Annou tay sa lakours avek landirans

“Avek determinasyon [oubyen “landirans,” NW] annou fer sa lakours ki i’n propoz nou.”​—EBR. 12:1.

1, 2. Avek kwa zapot Pol ti konpar lavi en Kretyen?

DAN bokou landrwa, tou le-z-an i annan bann maraton. Bann pli bon atlet i annan zis en sel lobzektif, ranport laviktwar dan sa paryaz taye. Me, pour bokou lezot ki partisipe zot bi se zis pour fini sa lakours.

² Dan Labib, lavi en Kretyen i ganny konpare avek en lakours. Dan son premye let pour kongregasyon Korent, zapot Pol ti servi sa legzanp avek bann frer ek ser Kretyen. I ti ekrir: “Zot pa konnen ki dan en lakours tou i taye, me zis enn ki ganny premye pri. Tay dan en fason pour ganny sa pri.”​—1 Kor. 9:24.

3. Akoz zapot Pol ti mansyonnen ki dan en lakours zis en atlet ki ranport laviktwar?

³ Eski Pol ti pe esey dir ki zis en Kretyen ki ti pou ganny sa pri lavi eternel e ki tou larestan ti pou’n tay anven? Ditou! Bann atlet dan bann konpetisyon ti fer bokou legzersis ek zefor avek bi pour ganny en lakours. Zapot Pol ti oule ki son bann frer Kretyen i fer bokou zefor zot osi pour ganny lavi eternel. Si zot ti fer sa, zot ti pou annan lespwar pour ganny sa pri, setadir lavi. Dan sa lakours Kretyen, tou sa ki pas laliny finisyon i ranport pri.

4. Ki nou bezwen egzaminen konsernan sa lakours ki devan nou?

⁴ Sa bann parol i ankourazan, me i osi fer reflesir bann ki’n konmans tay dan sa lakours pour lavi ozordi. Akoz? Parski sa pri, lavi dan lesyel ouswa dan Paradi lo later i ekstraordiner. I vre, sa lakours i long e difisil, i annan bokou lobstak, distraksyon ek danze. (Mat. 7:13, 14) Malerezman, serten in ralanti, abandonnen ouswa tonbe dan sa lakours. Ki serten latrap ek danze ou kapab rankontre dan sa lakours pour lavi? Ki mannyer ou kapab evit zot? Ki ou kapab fer pour fini e ranport laviktwar dan sa lakours?

Landirans i neseser pour ranport laviktwar

5. Ki Pol ti dir lo lakours dan Ebre 12:1?

⁵ Ler i ti ekrir bann Kretyen Zerizalenm ek Zide, Pol ti koz lo bann lakours ankor enn fwa. (Lir Ebre 12:1.) I pa ti zis koz lo rezon akoz nou devret taye dan sa lakours, me osi lo sa ki nou devret fer pour ranport laviktwar. Avan ki nou egzamin konsey zapot Pol pour bann Kretyen Ebre pour vwar ki leson nou kapab tire, annou vwar kwa ki ti pous Pol pour ekrir sa let e ki i ti pe ankouraz son lekter pour fer.

6. Ki presyon bann sef relizye ti met lo bann Kretyen?

⁶ Bann Kretyen dan premye syek, sirtou sa bann ki ti pe reste Zerizalenm ek Zide, ti pe fer fas avek bokou leprev ek difikilte. Zot ti anba en kantite presyon avek bann sef relizye Zwif ki ti ankor annan en kantite lenfliyans lo lepep. Pli boner, sa bann sef relizye ti reisi kondann Zezi konman en rebel kont gouvernman e touy li konman en kriminel. Sirman, zot pa ti pou aret opoz bann Kretyen. Dan liv Akt, nou lir plizyer resi kot bann premye Kretyen ti  ganny menase e atake enn deryer lot, deswit apre ki sa levennman mirakile ti arive Lapannkot lannen 33 N.L. Sa pa ti fer lavi fasil pour sa bann Kretyen fidel.​—Akt 4:1-3; 5:17, 18; 6:8-12; 7:59; 8:1, 3.

