Akoz nou devret les nou ganny gide par lespri sen?
Akoz nou devret les nou ganny gide par lespri sen?
“Ou mon Bondye. Ou lespri sen i bon; fer li gid mwan.”—PS. 143:10.
1. Donn legzanp pour montre ki mannyer en lafors envizib i kapab gid en dimoun.
ESKI ou’n deza servi en konpa pour ed ou trouv ou semen? En konpa i en keksoz senp, normalman i zis en plak ron avek en zegwiy lo la ki’n ganny fer avek lema e ki vir dan direksyon nor. En lafors manyetik envizib ki fer sa zegwiy vir dan sa direksyon. Pour plizyer syek, bann eksplorater ek vwayazer in servi konpa pour gid zot dan zot vwayaz lo later e osi lo lanmer.
2, 3. (a) Ki lafors pwisan Zeova ti servi dan kreasyon? (b) Akoz nou kapab ekspekte ki lafors aktif Bondye pou gid nou ozordi?
2 I annan en lot lafors envizib ki pli itil pour gid nou. Kwa sa? Sanmenm sa lafors ki ganny dekrir dan bann premye verse Labib. Pour dekrir sa ki Bondye ti fer bokou letan pase, liv Zenez i dir: “O konmansman, Bondye ti kree lesyel ek later.” Pour fer sa, i ti servi en lafors pwisan akoz sa resi lo kreasyon i osi dir ki “lafors aktif Bondye ti pe ale vini lo sirfas delo.” (Zen. 1:1, 2) Ki Bondye ti servi pour kree? I ti servi lespri sen, sa lafors pwisan. Nou’n vin an egzistans gras a sa lespri sen ki Zeova in servi pour fer tou son bann travay.—Zob 33:4; Ps. 104:30.
3 Lefet ki Zeova ti servi lespri sen pour kree nou, eski i annan lezot fason ki son lespri sen i kapab enfliyans nou lavi? Garson Bondye ti fer sa kler kan i ti dir son bann disip: “Lespri . . . pou gid zot dan laverite.” (Zan 16:13) Ki sa lespri? Akoz nou devret les li gid nou?
Ki si sa lespri sen?
4, 5. (a) Ki bann ki krwar dan Trinite i mazinen lespri sen i ete? (b) Ki mannyer ou pou eksplike ki si sa lespri sen?
4 Serten dimoun ki nou koz avek dan predikasyon i krwar ki lespri sen oubyen Holy Ghost dapre King James Version, i en personnaz ki egal avek Bondye e ki form parti Trinite. (1 Kor. 8:6) Par kont, i enteresan pour note ki an 1833, Noah Webster, en eksper leksikal Ameriken ti pibliy en Labib apele The Webster Bible kot i ti servi King James Version konman referans. Webster ti ranplas sa lekspresyon “Holy Ghost” avek “Holy Spirit.” I ti fer sa akoz i ti konnen ki dan Labib, sa lekspresyon pa ti vedir “en laparisyon.” *
5 Me, ki si sa lespri sen alor? Not anba lo paz pour Zenez 1:2 dan New World Translation of the Holy Scriptures—With References i dir: “Apard ganny tradwir ‘lespri,’ ruʹach [Ebre] i osi ganny tradwir ‘divan’ ouswa par lezot mo ki donn sa lide en lafors aktif ki envizib.” (Konpar not anba lo paz pour Zenez 3:8; 8:1.) Parey divan, lespri sen pa en personnaz oubyen keksoz fizik, plito i en lafors envizib ki kapab annan en lefe lo lezot keksoz. Bondye i servi sa lespri ouswa lenerzi pour akonplir son lavolonte. Eski i difisil pour krwar ki sa kalite lafors merveye i sorti kot nou Bondye sen ki tou pwisan? Pa ditou, pa i vre!—Lir Izai 40:12, 13. *
6. Ki David ti demann Zeova?
6 Eski Zeova i kapab kontinyen servi son lespri sen pour gid nou dan nou lavi? I ti promet psalmis David: “Mon pou fer ou annan bon zizman e mon pou enstrir ou dan sa semen ki ou devret pran.” (Ps. 32:8) Eski David ti oule ki Bondye i fer sa? Wi, parski i ti demann Zeova led an dizan: “Ansenny mwan pour fer ou lavolonte, akoz ou mon Bondye. Ou lespri sen i bon; fer li gid mwan.” (Ps. 143:10) Nou osi nou devret annan sa menm lanvi ek dezir pour les lespri sen Bondye gid nou. Akoz? Annou vwar kat rezon.
