Lekel ki pli enportan dan ou lavi?
Lekel ki pli enportan dan ou lavi?
“Ou tousel ki Tre O lo later antye.”—PS. 83:18.
1, 2. Pour nou ganny sove, akoz i pa sifi zis pour konn non Zeova?
PETET ou ti vwar non Zeova pour premye fwa kan en dimoun ti montre ou Psonm 83:18. Dwatet ou ti sirprann kan ou ti pe lir sa parol: “Ki dimoun i konnen ki ou, ki ou non i Zeova, ou tousel ki Tre O lo later antye.” Depi sa letan, tre probab ou’n servi sa menm verse pour ed lezot dimoun pour konn Zeova, nou Bondye lanmour.—Rom. 10:12, 13.
2 Menm si i enportan pour bann dimoun konn non Zeova, i pa sifi zis pour konn son non. Remarke ki mannyer sa psalmis i aksantye en lot laverite enportan ki relye avek nou delivrans kan i dir: “Ou tousel ki Tre O lo later antye.” Wi, Zeova i sa Personnaz pli enportan dan liniver antye. Konman Kreater tou keksoz, i annan sa drwa pour ekspekte ki tou sa ki i’n kree i soumet antyerman avek li. (Rev. 4:11) Alor, i byen pour demann nou lekor: ‘Lekel ki pli enportan dan mon lavi?’ I vreman enportan ki nou byen analiz larepons sa kestyon!
Sa kestyon ki ti ganny souleve dan zarden Edenn
3, 4. Ki mannyer Satan ti kapab anbet Ev e avek ki rezilta?
3 Lafason ki bann levennman ti deroule dan zarden Edenn i montre ki sa kestyon ti vreman serye. Laba menm ki sa lanz rebel ki pli tar ti vin Satan oubyen Dyab ti anbet Ev, sa premye madanm. Zeova ti’n komann zot pour pa manz fri lo en serten pye dibwa, me Ev ti les son dezir pas avan sa ki Zeova ti’n demande. (Zen. 2:17; 2 Kor. 11:3) I ti les li ganny anbete e anfet i ti demontre en mank respe pour souvrennte Zeova. Ev pa ti rekonnet Zeova konman sa Personnaz pli enportan dan son lavi. Me ki mannyer Satan ti kapab anbet Ev?
4 Satan ti servi diferan taktik rize dan son konversasyon avek Ev. (Lir Zenez 3:1-5. *) Premyerman, Satan pa ti servi non personnel Bondye. I ti senpleman koz lo “Bondye.” De lot kote, ekriven liv Zenez li i ti servi non personnel Zeova dan premye verse sa sapit. Dezyenmman, olye koz lo “komannman” Bondye, Satan ti zis demann li konsernan sa ki Bondye ti’n “dir.” (Zen. 2:16) Dan sa fason rize, manke Satan ti pe fer krwar ki sa komannman ki Bondye ti’n donnen pa ti sitan enportan. Trwazyenmman, menm si i ti pe koz zis avek Ev, i ti servi sa pronon “zot” dan plas ou. Par fer sa, i tre probab ki Satan ti pe esey kapitaliz lo lorgey Ev e fer li santi li pli enportan, konmsi li ki ti devret koz pour son lekor ek son msye. Ki ti arive? I paret ki Ev ti’n desid lo li menm pour koz pour zot tou le de ler i ti dir avek sa serpan: “Nou kapab manz fri sa bann pye dibwa dan zarden.”
5. (a) Ki Satan ti fer Ev port son latansyon lo la? (b) Ki Ev ti pe montre kan i ti manz sa fri ki i pa ti devret manze?
5 Satan ti osi kasyet laverite. I ti pe esey dir ki i ti mal pour Bondye demann Adan ek Ev pour “pa manz fri dan tou pye dibwa sa zarden.” Apre sa, Satan ti persyad Ev pour mazin zis son lekor e lafason ki i ti sipoze amelyor son sityasyon e vin “parey Bondye.” Pour fini kont, Satan ti reisi konvenk Ev pour konsantre lo sa pye dibwa ek son fri olye lo son relasyon avek sa Enn ki ti’n donn li tou keksoz. (Lir Zenez 3:6. *) Malerezman, par manz sa fri, Ev ti montre ki Zeova pa ti sa Personnaz pli enportan dan son lavi.
