Eski ou ti konnen?

Dan letan Zezi, ki mannyer bann sef relizye Zwif ti konsider bann senp dimoun?

▪ Dan premye syek N.L., bann gran personnaz dan lasosyete e dan larelizyon ti mepriz bann ki ti napa bokou ledikasyon. Dapre Labib, bann Farizyen ti dir: “Sa lafoul pa konn Lalwa Moiz e zot en bann dimoun modi.”​—Zan 7:49.

Dapre serten lenformasyon ki pa sorti dan Labib, serten gran personnaz dan lasosyete ti mepriz zot e apel sa bann dimoun ʽam ha·ʼaʹrets, oubyen “peizan.” O konmansman, sa term ti en mo respektab pour bann sitwayen en serten rezyon oubyen pei. I ti kapab bann pov, bann dernyen dimoun e osi bann dimoun enportan.​—Zenez 23:7, not anba paz; 2 Lerwa 23:35; Ezekyel 22:29.

Me selman, dan lepok Zezi, sa mo ti ganny servi pour abes bann dimoun ki ti swadizan pa konn nanryen lo Lalwa Moiz, oubyen ki pa ti arive swiv tou sa bann lareg zonm. Misna (en liv avek diferan leksplikasyon ki’n vin baz en lot liv ki apel Talmid) i averti lo danze pour reste kot lakaz bann ʽam ha·ʼaʹrets. Dapre The Encyclopedia of Talmudic Sages, profeser Meir dan dezyenm syek ti dir: “Kan en zonm i fer son fiy marye avek en ʽam-ha·ʼaʹrets i konmsi i’n anmar li e met li devan en lyon, pour li ganny devore.” Talmid i osi sit en lot profeser ki dir ki bann dimoun “san ledikasyon pa pou ganny resisite.”

Dan Labib, ki sa mo Sezar i vedir?

▪ Sezar ti sinyatir Gayis Zilis Sezar, ki ti ganny apwente konman diktater Ronm lannen 46 A.N.L. Bann lanperer Ronm ki ti swiv apre sa ti adopte sa non Sezar e trwa parmi zot i ganny mansyonnen dan Labib, Ogis, Tiber ek Klod.​—Lik 2:1; 3:1; Akt 11:28.

Lannen 14 N.L., Tiber ti vin lanperer e i ti dirize pandan tou sa letan ki Zezi ti pe akonplir son minister. Li ki ti sa Sezar ki ti o pouvwar kan Zezi ti pe reponn en kestyon lo taks an dizan: “Rann Sezar sa ki pour Sezar, e Bondye sa ki pour Bondye.” (Mark 12:17) I evidan ki Zezi pa ti anvi ki son larepons i aplik zis pour Tiber. Me plito, “Sezar” ti pe reprezant lotorite sivil oubyen Leta.

Apepre lannen 58 N.L., ler zapot Pol ti pe al ganny zize dan en fason enzis, i ti egzers son drwa konman en sitwayen Romen par fer apel avek Sezar. (Akt 25:8-11) Par fer sa, Pol pa ti pe neseserman demande pour ganny zize par Nero ki ti lanperer sa letan, me par lakour siprenm.

Sezar konman en sinyatir ti vin telman popiler an rapor avek bann dirizan ki menm a lafen renny sa dernyen lanperer dan fanmir Sezar, sa non ti reste konman tit en dimoun dan lotorite.

[Portre lo paz 30]

Denye an larzan avek portre Tiber