Nou pa kapab gid nou prop lekor
7, 8. (a) Akoz nou pa pou kapab gid nou lekor san gidans Bondye? (b) Donn legzanp pour montre akoz nou pa devret depan lo nou lekor dan sa move lemonn.
7 Premyerman, vi ki nou pa kapab gid nou prop lekor, nou devret anvi ki lespri sen Bondye i gid nou. Sa lekspresyon “ganny gide” i vedir “en dimoun i montre ou kot ou pou ale oubyen i diriz ou lo sa bon semen.” Zeova pa’n kree nou avek sa abilite pour gid nou prop lekor e pli pir ankor nou enparfe. Profet Zeremi ti ekrir: “O Senyer, mon konsyan ki en zonm pa kapab deside ki semen i pou pran: zonm napa sa pouvwar pour gid son lepa.” (Zer. 10:23, The Bible in Basic English) Akoz sa? Zeremi ti tann Zeova dir akoz ki imen pa kapab diriz son lepa. Ler i ti pe koz lo sa dimoun ki nou ete anndan, Zeova ti dir: “Leker i pli tret ki okenn keksoz e i tre move. Lekel ki kapab konn li?”—Zer. 17:9; Mat. 15:19.
8 Eski pa i ti pou bet pour en dimoun ki napa leksperyans al dan en bwa li tousel, san en gid, en map ouswa menm san en konpa? I ti pou met son lavi an danze akoz i pa ti pou ni konnen konman pour viv dan bwa e kote i pe ale. Pareyman, sa dimoun ki krwar i kapab diriz son lekor dan sa move lemonn san ki Bondye i gid li dan sa bon semen i tronpe akoz i pe met son lekor an danze. Sel sans ki nou annan pour reisi sirviv dan sa move lemonn i kan nou sipliy Zeova parey David ki ti dir: “Mon anvi ki mon lipye i reste lo ou bann santye akoz sirman mon pa pou tonbe.” (Ps. 17:5; 23:3) Ki mannyer nou kapab ganny sa kalite gidans?
9. Parey nou kapab vwar lo paz 19, ki mannyer lespri sen i azir konman en gid pour nou?
9 Si nou annan limilite e pare pour depan lo Zeova, i pou donn nou son lespri sen ki pou sirman gid nou lepa. Ki mannyer sa lafors aktif pou ed nou? Zezi ti dir son bann disip: “Konseyer, Lespri-sen ki mon Papa pou anvoye an mon non, pou ansenny zot tou keksoz, e fer zot rapel tou sa ki mon’n dir zot.” (Zan 14:26) Anmezir nou regilyerman etidye Parol Bondye, ensi ki sa ki Zezi ti dir e ki nou priye osi, lespri sen pou ed nou konpran plis bann keksoz profon Zeova pour nou kapab fer son lavolonte pli byen. (1 Kor. 2:10, NW) An plis ki sa, si nou rankontre problenm dan nou semen, lespri sen pou ed nou konnen ki pour fer. I pou fer nou rapel bann prensip Labib ki nou’n deza aprann e ed nou konpran konman pour aplik zot pour fer bann bon desizyon.
Zezi ti ganny gide par lespri sen
10, 11. Ki Zezi ti ekspekte an rapor avek lespri sen e ki lefe lespri sen ti annan lo li?
10 En lot rezon akoz nou devret anvi ki lespri sen Bondye i gid nou i akoz lespri sen ti gid son Garson. Avan vin lo later, sa sel Garson Bondye ti konn sa profesi: “Lespri Zeova pou bezwen lo li, lespri lasazes ek konprenezon, lespri konsey ek lafors, lespri konnesans ek lakrent pour Zeova.” (Iza. 11:2) Zis mazinen ki degre kontan Zezi ti kontan pour ganny led lespri sen Bondye pour kapab viv lo later!
