Rekonfort tou bann ki dan lapenn

“Zeova in swazir mwan . . . pour konsol tou bann ki dan dey.”​—IZA. 61:1, 2.

1. Ki Zezi ti fer pour bann ki ti dan lapenn e akoz?

ZEZI KRI ti dir: “Mon nouritir se pour obei lavolonte sa enn ki’n anvoy mwan, e fini travay ki i’n donn mwan.” (Zan 4:34) Ler Zezi ti pe fer sa travay ki Bondye ti’n donn li, i ti demontre bann zoli kalite parey son Papa. Sa gran lanmour ki Zeova i annan i enn parmi sa bann kalite. (1 Zan 4:7-10) Zapot Pol ti remark en fason ki Zeova ti demontre sa lanmour ler i ti dekrir Zeova konman sa “Bondye ki touzour donn konsolasyon.” (2 Kor. 1:3) Zezi ti demontre sa menm kalite lanmour ler i ti fer sa ki ti’n ganny predir dan profesi Izai. (Lir Izai 61:1, 2. *) Zezi ti lir sa profesi dan sinagog Nazaret e i ti aplik sa parol lo li menm. (Lik 4:16-21) Tou dilon son minister, avek lanmour, Zezi ti konsol oubyen rekonfort bann ki dan dey ouswa dan lapenn, ankouraz zot e ed zot annan lape lespri.

2, 3. Akoz nou bezwen imit Zezi an sa ki konsern rekonfort lezot?

 ² Tou bann disip Zezi i bezwen imit li par rekonfort bann ki dan lapenn. (1 Kor. 11:1) Pol ti dir kontinyen “ankouraz e fortifye kanmarad.” (1 Tesa. 5:11) Nou bezwen ankouraz ouswa rekonfort lezot sirtou la ki sa lemonn pe fer fas avek bann “letan difisil.“ (2 Tim. 3:1) Deplizanpli, i annan en kantite dimoun senser partou dan lemonn ki bezwen fer fas avek dimoun ki zot parol ek aksyon i fer lezot soufer, dekouraze e sagren.

³ Parey i’n ganny predir dan Labib, dan sa bann dernyen zour bokou dimoun pou “vin egois, kontan larzan, vantar, arogan zot pou koz kont Bondye, dezobeisan anver zot paran, engra, mank respe pour keksoz sen, zot pou annan leker dir, san pitye, kalomni zot prosen, vyolan, kriel, lennmi sa ki fer dibyen; zot pou tret, annan karakter vif, anfle avek lorgey, kontan plezir plis ki Bondye.” Bann dimoun koumsa pe vin pli pir deplizanpli, parski “bann move dimoun ek bann anbeter, zot pou fer touzour plis progre dan sa ki mal.”​—2 Tim. 3:2-4, 13.

4. Ki pe arive avek sa lemonn dan nou letan?

⁴ Tou sa la pa merit sirprann nou akoz Parol Bondye i fer kler ki “lemonn antye i dan pouvwar dyab.” (1 Zan 5:19) “Lemonn antye” i enkli bann eleman politik, relizye e komersyal, ensi ki lezot mwayen ki Satan i servi pour senm propagann. San okenn dout, Satan pe “gouvern lemonn” e i “bondye . . . sa syek.” (Zan 14:30; 2 Kor. 4:4) Sityasyon lemonn pe kontinyelman deteryore vi ki Satan i annan en gran lakoler, akoz i konnen ki i reste li zis ankor en pti pe letan avan Zeova i detrir li. (Rev. 12:12) Pa i rekonfortan pour konnen ki Bondye pou nepli toler Satan ek son move sistenm! Alor, sa kestyon konsernan souvrennte Zeova pou’n finalman ganny reponn.​—Zen., sapit 3; Zob, sapit 2.

