Zeova i mon par
Zeova i mon par
“Se mwan ki ou par ek ou leritaz parmi bann garson Izrael.”—NOM. 18:20.
1, 2. (a) Ki ti arive avek bann Levit ler Zozye ti partaz later avek bann Izraelit? (b) Ki lasirans Zeova ti donn bann Levit?
APRE ki bann Izraelit ti’n konkerir en bon bout Later Promiz, Zozye ti konmans tir osor e donn sakenn son par dan sa pei. Pour fer sa, i ti travay avek Gran Pret Eleazar ek bann sef tribi. (Nom. 34:13-29) Bann Levit zot, zot pa ti ganny en bout later konman leritaz parey lezot tribi. (Zoz. 14:1-5) Akoz bann Levit pa ti ganny en bout later oubyen en par dan Later Promiz? Eski zot ti’n ganny oubliye?
2 Nou vwar larepons dan sa parol ki Zeova ti dir bann Levit. Pour montre ki i pa ti’n abandonn zot, Zeova ti dir: “Se mwan ki ou par ek ou leritaz parmi bann garson Izrael.” (Nom. 18:20) Pa i ti en zoli lasirans ler Bondye ti dir: “Se mwan ki ou par.” Ki mannyer ou ti pou santi si Zeova ti’n dir ou sa? Kekfwa premye kou ou ti pou dir: ‘Eski mon merite ki Bondye Tou Pwisan i donn mwan en tel lasirans? Eski vreman Zeova i kapab vin par en Kretyen enparfe ozordi?’ Sa bann kestyon i konsern ou ek bann ki ou kontan. Alor, annou vwar ki sa parol ki Bondye ti dir i vedir. Sa pou ed nou konpran pli byen ki mannyer Zeova i kapab vin par bann Kretyen ozordi. Sirtou, ki mannyer Bondye i kapab vin ou par, ki swa ou annan lespwar pour viv dan lesyel ouswa ou pe esper avek enpasyans pour viv lo later dan Paradi.
Sa ki Zeova ti fer pour bann Levit
3. Ki mannyer servis bann Levit ti konmanse?
3 Avan ki Zeova ti donn Lalwa avek bann Izraelit, se bann sef fanmir ki ti servi konman pret. Me, ler Bondye ti donn Lalwa bann Izraelit, i ti fer laranzman pour ki serten dan tribi Levi i vin pret e lezot bann asistan. Ki mannyer sa ti konmanse? Ler Bondye ti touy bann premye ne Lezip, i ti sanktifye bann premye ne Izrael, andotmo, i ti met zot apar konmsi zot ti pour li. Apre sa, Bondye ti fer sa sanzman enportan: “Mon vreman pran bann Levit . . . dan plas tou bann premye ne parmi bann garson Izrael.” Dapre resansman, vi ki i ti annan plis premye ne parmi bann garson Izrael ki bann Levit, en ranson oubyen pri ti bezwen ganny peye pour kouver ladiferans. (Nom. 3:11-13, 41, 46, 47) Dan sa fason, bann Levit ti pou kapab zwe zot rol pour servi Bondye Izrael.
4, 5. (a) Ki i ti vedir pour bann Levit annan Bondye konman zot par? (b) Ki mannyer Bondye ti pran swen avek bann Levit?
4 Pour bann Levit, ki sa privilez ti enplike? Zeova ti dir ki i ti pou vin zot par akoz zot pa ti pou ganny en bout dan Later Promiz, me zot ti ganny konfye avek en privilez spesyal dan servis Bondye. Zot ti pou vin “pretriz Zeova,” sa ti pou zot leritaz. (Zoz. 18:7) Konteks Nonm 18:20 i montre ki zot pa ti pou pov lo plan materyel akoz sa laranzman. (Lir Nonm 18:19, 21, 24. *) Bann Levit ti pou ganny “konman leritaz tou dizyenm an Izrael pour sa servis ki zot [ti] pe rann.” Zot ti pou ganny 10 poursan dan bann prodwi agrikol e dan lakantite nouvo zannimo ki bann Izraelit ti gannyen. An retour, bann Levit ti pou donn en dizyenm dan sa ki zot ti gannyen, “sa ki pli meyer” pour siport bann pret. * (Nom. 18:25-29) Bann pret ti osi ganny “tou bann kontribisyon sen” ki bann garson Izrael ti anmenn pour Bondye kot son landrwa ladorasyon. Bann pret ti alor annan bon rezon pour krwar ki Zeova i donn zot sa ki zot bezwen.