Kestyon ki ti ganny souleve dan letan Zob
6. Dan ki fason Satan ti kestyonn lentegrite Zob e ki loportinite Zob ti gannyen akoz sa?
6 Plizyer syek pli tar, Zob, sa zonm fidel ti annan sa loportinite pour montre lekel ki ti pli enportan dan son lavi. Kan Zeova ti montre Satan ki Zob ti’n gard son lentegrite pour bokou lannen, Satan ti reponn: “Eski i pour nanryen ki Zob i annan lakrent pour Bondye?” (Lir Zob 1:7-10. *) Satan pa ti dir ki Zob pa ti obeir Bondye. O kontrer, i ti pe kestyonn motivasyon Zob. Dan en fason rize, i ti pe akiz Zob konmkwa i ti pe servi Zeova avek en lentere egois olye akoz son lanmour pour li. Zis Zob ki ti kapab reponn sa lakizasyon e i ti ganny sa loportinite pour fer li.
7, 8. Ki leprev Zob ti bezwen sibir e ki son landirans ek fidelite ti montre?
7 Zeova ti les Satan fer Zob pas atraver en seri maler enn deryer lot. (Zob 1:12-19) Ki mannyer Zob ti reakte ler son sirkonstans ti sanze? Labib i dir ki i “pa ti fer pese oubyen dir nanryen mal lo Bondye.” (Zob 1:22) Me kantmenm sa, Satan pa ti reste trankil. I ti kontinyen par konplent an dizan: “Lapo pour lapo e tou sa ki en zonm i annan i pou donnen pour son lavi.” * (Zob 2:4) Satan ti pe sey dir ki si Zob li menm ti soufer, i ti pou nepli konsider Zeova konman sa Personnaz pli enportan dan son lavi.
8 Zob ti’n defigire avek en maladi repinyan e apre sa, son madanm ti met presyon lo li pour modi Bondye e mor. Pli tar, trwa swadizan zanmi ki ti vin konsol li ti akiz li konmkwa i ti’n mal konport li. (Zob 2:11-13; 8:2-6; 22:2, 3) Me, malgre tou sa bann soufrans, Zob ti determinen pour gard son lentegrite. (Lir Zob 2:9, 10. *) I ti demontre atraver son landirans ki Zeova ti sa Personnaz pli enportan dan son lavi. Menm si i pa ti dan en fason parfe, Zob ti osi montre ki i posib pour bann imen enparfe reponn sa fo lakizasyon Dyab.—Konpar Proverb 27:11.
Larepons parfe Zezi
9. (a) Dan ki fason Satan ti esey tant Zezi an rapor avek son prop dezir? (b) Ki mannyer Zezi ti reazir anver sa tantasyon?
9 En pti pe letan apre batenm Zezi, Satan ti esey tant Zezi pour pourswiv bann dezir egois olye gard Zeova konman sa Personnaz pli enportan dan son lavi. Dyab ti servi trwa tantasyon avek Zezi. Premyerman, i ti esey zwe lo dezir natirel Zezi, par demann li pour fer ros vin dipen. (Mat. 4:2, 3) Zezi pa ti’n manze depi 40 zour e sirman i ti lafen. Alor, Dyab ti ankouraz li pour servi son pouvwar pour fer mirak pour satisfer son lafen. Ki mannyer Zezi ti reazir? Kontrerman avek Ev, Zezi ti konsantre lo Parol Zeova e deswit i ti rezet sa tantasyon.—Lir Matye 4:4.
10. Akoz Satan ti met Zezi o defi par demann li pour zet son lekor anba sorti anler lo miray otour tanp?
10 Satan ti osi esey tant Zezi pour reazir dan en fason egois. I ti met Zezi o defi par dir li zet son lekor anba, sorti anler lo miray otour tanp. (Mat. 4:5, 6) Ki Satan ti pe esey akonplir? Satan ti pe sey dir ki si Zezi pa ti ganny dimal ler i ti’n tonm ater, savedir i ti en “Garson Bondye.” I evidan ki Dyab ti anvi ki Zezi i demonstre pour fer vwar ki i ti pli enterese avek son prop repitasyon. Satan ti konnen ki en dimoun i kapab aksepte en defi danzere koumsa akoz lorgey ek sa dezir pour pa paret en kapon devan son kanmarad. Satan ti mal aplik en verse Labib, me Zezi ti montre li ki I ti byen konpran Parol Zeova. (Lir Matye 4:7.) Par rezet sa defi, Zezi ti ankor enn fwa prouve ki Zeova ti pli enportan dan son lavi.