Sa bon nouvel pe ganny anonse partou lo later

5. Ki mannyer sa profesi konsernan sa travay predikasyon pe ganny akonplir dan sa bann dernyen zour?

⁵ Sa ki Zezi ti predir pe ganny akonplir la konmela pandan sa letan difisil dan listwar imen. I ti dir: “Sa Bonn Nouvel Rwayonm pou ganny anonse partou dan lemonn pour tou dimoun konnen; e apre sa, lafen pou arive.” (Mat. 24:14) Sa travay predikasyon lo Rwayonm Bondye pe ganny fer dan lemonn antye lo en pli gran lanpler ki zanmen oparavan. Ozordi, i annan plis ki 7,500,000 Temwen Zeova dan plis ki 107,000 kongregasyon atraver lemonn ki pe pres konsernan Rwayonm Bondye zis parey Zezi ti pres e ansenny  konsernan sa Rwayonm. (Mat. 4:17) Gras a sa travay predikasyon ki pe ganny fer ozordi, bokou dimoun ki dan lapenn pe ganny rekonforte. I enteresan pour note ki dan sa de dernyen lannen 570,601 dimoun in ganny batize konman Temwen Zeova.

6. Ki ou panse konsernan lanpler sa travay predikasyon?

⁶ Lanpler sa travay predikasyon i evidan atraver lafason ki Temwen Zeova pe tradwir e distribye bann piblikasyon baze lo Labib dan plis ki 500 langaz. En keksoz parey pa’n zanmen arive oparavan dan listwar imen! Lafason ki lorganizasyon Zeova lo later i ete, son travay ek son progre i vreman ekstraordiner. I ti pou enposib pour en keksoz koumsa arive dan sa lemonn Satan san gidans ek led lespri sen, sa lafors pwisan Bondye. Lefet ki sa bon nouvel pe ganny anonse partou dan lemonn, bann vre Kretyen pe ganny rekonforte atraver Labib e osi bann dimoun ki dan lapenn ki aksepte sa mesaz Rwayonm.

Rekonfort nou bann frer ek ser

7. (a) Akoz nou pa kapab ekspekte Zeova retir tou bann keksoz ki fer nou soufer la konmela? (b) Ki mannyer nou konnen ki i posib pour nou fer fas avek persekisyon ek soufrans?

⁷ Dan sa lemonn ki ranpli avek sa ki mal ek soufrans, nou pou sirman rankontre bann sityasyon ki pou fer nou sagren. Nou pa kapab ekspekte ki Zeova pou retir tou bann keksoz ki fer nou malere oubyen sagren, tan ki i pa’n detrir sa move lemonn. Me pour le moman, bann ki siport Zeova konman Souvren liniver i bezwen veye pour ki zot pa kas zot lentegrite si zot arive fer fas avek persekisyon ki’n ganny predir. (2 Tim. 3:12) Par kont, avek led ek rekonfor ki nou Papa ki dan lesyel i donn nou, nou kapab vin parey bann Kretyen swazir dan ansyen Tesalonik. Zot lafwa ek landirans ti ed zot fer fas avek persekisyon ek soufrans.​—Lir 2 Tesalonisyen 1:3-5.

8. Ki laprev dan Labib ki montre ki Zeova i rekonfort son bann serviter?

⁸ San okenn dout Zeova i donn son bann serviter sa rekonfor ki zot bezwen. Par egzanp, ler move Larenn Zezabel ti pe rod profet Eliya pour touy li, sa profet ti perdi kouraz e sove, i ti menm dir ki i ti anvi mor. Me olye koriz Eliya, Zeova ti rekonfort li e donn li kouraz pour kontiny son travay konman en profet. (1 Rwa. 19:1-21) Legzanp bann Kretyen dan premye syek i osi montre ki Zeova i rekonfort son pep. Nou lir konsernan en letan ler kongregasyon ti “an-pe dan Zide antye, dan Galile ek Samari [e] i ti vin for.” Deplis, “i ti devlope, ogmante avek led [oubyen “konsolasyon,” NW] Sent-Espri e zot ti viv avek respe pour Senyer.” (Akt 9:31) Pa nou rekonesan ki nou osi nou kapab ganny konsolasyon lespri sen!

9. Akoz i rekonfortan pour aprann konsernan Zezi?

⁹ Konman Kretyen, nou’n ganny rekonforte anmezir nou’n aprann konn Zezi Kri e swiv son legzanp. Zezi ti dir: “Vin kot mwan zot tou ki fatige e ki pe anmenn en fardo e mwan, mon a donn zot repo. Pran mon zoug e aksepte mon legzanp akoz mon dou e mon annan limilite dan mon leker e zot a ganny repo. Akoz mon zoug i fasil e mon fardo i leze.” (Mat. 11:28-30) Kan nou aprann konsernan lafason ki Zezi ti tret dimoun avek lanmour ek labonte e apre swiv son bon legzanp, nou pou ganny soulaze si nou santi nou anba presyon.