5 I paret ki Lalwa ti mansyonn en dezyenm ladim. Sa ladim ti ganny met apar pour soutenir bann fanmir Izraelit ek bann aktivite ki ti ganny fer kot bann rasanbleman sen tou le-z-an. (Det. 14:22-27) Toudmenm, tou le set an i ti annan en lannen saba e a lafen trwazyenm ek sizyenm lannen pandan sa peryod set an, sa ladim ti ganny mete kot baro pour bann pov ek bann Levit osi. Akoz bann Levit ti ganny sa ladim? Parski zot ti napa en “par ouswa leritaz” dan Izrael.—Det. 14:28, 29.
6. Menm si zot pa ti ganny okenn leritaz dan pei Izrael, kote bann Levit ti pou reste?
6 Petet ou kapab demande: ‘Si bann Levit pa ti ganny okenn bout later konman leritaz, kote zot ti pou reste?’ Bondye ti pran swen avek zot e i ti donn zot 48 lavil enkli later toultour sa bann lavil pour zot zannimo. Sa ti enkli sa sis lavil refiz. (Nom. 35:6-8) Alor, bann Levit ti annan en landrwa reste ler zot pa ti pe servi dan tabernak Bondye. Zeova ti donn annabondans sa bann ki ti volonterman servi li. I kler ki bann Levit ti montre ki Zeova ti zot par parski zot ti met konfyans dan li akoz zot ti konnen ki i kapab e i pou volonterman pran swen avek zot.
7. Ki bann Levit ti bezwen fer pour ki Zeova i vin zot par?
7 Dapre Lalwa, i ti napa okenn pinisyon si en Izraelit pa ti donn ladim. Kan lepep pa ti fer li, bann pret ek Levit ti ganny afekte. Sa ti arive dan letan Neemya kot bann Levit ti bezwen al travay dan zot plantasyon e negliz zot servis dan tanp. (Lir Neemya 13:10. *) Vreman, ler tribi Levi pa ti ganny pran swen lo plan materyel, sa ti annan en lefe lo spirityalite sa nasyon. Deplis, bann pret ek Levit ti bezwen annan lafwa dan Zeova e dan lefet ki Zeova ti pou donn zot sa ki zot bezwen.
Legzanp serten dimoun ki Zeova ti vin zot par
8. Kwa ki ti pe enkyet Azaf sa Levit?
8 Konman en tribi, Zeova ti par bann Levit. Toudmenm, i enteresan pour note ki endividyelman, bann Levit ti servi sa lekspresyon “Zeova i mon par” pour demontre zot devosyon pour Bondye e ki zot ti depan lo li. (Lam. 3:24) Par egzanp, enn ant zot ti en santer ek konpoziter. Nou pou apel li Azaf, menm si petet i ti en manm fanmir Azaf sa Levit ki ti gid bann santer dan lepok Lerwa David. (1 Kron. 6:31-43) Dan Psonm 73 nou lir ki Azaf (ouswa enn son desandans) ti enkyet. I ti zalou bann malfeter ki ti pe reisi dan lavi e i ti menm dir: “Wi, i pour nanryen ki mon’n pirifye mon leker e lav mon lanmen dan linosans.” I paret ki i ti nepli vwar son servis konman en privilez e i ti nepli konsider Zeova konman son par. I pa ti stab spirityelman “ziska ki [i] ti antre dan gran sanktyer Bondye.”—Ps. 73:2, 3, 12, 13, 17.
