“Pa apiy lo ou prop konprenezon”

“Met ou konfyans dan Zeova avek tou ou leker e pa apiy lo ou prop konprenezon.”​—PROV. 3:5.

1, 2. (a) Ki sityasyon nou kapab trouv nou ladan? (b) Kan nou dan bann sityasyon difisil, annan desizyon enportan pour fer ouswa nou bezwen reziste kek tantasyon, lo lekel nou devret depan e akoz?

SERTEN departman dan lakonpannyen kot Cynthia * i travay in fermen e serten son bann koleg in fini perdi louvraz. Cynthia i santi ki li osi i pou perdi son travay. Si sa i arive, ki i pou fer? Ki mannyer i pou pey son bann bil? En Kretyen ki apel Pamela i anvi al reste dan en landrwa kot napa bokou proklanmater, eski sa i en bon desizyon? En zenn onm ki apel Samuel i annan en lot problenm. Ler i ti ankor byen zenn, i ti get pornografi. La ki i’n vin en zenn adilt, Samuel i ganny tante pour get pornografi. Eski i pou kapab reziste sa dezir pour rekonmans get pornografi?

² Ler ou fer fas avek bann sityasyon difisil, ou annan bann desizyon enportan pour fer ouswa ou bezwen reziste kek tantasyon, lo lekel ki ou pou depan? Eski ou depan antyerman lo ou prop lekor ouswa ou “larg ou fardo lo Zeova”? (Ps. 55:22) Labib i dir: “Lizye Zeova i lo bann ki drwat e son zorey i tann zot lapel o sekour.” (Ps. 34:15) Alor, pa i vreman enportan ki nou annan konfyans dan Zeova avek tou nou leker e ki nou pa apiy lo nou prop konprenezon!​—Prov. 3:5.

3. (a) Ki savedir met konfyans dan Zeova? (b) Akoz serten i kapab tant pour anvi depan lo zot prop konprenezon?

³ Annan konfyans dan Zeova avek tou nou leker i enplik fer keksoz dan son fason e dapre son lavolonte. Anliny avek sa lide, nou bezwen kontinyelman koz avek li dan lapriyer e senserman demann li son gidans. Me, i kapab vreman difisil pour bokou nou depan antyerman lo Zeova. Par egzanp, en ser ki apel Lynn i admet: “I ti vreman difisil pour mwan met tou mon konfyans dan Zeova.” Akoz? I ti dir: “Mon ti napa okenn kontak avek mon papa e mon manman pa ti pran swen avek mwan fizikman ouswa emosyonnelman. Alor, mon ti aprann depan lo mwan menm ler mon ti ankor byen zenn.” Lafason ki Lynn ti grandi ti fer li difisil pour li annan konfyans dan lezot totalman. Sikse ek abilite i kapab fer en dimoun annan tro bokou konfyans dan son lekor. Si i depan zis lo son leksperyans, en ansyen i kapab pa priye avan i desarz son responsabilite dan kongregasyon.

4. Ki nou pou egzaminen dan sa lartik?

⁴ Zeova i ekspekte nou fer bann zefor senser pour azir an armoni avek nou lapriyer ek son lavolonte. Alor, ki mannyer nou kapab annan en bon balans ant depan lo li e fer zefor pour rezourd bann problenm difisil? Kan i annan desizyon pour fer, ki nou devret veye? Akoz lapriyer i enportan kan nou pe esey reziste tantasyon? Nou pou reponn sa bann kestyon atraver bann legzanp dan Labib.

Kan nou dan sityasyon difisil

5, 6. Ki Izkiya ti fer ler lerwa Lasiri ti menas li?

⁵ Labib i dir sa lo Izkiya, lerwa Zida: “I ti reste atase avek Zeova. I pa ti aret swiv li, i  ti kontinyen obeir son bann komannman, sa bann ki Zeova ti’n konmann Moiz.” Wi, “i ti met son konfyans dan Zeova, Bondye Izrael.” (2 Rwa. 18:5, 6) Ki mannyer Izkiya ti reazir kan Senakerib, lerwa Lasiri ti anvoy Rabsake ek en gran lafors militer Zerizalenm? Sa larme pwisan sorti Lasiri ti’n deza ranport laviktwar lo serten lavil Zida e la aprezan, Senakerib ti pe al atak Zerizalenm. Izkiya ti al kot lakaz Zeova e konmans priye: “O Zeova nou Bondye, silvouple sov nou dan son lanmen, afen ki tou bann rwayonm lo later i konnen ki zis ou ki Bondye, O Zeova.”​—2 Rwa. 19:14-19.

