Form bann zonm pour desarz plis responsabilite dan kongregasyon

“Sak zelev ki’n byen aprann i a vin parey son profeser.”​—LIK 6:40.

1. Ler i ti lo later, ki Zezi ti fer pour etablir kongregasyon Kretyen?

A LAFEN son Levanzil, zapot Zan ti ekrir: “Zezi in fer ankor bokou lezot keksoz. Si nou ti pou met tou an-ekri, mon mazinen ki lemonn antye pa ti pou kapab kontenir tou sa bann liv.” (Zan 21:25) Zezi ti napa bokou letan lo later, me i ti byen aktif dan son minister. Pandan sa letan, i ti swazir, form e organiz bann zonm ki ti pou kapab pran swen avek kongregasyon apre son depar. Ler i ti retourn dan lesyel lannen 33 N.L., Zezi ti’n fini etablir en kongregasyon remarkab. Plitar, plizyer milye dimoun ti zwenn sa kongregasyon.​—Akt 2:41, 42; 4:4; 6:7.

2, 3. (a) Akoz i annan en gran bezwen pour bann frer desarz responsabilite dan kongregasyon? (b) Ki nou pou etidye dan sa lartik?

² Ozordi, sa lorganizasyon in depas plis ki set milyon proklanmater sa bon nouvel dan plis ki 100,000 kongregasyon dan lemonn antye. Pour sa rezon, nou bezwen bann zonm pour desarz bann responsabilite spirityel dan kongregasyon. Par egzanp, nou bezwen plis ansyen. Bann ki annan sa lanvi  pour kalifye pour sa privilez i ganny felisite akoz zot “dezir en fonksyon nob.”​—1 Tim. 3:1.

³ Toudmenm, bann zonm pa otomatikman kalifye pour sa bann privilez. Pa zis ledikasyon ek leksperyans dan lavi ki fer en zonm kalifye pour sa kalite responsabilite. Pour byen desarz bann responsabilite dan kongregasyon, en zonm i bezwen kalifye spirityelman. Pa zis abilite ek lakonplisman ki konte. En zonm i devret annan bann kalite spirityel. Ki mannyer nou kapab ed bann zonm pour kalifye? Zezi ti dir: “Sak zelev ki’n byen aprann i a vin parey son profeser.” (Lik 6:40) Dan sa lartik, nou pou egzaminen ki mannyer sa Gran Ansenyan, Zezi Kri ti ed son bann disip pour kalifye pour plis responsabilite, nou pou osi tir bann leson dan lafason ki i ti azir.

“Mon apel zot zanmi”

4. Ki mannyer Zezi ti vin en vre zanmi pour son bann disip?

⁴ Zezi pa ti tret son bann disip konman bann dimoun enferyer me konman son bann zanmi. I ti pas letan avek zot, i ti montre ki i ti annan konfyans dan zot e i ti ‘dir zot tou sa ki son Papa ti’n dir li.’ (Lir Zan 15:15.) Zis mazin zot leksitasyon ler Zezi ti reponn zot kestyon: “Ki siny ki pou endik ou [“prezans ek konklizyon sa sistenm,” NW]?” (Mat. 24:3, 4) I ti osi dir son bann disip son santiman e sa ki i ti panse. Par egzanp, lannwit son lanmor, Zezi ti anmenn Pyer, Zak ek Zan avek li dan zarden Zetsemane kot i ti sipliy Bondye akoz son leker ti trouble. I vre ki kekfwa sa trwa zapot pa ti tann sa ki Zezi ti pe dir dan son lapriyer, me zot ti bezwen realize ki sa ki ti pe arive ti vreman enportan. (Mark 14:33-38) Mazin osi sa lefe ki transfigirasyon ti’n kapab annan lo zot trwa en pe letan pli boner. (Mark 9:2-8; 2 Pyer 1:16-18) Sa gran lanmitye ki Zezi ti devlope avek son bann disip ti parey en lank dan movetan kan zot ti bezwen desarz bann gro responsabilite pli tar.

5. Ki bann ansyen dan kongregasyon i kapab fer pour montre ki zot pare pour ed lezot?

⁵ Parey Zezi, bann ansyen dan kongregasyon ozordi i ed e fer zanmi avek lezot. Zot devlop bann relasyon amikal e pros avek lezot Kretyen ler zot pran letan pour demontre en lentere senser dan lezot. Bann ansyen i realize ki serten keksoz i konfidansyel me pa tou keksoz ki en sekre. Zot annan konfyans dan bann manm kongregasyon e zot kontan koz lo bann keksoz spirityel ki zot menm zot in aprann. Bann ansyen pa pou zanmen tret en zenn asistan ministeryel konman enferyer. O kontrer, zot vwar li konman en zonm spirityel ki annan potansyel e ki pe akonplir en travay enportan dan kongregasyon.

