Laverite i kapab sanz ou lavi

PETET ou’n deza tande oubyen ou’n ganny ansennyen enn sa bann mansonz lo Bondye ki sa seri lartik in devwale. Me kantmenm sa, ou kapab ezite pour sanz ou krwayans, sirtou si ou’n toultan krwar sanmenm.

Nou kapab konpran akoz ou ezite. Serten larelizyon i kapab dekouraz ou pour konpar sa ki zot ansennyen ek sa ki Labib i dir. Lezot i esey defann bann mansonz par dir ki Labib i tro konplike e ki pa tou dimoun ki kapab konpran sa ki i dir. Laplipar disip Zezi ti bann dimoun ordiner ki ti napa gran ledikasyon. Pourtan, zot ti fasilman konpran sa ki i ti ansennyen.​—Akt 4:13.

Petet ou osi ou pa pou egzamin ou krwayans akoz ou per ki si ou fer li, sa pou montre ki ou mank lafwa. Me eski i fer sans pour krwar ki Bondye ti pou mekontan akoz ou pe esey konpran son mesaz pour limanite ki dan Labib? O kontrer, Labib i ankouraz ou pour personnelman egzamin Lekritir. I dir: “[Verifye oubyen] konpran lavolonte Bondye: Sa ki bon, sa ki fer li plezir, sa ki parfe.”​—Romen 12:2.

Aprann laverite lo Bondye i enplik plis ki zis annan en serten konnesans, me i kapab sanz ou lavi pour le meyer. (Zan 8:32) Deanne ki’n ganny mansyonnen o konmansman in aprezan devlop lafwa dan Parol Bondye. I rakonte: “Mon pa ti’n zanmen realize ki Lekritir ti telman kler ziska ki mon ti konmans etidye Labib. Aprezan mon konn Zeova, pa zis konman en Bondye pwisan, me konman mon Papa dan lesyel ki ranpli avek lanmour. Mon annan en vre bi dan lavi.”

Petet ou’n deza etidye Labib oparavan san ki ou ti santi ki ou’n benefisye. Si i ti le ka, pa abandonnen. Bann dimoun ki anvi konpran Labib e ki’n ganny ansennyen bann mansonz, i parey bann dimoun ki pe azout bann bout puzzle ansanm par get sa move portre. Petet ou pou arive azout serten bout byen ansanm, me apre sa ou kapab fristre kan ou realize ki zot pa al byen avek sa portre ki ou’n ganny donnen. Me, si ou konmans avek sa bon portre, ou pou vwar ki tou bann bout pou tonm byen dan zot plas.

Eski ou ti pou kontan konn laverite lo Bondye? Nou envit ou pour pran kontak avek Temwen Zeova dan ou rezyon ouswa ekrir enn ant sa bann ladres apropriye ki lo paz 4 sa piblikasyon pour en letid Labib gratwit kot ou.

[Ekstre lo paz 9]

“[Verifye oubyen] konpran lavolonte Bondye: Sa ki bon, sa ki fer li plezir, sa ki parfe.”​—ROMEN 12:2.