⁶ Izkiya ti azir an armoni avek son lapriyer. Menm avan ki i ti al priye dan tanp, i ti demann lepep pour pa reponn bann lakizasyon Rabsake. Izkiya ti osi anvoy en group dimoun kot profet Izai pour demann li konsey. (2 Rwa. 18:36; 19:1, 2) Izkiya ti pran aksyon apropriye. Sa voyaz, i pa ti esey rod en solisyon ki pa ti an armoni avek lavolonte Zeova. Par egzanp, i ti’n kapab rod led Lezip ek bann nasyon dan zanmirant, me i pa ti fer sa. Olye apiy lo son prop konprenezon, Izkiya ti met son konfyans dan Zeova. Apre ki lanz Zeova ti touy 185,000 solda Senakerib, finalman Senakerib ti bezwen ale e retourn Niniv.​—2 Rwa. 19:35, 36.

7. Ki mannyer lapriyer Ana ek Yona i kapab rekonfort nou?

⁷ Ana, madanm en Levit ki ti apel Elkana, ti osi depan lo Zeova kan i ti dan depresyon akoz i pa ti kapab fer zanfan. (1 Sam. 1:9-11, 18) Profet Yona ti ganny sove dan vant en gro pwason apre ki i ti’n priye: “Dan mon dezespwar, mon ti kriy Zeova e i ti reponn mwan. Dan vant Seol, mon ti kriy o sekour e ou ti ekout mon lavwa.” (Yona 2:1, 2, 10) Pa i rekonfortan pour konnen ki menm dan bann sityasyon difisil, nou kapab kriy Zeova e i pou ekout nou!​—Lir Psonm 55:1, 16. *

8, 9. Ki Izkiya, Ana ek Yona ti priy lo la e ki nou kapab aprann avek zot legzanp?

⁸ Legzanp Izkiya, Ana ek Yona i osi ansenny nou en leson vreman enportan lo lapriyer dan bann sityasyon vreman difisil. Zot tou le trwa zot ti dezespere ler zot ti pas dan bann moman difisil. Pourtan, zot lapriyer i montre ki zot pa ti pe zis mazin zot lekor ouswa zis ganny en solisyon pour zot problenm. Non Bondye, son ladorasyon e fer son lavolonte ti pli enportan ki tou pour zot. Izkiya ti byen sagren ki non Zeova ti pe ganny sali. Ana ti promet ki i ti pou donn sanmenm sa garson ki i ti vreman anvi pour li al servi dan tabernak Silo. Yona li i ti dir: “Mwan mon’n fer serman, mon pou peye.”​—Yona 2:9.

⁹ Kan nou demann Zeova pour ed nou dan en sityasyon difisil, i byen pour egzamin nou motivasyon. Eski nou zis enterese pour rezourd nou problenm ouswa nou mazin Zeova ek son plan? Bann soufrans ki nou eksperyanse i kapab fer nou sitan preokipe avek nou problenm ki bann keksoz spirityel i finalman pa paret sitan enportan. Kan nou priy Bondye pour ganny led, annou touzour mazin Zeova, ki son non i ganny sanktifye e ki son souvrennte i ganny zistifye. Si nou fer sa, nou pou kapab annan en pwennvi pozitif menm si sa solisyon ki nou ti pe ekspekte pa reisi. Petet larepons nou lapriyer se ki nou bezwen siport nou sityasyon avek led Zeova.​—Lir Izai 40:29 *; Filipyen 4:13.

 Kan pe fer desizyon

10, 11. Ki Yeosafat ti fer ler i ti vwar li dan en sityasyon kot i pa ti konnen ki i pou fer?

¹⁰ Ki mannyer ou fer bann desizyon enportan dan lavi? Eski petet ou deside ki ou pou fer, apre ou priy Zeova pour beni sa desizyon ki ou’n fer? Egzamin sa ki Yeosafat, lerwa Zida ti fer letan bann Moabit ek Amorit ti zwenn ansanm pour vin lager kont li. Zida pa ti dan en pozisyon pour ranport laviktwar lo sa bann nasyon. Ki Yeosafat ti fer?

