Eski ou pou swiv bon gidans Zeova?
Eski ou pou swiv bon gidans Zeova?
“Mon’n ay tou semen ki kapab anbet mwan.”—PS. 119:128.
1, 2. (a) Ler ou enformen pour al en kek landrwa, ki kalite lavertisman ou ti pou kontan gannyen e akoz? (b) Ki kalite lavertisman Zeova i donn bann ki servi li e akoz?
FER krwar ou bezwen al en serten landrwa. Ou pa tro tro asire kot i ete, alor ou demann led avek ou bon zanmi ki konn byen sa landrwa. Anmezir i donn ou bann leksplikasyon byen presi, i kapab dir ou en keksoz parey: “Ler ou vwar sa pye friyapen, pa bezwen al kote gos akoz ou pou tonm kot en lot lakaz, me plito pran sa semen kote drwat o bor sa glasi.” Pa ou ti pou kontan ki ou zanmi in averti ou e ou ti pou swiv son konsey! Dan en sans, Zeova i parey sa zanmi. I donn nou en direksyon byen presi pour ed nou ariv kot nou destinasyon, setadir lavi eternel. Me i osi averti nou lo bann danze ki ti kapab fer nou pran en move semen.—Det. 5:32; Iza. 30:21.
2 Dan sa lartik ek sa lot ki swiv, nou pou egzaminen ki mannyer Zeova, nou Bondye ek Zanmi i averti nou konsernan serten danze. Pa bliye ki Zeova i averti nou akoz i kontan nou. I anvi ki nou ariv kot nou destinasyon. I sagren kan i vwar dimoun les zot ganny anbete e perdi semen. (Ezek. 33:11) Dan sa lartik, nou pou vwar trwa danze. Premye i sorti kot lezot dimoun e dezyenm i sorti dan nou menm. Sa enn trwazyenm pa ni menm reel, me toudmenm, i vreman danzere. Nou bezwen konn byen sa bann danze e ki mannyer nou Papa dan lesyel i kapab ed nou rezet zot. En psalmis ti dir Zeova: “Mon’n ay tou semen ki kapab anbet mwan.” (Ps. 119:128) Eski ou santi parey? Annou vwar ki mannyer nou kapab evit tou sa bann move semen.
“Ou pa devret swiv lafoul”
3. (a) Akoz i kapab danzere pour swiv lezot dimoun ler nou pa tro asire ki larout pour pran? (b) Ki prensip enportan nou trouve dan Egzod 23:2?
3 Si ou pe al en gran vwayaz, ki ou ti pou fer si ou pa ti tro asire ki larout ou ti pou pran? Si ou ti vwar bokou dimoun pe al dan en serten direksyon, manke ou ti pou anvi swiv zot. Sa i danzere. Petet sa bann dimoun pa pe al menm landrwa avek ou ouswa zot in perdi osi. Sa legzanp i ed nou konpran en prensip ki Zeova ti oule ansenny bann Izraelit ler i ti donn zot en serten lalwa. Zeova ti dir bann ziz ek bann temwen ki ti enplike dan bann zizman pour veye ki zot ‘pa swiv lafoul.’ (Lir Egzod 23:2. *) I vreman fasil pour bann imen enparfe fer bann move desizyon zis pour fer plezir lezot e fer sa ki enzis. Me eski sa prensip i zis aplik avek bann zafer legal? Ditou.
4, 5. Akoz Zozye ek Kaleb ti’n kapab ganny tante pour swiv lafoul, me kwa ki ti ed zot reziste?
