Akoz lavi i paret napa en sans?

AKOZ ou pa devret krwar ki lavi pou zis, parey Lerwa Salomon ti dir, “en pti moman legzistans vid” ki pase “parey en lonbraz?” (Eklezyast 6:12, The New English Bible) Parol Bondye, Labib i donn bann lenformasyon ki nou touzour kapab depan lo la. I promet ki lavi a lavenir pou vreman fer sans.​—2 Timote 3:16, 17.

Labib i dir nou plan ki Bondye ti annan o konmansman pour later. I osi eksplike akoz lemonn i ranpli avek lenzistis, labi ek soufrans. Akoz i enportan ki nou konpran sa bann keksoz? Pli gran rezon akoz bann dimoun i krwar ki lavi i vreman pa fer sans i parski zot pa konnen, ouswa zot swazir pour inyor plan Bondye pour sa later ek bann imen.

Ki plan Bondye pour later?

Zeova, * Bondye ti fer later konman en paradi parfe pour bann imen reste lo la. I ti pou en landrwa kot  bann imen ti pou kapab viv en lavi gou e satisfezan dan perfeksyon pour touzour. Sa pwen enportan i kontredir sa lide ki sipoze sorti dan Labib, konmkwa Bondye ti fer later konman en landrwa pour teste bann imen, pour vwar si zot merite viv en lavi ki fer plis sans dan lesyel.​—Vwar bwat “Eski nou devret kit later pour viv en lavi ki fer plis sans?” lo paz 6.

Bondye ti fer zonm ek fanm dan Son resanblans avek sa abilite pour demontre Son bann kalite merveye. (Zenez 1:26, 27) I ti fer zot parfe. Zot ti annan tou sa ki zot ti bezwen pour viv en lavi ki fer sans e ki prodiktif pour touzour. Sa i enplik ranpli later e domin li, fer later antye vin en paradi zis parey zarden Edenn ti ete.​—Zenez 1:28-31; 2:8, 9.

Kwa ki’n al mal?

I evidan ki en keksoz ti mars mal. Bann imen an zeneral pa pe vreman demontre bann kalite merveye ki Bondye i annan. Later i definitivman pa en paradi. Ki’n arive? Adan ek Ev, nou premye paran ti mal servi zot liberte pour swazir. Zot ti anvi vin “parey Bondye,” setadir deside pour zot menm sa “ki bon ek sa ki move.” Ler zot ti fer sa, zot ti pe swiv menm latitid rebel ki Dyab ti’n deza fini demontre.​—Zenez 3:1-6.

Savedir lemal pa form parti en plan misterye ki Bondye in deside davans. I ti vin an egzistans kan Satan e plitar Adan ek Ev ti rebel kont dominasyon Bondye. Akoz zot rebelyon, nou premye paran ti perdi sa Paradi ek zot lavi parfe. Finalman, pa zis zot ki’n mor, me zot in osi pas lanmor avek zot bann desandans, setadir tou fanmir imen. (Zenez 3:17-19; Romen 5:12) Sanmenm sa rezon ki sa bann kondisyon ek sirkonstans i egziste ki fer lavi paret napa en sans.

Akoz Bondye pa ti detri lemal deswit?

Serten i mazinen: ‘Akoz Bondye pa ti detri lemal deswit par touy Satan ek lezot rebel e rekonmans tou?’ Eski sa ti pou vreman saz? Ki mannyer ou ti pou reakte si ou ti tande ki en gouvernman pwisan ti deswit egzekit nenport dimoun ki ti kestyonn son lotorite? Eski bann tel aksyon pa ti pou fer bann bon dimoun pa siport sa gouvernman e pa respekte son lotorite?

Bondye ti deside pour pa azir deswit avek sa bann rebel. Avek lasazes, i ti les letan pase pour ki sa kestyon ki ti ganny souleve dan zarden Edenn konsernan son fason dirize ti pou ganny regle enn fwa pour tou.

Retir tou lemal

Sa ki pli enportan pour rapel se ki Bondye in les lemal egziste zis pour en serten kantite letan. I’n fer sa akoz i konnen ki i kapab konpletman efas tou move konsekans enn fwa ki sa kestyon ki ti ganny souleve par sa rebelyon ti ganny reponn.

Plan Bondye pour later ek imen i ankor parey. Atraver profet Izai, Zeova i asir nou ki i sa Enn ki’n fer later, sa Enn ki “pa’n kree li pour nanryen ditou, ki’n fer li pour dimoun reste lo la.” (Izai 45:18) Tre byento, i pou fer later vin parfe parey i ti ete o  konmansman. Vi ki son drwa pour dirize dan sa bon fason pou’n ganny etablir, i pou kapab byen servi son gran pouvwar pour ki son lavolonte i ganny fer e finalman konpletman detri tou lemal. (Izai 55:10, 11) Dan lapriyer Notreper, Zezi Kri ti demande pour Bondye fer sa. Zezi ti ansenny nou pour priy koumsa: “Ki ou lavolonte i ganny akonpli lo later parey dan lesyel.” (Matye 6:9, 10) Ki sa enplike?