7. Ki letan difisil bann Kretyen ki Pol ti ekrir ti pe viv ladan?

⁷ Sa bann Kretyen ti pe osi viv dan sa lepok zis avan lafen sistenm Zwif. Zezi ti’n fini dir zot konsernan destriksyon ki ti pou vin lo nasyon Zwif enfidel. I ti osi koz avek son bann disip lo serten levennman ki ti pou arive avan lafen, e i ti donn zot bann lenstriksyon detaye lo sa ki zot ti bezwen fer pour zot kapab sirviv. (Lir Lik 21:20-22.) Ki zot ti pou bezwen fer? Zezi ti reponn: “Fer byen atansyon zot menm, pangar zot vizilans i ganny detournen avek festen, labwason ek traka lavi. Fer atansyon sa zour i sirprann zot parey en pyez.”​—Lik 21:34.

8. Kwa ki ti’n kapab fer serten Kretyen ralanti ouswa abandonn sa lakours Kretyen?

⁸ Letan ki Pol ti ekrir son let pour bann Ebre, preski 30 an ti’n fini pase depi ler Zezi ti’n donn sa lavertisman. Ki lefe tou sa letan ki zot ti’n bezwen espere ti annan lo bann Kretyen? Serten ti tonbe akoz presyon ek distraksyon dan lavi tou le zour e zot pa ti progrese spirityelman, en keksoz ki ti’n kapab fortifye zot. (Ebr. 5:11-14) Aparaman, lezot ti santi ki lavi ti pou bokou pli fasil si zot ti viv parey lamazorite Zwif sa letan. Apre tou, sa bann Zwif pa ti’n konpletman abandonn Bondye, zot ti pe swiv Lalwa lo en serten degre. Lezot Kretyen ti vreman krwar ouswa les zot ganny enfliyanse par serten endividi dan kongregasyon ki ti ensiste ki zot swiv Lalwa Moiz ek lezot tradisyon. Ki Pol ti’n kapab dir pour ed son bann frer ek ser Kretyen reste vizilan spirityelman e andire dan sa lakours?

9, 10. (a) Ver lafen Ebre sapit 10, ki lankourazman Pol ti donnen? (b) Akoz Pol ti ekrir lo sa ki bann temwen dan letan lontan ti fer pour demontre zot fidelite?

⁹ I enteresan pour not lafason ki Pol, anba lenspirasyon Bondye, ti fer zefor pour fortifye bann Kretyen Ebre. Dan sapit 10 son let, Pol ti fer kler ki Lalwa ti zis “en lonbraz bann bon keksoz ki pe vini” e i ti montre valer sakrifis Kris. Ver lafen sa sapit, Pol ti ankouraz son bann lekter an dizan: “Zot bezwen annan perseverans [oubyen “landirans,” NW] pour akonpli lavolonte Bondye e resevwar sa ki i’n promet zot. Parey Lekritir i dir: ‘Ankor en pti pe letan, en pti pe menm e sa enn ki pe vini pou arive e i pa pou tarde.’”​—Ebr. 10:1, 36, 37.

¹⁰ Dan Ebre sapit 11, Pol ti eksplike ki si sa vre lafwa dan Bondye. I ti donn legzanp bann zonm ek fanm ki ti annan lafwa dan letan lontan. Akoz i ti bezwen al koz lo lafwa kan i ti pe eksplike ki si sa landirans? Sa zapot ti konnen ki pour son bann frer ek ser spirityel demontre vre lafwa, zot ti pou bezwen annan kouraz ek landirans. Bon legzanp sa bann serviter fidel Zeova ti pou fortifye sa bann Ebre e ed zot fer fas avek bann leprev ek difikilte. Apre ki i ti’n montre ki mannyer sa bann serviter fidel ti demontre lafwa dan lepase, Pol ti kapab dir: “Parski nou ganny antoure avek en si gro nyaz temwen, debaras nou avek tou fardo ki zenn nou e tou pese ki anvlop nou si fasilman e avek determinasyon [oubyen “landirans,” NW] annou fer sa lakours ki i’n propoz nou.”​—Ebr. 12:1.

