3 Bondye i revanze—Eski i vre?
3 Bondye i revanze—Eski i vre?
Sa ki petet ou’n tande: “Bondye i rapel tou pese e i pini bann dimoun dan lanfer.”
“Bondye i servi dezas natirel pour pini bann peser.”
Ki Labib i dir: Dezyenm Pyer 3:9 i dir ki Zeova “pa oule ki personn i ganny detri, me ki tou dimoun i arive repanti.” Olye tir lizye lo nou bann fot, i konsantre lo nou bann bon kalite. “Lizye [Zeova] pe ale vini partou lo later pour li montre son lafors an faver bann ki zot leker i tou pour li.”—2 Kronik 16:9.
Lanfer dife i pa en lansennyman Labib, sa lide li menm i en keksoz degoutan pour Bondye. Pli gro pinisyon ki i donn bann move dimoun se lanmor. (Zeremi 7:31; Romen 6:7) Bondye pa responsab pour bann dezas natirel ki kapab touy nenport ki, me plito sa bann dezas natirel i bann levennman ki arive san ekspekte e ki kapab afekte nenport dimoun.—Eklezyast 9:11.
Konn laverite i kapab ed ou: Nou kapab vin pli pros avek Bondye ler nou konnen ki i “pare pour pardonnen” e i pa taye pour kondann nou. (Psonm 86:5) Nou pa devret servi Bondye akoz nou santi nou koupab ouswa akoz nou per pangar nou ganny pini. O kontrer, nou lanmour pour Zeova pou motiv nou pour devlop plis lafwa dan li. Sa kalite lanmour i pous nou pour fer nou mye pour fer li plezir.—Matye 22:36-38; 1 Zan 5:3.
Bondye i anvi ki tou dimoun i fer sa ki byen, menm si petet bokou pa pou zanmen anvi fer li. Si Bondye pa ti zanmen pran aksyon kont bann ki fer sa ki mal, i ti pou parey sa bann gouvernman ki fer lalwa me ki pa met sa bann lalwa an fors. Se konmsi i ti pou les lenzistis ek soufrans egziste pour touzour. (Eklezyast 8:11) Si nou konnen ki Bondye pa pou toler lemal pour touzour, sa i donn nou en bon rezon pour annan lespwar pour lavenir. Bondye in promet ki i pou detrir sa bann ki kontinyen fer bann move keksoz, pour ki “bann ki annan limilite” i kapab rezwir lavi pour touzour lo later parey i’n anvi depi o konmansman.—Psonm 37:10, 11, 29. *
[Not anba lo paz]
^ par. 7 Pour plis lenformasyon lo konman ki Bondye pou fer later vin en paradi, vwar sapit 3 ek 8 dan liv Ki Labib i vreman dir?
[Ekstre lo paz 6]
Eski Bondye ti pou anvi nou ador li zis akoz nou per pangar nou ganny pini?
[Portre sorti kot lo paz 6]
Portre par Doré
