Zezi​—Kote i ti sorti?

“[Pilat] ti antre dan pale e demann Zezi, ‘Kote ou sorti?’ Me Zezi pa ti reponn li.”​—ZAN 19:9.

PONS PILAT, Gouverner Ronm, ti demann sa kestyon ler Zezi ti pe ganny zize. * Pilat ti konnen ki rezyon Izrael Zezi ti sorti. (Lik 23:6, 7) I ti osi konnen ki Zezi pa ti en senp zonm. Eski Pilat ti pe mazinen si Zezi ti’n deza egziste avan? Eski sa dirizan ki ti en payen ti vreman pare pour aksepte e azir dapre laverite? An tou le ka, Zezi pa ti reponn li e zis apre i ti evidan ki Pilat ti pli enterese avek son karyer ki laverite ek lazistis.​—Matye 27:11-26.

Erezman, bann ki senserman anvi konnen kote Zezi ti sorti i kapab fasilman trouv larepons. Labib i donn nou en leksplikasyon kler. Annou egzamin serten pwen.

▪ Landrwa kot i ti ne Bann kalkilasyon i montre ki Zezi ti ne o konmansman lotonn lannen 2 A.N.L. dan en vilaz ki ti apel Betleenm, Zide. Sezar Ogis ti donn lord tou dimoun pour al anrezistre zot. Alor Mari, manman Zezi “ki ti ansent” e pros pour “ganny son baba” ek son msye Zozef, ti oblize vwayaz an Betleenm kot zanset Zozef ti reste. Vi ki zot pa ti kapab trouv en landrwa pour reste, sa koup ti bezwen al dan en park bef kot Zezi ti ne e ganny mete dan en loz.​—Lik 2:1-7.

Depi plizyer syek avan, en profesi Labib ti predir sa landrwa kot Zezi ti pou ne: “Ou, o Betleenm Efrata, sa enn tro pti pour form parti sa milye dan Zida, dan ou pou sorti pour mwan sa enn ki pou vin dirizan dan Izrael.” * (Mika 5:2) Betleenm ti aparaman tro pti pour ganny mansyonnen parmi bann lavil dan teritwar Zida. Pourtan, sa pti vilaz ti pou ganny en loner spesyal. Sa Mesi ki ti’n ganny promet oubyen Kris, ti pou sorti Betleenm.​—Matye 2:3-6; Zan 7:40-42.

▪ Landrwa kot i ti grandi Fanmir Zezi ti reste Lezip pour zis en pti pe letan avan ki zot ti al reste Nazaret, en lavil dan provens Galile ki i apepre 96 kilomet nor avek Zerizalenm. Sa bann letan, Zezi ti annan mwens ki trwa-z-an. I ti grandi dan en zoli rezyon kot i ti annan bann fermye, berze ek peser e dan en gran fanmir ki an zeneral ti napa bokou.​—Matye 13:55, 56.

 Pour plizyer syek davans, Labib ti predir ki Mesi ti pou en “Nazareen.” Matye, en ekriven levanzil ti dir ki fanmir Zezi ti al reste “dan en lavil ki ti apel Nazaret. Sa ti arive pour ki parol bann profet i ganny realize: ‘I pou ganny apele Nazareen.’” (Matye 2:19-23) I paret ki sa non Nazareen i relye avek sa mo Ebre pour “pti bourzon.” I evidan alor ki Matye ti pe refer avek profesi Izai kot i ti apel Mesi “en pti bourzon,” ki vedir ki Mesi ti pou en desandans Zese, papa Lerwa David. (Izai 11:1) Zezi ti annefe en desandans Zese atraver David.​—Matye 1:6, 16; Lik 3:23, 31, 32.

▪ Son lorizin Labib i ansenny nou ki Zezi ti egziste depi byen lontan avan ki i ti ne dan sa park bef an Betleenm. Sa profesi Mika ki’n ganny site pli o i azoute ki Son “lorizin i depi letan ansyen, depi bann zour letan endefini.” (Mika 5:2) Konman premye Garson Bondye, Zezi ti en lespri dan lesyel avan ki i ti vin lo later konman en imen. Zezi li menm ti dir: “Mon’n sorti dan lesyel.” (Zan 6:38; 8:23) Ki mannyer sa ti posib?

Zeova ti servi son lespri sen pour fer en mirak. * I ti transfer lavi son Garson ki ti dan lesyel dan vant en vyerz Zwif ki ti apel Mari pour li kapab ne konman en imen parfe. Bondye Tou Pwisan i kapab fasilman fer en tel mirak. Zis parey sa lanz ki ti koz avek Mari lo sa mirak ti dir, “napa nanryen ki enposib pour Bondye.”​—Lik 1:30-35, 37.

Labib pa zis dir nou kote Zezi ti sorti. Sa kat Levanzil: Matye, Mark, Lik ek Zan i dir nou bokou lo lafason ki i ti viv son lavi.

[Not anba lo paz]