11. Akoz Zezi pa ti aksepte propozisyon Dyab an rapor avek tou bann rwayonm lo later?
11 Dan son trwazyenm e dernyen lesey, Satan ti ofer Zezi tou bann rwayonm lo later. (Mat. 4:8, 9) Deswit Zezi ti refiz sa propozisyon. I ti realize ki si i ti aksepte li, i ti pou konmsi i ti pe rezet souvrennte Zeova, setadir drwa Bondye pour dirize konman sa Enn Tre O. (Lir Matye 4:10.) Dan sak ka, Zezi ti reponn Satan par sit en verse ki ti annan non Zeova ladan.
12. Ki desizyon difisil Zezi ti bezwen fer anmezir son lanmor ti aprose e ki nou aprann lo lafason i ti reazir anver sa desizyon?
12 Anmezir ki Zezi ti ariv ver lafen son lavi lo later, i ti annan en desizyon difisil pour li fer. Tou dilon son minister, i ti’n dir ki i ti pare pour ofer son lavi konman en sakrifis. (Mat. 20:17-19, 28; Lik 12:50; Zan 16:28) Pourtan, Zezi ti realize ki zot ti pou fer bann fo lakizasyon kont li, lakour Zwif ti pou kondann li e apre i ti pou ganny egzekite konman en dimoun ki blasfenmen. Lafason ki i ti pou mor ti trouble li bokou. I ti priye: “Mon Papa, si i posib elwanny sa lakoup avek mwan!” Me i ti kontinyen an dizan: “Pourtan pa selon mon lavolonte me selon ou lavolonte.” (Mat. 26:39) Wi, fidelite Zezi ziska son lanmor ti san okenn dout montre lekel ki ti vreman pli enportan dan son lavi!
Nou larepons anver sa kestyon
13. Ki leson nou’n aprann ziska prezan atraver legzanp Ev, Zob ek Zezi Kri?
13 Ki nou’n aprann ziska prezan? Dan ka Ev, nou’n aprann ki sa bann ki les zot ganny anbete par bann dezir egois ouswa ki konsider zot lekor pli enportan, pa pe montre ki Zeova i sa Personnaz pli enportan dan zot lavi. De lot kote, atraver lentegrite Zob pour bokou lannen, nou’n aprann ki menm bann imen enparfe i kapab montre ki zot met Zeova premye kan zot andir bann leprev fidelman, menm si parfwa zot pa konn tou lo lakoz zot problenm. (Zak 5:11) Finalman, legzanp Zezi i ansenny nou ki nou devret pare pour fer fas avek laont e pa met tro bokou lenportans lo nou prop repitasyon. (Ebr. 12:2) Me ki mannyer nou kapab met an pratik sa ki nou’n aprann?
14, 15. Ki mannyer reaksyon Zezi anver tantasyon ti diferan avek pour Ev e ki mannyer nou kapab imit Zezi? (Fer komanter lo portre lo paz 21.)
14 Pa zanmen les tantasyon fer ou oubliy Zeova. Ev pa ti rezet sa tantasyon ki ti’n ganny met devan li. I ti vwar ki sa fri ti “bon pour manze e i ti en keksoz ki son lizye ti anvi gete, wi, sa fri ti atiran pour gete.” (Zen. 3:6) Son reaksyon ti vreman diferan avek sa ki pour Zezi kan i ti ganny tante trwa fwa, pa i vre! Sak fwa, i ti vwar pli lwen ki sa tantasyon e i ti mazin konsekans son aksyon. I ti depan lo Parol Bondye e i ti osi servi non Zeova.