4 Anfet, i annan sa danze pour “swiv lafoul” dan preski nenport sityasyon dan lavi. Sa bann sityasyon i kapab ariv en sel kou e i kapab difisil pour pa fer sa ki lezot pe fer. Par egzanp, mazin sa ki ti arive avek Zozye ek Kaleb. Zot ti parmi en group 12 zonm ki ti al espyonn Later Promiz. Ler zot ti retournen, dis ladan ti donn en rapor negatif ki ti fer lezot per. Zot ti menm dir ki serten zabitan sa pei ti bann zean sorti dan fanmir bann Nefilim, zanfan bann lanz rebel ki ti vin lo later. (Zen. 6:4) Sa ti enposib akoz sa bann Nefilim ti’n mor dan Deliz plizyer syek pli boner e zot ti napa okenn zanfan. Bann Izraelit ti kapab krwar dan bann keksoz ki pa ti menm fer sans akoz zot lafwa ti feb. Ler zot ti tann sa bann move rapor avek sa dis espyon, bokou ti konmans per. En pti moman apre, laplipar ti vwar li en problenm pour antre dan Later Promiz parey Zeova ti’n demande. Ki Zozye ek Kaleb ti pou fer dan sa sityasyon difisil?—Nom. 13:25-33.
5 Zot pa ti swiv lafoul. Menm si sa bann dimoun pa ti anvi tann sa ki sa de zonm ti pe dir e zot ti menm menase pour saboul zot avek ros, Zozye ek Kaleb ti determinen pour kontinyen dir laverite. Kote zot ti ganny sa kouraz? San okenn dout, i ti akoz zot lafwa. Dimoun ki annan lafwa i kapab vwar ladiferans ant mansonz bann imen ek promes Zeova. Tou le de zonm ti dir pli tar ki mannyer zot ti santi lo lafason ki Zeova i toultan realiz son bann promes. (Lir Zozye 14:6, 8; 23:2, 14. *) Zozye ek Kaleb ti kontan e annan konfyans dan zot Bondye fidel, e zot pa ti pou anvi fer okenn keksoz ki ti pou kapab fer Zeova sagren zis pour fer plezir sa lafoul ki ti napa lafwa. Alor, zot ti reste ferm, e zot in kit en bon legzanp pour nou ozordi.—Nom. 14:1-10.
6. Dan ki sityasyon nou ti kapab swiv lafoul?
6 Eski parler ou’n santi ou anba presyon pour swiv lafoul? I annan en gran lafoul dimoun ki pa pe servi Zeova e ki kontan boufonn bann standar moral ki nou swiv. Zot kontan promouvwar bann lide ki pa fer sans, par egzanp, dan domenn divertisman ek lanmizman. Zot kapab dir ki napa nanryen mal avek limoralite seksyel, vyolans ek bann pratik demonyak ki sitan popiler dan bann progranm televizyon, film ek zwe video. (2 Tim. 3:1-5) Ler ou swazir sa ki ou ek ou fanmir pou fer dan bann moman detant, eski ou les lezot dimoun dir ou sa ki byen ek sa ki mal? Si i le ka, eski pa sa i konmsi ou pe swiv lafoul?
7, 8. (a) Ki mannyer nou kapab aprann byen servi nou abilite pour “fer diferans ant sa ki byen ek sa ki mal”? Akoz i pli bon fer sa ki swiv en bann lareg strik? (b) Akoz i ankourazan pour vwar legzanp bokou zenn Kretyen?
7 Zeova in donn nou en keksoz presye ki kapab ed nou fer bann bon desizyon e sa i sa abilite pour “fer diferans ant sa ki byen ek sa ki mal.” Par kont, nou bezwen devlop sa abilite par servi li. (Ebr. 5:14) Swiv lafoul oubyen en bann lareg strik pa pou ed nou devlop sa abilite. Se pour sa rezon ki pep Zeova pa donn nou en lalis film, liv ek sit Internet ki nou pa devret gete. Tou fason, sa lemonn i telman sanz vitman ki sa lalis ti pou’n fini pa bon avan ki i’n fini konplete. (1 Kor. 7:31) Pli pir ankor, i ti pou anpes nou reflesir dan lapriyer lo bann prensip Labib ki kapab ed nou fer bann bon desizyon.—Efe. 5:10.
8 Byensir, kan nou fer bann desizyon ki an armoni avek sa ki Labib i dir, bann dimoun i kapab pa kontan nou. Kot lekol, bann zenn Kretyen i kapab santi zot anba presyon pour gete e fer sa ki tou lezot zenn pe fer. (1 Pyer 4:4) Alor, i gou pour vwar bann Kretyen zenn konman aze pe imit lafwa Zozye ek Kaleb kan zot refize “swiv lafoul.”