9, 10. Akoz Azaf ti kapab dir ki Bondye i son “par pour en letan endefini”?
9 Kot sanktyer, Azaf ti konmans vwar keksoz parey Zeova. Petet ou’n annan menm santiman ki li. Kekfwa en serten moman dan ou lavi ou ti aret apresye ou privilez pour servi Bondye e ou ti konmans konsantre lo bann keksoz ki ou ti napa lo plan materyel. Me par etidye Parol Bondye e asiste bann renyon Kretyen, ou ti konmans vwar keksoz parey Zeova. Azaf ti konpran sa ki ti pou arive finalman avek bann move dimoun. I ti reflesir lo sa ki i ti annan e realize ki Zeova ti pou tyonbo son lanmen drwat e gid li. Alor, Azaf ti kapab dir Zeova: “Apard ki ou, mon pa trouv okenn plezir lo later.” (Ps. 73:23, 25) Apre sa, i ti dir ki Zeova i son par. (Lir Psonm 73:26. *) Menm si sa psalmis ti santi ki son ‘lekor ek leker ti’n epwize,’ Bondye ti pou son “par pour en letan endefini.” Sa psalmis ti annan konfyans ki Zeova ti pou rapel li konman en zanmi. I pa ti pou oubliy son fidelite dan son servis. (Ekle. 7:1) Pa sa ti vreman ankourazan pour Azaf! I ti sante: “I bon pour mwan apros avek Bondye. Mon’n pran refiz dan Souvren Senyer Zeova.”—Ps. 73:28.
10 Annan Zeova konman son par ti annan plis valer pour Azaf ki bann keksoz materyel ki i ti gannyen konman en Levit. I ti prensipalman refer avek son servis ek son relasyon avek Zeova, son lanmitye ki i ti annan avek sa enn Tre O. (Zak 2:21-23) Pour gard sa relasyon, sa psalmis ti bezwen kontinyen annan lafwa dan Bondye e annan konfyans dan li. Azaf ti bezwen annan konfyans ki finalman i ti pou ganny son rekonpans pli tar si i ti viv son lavi an armoni avek bann standar Bondye. Ou kapab annan sa menm konfyans dan sa Enn Tou Pwisan.
11. Ki kestyon Zeremi ti demande e ki mannyer i ti ganny reponn?
11 Profet Zeremi ti en lot Levit ki ti vwar ‘Zeova konman son par.’ Annou vwar ki sa ti vedir dan son ka. Zeremi ti reste Anatot, en lavil bann Levit, pros avek Zerizalenm. (Zer. 1:1) En serten moman dan son lavi, Zeremi ti enkyet. I ti demann son lekor akoz bann move dimoun ti pe prospere e bann ki drwat ti pe soufer? (Zer. 12:1) Apre ki i ti’n vwar sa ki ti pe pase Zerizalenm ek Zida, i ti santi li pouse pour ‘konplent’ konsernan sa ki i ti vwar. Zeremi ti konnen ki Zeova i drwat. Sa profet ti ganny larepons kler pour son kestyon kan Zeova ti enspir li pour profetize e ler i ti vwar ki mannyer Zeova ti akonplir sa bann parol profetik. An armoni avek bann profesi, Zeova ti sov “lavi” sa bann ki ti obeir lenstriksyon, tandis ki bann move dimoun ki ti pe prospere pa ti pran kont sa lavertisman e zot ti mor.—Zer. 21:9.
12, 13. (a) Kwa ki ti motiv Zeremi pour dir: “Zeova i mon par” e ki latitid i ti annan? (b) Akoz tou bann tribi Izrael ti bezwen kontinyen espere?
