁹ Wi, plan Zeova konsernan “Izrael Bondye” in ganny akonplir dan en fason merveye. (Gal. 6:16, NW) Parey Pol ti dir: “Pep Izrael antye pou ganny sove.” (Rom. 11:26) Dan letan apropriye Zeova, “Izrael antye,” setadir sif konplet bann Izraelit spirityel pou servi konman lerwa ek pret  dan lesyel. Napa nanryen ki pou anpes Zeova realiz son plan!

²⁰ Parey i ti’n ganny predir, desandans Abraam, setadir Zezi ek sa 144,000 Kretyen swazir pou anmenn benediksyon lo “lezot nasyon.” (Rom. 11:12; Zen. 22:18) Dan sa fason, tou dimoun parmi pep Bondye pou benefisye atraver sa laranzman. Vreman, si nou medit lo realizasyon plan eternel Zeova, nou pou vreman emerveye par ‘lasazes Bondye ki vreman profon.’​—Rom. 11:33.

[Not anba lo paz]

Eski ou rapel?

• Ki nou’n aprann avek lafason Zeova i akonplir son plan?

• Dan Romen sapit 11, kwa ki ganny reprezante par . . .

sa pye zoliv?

son rasin?

son tron?

son bann brans?

• Akoz sa gref ti ‘kontrerman avek natir’?

[Kestyon]

[Bwat/​Portre lo paz 26]

Akfer gref brans pye zoliv maron lo en bon pye?

▪ Lucius Junius Moderatus Columella ti en solda Romen e osi en fermye ki ti viv dan premye syek N.L. I renonmen pour sa 12 liv ki i ti ekrir lo lagrikiltir ek lavi dan lakanpanny.

Dan son senkyenm liv, i ti sit en vye proverb: “Sa enn ki prepar son plantasyon pye zoliv, pe demann li son fri; sa enn ki met fimyen, i sipliy li pour son fri; sa enn ki tay li, i fors li pour raport fri.”

Ler i ti pe koz lo bann zoli pye ki pa raport fri, i ti donn sa sizesyon: “I bon pour fouy en trou avek en teryer dan sa pye e apre pran brans en pye zoliv maron e anfons li byen sere dan sa trou; finalman i pou konmsi i’n reganny sa lafors pour li raport fri e i pou vin pli prodiktif.”