10, 11. Lekel ki kapab rekonfort lezot dan kongregasyon?

¹⁰ Nou kapab osi ganny rekonforte par nou bann frer ek ser Kretyen. Par egzanp, annou vwar ki mannyer bann ansyen dan kongregasyon i kapab ed bann ki dan sityasyon difisil. Disip Zak ti ekrir: “Eski i annan  ki malad [spirityelman] parmi zot? I devre apel bann ansyen dan [“kongregasyon,” NW], e zot a priy pour li.“ Avek ki rezilta? “Lapriyer avek lafwa i a sov sa malad, e Senyer i a donn li lasante; e si i’n komet okenn pese i a ganny pardonnen.” (Zak 5:14, 15) Lezot manm kongregasyon osi i kapab rekonfort nou.

¹¹ Bann madanm i souvan vwar li pli fasil pour koz avek lezot madanm konsernan diferan problenm. Bann ser pli aze ki annan plis leksperyans i sirtou kapab donn bann bon konsey bann ser pli zenn. I kapab ki sa bann ser pli matir in deza pas atraver menm sityasyon dan zot lavi. Lefet ki sa bann ser eksperyanse i kontan konpran e pran en lentere dan lezot, sa i kapab ed en kantite. (Lir Tit 2:3-5.) Byensir, bann ansyen ek lezot i kapab e devret “koz dan en fason konsolan avek bann ki dan depresyon.” (1 Tesa. 5:14, NW, 15) I byen pour nou gard antet ki Bondye “i konsol nou dan nou bann soufrans pour ki nou osi nou a kapab konsol tou bann ki dan soufrans.”​—2 Kor. 1:4.

12. Akoz i enportan pour nou asiste renyon kongregasyon?

¹² En fason tre enportan kot nou ganny rekonforte, i kan nou asiste bann renyon kongregasyon, kot bann diskisyon ki baze lo Labib i ankouraz nou. Nou lir ki Zida ek Silas ti “koz lontan avek bann frer pour ankouraz zot e fortifye zot.” (Akt 15:32) Avan e apre nou bann renyon, bann frer ek ser i fer bann konversasyon ki ankourazan antre zot. Alor, si nou pe soufer akoz kek sityasyon ki pe trakas nou, annou pa izol nou lekor, akoz sa pa pou amelyor nou sityasyon. (Prov. 18:1) O kontrer, i pou byen si nou ekout konsey zapot Pol: “Annou rode konman pous kanmarad pour annan lanmour e fer sa ki byen. Pa abandonn zot lasanble parey labitid serten parmi zot, me ankouraz kanmarad sirtou ki la sa Zour Senyer pe aprose.”​—Ebr. 10:24, 25.

Ganny rekonfor dan Parol Bondye

13, 14. Eksplike ki mannyer Lekritir i kapab rekonfort nou.

¹³ Ki swa nou en Kretyen batize oubyen nou fek konmans aprann konn Bondye ek son plan, nou kapab ganny rekonfor dan Parol Bondye, Labib. Zapot Pol ti ekrir: “Tou sa ki’n ganny ekrir dan lepase in ganny ekrir pour nou lansennyman, pour ki par pasyans ek konsolasyon ki Lekritir i donnen nou posed lesperans.” (Rom. 15:4) Lekritir sen i kapab rekonfort nou e fer nou “byen prepare e byen ekipe pour fer tou aksyon ki bon.” (2 Tim. 3:16, 17) Sirman nou pou ganny rekonforte en kantite kan nou konn laverite konsernan plan Bondye e annan en vre lespwar pour lavenir. Alor, annou vey tou loportinite  pour servi byen Parol Bondye ek bann piblikasyon baze lo Labib ki kapab rekonfort nou e benefisye nou dan en kantite fason.