Pa swiv ‘ou leker ek ou lizye’
9. (a) Si ou pe al kek landrwa, akoz i kapab danzere pour swiv en semen zis akoz nou kontan li? (b) Akoz sa lalwa dan Nonm 15:37-39 ti enportan pour pep Izrael?
9 Dezyenm danze ki nou pou koz lo la i sorti dan nou menm. Annou pran en legzanp: Meton ou pe al en serten landrwa, eski ou ti kapab mazinen pa servi ou map e zis swiv sa ki vin dan ou lespri, par pran nenport ki semen ki ofer en peizaz manifik? Si ou fer sa, ou pa pou ariv kot ou destinasyon. Dan menm laliny, annou egzamin bann lalwa ki Zeova ti donn ansyen Izrael. Bokou dimoun ozordi pa konpran akoz Bondye ti donn sa lalwa konsernan met en franz ek pti bordir ble lo zot lenz. (Lir Nonm 15:37-39. *) Me, eski ou konpran akoz sa lalwa ti enportan? Lobeisans anver sa lalwa ti ed pep Bondye pour reste diferan e separe avek bann nasyon payen ki ti otour zot. Si zot ti oule kontinyen fer plezir Zeova zot ti pou bezwen kontinyen reste separe avek sa bann nasyon. (Lev. 18:24, 25) Toudmenm, sa lalwa i osi montre nou en lot danze ki kapab anpes nou ariv kot nou destinasyon, setadir lavi eternel. Ki sa danze?
10. Ki mannyer Zeova ti montre ki i konn byen bann imen?
10 I ti annan en rezon pour Zeova donn son pep sa lalwa. I ti dir: “Zot pa devret swiv zot leker ek zot lizye pour al pratik bann relasyon imoral.” Zeova i konn byen bann imen. I konnen ki nou leker, sa ki nou ete anndan i kapab ganny enfliyanse par sa ki nou lizye i trouve. Pour sa rezon, Labib i averti nou: “Leker i pli tret ki okenn keksoz e i tre move. Lekel ki kapab konn li?” (Zer. 17:9) Eski ou dakor alor ki sa ki Zeova ti dir avek bann Izraelit ti vreman apropriye. I ti konn byen ki zot ti pou anvi get sa ki bann pep payen ti pe fer otour zot, zot ti pou anvi fer parey. Zot ti pou ganny tante pour vin parey zot, setadir, mazin, santi e azir parey zot.—Prov. 13:20.
11. Akoz i kapab danzere pour swiv nou leker ek nou lizye?
11 Denozour, i ankor pli fasil pour nou leker tret ganny enfliyanse par sa ki nou trouve. Nou viv dan en lemonn kot tou sa ki otour nou i kapab eksit nou bann move dezir. Alor, ki mannyer nou kapab aplik sa prensip dan Nonm 15:39? Par egzanp, si kot lekol, dan travay oubyen dan kanton, bann dimoun i sanz dan en fason deplizanpli provokan, eski sa pou annan lefe lo ou? Eski ou pou ganny tante pour swiv ‘ou leker ek ou lizye’ e anvi fer parey zot? Apre sa, eski ou pou les ou ganny enfliyanse pour sanz parey zot e pa parey en Kretyen?—Rom. 12:1, 2.
12, 13. (a) Ki nou devret fer si nou lizye i ganny atire par sa ki mal? (b) Kwa ki kapab ed nou pour pa vin en tantasyon pour lezot?
12 I vreman enportan ki nou kontrol nou bann dezir. Si nou lizye i tant pour get bann keksoz ki i pa devret, touzour mazin sa lalyans ki Zob en serviter fidel ti fer avek son lizye pour pa get en lot madanm avek en lentansyon romantik apard ki son madanm. (Zob 31:1) Pareyman, Lerwa David ti determinen pour ‘pa met devan son lizye okenn keksoz ki pa vo nanryen.’ (Ps. 101:3) Nenport kwa ki kapab sali nou konsyans e gat nou relasyon avek Zeova i en keksoz ki “pa vo nanryen.” Sa i enkli okenn tantasyon atraver bann keksoz ki nou vwar e ki ti kapab fer nou devlop en move dezir dan nou leker pour fer sa ki mal.
