Eski ou pe les Zeova vin ou par?
Eski ou pe les Zeova vin ou par?
“Rod plito Rwayonm Bondye ek son lazistis, e limenm i a donn zot anplis tou lezot keksoz osi.”—MAT. 6:33.
1, 2. (a) Ki “Izrael Bondye” ki ganny mansyonnen dan Galat 6:16 i reprezante? (b) Ki sa “douz tribi Izrael” ki ganny mansyonnen dan Matye 19:28 i reprezante?
LER ou vwar sa mo Izrael dan Labib, kwa ki vin dan ou lespri? Eski ou mazin Zakob, garson Izaak ki pli tar ti ganny apele Izrael? Ouswa ou mazin nasyon Izrael, desandans Zakob? Kekfwa ou ti kapab mazin Izrael spirityel osi. Kan sa mo Izrael i ganny servi dan en sans senbolik, i souvan pe refer avek “Izrael Bondye,” andotmo sa 144,000 ki’n ganny swazir avek lespri sen pour vin bann pret ek lerwa dan lesyel. (Gal. 6:16, NW; Rev. 7:4; 21:12) Me i enteresan pour not sa ki Matye 19:28 i dir konsernan sa 12 tribi Izrael.
2 Zezi ti dir: “Kan Fis-de-Lonm pou asiz lo son tronn laglwar, dan sa monn nouvo, zot ki’n swiv mwan pou osi asiz lo douz tronn pour ziz sa douz tribi Izrael.” Dan sa verse, se “sa douz tribi Izrael” ki pou ganny zize par bann Kretyen swazir, bann disip Kris, e zot pou kapab ganny lavi eternel dan Paradi lo later. Zot pou benefisye avek servis sa 144,000 pret.
3, 4. Ki bon legzanp bann Kretyen swazir fidel in kite?
3 Parey bann pret ek Levit dan letan lontan, bann Kretyen swazir ozordi i konsider zot servis konman en privilez. (Nom. 18:20) Bann Kretyen swazir pa pe ekspekte ganny en teritwar oubyen landrwa pour reste lo later konman en leritaz. O kontrer, zot kontan pour vin bann lerwa ek pret dan lesyel avek Zezi Kri. Bann Kretyen swazir pou kontinyen desarz sa responsabilite pour Zeova parey nou kapab lir dan Revelasyon 4:10, 11 konsernan zot.—Ezek. 44:28.
4 Ler zot lo later, bann Kretyen swazir i viv zot lavi dan en fason ki montre ki Zeova i zot par. Pour zot, servi Zeova i sa keksoz pli enportan. Zot demontre lafwa dan sakrifis Zezi e zot swiv li kontinyelman, koumsa zot asire ki zot pou ganny zot rekonpans. (2 Pyer 1:10, NW) Zot sirkonstans ek abilite i diferan. Selman, zot limitasyon pa en leskiz pour zot fer zis en ptigin dan servis Bondye. O kontrer, servis Bondye i zot priyorite e zot fer tou sa ki zot kapab dan son servis. Zot donn en bon legzanp sa bann ki annan lespwar pour viv lo later.
5. Ki mannyer tou bann Kretyen i kapab annan Zeova konman zot par e akoz i kapab difisil?
5 Ki swa nou annan lespwar pour viv lo later ouswa dan lesyel, nou devret ‘aret mazin zis nou menm e pran nou poto matir e kontinyen swiv Kris.’ (Mat. 16:24, NW) Plizyer milyon dimoun ki pe esper avek enpasyans pour viv dan Paradi lo later pe ador Bondye e swiv Kris dan sa menm fason. Zot pa fer zis en ptigin kan zot santi zot kapab fer plis. Bokou in santi zot pouse pour senplifye zot lavi pour vin pionye. Lezot i fer pionye pour en serten kantite mwan dan en lannen. Lezot ankor ki pa kapab fer pionye i donn zot meyer dan predikasyon. Zot devoue parey Mari ki ti vid lesans lo Zezi. Zezi ti dir sa lo li: “I’n fer en gran keksoz pour mwan. I’n fer sa ki i ti kapab.” (Mark 14:6-8, nou ki’n met an italik.) I pa toultan fasil pour fer tou sa ki nou kapab akoz nou pe viv dan en lemonn ki pe ganny dirize par Satan. Selman, nou fer bokou zefor e nou met konfyans dan Zeova. Annou egzamin kat domenn kot nou kapab fer sa.
Rod plito Rwayonm Bondye
6. (a) Ki mannyer bann dimoun an zeneral i montre ki zot par i selman dan sa lavi? (b) Akoz i pli bon imit David?