¹¹ Labib i dir: “Yeosafat ti per e i ti tourn son figir pour rod Zeova.” I ti donn lord ki pep Zida antye i zennen e rasanble ansanm pour “demann Zeova kestyon.” Apre sa, i ti debout dan lasanble Zida ek Zerizalenm e i ti priye. I ti dir: “O nou Bondye, eski ou pa pou egzekit zizman lo zot? Akoz nou napa lafors dan nou kont sa gran lafoul ki pe vin kont nou; e nou menm nou pa konnen ki nou pou fer, me nou lizye i lo ou.” Sa vre Bondye ti ekout lapriyer Yeosafat e i ti delivre li atraver en mirak. (2 Kron. 20:3-12, 17) Kan nou pe fer bann desizyon, sirtou sa bann ki kapab annan lefe lo nou spirityalite, eski pa nou devret depan lo Zeova olye apiy lo nou prop konprenezon?

12, 13. Ki legzanp Lerwa David in kite an rapor avek fer desizyon?

¹² Ki nou devret fer si nou dan en sityasyon ki kapab paret fasil pour rezourd akoz nou’n deza pas ladan? En resi lo Lerwa David i ed nou konpran sa. Kan bann Amalekit ti vin atak lavil Tsiklag, zot ti pran bann madanm ek zanfan David ensi ki madanm ek zanfan son bann zonm. David ti demann Zeova kestyon an dizan: “Eski mon pou tay deryer sa group voler?” Zeova ti reponn: “Ale, tay deryer zot, akoz ou pou sirman zwenn zot e ou pou sirman delivre zot.” David ti obeir e i “ti reisi sov tou sa ki bann Amalekit ti’n pran.”​—1 Sam. 30:7-9, 18-20.

¹³ En pe letan apre ki bann Amalekit ti’n atak zot, ti tour bann Filisten pour lager avek bann Izraelit. Ankor enn fwa, David ti rod led avek Zeova e i ti ganny en larepons kler. Bondye ti dir: “Ale, akoz mon pou san dout donn bann Filisten dan ou lanmen.” (2 Sam. 5:18, 19) Pa tro bokou letan apre, bann Filisten ti ankor enn fwa lager avek bann Izraelit. Ki i ti pou fer safwasi? I ti’n kapab dir: ‘Be i fer trwazyenm fwa mon dan menm sityasyon. Plito mon al lager avek lennmi Bondye parey mon ti fer avan sa.’ Ouswa, eski David ti pou rod gidans Zeova? David pa ti depan lo son bann leksperyans lepase. Ankor enn fwa, i ti priy Zeova. Pa i ti vreman kontan ki i ti’n fer sa! Safwasi lenstriksyon ti diferan. (2 Sam. 5:22, 23) Kan nou trouv nou dan menm sityasyon ouswa dan menm problenm, nou devret fer atansyon ki nou pa depan zis lo nou bann leksperyans lepase.​—Lir Zeremi 10:23. *

14. Ki leson nou kapab tire avek lafason ki Zozye ek bann ansyen Izrael ti tret sa sityasyon avek bann Gibeonnit?

¹⁴ Lefet ki nou enparfe, nou tou, enkli bann ansyen eksperyanse, nou pa devret oubliye pour rod gidans Zeova kan nou annan bann desizyon pour fer. Gete ki mannyer sikseser Moiz, setadir Zozye ek bann ansyen Izrael ti azir kan bann Gibeonnit ti fer krwar ki zot ti sorti dan en pei lwenten. Zozye ek lezot pa ti demann Zeova son pwennvi e zot ti fer lape avek bann Gibeonnit e fer en lalyans avek zot. Menm si Zeova ti siport sa lagreman, i ti fer sir ki sa zistwar i ganny ekrir dan Labib pour ki  nou tir en leson vi ki bann Izraelit pa ti rod son gidans.​—Zoz. 9:3-6, 14, 15.