12 Pli tar, ler Zeremi ti get son pei ki ti’n ganny devaste, i ti santi konmsi i ti pe mars dan fernwanr. I ti konmsi Zeova ti’n fer li “asiz konman bann zonm ki’n mor depi lontan.” (Lam. 1:1, 16; 3:6) Zeremi ti’n demann sa nasyon rebel pour retourn ver zot Papa ki dan lesyel, me zot ti’n telman fer sa ki mal ki Bondye ti les Zerizalenm ek Zida ganny detrir. Menm si i pa ti annan tor, Zeremi ti dan sagrinasyon. Malgre sa bann soufrans, sa profet ti rapel mizerikord Bondye. I ti dir: “Nou pa’n disparet.” I vre, Zeova i demontre son mizerikord dan diferan fason sak zour. Lanmenm ler ki Zeremi ti dir: “Zeova i mon par.” I ti kontinyen annan sa privilez pour servi Zeova konman en profet.—Lir Lamantasyon 3:22-24. *
13 Pour 70 an, bann Izraelit pa ti pou reste dan zot pei natal. I ti pou ganny devaste. (Zer. 25:11) Me Zeremi ti dir: “Zeova i mon par.” Sa i montre ki i ti annan konfyans dan mizerikord Bondye e sa ti donn li rezon pour demontre ki i ti pe “kontinyen esper” Bondye. Tou bann tribi Izrael ti perdi zot leritaz, alor zot ti bezwen demontre sa menm latitid ki sa profet. Zeova ti zot sel lespwar. Swasanndis an pli tar, pep Bondye ti retourn dan zot pei e zot ti annan sa privilez pour servi li laba.—2 Kron. 36:20-23.
Zeova ti pou vin en par pour lezot osi
14, 15. Apard bann Levit, lekel ki ti konsider Zeova konman son par e akoz?
14 Azaf ek Zeremi ti sorti dan tribi Levi, me eski zis bann Levit ki ti pou annan sa privilez pour servi Zeova? Pa neseserman! David ki ti ankor zenn e ki ti pou pli tar vin lerwa Izrael ti dir ki Bondye ti son “par dan pei bann vivan.” (Lir Psonm 142:1, 5. *) Letan ki David ti konpoz sa psonm, i pa ti pe reste dan en pale, ni menm dan en lakaz. I ti pe kasyet son bann lennmi dan en kavern. Omwen de fwa, David ti kasyet dan kavern, en fwa pros avek Adoulam e en lot fwa dan rezyon dezer Enn-gedi. Dwatet i ti konpoz Psonm 142 dan enn sa bann kavern.
15 Si sa ti le ka, se Lerwa Sail ki ti pe tay deryer David pour touy li. I ti pou difisil pour ariv dan sa kavern kot David ti al kasyet. (1 Sam. 22:1, 4) Dan sa landrwa elwannyen, petet David ti kapab santi ki i ti napa en zanmi dan son kote pour protez li. (Ps. 142:4) Lanmenm ler ki David ti kriy Bondye pour demann led.
16, 17. (a) Akoz David ti dezespere? (b) Avek lekel David ti kapab rod led?
16 Letan ki David ti konpoz Psonm 142, petet i ti’n fini konnen ki ti’n arive avek Gran Pret Aimelek ki ti’n ed li san realize kan i ti pe sov Sail. Dan son zalouzi, Lerwa Sail ti fer Aimelek ek son fanmir antye ganny touye. (1 Sam. 22:11, 18, 19) David ti santi li koupab pour zot lanmor. I ti konmsi i ti’n touy sa pret ki ti’n ed li. Si ou ti dan plas David, eski ou ti pou santi ou responsab? An plis ki sa, David ti vreman anba presyon akoz i ti bezwen mars an tayan lefet ki Sail ti pe kontinyen rod li pour touy li.