“Mon’n donn zot en legzanp”

6, 7. Ki legzanp Zezi ti donn son bann disip e ki lefe sa ti annan lo zot?

⁶ Menm si bann disip Zezi ti annan lapresyasyon pour bann keksoz spirityel, par ler zot ti les zot fason panse ganny enfliyanse par zot lorizin ek kiltir. (Mat. 19:9, 10; Lik 9:46-48; Zan 4:27) Toudmenm, Zezi pa ti lir zot en lartik ouswa menas zot. I pa ti ekspekte tro bokou avek zot ouswa konsey zot pour fer serten keksoz ki li i pa ti fer. O kontrer, i ti ansenny zot par son legzanp.​—Lir Zan 13:15.

⁷ Ki kalite legzanp Zezi ti ete pour son bann disip? (1 Pyer 2:21) I ti annan en lavi senp pour li kapab fasilman servi lezot. (Lik 9:58) Zezi ti konn son limit e i ti toultan baz son lansennyman lo Labib. (Zan 5:19; 17:14, 17) I ti zantiy e abordab. Tou sa ki i ti fer, i ti fer akoz lanmour. (Mat. 19:13-15; Zan 15:12) Legzanp Zezi ti annan en bon lenfliyans lo son bann zapot. Par egzanp, Zak pa ti per lanmor e i ti servi Bondye fidelman ziska i ti ganny touye. (Akt 12:1, 2) Zan ti  fidelman swiv legzanp Zezi pour plis ki 60 an.​—Rev. 1:1, 2, 9.

8. Ki legzanp bann ansyen i kapab donn bann zenn onm ek lezot?

⁸ Bann ansyen ki annan limilite, lanmour e ki pare pour sakrifye zot lekor pour lezot i donn en bon legzanp pour bann zenn onm ki anvi progrese. (1 Pyer 5:2, 3) Deplis, bann ansyen ki donn en bon legzanp lafwa, lansennyman, kondwit Kretyen e dan zot minister i kontan akoz zot konnen ki lezot i kapab imit zot lafwa.​—Ebr. 13:7.

‘Zezi ti anvoy zot e donn zot lord’

9. Ki mannyer nou konnen ki Zezi ti form son bann disip pour diriz predikasyon?

⁹ Zezi ti’n travay dir pour akonplir son minister pour apepre de-z-an, ler i ti deside pour anvoy son 12 zapot pour fer plis ankor dan sa travay. Me avan anvoy zot, i ti donn zot bann lenstriksyon. (Mat. 10:5-14) Ler i ti fer mirak pour nouri en lafoul, Zezi ti dir son bann disip ki mannyer i ti oule organiz distribisyon manze. (Lik 9:12-17) I evidan ki Zezi ti pe form son bann disip par donn zot bann gidans spesifik e kler. Sa formasyon kontinyel ek led pwisan lespri sen ti pli tar ed bann zapot pour organiz predikasyon lo en pli gran lanpler ankor apartir lannen 33 N.L. e dan bann lannen ki ti swiv.

10, 11. Ki mannyer bann nouvo i kapab progresivman ganny formen?

¹⁰ Ozordi, lenstriksyon spirityel i konmanse ler en zonm i aksepte en letid Labib. Kekfwa nou pou bezwen ed li lir byen. Nou pou kontinyen ed li atraver son letid Labib. Ler i pou konmans asiste bann renyon kongregasyon regilyerman, son formasyon spirityel pou kontinyen anmezir i antre dan Lekol Minister Teokratik, vin en proklanmater ki pa ankor batize, ensidswit. Apre son batenm, son formasyon pou kontinyen, par egzanp, ler i pou ede mentenir Lasal Rwayonm. Avek letan, en frer pou ganny ede pour konpran ki i bezwen fer pour vin en asistan ministeryel.