Kan nou pe lalit avek tantasyon

15. Eksplike akoz lapriyer i enportan pour ed nou reziste tantasyon.

¹⁵ Lefet ki nou annan “lalwa pese” dan nou, nou bezwen fer bokou zefor pour lalit avek nou bann tandans enparfe. (Rom. 7:21-25) Sa i en batay ki nou kapab ranport laviktwar. Ki mannyer? Zezi ti dir son bann disip ki lapriyer i vreman enportan pour pa tonm dan tantasyon. (Lir Lik 22:40.) Menm si apre ki nou’n priye, bann move dezir ouswa panse i kontinyen fatig nou, nou devret ‘kontinyen demann Bondye’ lasazes pour fer fas avek sa leprev. I asir nou ki i “donn tou dimoun zenerezman san fer okenn repros.” (Zak 1:5) Zak ti osi ekrir: “Eski i annan ki malad [spirityelman] parmi zot? I devre apel bann ansyen dan [“kongregasyon,” NW], e zot a priy pour li e zot a vers delwil lo li o non Senyer. Lapriyer avek lafwa i a sov sa malad.”​—Zak 5:14, 15.

16, 17. Kan ki i sirtou enportan pour nou priye konsernan tantasyon?

¹⁶ Lapriyer i vreman enportan pour ed nou reziste tantasyon, me nou bezwen konpran lenportans pour priye dan sa bon moman. Egzamin legzanp en serten zenn onm ki ganny mansyonnen dan Proverb 7:6-23. Apre soley kouse, i ti pe desann dan lale kot en prostitye ki tou dimoun ti konnen i reste. Vi ki sa madanm ti persiste, i ti les li ganny anbete e sedwir par son labous ki finalman i ti tay deryer sa madanm parey en toro ki pe al ganny touye. Akoz sa zenn onm ti’n al laba? Vi ki i ti “napa en bon lentansyon,” oubyen napa leksperyans, petet i ti pe lager avek bann move dezir. (Prov. 7:7) Kan ki lapriyer ti pou’n en led pour li? Nenport ki ler i ti’n kapab priye pour pa tonm dan tantasyon. Me i ti pou’n pli bon pour li priye kan sa lide ti vin dan son lespri avan ki i ti al dan sa lale.

¹⁷ Denozour, en zonm i kapab pe fer bokou zefor pour reziste sa tandans pour get pornografi. Me, meton i al lo bann sit Internet kot i konnen i pou trouv bann portre ouswa film provokan. Eski pa i pe fer parey sa zenn onm dan Proverb sapit 7? Pa i en lale danzere pour pas ladan! Pour arive reziste sa tantasyon pour get pornografi, en dimoun i bezwen rod led Zeova dan lapriyer avan i al dan sa move semen.

18, 19. (a) Akoz i kapab difisil pour reziste tantasyon, me ki mannyer ou kapab reisi fer fas avek sa bann defi? (b) Ki ou determinen pour fer?

¹⁸ I pa fasil pour reziste tantasyon oubyen rezet bann move labitid. Zapot Pol ti  ekrir: “Parski dezir natir imen i kont lespri, e dezir lespri i kont natir imen.” Alor, “[nou] pa kapab fer sa ki [nou] oule.” (Gal. 5:17) Pour fer fas avek sa defi, nou bezwen sipliy Zeova kan bann move panse ouswa tantasyon i vin dan nou lespri e azir an armoni avek nou lapriyer. “Tou tantasyon ki’n ariv [nou] i arive normalman avek en dimoun” e avek led Zeova nou kapab reste fidel avek li.​—1 Kor. 10:13.

¹⁹ Ki swa nou pe fer fas avek bann sityasyon difisil, pe fer bann gro desizyon ouswa nou pe esey reziste tantasyon, Zeova in donn nou en kado merveye. Sa kado presye se lapriyer. Atraver lapriyer, nou kapab demontre ki nou depan ouswa apiy lo li. Nou devret osi kontinyen demann Bondye pour son lespri sen gid nou e donn nou lafors. (Lik 11:9-13) Annou fer tou sa ki nou kapab pour annan konfyans dan Zeova e pa apiy lo nou prop konprenezon.

[Not anba lo paz]

Eski ou rapel?

• Ki ou’n aprann avek legzanp Izkiya, Ana ek Yona konsernan met konfyans dan Zeova?

• Ki mannyer legzanp David ek Zozye i met lanfaz lo sa lenportans pour pridan kan nou annan bann desizyon pour fer?

• Kan ki i sirtou enportan pour nou priye konsernan tantasyon?

[Kestyon]

[Portre lo paz 13]

Pour reziste tantasyon, kan ki lapriyer i enportan?