15 Kan nou ganny tante pour fer bann keksoz ki Zeova i deteste, lo kwa nou konsantre? Pli nou konsantre lo sa tantasyon, pli nou pou devlop lanvi pour sa move keksoz. (Zak 1:14, 15) Nou devret azir deswit pour ki nou retir okenn latras sa lanvi dan nou, menm si sa aksyon i kapab paret osi difisil ki retir en parti nou lekor. (Mat. 5:29, 30) Parey Zezi, nou devret konsantre lo konsekans nou aksyon, ki lefe i pou annan lo nou relasyon avek Zeova. Nou devret rapel sa ki son Parol Labib i dir. Zis dan sa fason ki nou pou kapab prouve ki Zeova i sa Personnaz pli enportan dan nou lavi.
16-18. (a) Kwa ki kapab fer nou dekouraze? (b) Kwa ki pou ed nou fer fas avek bann sityasyon ki enkyet nou?
16 Pa les bann maler ki ou fer fas avek fer ou ankoler avek Zeova. (Prov. 19:3) Anmezir nou apros lafen sa move lemonn, pep Zeova i deplizanpli ganny afekte avek dezas ek maler. La konmela nou pa ekspekte Zeova i toultan fer bann mirak pour protez nou. Kantmenm sa, parey Zob, nou kapab santi nou dekouraze kan nou perdi en dimoun ki nou kontan ouswa ler nou pe fer fas avek kek difikilte.
17 Zob pa ti konpran rezon akoz Zeova ti pe les serten keksoz arive, e parler i kapab ki nou pa tro konpran akoz bann move keksoz i arive. Petet nou’n tann konsernan serten frer fidel ki’n mor kan tranblemandter ti frape, parey i ti le ka Aiti, ouswa lezot dezas natirel. Ouswa nou konn en Kretyen fidel ki’n soufer akoz vyolans ouswa ki’n mor dan en aksidan terib. Nou menm kapab pe fer fas avek bann sirkonstans difisil ouswa kek lenzistis. Nou lenkyetid i kapab fer nou demande: ‘Zeova, akoz? Akoz mwan? Ki mon’n fer mal?’ (Aba. 1:2, 3) Kwa ki pou ed ou siport bann moman koumsa?
18 Nou bezwen fer atansyon ki nou pa krwar ki sa bann maler i akoz nou napa laprouvasyon Zeova. Zezi ti aksantye sa pwen kan i ti koz lo de maler ki ti ariv dan son letan. (Lir Lik 13:1-5.) Bokou maler i arive akoz “letan ek levennman san ekspekte.” (Ekle. 9:11) Malgre nenport kwa ki kapab pe enkyet nou, nou kapab fer fas, si nou toultan mazin sa “Bondye ki touzour donn konsolasyon.” I pou donn nou lafors ki nou bezwen pour kontinyen reste fidel.—2 Kor. 1:3-6.
19, 20. Kwa ki ti ed Zezi pour fer fas avek bann sityasyon ki ti imilye li e kwa ki kapab ed nou fer parey?
19 Pa les lorgey ouswa lakanmizri domin ou. Limilite Zezi ti ed li pour “renons tou sa ki i posede pour pran kondisyon lesklav.” (Fili. 2:5-8) Menm si i ti fer fas avek bann sityasyon ki ti imilye li, i ti reisi siporte akoz i ti depan antyerman lo Zeova. (1 Pyer 2:23, 24) Par fer sa, Zezi ti met lavolonte Zeova premye, e finalman i ti ganny en pozisyon pli siperyer. (Fili. 2:9) Zezi ti demann son bann disip pour viv menm kalite lavi.—Mat. 23:11, 12; Lik 9:26.
20 Parler, serten leprev ki teste nou lafwa i kapab anbarasan. Me, kantmenm sa, nou devret annan menm konfyans ki zapot Pol ki ti dir: “Se pour sanmenm ki mon pe soufer. Me mon pa onte, parski mon konnen dan lekel mon’n met mon lafwa, e mon sir ki i kapab gard sa ki i’n konfye mwan ziska sa Zour.”—2 Tim. 1:12.
21. Malgre latitid egois dan sa lemonn, ki ou determinen pour fer?
21 Labib ti predir ki dan sa letan ki nou pe viv bann dimoun pou “vin egois.” (2 Tim. 3:2) I pa drol alor ki nou antoure avek en zenerasyon ki mazin zis zot prop lekor. Annou pa zanmen les nou ganny sali par sa latitid egois! O kontrer, ki swa nou pe fer fas avek tantasyon, eksperyans maler ouswa nou pe sibir sikannri lezot, nou tou, annou reste determinen pour prouve ki Zeova i definitivman sa Personnaz pli enportan dan nou lavi!