6 Zezi ti ansenny son bann disip pour rod plito Rwayonm ek ladrwatir Bondye. An zeneral, bann dimoun dan lemonn i rod zot prop lentere. Labib i dir ki zot “bann zonm sa sistenm ki zot par i dan sa lavi.” (Lir Psonm 17:1, 13-15. *) Bokou pa fatig zot avek zot Kreater, zot plito dedye zot zefor pour viv en lavi konfortab, annan en fanmir e kit en leritaz deryer. Pour zot, zot par i selman dan sa lavi. De lot kote, David ti enterese pour annan en “bon non” devan Zeova, parey son garson ti dir pli tar. (Ekle. 7:1, not.) Zis parey Azaf, David ti santi ki annan Zeova konman son Zanmi ti sa pli bon keksoz olye met son lentere premye dan son lavi. I ti kontan pour mars avek Bondye. Dan nou letan, bokou Kretyen in met bann keksoz spirityel avan zot lanplwa.
7. Ki benediksyon en frer ti gannyen lefet ki i ti met Rwayonm premye?
7 Annou get legzanp Jean-Claude ki sorti Repiblik Sant Lafrik. I en ansyen ki’n marye e annan trwa zanfan. Dan sa pei, i pa fasil pour ganny en louvraz e laplipar dimoun pou fer nenport kwa pour gard zot travay. En zour, direkter prodiksyon ti dir Jean-Claude ki i ti pou bezwen travay aswar, konmans 6:30 diswar tou le zour. Jean-Claude ti eksplike ki i pa zis pran swen avek son fanmir lo plan materyel me osi lo plan spirityel. I ti osi dir ki i ti annan sa responsabilite pour ed kongregasyon. Ki sa direkter ti reponn? “Si ou’n ase sanse pour annan en louvraz, ou devret bliy lezot keksoz parey ou madanm, ou zanfan ek ou problenm. Ou bezwen dedye ou lavi dan ou louvraz, zis ou louvraz. Fer ou swa: ou larelizyon ouswa ou travay.” Ki ou ti pou’n fer? Jean-Claude ti realize ki si i ti perdi son louvraz, Bondye ti pou pran swen avek li. I ti pou annan ankor bokou pour fer dan servis Bondye e Zeova ti ed li pran swen avek bezwen materyel son fanmir. Alor, i ti al son renyon lasemenn e apre sa i ti met li pare pour al travay. I pa ti asire si i ti pou ankor annan son louvraz. Lanmenm la ki i ti ganny en koudtelefonn. Son direkter ti’n ganny pouse e nou frer ti ankor annan son louvraz.
8, 9. Ki mannyer nou kapab imit bann pret ek bann Levit?
8 Serten ki ti’n kapab perdi zot louvraz ti kapab demann zot lekor: ‘Eski mon pou kapab pran swen avek mon fanmir?’ (1 Tim. 5:8) Ki swa ou’n deza trouv ou dan sa sityasyon ouswa non, tre probab ou asire ki ou pa pou zanmen dezapwente si Bondye i vin ou par e si ou apresye en kantite privilez ki ou annan pour servi li. Ler Zezi ti demann son bann disip pour “rod plito Rwayonm Bondye,” i ti asir zot ki “[Bondye ti pou] donn zot anplis tou lezot keksoz osi” tel ki manze, bwar ek lenz.—Mat. 6:33.
9 Mazin bann Levit ki pa ti’n ganny okenn bout later konman leritaz dan Later Promiz. Vi ki vre ladorasyon ti zot priyorite, zot ti depan lo Zeova pour pran swen avek zot, akoz i ti’n dir zot: “Se mwan ki ou par.” (Nom. 18:20) Menm si nou pa servi dan en tanp literal parey bann pret ek Levit, nou kapab imit zot leta lespri e annan konfyans ki Zeova pou pran swen avek nou. Nou konfyans dan pwisans Bondye pour donn nou sa ki nou bezwen pou vin deplizanpli for anmezir ki lafen i aprose.—Rev. 13:17.
Rod plito ladrwatir Bondye
10, 11. Ki mannyer serten in met konfyans dan Zeova dan domenn lanplwa? Donn en legzanp.
10 Zezi ti demann son bann disip pour kontinyen ‘rod plito ladrwatir Bondye.’ (Mat. 6:33) Sa i enplik met bann standar Zeova lo sa ki byen ek sa ki mal avan bann standar imen. (Lir Izai 55:8, 9. *) Ou kapab rapel ki dan lepase serten dimoun ti kiltiv oubyen vann taba, form lezot pour al lager ouswa fer e vann bann zarm lager. Apre ki zot ti konn laverite, laplipar ti deside pour sanz zot louvraz e zot ti pare pour batize.—Iza. 2:4; 2 Kor. 7:1; Gal. 5:14.