¹¹ Ler en frer batize i ganny en serten responsabilite, bann ansyen pou kontan pour eksplik li bann prosedir lorganizasyon ek bann lenstriksyon neseser. Sa frer ki pe ganny sa formasyon i devret konpran sa ki ganny ekspekte avek li. Si sa frer i vwar li difisil pour fer sa ki i’n ganny demande pour fer, avek lanmour, en ansyen pa pou deswit tonm lo sa konklizyon ki i pa kalifye. O kontrer, i pou pli bon si sa ansyen i montre li spesifikman kote i bezwen amelyore e revwar avek li bann lobzektif ek prosedir apropriye ki annan pour fer avek son responsabilite. Bann ansyen i kontan ler en frer i aksepte sa formasyon e eksperyans lazwa pour servi lezot.​—Akt 20:35.

“Sa enn ki ekout konsey i saz”

12. Kwa ki ti fer bann konsey Zezi efikas?

¹² Zezi ti form son bann disip ler i ti donn zot bann konsey personnel ki ti adapte avek zot sityasyon. Par egzanp, i ti koriz Zak ek Zan akoz zot ti oule fer dife sorti dan lesyel desann lo bann Samariten ki pa ti’n aksepte lansennyman Zezi. (Lik 9:52-55) Ler manman Zak ek Zan ti demann Zezi ki son de garson i ganny bann bon pozisyon dan Rwayonm, Zezi ti direkteman dir sa de frer: “Pa mwan ki deside lekel ki pou asiz lo mon kote drwat oubyen mon kote gos. Sa plas i pour bann ki mon Papa in prepare.” (Mat. 20:20-23) Toultan, Zezi ti donn konsey ki ti kler, pratik e baze lo bann prensip Bondye. I ti montre son bann disip konman pour rezonn lo bann prensip koumsa. (Mat. 17:24-27) Zezi ti osi rekonnet zot limit, i pa ti ekspekte perfeksyon avek zot. I ti konsey zot akoz i ti vreman kontan zot.​—Zan 13:1.

13, 14. (a) Lekel ki bezwen konsey? (b) Donn serten legzanp bann konsey personnel ki bann ansyen i kapab donnen avek bann ki pa pe progrese spirityelman.

¹³ Tou zonm ki oule progrese dan kongregasyon i bezwen bann sizesyon ouswa  konsey lo Labib en moman ou en lot. Proverb 12:15 i dir: “Sa enn ki ekout konsey i saz.” En zenn frer ti dir: “Aksepte mon prop lenperfeksyon ti sa keksoz pli difisil pour mwan. Me konsey ki en ansyen ti donn mwan ti ed mwan pour annan en pwennvi ekilibre.”

¹⁴ Si bann ansyen i remarke ki serten kondwit i anpes en frer progrese spirityelman, zot pran linisyativ pour redres li avek ladouser. (Gal. 6:1) Par ler en frer i bezwen ganny konseye lo serten laspe son personnalite. Par egzanp, si en frer pa pe fer bokou zefor, en ansyen i kapab vwar li itil pour montre li ki Zezi ti anons bon nouvel avek devouman e ki i ti demann bann Kretyen pour fer disip. (Mat. 28:19, 20; Lik 8:1) Si en frer i paret anbisye, en ansyen i kapab montre li ki mannyer Zezi ti ed Son bann disip pour vwar ki rod pozisyon i danzere. (Lik 22:24-27) Me, si en frer pa tro kontan pardonnen? Legzanp Zezi konsernan sa lesklav ki ti refize pardonn en pti det ler li menm i ti’n ganny pardonnen en kantite i kapab fer en gro lefe lo li. (Mat. 18:21-35) Bann ansyen i devret donn en konsey o pli vit posib ler i neseser.​—Lir Proverb 27:9. *

“Antrenn ou” lekor

15. Ki mannyer fanmir en frer i kapab ed li servi lezot?

¹⁵ Bann ansyen i pran linisyativ pour form bann frer ki anvi progrese me lezot osi i kapab ede. Par egzanp, fanmir en frer i kapab e devret ed li pour progrese. Si i deza en ansyen, i pou vreman apresye sipor en bon madanm ek bann zanfan ki pa egois. Pour li kapab desarz son responsabilite, tou lafanmir i devret pare pour partaz zot papa oubyen msye avek kongregasyon. Zot leta lespri sakrifis pou fer sa frer kontan e lezot pou kontan sa osi.​—Prov. 15:20; 31:10, 23.

16. (a) I responsabilite lekel premyerman pour progrese dan kongregasyon? (b) Ki mannyer en frer i kapab progrese pour desarz plis responsabilite dan kongregasyon?