‘En gro nyaz temwen’

11. Ki lefe i kapab annan lo nou si nou kontinyen mazin legzanp sa “nyaz temwen”?

¹¹ Sa ‘gro nyaz temwen’ pa ti la konman bann spektater ki ti zis get lezot pe taye dan sa lakours, oubyen ki ti’n vin la pour get zot  atlet ouswa tim prefere ranport laviktwar. Plito, zot ti bann partisipan dan sa lakours. Zot ti’n tay dan sa lakours ziska finisyon e zot ti’n ranport laviktwar. Menm si zot in fini mor, zot ti kapab ganny konpare avek bann atlet eksperyanse ki kapab ankouraz bann nouvo dan sa lakours. Zis mazinen ki mannyer en nouvo dan sa lakours ti pou santi si i ti konnen ki bann atlet pli eksperyanse in vin get li. Pa i ti pou santi li pouse pour fer zefor e donn son meyer! Sa bann temwen dan lepase in prouve ki menm si lakours i difisil, i posib pour ranport laviktwar. Alor, si bann Kretyen Ebre ti kontinyen mazin legzanp sa “nyaz temwen,” sa ti pou ed zot tay sa lakours avek landirans, parey nou osi nou kapab fer ozordi.

12. Ki mannyer nou kapab benefisye avek bann legzanp ki Pol ti mansyonnen?

¹² Bokou sa bann serviter fidel ki Pol ti mansyonnen ti dan preski menm sirkonstans ki pour nou. Noe, par egzanp, ti viv zis avan Deliz. Nou pe viv dan en letan kot sa lemonn i pros pour ariv ver son lafen. Abraam ek Sara ti ganny demande pour kit zot pei natal akoz vre ladorasyon e pour esper realizasyon plan Bondye. Nou osi nou ganny ankouraze pour aret mazin zis nou lekor e pou ganny laprouvasyon Zeova ek son bann benediksyon. Moiz ti travers en dezer ki fer per pour al ver Later Promiz. Nou osi nou bezwen viv dan sa lemonn difisil anmezir ki nou pe esper sa nouvo lemonn. Nou kapab aprann bokou si nou medit lo sa ki sa bann dimoun ti pas atraver, kot zot ti reisi ouswa tonbe, zot pwen for ek zot pwen feb.​—Rom. 15:4; 1 Kor. 10:11.

Ki mannyer zot ti reisi?

13. Ki difikilte Noe ti rankontre e kwa ki ti ed li sirmont zot?

¹³ Kwa ki ti ed sa bann serviter Zeova pour andire e reisi dan sa lakours? Get sa ki Pol ti ekrir lo Noe. (Lir Ebre 11:7.) Noe “pa ti ankor vwar” sa “deliz [ki ti pou] detrir tou sa ki annan lafors lavi.” (Zen. 6:17) Sa ti en keksoz ki pa ti’n zanmen arive oparavan. Toudmenm, Noe pa ti mazinen ki sa pa ti pou zanmen arive oubyen ki i ti enposib. Akoz? Parski i ti annan lafwa ki Zeova ti pou fer sa ki i ti’n dir. Noe pa ti santi ki sa ki i ti’n ganny demande pour fer ti tro difisil. Plito, “i ti fer egzakteman sanmenm.” (Zen. 6:22) Zis mazin tou sa ki Noe ti bezwen fer. I ti bezwen konstri lars, rasanble bann zannimo, anmas sifizaman manze pour zannimo ek dimoun, pres en mesaz lavertisman e gard son fanmir for spirityelman. Sa pa ti en pti louvraz pour li kapab fer “egzakteman” sa ki Zeova ti demann li. Me, lafwa ek landirans Noe ti fer li ek son fanmir ganny lavi ek bann benediksyon.