¹⁴ Zezi in kit en bon legzanp pour nou ler i ti servi Lekritir pour ansenny e rekonfort lezot. Par egzanp, apre son rezireksyon, i ti aparet avek de son disip e i ti ‘eksplik zot Lekritir.’ Anmezir ki i ti koz avek zot, i ti tous zot leker. (Lik 24:32) Zapot Pol ti swiv sa bon legzanp Zezi par “diskit lo Lekritir.” Dan lavil Bere, bann ki ti ekout li “ti resevwar Parol Bondye avek bokou lentere. Toulezour zot ti etidye Lekritir.” (Akt 17:2, 10, 11) Alor, pa i apropriye ki nou lir Labib tou le zour e ganny rekonforte atraver Labib ek bann piblikasyon ki donn nou lespwar dan sa bann letan difisil!

Lezot fason pour rekonfort lezot

15, 16. Ki serten keksoz nou kapab fer pour ed e rekonfort nou bann frer ek ser Kretyen?

¹⁵ Nou kapab ed e rekonfort nou bann frer ek ser dan diferan fason pratik. Par egzanp, nou kapab aste konmisyon pour bann frer ek ser ki swa aze oubyen malad. Nou kapab ed lezot avek zot louvraz kot lakour e dan sa fason demontre lentere personnel dan zot. (Fili. 2:4) Petet nou kapab konplimant nou bann frer ek ser lo zot bann bon kalite parey lanmour, kouraz, lafwa ek zot abilite pour rezourd problenm.

¹⁶ Pour rekonfort bann aze, nou kapab vizit zot e ekout atantivman zot leksperyans ek bann benediksyon ki zot in gannyen dan servis Zeova. Anfet, sa i kapab ankouraz e rekonfort nou! Nou kapab lir Labib oubyen bann piblikasyon ki baze lo Labib avek bann ki nou vizite. Petet nou kapab egzamin ansanm sa lartik Letid Latour Veyer oubyen sa lenformasyon pour Letid Labib Kongregasyon ki pou ganny etidye sa semenn. Petet nou kapab get en DVD baze lo Labib. Nou kapab osi lir oubyen rakont bann leksperyans ankourazan ki sorti dan nou bann piblikasyon.

17, 18. Konman bann serviter fidel Zeova, akoz nou kapab asire ki i pou siport e rekonfort nou?

¹⁷ Si nou remarke ki en frer oubyen en ser Kretyen i bezwen rekonfor, nou kapab mazin li dan nou lapriyer personnel. (Rom. 15:30; Kol. 4:12) Anmezir ki nou fer fas avek bann problenm dan lavi tou le zour e fer bokou zefor pour rekonfort lezot, nou kapab annan menm lafwa ek konviksyon parey sa psalmis ki ti sante: “Larg ou fardo lo Zeova li menm, e li i pou soutenir ou. Zanmen i pou les sa enn ki drwat drive.” (Ps. 55:22) Vreman, Zeova pou toultan la pour rekonfort e siport nou konman son bann serviter fidel.

¹⁸ Bondye ti dir son bann adorater dan lepase: “Mwan, mon sanmenm sa Enn ki pou rekonfort zot.” (Iza. 51:12) Zeova pou fer parey pour nou e i pou beni nou bann bon aksyon ek parol ler nou konsol bann ki dan lapenn. Ki swa nou annan lespwar pour viv dan lesyel oubyen lo later, nou tou nou kapab ganny rekonforte avek parol Pol pour bann Kretyen swazir: “Mon demande ki nou Senyer Zezi-Kri limenm e Bondye, nou Papa, ki’n kontan nou e ki’n donn nou par son lagras en lankourazman [oubyen “konsolasyon,” NW] eternel ek en bon lesperans, i ranpli zot leker avek kouraz [oubyen “konsolasyon,” NW], e donn zot lafors pour pratik tou sa ki byen, par aksyon e osi par parol.”​—2 Tesa. 2:16, 17.

[Not anba lo paz]

Eski ou rapel?

• Ziska ki degre nou travay pour rekonfort bann ki dan lapenn in arive?

• Ki serten keksoz nou kapab fer pour rekonfort lezot?

• Ki laprev i annan dan Labib ki montre ki Zeova i rekonfort son pep?

[Kestyon]

[Portre lo paz 26]

Eski ou rekonfort bann ki dan lapenn?

[Portre lo paz 28]

Aze konman zenn i kapab ankouraz lezot