¹⁶ I vre ki lezot i devret ede e siport en frer, me apre tou se li menm ki annan sa responsabilite pour progrese. (Lir Galat 6:5.) Byensir, en frer pa neseserman bezwen en ansyen ouswa asistan ministeryel pour ed lezot oubyen partisip plennman dan predikasyon. Selman, si en frer i anvi desarz plis responsabilite dan kongregasyon i pou bezwen ranpli bann kalifikasyon ki Labib i koz lo la. (1 Tim. 3:1-13; Tit 1:5-9; 1 Pyer 5:1-3) Alor, si i anvi vin en ansyen ouswa en asistan ministeryel me i pa ankor le ka, sa frer pou bezwen konsantre son  zefor lo bann laspe kot i bezwen progrese spirityelman. Pour arive fer sa, i pou bezwen lir Labib regilyerman, etidye personnelman e seryezman, medit o profon, priye senserman e partisip avek devouman dan predikasyon. Dan sa fason, i pou personnelman aplik konsey ki Pol ti donn Timote: “Antrenn ou pour en lavi sen avek Bondye.”​—1 Tim. 4:7.

17, 18. Ki en frer i kapab fer si i enkyet, pa santi li alaoter oubyen pa santi sa lanvi pour progrese dan kongregasyon?

¹⁷ Me, meton en frer pa progrese akoz i enkyet ouswa i santi li pa alaoter. I ti pou byen si i mazin tou sa ki Zeova ek Zezi in fer pour nou. Annefe, Zeova i “anmenn nou fardo sak zour.” (Ps. 68:19) Alor, nou Papa ki dan lesyel i kapab ed en frer pour desarz son responsabilite. En frer ki pa ankor en asistan ministeryel ouswa en ansyen pou vwar li itil pour mazinen ki i annan en bezwen pour bann zonm matir aksepte bann privilez dan lorganizasyon Bondye. Si en frer i reflesir lo sa bann pwen, sa i kapab ed li fer zefor pour sirmont son bann santiman negatif. I kapab priye pour ganny lespri sen Bondye akoz fri lespri i enkli lape ek kontrol lo son prop lekor ki neseser pour li aret trakase oubyen krwar ki i pa alaoter. (Lik 11:13; Gal. 5:22, 23) Sa frer i kapab asire ki Zeova pou beni tou bann ki esey progrese avek en bon motivasyon.

¹⁸ Eski i kapab arive ki en frer napa sa lanvi pour progrese dan kongregasyon? Kwa ki kapab ed en frer ki napa sa lanvi pour servi lezot? Zapot Pol ti ekrir: “Parski Bondye i travay dan zot, e i donn zot lavolonte [oubyen sa lanvi] e rann zot kapab [pour] akonpli tou dapre son bon plan.” (Fili. 2:13) Se Bondye ki donn sa lanvi pour servi e lespri sen Zeova i kapab donn lafors en dimoun pour fer son servis sakre. (Fili. 4:13) Deplis, en Kretyen i kapab priye ki Bondye i ed li fer sa ki byen.​—Ps. 25:4, 5.

19. Ki sa profesi lo sa “set berze” ek “wit dik” i montre?

¹⁹ Zeova pe beni zefor bann ansyen ki form lezot. Bann ki aksepte sa formasyon e fer zefor pour progrese dan kongregasyon pou osi ganny benediksyon Bondye. Labib ti profetize ki dan pep Bondye i ti pou annan “set berze, wi, wit dik,” andotmo, i ti pou annan ase zonm kalifye ki ti pou pran swen avek lorganizasyon Zeova. (Mik. 5:5) Benediksyon Zeova i evidan ler nou vwar lakantite zonm Kretyen ki pe ganny formen e ki avek limilite i pare pour desarz plis responsabilite dan servis Bondye, pa i vre!

[Not anba lo paz]

Ki ou pou reponn?

• Ki mannyer Zezi ti prepar son bann disip pour zot kalifye pour ganny plis responsabilite?

• Ki mannyer bann ansyen i kapab imit Zezi pour ed bann frer pour desarz plis responsabilite dan kongregasyon?

• Ki rol en fanmir i zwe pour ed en frer pour progrese dan kongregasyon?

• Ki en frer i kapab fer pour arive ganny plis responsabilite?

[Kestyon]

[Portre lo paz 31]

Ki formasyon ou kapab donn ou etidyan Labib anmezir i progrese?

[Portre lo paz 32]

Ki mannyer bann zonm i montre ki zot annan sa lanvi pour progrese dan kongregasyon?