11 Andrew i en legzanp. Ler zot ti aprann laverite zot de son madanm, zot ti deside pour servi li. Andrew ti vreman kontan son louvraz, me i ti kite. Akoz? Parski i ti pe travay pour en lorganizasyon ki siport lager e i ti determinen pour rod plito ladrwatir Bondye. Ler Andrew ti kit sa louvraz, i ti annan de zanfan, i ti napa reveni e i ti annan zis ase larzan pour detrwa mwan. Dapre pwennvi imen, i ti kapab konmsi i ti napa ‘leritaz.’ I ti annan konfyans dan Zeova e i ti al rod en louvraz. Ler zot mazin sa letan, Andrew ek son fanmir i kapab dir fransman ki lanmen Zeova pa tro kourt. (Iza. 59:1) Vi ki zot ti gard zot lavi senp, Andrew ek son madanm ti finalman kapab konmans servis a plen tan. I ti dir: “I ti annan letan kot nou ti enkyet pour larzan, lakaz, lasante ek lavyeyes, me Zeova in toultan la dan nou kote. . . . Nou kapab dir ki servi Zeova avek en konfyans total dan li i san okenn dout sa pli bon keksoz ki en imen i kapab fer ki pou anmenn bokou byenfe.” *—Ekle. 12:13.
12. Ki kalite ki neseser pour met bann standar Bondye premye? Donn legzanp lokal.
12 Zezi ti dir son bann disip: “Si zot annan lafwa groser en lagrenn moutard zot a kapab dir avek sa montanny, ‘Ale, sanz plas al laba!’ e i pou ale. E napa nanryen ki pou enposib pour zot.” (Mat. 17:20) Eski ou ti pou kapab met bann standar Bondye premye menm si sa i anmenn difikilte pour ou? Si ou annan dout ki ou kapab fer sa, koz avek lezot dan kongregasyon. Ou kapab asire ki ou pou vwar ki i pou ankourazan spirityelman pour antann zot leksperyans.
Annou apresye bann provizyon spirityel sorti kot Zeova
13. Ler nou fer bokou zefor dan servis Zeova, ki nou kapab ekspekte spirityelman?
13 Si ou kontan ou privilez pour servi Zeova, ou kapab asire ki i pou pran swen avek ou bann bezwen materyel e spirityel, zis parey i ti fer pour bann Levit. Mazin en pe David. Menm si i ti dan en kavern, i ti kapab depan lo Bondye pour pran swen avek li. Nou osi nou kapab depan lo li, menm ler nou pa vwar solisyon pour nou problenm. Rapel ki Azaf ti konpran sa ki ti pe trakas li kan i ti al dan “gran sanktyer Bondye.” (Ps. 73:17) Pareyman, nou bezwen tourn ver sa Enn ki pran swen avek nou spirityelman. Dan sa fason, nou demontre nou lapresyasyon pour sa privilez ki nou annan pour servi Bondye nenport ki sityasyon nou ladan. Alor, kan nou fer sa nou pe les Zeova vin nou par.
14, 15. Ki mannyer nou devret reazir kan i annan leklersisman lo en serten lansennyman Labib e akoz?
14 Ki ou reaksyon ler Zeova, Sours lalimyer spirityel, i donn bann leklersisman lo bann keksoz profon Bondye ki ganny trouve dan Labib? (1 Kor. 2:10-13) Nou trouv en bon legzanp atraver reaksyon zapot Pyer kan Zezi ti dir sa bann ki ti ekout li: “Si zot pa manz laser Fis-de-Lonm, e bwar son disan, zot pa pou annan lavi dan zot.” Bokou ki pa ti konpran sa parol ti dir: “Sa lansennyman i dir. Lekel ki kapab aksepte sa?” Alor, zot ti “dekile.” Me Pyer ti dir: “Senyer, kot lekel nou pou ale? Ou annan parol lavi eternel.”—Zan 6:53, 60, 66, 68.
15 Pyer pa ti neseserman konpran sa ki Zezi ti pe dir lo manz Son laser e bwar Son disan. Me sa zapot ti annan konfyans ki Bondye pou donn lalimyer spirityel. Ler bann lansennyman lo laverite i vin deplizanpli kler, eski ou esey konpran bann rezon dapre Labib pour sa azisteman? (Prov. 4:18) Bann premye Kretyen Bere ti resevwar Parol Bondye “avek bokou lentere. Toulezour zot ti etidye Lekritir.” (Akt 17:11) Si ou imit zot, ou pou ogmant ou lapresyasyon pour ou privilez pour servi Zeova e annan li konman ou par.