Lavolonte Bondye pour later

En laspe dan lavolonte Bondye se ki “bann dimoun ki annan limilite pou posed later.” (Psonm 37:9-11, 29; Proverb 2:21, 22) Zezi Kri “pou delivre sa enn pov ki pe kriy o sekour, osi sa enn ki pe soufer.” I pou sov zot “avek vyolans ek lopresyon.” (Psonm 72:12-14) I pou nepli annan lager, ni lanmor, ni larm, ni douler e ni menm okenn soufrans. (Psonm 46:9; Revelasyon  21:1-4) Sa lafoul dimoun ki’n mor pandan tou sa letan ki Bondye in permet soufrans pou ganny resisite pour viv isi lo later. Zot pou annan sa loportinite pour benefisye avek sa bann benediksyon ek lezot ankor.​—Zan 5:28, 29.

Anfet, Zeova pou repar tou domaz ki rebelyon Satan in fer. I pou fer li dan en fason telman konplet ki “bann maler ki’n pase [tou bann keksoz ki anmenn sagrinasyon ek douler ozordi] pou vreman ganny oubliye.” (Izai 65:16-19) Sanmenm ki pou arive dan lavenir akoz Bondye pa koz manti. Tou son bann promes i vin vre. Lavi pou nepli “vid e tay deryer divan.” (Eklezyast 2:17, The New English Bible) O kontrer, lavi pou annan sa vre sans.

Me la konmela? Eski ou lavi pou annan sa vre sans ozordi si ou konn sa ki Labib i dir e konpran plan Bondye pour later? Sa dernyen lartik pou egzamin sa kestyon.

[Not anba lo paz]

[Portre lo paz 6]

Eski nou devret kit later pour viv en lavi ki fer plis sans?

Pour plizyer syek, bann dimoun ki pa konn plan Bondye pour later in ansennyen ki nou devret kit sa later pour nou kapab viv en lavi ki fer sans.

Serten i dir ki nanm ti “viv en lavi pli siperyer avan ki zot ti antre dan lekor imen.” (New Dictionary of Theology) Lezot i dir ki nanm ti ganny “anprizonnen dan en lekor imen konman en pinisyon pour bann pese ki i’n fer ler i ti ankor dan lesyel.”​—Cyclopedia of Biblical, Theological, and Ecclesiastical Literature.

Bann filozof Grek parey Socrates ek Plato ti ansenny sa lide: Zis ler en nanm i sorti dan en lekor imen kot i ti’n ganny anprizonnen ki i pou vreman kapab ganny libere avek “dout, enbesilite, lafreyer, move dezir ek lezot move konportman ki akable limanite” e i pou kapab reste “ansanm avek bann bondye pour leternite.”​—Plato’s Phaedo, 81, A.

Plitar, bann swadizan sef relizye Kretyen ti entrodwir “krwayans [sa bann filozof Grek] lo nanm imortel” dan zot lansennyman.​—Christianity​—A Global History.

Konpar sa bann lide avek trwa keksoz ki Labib i dir:

1. I plan Bondye pour later vin sa landrwa permanan pour bann imen reste, pa en landrwa tanporer pour teste zot pour vwar si zot pou kapab viv avek li dan lesyel. Si Adan ek Ev ti’n obeir lalwa Bondye, zot ti pou ankor vivan isi dan Paradi lo later.​—Zenez 1:27, 28; Psonm 115:16.

2. Laplipar larelizyon i ansennyen ki imen i annan en nanm, en keksoz ki reste dan zot, me Labib i dir en keksoz pli senp. Zonm i en “nanm vivan” ki’n ganny formen avek “lapousyer sorti dan later.” (Zenez 2:7) Labib pa zanmen dir ki nanm i imortel. I dir ki nanm i kapab ganny touye oubyen detrir, setadir i nepli egziste. (Psonm 146:4; Eklezyast 9:5, 10; Ezekyel 18:4, 20) Adan, sa premye zonm ti sirman mor e retourn dan lapousyer kot i ti sorti. I ti zis nepli egziste.​—Zenez 2:17; 3:19.

3. Lespwar pour bann imen viv a lavenir pa depan lo si zot annan en nanm imortel ki pou al viv dan lesyel me lo promes Bondye ki pou resisit bann dimoun pour zot viv lo later dan Paradi.​—Danyel 12:13; Zan 11:24-26; Akt 24:15.