13 De lot kote, nou pa pou anvi vin en “keksoz ki pa vo nanryen” dan en sans, par tant lezot pour fer sa ki mal. Alor, nou bezwen pran o serye konsey sorti dan Labib pour byen sanze e dan en fason respektab. (1 Tim. 2:9) I pa zis depan lo nou pour dir si nou pe sanz dan en fason respektab. Nou osi bezwen pran an konsiderasyon konsyans ek pwennvi lezot. Respekte konsyans ek lentere lezot i devret pli enportan ki nou preferans. (Rom. 15:1, 2) Dan kongregasyon Kretyen, i annan en kantite zenn ki pe donn en legzanp remarkab dan sa domenn. Pa nou fyer ki zot refize pour swiv “zot leker ek zot lizye” e ki zot determinen pour fer plezir Zeova dan tou sa ki zot fer, menm dan lafason ki zot sanze!
Pa swiv bann keksoz ki “pa reel”
14. Ki lavertisman Samyel ti donn bann Izraelit konsernan swiv sa ki “pa reel”?
14 Fer krwar ou pe fer en vwayaz dan en gran dezer. Ki ti pou arive si en sel kou ou ti krwar ou vwar delo me i pa vreman delo? Prezan, ou kit ou semen pour al ver sa keksoz ki pa reel. I ti kapab kout ou ou lavi, pa i vre! Zeova i konn byen ki i danzere pour nou swiv keksoz ki pa reel. Annou pran en legzanp. Bann Izraelit ti oule en lerwa imen parey bann nasyon dan zalantour. Sa ti vreman mal akoz i ti konmsi zot ti pe rezet Zeova konman zot Lerwa. Menm si Zeova ti permet zot annan en lerwa imen, i ti fer Samyel averti zot lo danze ki i annan pour swiv bann keksoz ki pa reel.—Lir 1 Samyel 12:21. *
15. Dan ki fason bann Izraelit ti swiv bann keksoz ki pa ti reel?
15 Eski pep Izrael ti krwar ki i ti pou pli fasil pour met zot konfyans dan en lerwa imen akoz dan en sans i ti pou pli reel ki Zeova? Si sa ti le ka, zot ti pe vreman swiv en keksoz ki pa reel! Alor Satan ti pou’n kapab anbet zot pour krwar lezot keksoz ki pa reel. Bann lerwa imen ti pou fasilman antrenn zot pour ador zidol. Bann ki ador zidol i fer sa fot pour krwar ki i pou pli fasil annan konfyans dan en zidol reel ki’n ganny fer avek ros oubyen dibwa, plito ki dan Zeova en Bondye envizib ki’n kree tou keksoz. Me, parey Pol ti dir bann zidol pa “nanryen.” (1 Kor. 8:4) Zot pa kapab vwar, tande, koze oubyen azir. Ou kapab vwar zot oubyen tous zot, me si ou ador zot, i konmsi ou pe swiv en keksoz ki pa reel, ou pe ganny anbete e sa pou anmenn zis maler lo ou.—Ps. 115:4-8.
16. (a) Ki mannyer Satan i anbet dimoun ozordi pour swiv bann keksoz ki pa reel? (b) Akoz nou kapab dir ki bann keksoz materyel i pa reel ler nou konpar zot avek nou Bondye Zeova?