[Not anba lo paz]
^ par. 4 Zenez 3:1-5: “Prezan, serpan ti sa zannimo sovaz pli pridan ki Zeova Bondye ti’n kree dan lakanpanny. Alor i ti dir avek sa madanm: ‘Eski i vre ki Bondye in dir zot pa manz fri dan tou pye dibwa sa zarden?’ 2 Me sa madanm ti dir avek sa serpan: ‘Nou kapab manz fri sa bann pye dibwa dan zarden. 3 Me fri sa pye dibwa ki dan milye zarden, Bondye in dir: “Zot pa devret manze. Non, zot pa devret tous li pour ki zot pa mor.”’ 4 Alor sa serpan ti dir avek sa madanm: ‘Sirman, zot pa pou mor. 5 Akoz Bondye i konnen, ki sa zour menm ki zot pou manz sa fri, zot lizye pou sirman ouver e sirman zot pou vin parey Bondye, zot pou konn sa ki bon ek sa ki move.’”
^ par. 5 Zenez 3:6: “Alor sa madanm ti vwar ki fri dan sa pye ti bon pour manze e i ti en keksoz ki son lizye ti anvi gete, wi, sa fri ti atiran pour gete. Alor i ti konmans kas fri dan sa pye e i ti manze. Apre sa i ti donn son msye en pe kan i ti avek li e i ti konmans manze.”
^ par. 6 Zob 1:7-10: “Alor Zeova ti dir Satan: ‘Kot ou sorti?’ Satan ti reponn Zeova e dir: ‘Mon ti pe fer letour later e egzamin li.’ 8 Apre Zeova ti dir avek Satan: ‘Eski ou’n met ou leker lo mon serviter Zob? Napa personn lo later ki parey li, en zonm san repros e drwat, ki annan lakrent pour Bondye e ki rezet sa ki mal.’ 9 Me Satan ti reponn Zeova e dir: ‘Eski i pour nanryen ki Zob i annan lakrent pour Bondye? 10 Pa ou menm ou’n met en baraz otour li, otour son lakaz, e otour tou sa ki i annan? Ou’n beni son travay, e son latroup zannimo in propaze lo later.’”
^ par. 7 Serten spesyalis Labib i panse ki sa lekspresyon “lapo pour lapo” i kapab endike ki Zob ti pou volonterman e dan en fason egois les son bann zanfan ek zannimo perdi zot lapo oubyen lavi tan ki li i ti pou sov sa ki pour li. Lezot i panse ki sa lekspresyon i fer resorti ki en dimoun ti pou pare pour perdi en bout son lapo osi lontan ki sa ti pou sov son lavi. Par egzanp, pour li pa ganny tape, en dimoun ti pou protez son latet avek son lanmen e perdi en bout son lapo pour sov son lavi. Me, nenport kwa ki sa lekspresyon i kapab vedir, aparaman i ti pe endike ki Zob ti pou pare pour donn tou sa ki i ti annan pour li kapab sov son lavi.
^ par. 8 Zob 2:9, 10: “Finalman son madanm ti dir li: ‘Eski ou ankor pe gard ou lentegrite? Modi Bondye e mor!’ 10 Me i ti dir li: ‘Ou osi, ou koz parey en madanm bet. Eski nou pou aksepte zis sa ki bon sorti kot sa vre Bondye e pa aksepte sa ki move?’ An tou le ka, Zob pa ti fer pese avek son labous.”
Ki nou kapab aprann avek . . .
• lafason ki Satan ti anbet Ev?
• reaksyon Zob anver bann maler ki i ti eksperyanse?
• sa ki ti pli enportan pour Zezi?
[Kestyon]
[Portre lo paz 21]
Zezi ti reziste bann tantasyon Satan e i ti konsantre lo fer lavolonte Zeova
[Portre lo paz 22]
Predikasyon kot bann latant apre tranblemandter Aiti
Dan moman difisil, toultan mazin sa “Bondye ki touzour donn konsolasyon”