14. Ki leprev Abraam ek Sara ti bezwen andire e ki leson nou kapab tire?

¹⁴ Apre sa, Pol ti koz lo Abraam ek Sara parmi sa “nyaz temwen.” Zot ti bezwen abandonn sa lavi ki zot ti’n abitye avek Our e zot pa ti konnen ki lavenir ti’n rezerve pour zot. Zot en legzanp lafwa ek lobeisans remarkab dan bann moman difisil. An rapor avek tou bann sakrifis ki Abraam ti pare pour fer pour vre ladorasyon, i toutafe apropriye ki i ti ganny apele ‘papa tou sa ki annan lafwa.’ (Rom. 4:11) Pol pa ti donn tou detay akoz son bann lekter ti konn tre byen lavi Abraam. Toudmenm, leson ki Pol ti anvi nou tire i vreman enportan: “Zot tou, [enkli Abraam ek son fanmir] zot in mor dan lafwa, san ki zot i’n resevwar sa bann keksoz ki zot in ganny promet, me zot in war de lwen e zot in rezoui. Zot ti deklare ki zot ti bann etranze e bann egzile lo later.” (Ebr. 11:13) Vreman, zot lafwa dan Bondye e zot relasyon personnel avek li ti ed zot tay dan sa lakours avek landirans.

15. Kwa ki ti motiv Moiz pour viv sa kalite lavi?

 ¹⁵ Moiz i en lot serviter Zeova ki en legzanp parmi sa “nyaz temwen.” Moiz ti kit deryer en lavi konfortab e privilezye, “i ti swazir ganny maltrete ansanm avek pep Bondye.” Kwa ki ti motiv li pour fer sa? Pol ti reponn: “Son regar ti fikse lo rekonpans dan lavenir. . . .  I ti reste ferm konmsi i ti pe war sa enn ki envizib.” (Lir Ebre 11:24-27.) Moiz pa ti les li ganny antrennen pour li “zouir pese pandan en pti pe letan.” Bondye ek son bann promes ti sitan reel pour Moiz ki i ti demontre kouraz ek landirans ekstraordiner. I ti donn tou son kouraz pour gid e tir bann Izraelit Lezip e anmenn zot ver Later Promiz.

16. Akoz Moiz pa ti dekouraze ler i pa ti antre dan Later Promiz?

¹⁶ Parey Abraam, Moiz pa ti vwar lakonplisman bann promes Bondye ler i ti ankor vivan. Ler bann Izraelit ti pros pour antre dan Later Promiz, Moiz ti ganny dir: “Ou pou vwar sa pei dan lwen, me ou ou pa pou al laba dan sa pei ki mon pe donn bann garson Izrael.” Sa ti akoz pli boner, li ek Aaron ti’n pran lakoler akoz latitid rebel pep Izrael e zot pa ti “arive ranpli zot devwar anver [Bondye] parmi bann garson Izrael kot delo Meriba.” (Det. 32:51, 52) Eski Moiz ti dekouraze oubyen ankoler? Non. I ti beni sa pep e i ti dir zot sa parol: “Ou ere O Izrael! Lekel ki parey ou, en pep ki Zeova in sove, li ki en boukliye pour ed ou e sa Enn ki ou gran lepe?”​—Det. 33:29.

Leson pour nou

17, 18. (a) An rapor avek sa lakours pour lavi, ki nou kapab aprann avek sa “nyaz temwen”? (b) Ki pou ganny diskite dan lot lartik?

¹⁷ Apre ki nou’n revwar lavi serten serviter fidel Bondye parmi sa “nyaz temwen,” i  evidan ki nou bezwen annan en lafwa total dan Bondye ek son bann promes si nou oule tay dan sa lakours ziska lafen. (Ebr. 11:6) Nou napa en lafwa anler anler, me nou annan en lafwa solid ki annan en lefe lo nou lavi. Kontrerman avek bann ki napa lafwa, bann serviter Zeova i vwar pli lwen ki zot lavi la konmela. Nou kapab vwar “sa enn ki envizib” e tay sa lakours avek landirans.​—2 Kor. 5:7.

¹⁸ Sa lakours Kretyen pa sitan fasil. Toudmenm, i posib pour fini e ranport laviktwar dan sa lakours. Dan lot lartik, nou pou vwar lezot led ki disponib.

Eski ou kapab eksplike?

• Akoz Pol ti koz bokou lo bann temwen fidel dan lepase?

• Ki lankourazman nou kapab gannyen kan nou mazin sa “nyaz temwen”?

• Ki ou’n aprann avek legzanp bann temwen fidel parey Noe, Abraam, Sara ek Moiz?

[Kestyon]

[Portre lo paz 22]

Abraam ek Sara ti pare pour kit deryer zot lavi konfortab Our