Marye zis selon Senyer
16. Ki mannyer Bondye i kapab vin nou par si nou obeir sa ki 1 Korentyen 7:39 i dir?
16 En lot domenn kot bann Kretyen i montre ki zot reste konsantre lo plan Bondye, i kan zot swiv gidans Labib pour marye selman “selon Senyer.” (1 Kor. 7:39) Bokou i pli kontan reste selibater ki rezet sa konsey Bondye. Bondye i pran swen avek sa bann frer ek ser. Ki David ti fer ler i ti paret ki personn pa ti pe ed li e ki i ti santi li tousel? I ti dir: “Devan [Bondye] mon ti kontinyen devid mon konsern. Devan li mon ti kontinyen dir mon bann lenkyetid, kan mon lespri ti pe afebli dan mwan.” (Ps. 142:1-3) Petet Zeremi osi ti santi parey, i ti servi Bondye fidelman pour plizyer dizenn lannen konman en selibater. Sirman, ou pou anvi etidye son legzanp parey i ganny eksplike dan sapit 8 dan liv God’s Word for Us Through Jeremiah.
17. Ki mannyer en ser selibater ti fer fas avek bann moman kot i santi li tousel?
17 En ser Leta-z-ini ti dir: “Mon pa’n zanmen anvi reste selibater. Mon pare pour marye si mon zwenn sa bon dimoun. Mon manman ki pa Temwen in esey konvenk mwan pour marye avek nenport ki. Mon ti demann li si i ti pou anvi responsab si mon maryaz pa reisi. Avek letan, i ti vwar ki mon ti annan en louvraz stab, mon ti pe pran swen avek mon lekor e mon ti ere. Alor, i ti aret met presyon lo mwan.” Par ler, sa ser i santi li tousel. I ti dir: “Me selman, mon esey met mon konfyans dan Zeova. I pa zanmen abandonn mwan.” Kwa ki’n ed li devlop konfyans dan Zeova? I reponn: “Lapriyer in ed mwan santi ki Bondye i reel e ki mon pa zanmen tousel. Sa Enn Tre O dan liniver pe ekoute, sanmenm sa mon santi mwan zwaye e annan valer.” I dir: “Mon asire ki i annan plis lazwa pour donnen ki resevwar, alor mon esey mon mye pour donn mon lekor pour lezot san ekspekte nanryen an retour. Kan mon mazinen: ‘Ki mon kapab fer pour ed sa dimoun?’ Mon trouv lazwa.” (Akt 20:35) Wi, dan son ka, Zeova in vin son par, e sa ser i annan sa privilez pour servi li.
18. Dan ki fason ou kapab vin par Zeova?
18 Malgre nenport sityasyon ou kapab trouv ou lekor ladan, Bondye i kapab vin ou par. Si i le ka, ou pou parmi pep ere Bondye. (2 Kor. 6:16, 17) Finalman, ou ki pou vin par Zeova parey i ti le ka avek serten serviter Bondye dan lepase. (Lir Deterononm 32:9, 10. *) Zis parey Izrael ti vin par Bondye parmi bann nasyon, i kapab swazir ou osi konman son par e avek lanmour pran swen avek ou.—Ps. 17:8.
[Not anba lo paz]
^ par. 6 Psonm 17:1, 13-15: “1 O Zeova ekout mon parol ki drwat, port latansyon ler mon pe sipliy ou; ouver ou zorey avek mon lapriyer akoz mon pa’n koz manti.” “13 O Zeova, leve, afront li dan son figir, fer li kourbe, avek ou lepe sov mwan avek sa enn move. 14 O Zeova, avek ou lanmen sov mwan avek bann zonm, avek bann zonm sa sistenm ki zot par i dan sa lavi, ou’n ranpli zot vant avek ou trezor kasyet, bann ki satisfe avek garson e ki anmas pour zot zanfan sa ki zot kit deryer. 15 Kant a mwan, mon pou get ou figir avek ladrwatir, mon pou satisfe ler mon leve pour vwar ou laform.”
^ par. 10 Izai 55:8, 9: “8 La sa ki Zeova i dir, ‘Zot panse pa parey avek mon panse, e zot fason fer pa parey avek mon fason fer. 9 Parski zis parey lesyel i pli o ki later, pareyman mon fason fer i pli siperyer ki zot fason fer, e mon panse i pli siperyer ki zot panse.’”
^ par. 11 Vwar Awake! Novanm 2009 paz 12-14.
^ par. 18 Deterononm 32:9, 10: “9 Pep Zeova i son par, Zakob i sa porsyon ki i erite. 10 I ti finalman trouv li dan en pei dezerte, la kot divan i soufle e personn pa reste. Alor, i ti antour li e pran swen avek li, i ti protez li parey son kannet lizye.”
Ki ou pou reponn?
Ki mannyer ou kapab les Zeova vin ou par
• ler ou rod plito Rwayonm Bondye ek son ladrwatir?
• ler ou demontre lapresyasyon pour nouritir spirityel?
• ler nou obeir lord Bondye pour marye zis selon Senyer?
[Kestyon]
[Ekstre lo paz 16]
Zeova i vin nou par kan son servis i pli enportan pour nou
[Portre lo paz 18]
Legzanp Zeremi i ankourazan