16 Satan i malen e i anvi fer krwar bann dimoun ki zot devret swiv bann keksoz ki “pa reel.” Par egzanp, i’n fer en kantite krwar ki si zot annan en bon travay, anmas bokou larzan ek zoli keksoz materyel, zot pou annan en lavi ere e an sekirite. Zot krwar ki zot kapab met konfyans dan sa bann keksoz pour rezourd zot problenm. Me eski sa bann keksoz pou kapab ed zot ler zot tonm malad, lekonomi i tonbe oubyen si i ariv en katastrof natirel? Eski i pou ed zot kan zot santi zot vid, zot napa en bi ek en direksyon dan lavi? Eski i pou reponn zot bann kestyon enportan? Ki tou sa la pou anmennen ler zot fer fas avek lanmor? Si nou krwar ki bann keksoz materyel pou konble nou bezwen spirityel, nou pou vreman dezapwente. Zot pa reel akoz zot pa vreman kapab sov nou. Finalman, larzan ek keksoz materyel pa pou toultan en proteksyon akoz zot pa ni menm kapab anpes nou tonm malad e mor. (Prov. 23:4, 5) Pa Zeova nou Bondye i bokou pli reel! Zis ler nou annan en relasyon pros avek Zeova ki nou pou santi nou vreman an sekirite. Pa sa i en benediksyon! Pa zanmen abandonn li pour swiv bann keksoz ki pa reel.
17. An rapor avek sa bann danze ki nou’n diskite, ki ou determinen pour fer?
17 Pa nou vreman kontan pour annan Zeova konman nou Zanmi ek Gid dan sa semen ki anmenn ver lavi? Nou pou pli fasilman ariv kot nou destinasyon, lavi eternel, si nou kontinyen swiv sa trwa lavertisman ki i donn nou avek lanmour. Sa i enplik pa swiv lafoul, nou leker ek bann keksoz ki pa reel. Dan sa lot lartik, nou pou vwar trwa lezot lavertisman ki Zeova i donn nou pour ed nou ay e rezet bann move semen ki kapab elwanny nou avek Bondye.—Ps. 119:128.
[Not anba lo paz]
^ par. 3 Egzod 23:2: “Ou pa devret swiv lafoul avek move lentansyon e dan en dispit ou pa devret say dan kote lafoul pour fer sa ki enzis.”
^ par. 5 Zozye 14:6, 8; 23:2, 14: “Alor bann garson Zida ti vin kot Zozye, Gilgal, e Kaleb garson Yefoune sa Kenizit ti dir li: ‘Ou konn byen ou menm sa ki Zeova ti dir Moiz, sa zonm sa vre Bondye konsernan mwan ek ou ler nou ti Kades-Barnea.’” “E mon bann frer ki ti vin avek mwan ti fer leker lepep fonn, me tandis ki mwan, mon ti swiv Zeova mon Bondye konpletman.” “Zozye ti kriy nasyon Izrael antye, son bann ansyen, son bann sef, son bann ziz, ek son bann zofisye. I ti dir zot: ‘Mwan, mon’n vye e avanse dan laz.’” “Ekoute aprezan! Mon pros pour mor parey tou dimoun lo later. Zot konn byen avek tou zot leker e avek tou zot nanm ki napa okenn parol parmi tou bann bon parol ki Zeova zot Bondye in dir zot ki pa’n reisi. Tousala in vin vre pour zot. Napa en parol ki pa’n reisi.”
^ par. 9 Nonm 15:37-39: “E Zeova ti osi dir Moiz: 38 ‘Koz avek bann garson Izrael e ou devret dir zot ki zot devret met en franz avek bordir zot lenz, zenerasyon apre zenerasyon, e zot devret pik en pti bordir ble zis par lao franz zot lenz. 39 “E sa franz i devret avek bordir zot lenz e ler zot pou vwar li zot pou rapel tou bann komannman Zeova e obei zot. E zot pa devret swiv zot leker ek zot lizye pour al pratik bann relasyon imoral.”’”
^ par. 14 1 Samyel 12:21: “E zot pa devret elwannyen pour swiv bann keksoz ki pa reel, ki pa anmenn okenn byenfe e ki pa kapab delivre zot, akoz zot pa reel.”
Ki ou panse?
Ki mannyer ou kapab met an pratik bann prensip dan sa bann verse?
[Kestyon]
[Portre lo paz 11]
Eski ou’n deza ganny tante pour swiv lafoul?
[Portre lo paz 13]
Akoz i danzere pour nou swiv nou bann move dezir?
[Portre lo paz 14]
Eski ou pe swiv bann keksoz ki pa reel?