17 En pe letan pli tar, profet Samyel, sa enn ki ti’n apwent David konman fitir lerwa ti mor. (1 Sam. 25:1) Sa ti’n kapab fer David santi li pli dezespere ankor. Pourtan, David ti konnen kote pour rod led. Avek Zeova sirman. David ti napa menm privilez ki bann Levit dan servis Bondye, me i ti’n fini ganny swazir pour fer en lot kalite servis. I ti pou finalman vin lerwa pep Bondye. (1 Sam. 16:1, 13) Alor, David ti devid son leker avek Zeova e kontinyen rod son gidans. Ou osi ou kapab e devret fer Li vin ou par e ou refiz anmezir ou persevere dan ou servis pour li.
18. Ki mannyer bann legzanp ki nou’n koz lo la dan sa lartik i montre ki Zeova ti zot par?
18 Sa bann legzanp ki nou’n egzaminen i montre ki Zeova ti zot par akoz zot ti ganny en responsabilite dan son servis. Zot ti depan lo Bondye pour pran swen avek zot lo plan materyel anmezir zot ti servi li. Bann Levit ek dimoun dan lezot tribi Izrael, parey David, ti les Zeova vin zot par. Ki mannyer ou osi ou kapab les Zeova vin ou par? Nou pou diskit sa dan nou prosen lartik.
[Not anba lo paz]
^ par. 4 Nonm 18:19, 21, 24: “19 Tou bann kontribisyon sen ki bann garson Izrael pou donn Zeova, mon’n donn ou, ou bann garson ek fiy konman en par ki’n ganny rezerve pour en letan endefini. Sa i en lalyans disel pour en letan endefini devan Zeova pour ou ek ou desandans.” “21 Gete! Mon’n donn bann garson Levi konman leritaz tou dizyenm an Izrael pour sa servis ki zot pe rann, sa servis dan latant renyon.” “24 Parski sa dizyenm par, ki bann garson Izrael pou donnen pour Zeova konman en kontribisyon, mon’n donn bann Levit konman en leritaz. Se pour sa rezon ki mon’n dir zot: ‘Zot pa pou ganny en leritaz parmi bann garson Izrael.’”
^ par. 4 Pour plis lenformasyon konsernan pretriz, vwar Insight on the Scriptures, Volim 2, paz 684.
^ par. 7 Neemya 13:10: “E mon ti aprann ki bann Levit pa ti’n ganny donnen zot porsyon, ki fer ki bann Levit ek bann santer ki ti pe fer louvraz ti’n sove, sakenn kot son plantasyon.”
^ par. 9 Psonm 73:26: “Mon lekor ek mon leker in epwize. Bondye i parey en ros ki siport mon leker e i mon par pour en letan endefini.”
^ par. 12 Lamantasyon 3:22-24: “22 Si nou pa’n disparet se akoz Zeova in demontre son labonte leker anver nou, akoz vreman son mizerikord pa pou zanmen fini. 23 Tou le bomaten, i annan en nouvo fason demontre son mizerikord. Ou fidelite i annabondans. 24 Mon’n dir: ‘Zeova i mon par, sanmenm sa rezon ki mon pou kontinyen esper li.’”
^ par. 14 Psonm 142:1, 5: “1 Avek mon lavwa mon ti kriy Zeova pour ganny led; avek mon lavwa mon ti demann Zeova faver.” “5 O Zeova, mon ti kriy ou pour ganny led. Mon ti dir: ‘Ou mon refiz, mon par dan pei bann vivan.’”
Ki ou pou reponn?
• Dan ki sans Zeova ti par bann Levit?
• Ki Azaf, Zeremi ek David ti fer pour montre ki Zeova ti zot par?
• Ki kalite ou bezwen annan pour Bondye vin ou par?
[Kestyon]
[Ekstre lo paz 11]
Bann Levit pa ti ganny en bout later konman leritaz. Plito Zeova ti zot par, akoz zot ti annan sa gran privilez pour servi li
[Portre lo paz 10]
Ki mannyer Zeova ti vin par bann pret ek Levit?
[Portre lo paz 12]
Kwa ki ti ed Azaf pour kontinyen annan Zeova konman son par?