11 Parol Zeova ti vin vre. Levanzil i dir nou sa ki ti arive deswit apre batenm Zezi: “Zezi, ranpli avek Lespri Sen, ti kit larivyer Zourden e Lespri Sen ti anmenn li dan dezer.” (Lik 4:1) Laba dan dezer, letan ki Zezi ti pe zennen, priye e medite, tre probab Zeova ti enstrir li e fer li konn sa ki ti pou arive avek li pli tar. Lespri sen Bondye ti pe travay dan lespri ek leker Zezi e gid son panse ek desizyon. Akoz sa, Zezi ti konnen ki i pou fer dan sak sityasyon e i ti fer sa ki son Papa ti anvi i fer.
12. Akoz i enportan ki nou demann Bondye son lespri sen pour gid nou?
12 Lefet ki i ti rekonnet lenportans lespri sen Bondye dan son lavi, Zezi ti fer son bann disip konpran lenportans pour demann Bondye son lespri sen e les li gid zot. (Lir Lik 11:9-13.) Akoz nou osi nou devret fer parey? Parski i kapab transform nou leta lespri e fer li vin parey leta lespri Kris. (Rom. 12:2; 1 Kor. 2:16) Si nou les lespri sen Bondye gid nou dan nou lavi, nou pou kapab mazin parey Zezi e imit son legzanp.—1 Pyer 2:21.
Lespri sa lemonn i kapab anbet nou
13. Ki si sa lespri lemonn e ki lefe i kapab annan lo nou?
13 Trwazyenm rezon akoz nou anvi ki lespri sen Bondye i gid nou i akoz san son led nou kapab ganny distrer par sa move lespri ki pe travay dan lamazorite dimoun ozordi. Lemonn i annan son prop lafors pwisan ki promot en fason viv ki tou lekontrer avek sa ki lespri sen i prodwir dan nou. Olye fer bann dimoun devlop en leta lespri Kris, lespri sa lemonn i fer zot annan en leta lespri ek fason panse Satan, sef sa lemonn. (Lir Efezyen 2:1-3; Tit 3:3.) Kan en dimoun i les lespri lemonn enfliyans li, e i pratik bann dezir natir imen, son konsekans i vreman grav e pour fini kont, i pa pou erit Rwayonm Bondye.—Gal. 5:19-21.
14, 15. Ki mannyer nou kapab reziste lespri sa lemonn?
14 Zeova in donn nou sa ki nou bezwen pour reziste lespri sa lemonn. Zapot Pol ti dir nou kontinyen ‘rod nou lafors dan linyon avek Senyer e dan son gran pisans. . . . Pour ki nou a kapab defann nou lekor kont latak lennmi.’ (Efe. 6:10, 13) Atraver lespri sen, Zeova i fortifye nou pour ki nou kapab reziste tou zefor ki Satan i fer pour anbet nou. (Rev. 12:9) Lespri sa lemonn i for e nou pa kapab evit li. Me, nou kapab reisi anpes li enfliyans nou akoz lespri sen i pli for ankor e nou pou ganny led atraver li.
15 Zapot Pyer ti dir sa avek bann Kretyen dan premye syek ki ti pe kit laverite: “Zot in abandonn vre semen e zot in egare lo zot larout.” (2 Pyer 2:15) Me nou, pa nou vreman kontan ki “nou pa’n ganny Lespri dapre lemonn, me nou’n ganny Lespri ki sorti kot Bondye”! (1 Kor. 2:12) Atraver led lespri sen e kan nou profit byen tou sa ki Zeova in fourni pour kit nou lo sa bon semen spirityelman, nou kapab reisi reziste move lespri sa lemonn visye.—Gal. 5:16.
Lespri sen i prodwi bon fri
16. Ki bann laspe ki lespri sen i kapab ed nou devlope?
16 En katriyenm rezon akoz nou anvi ki lespri sen Bondye i enfliyans nou i akoz si nou les li, nou pou devlop bann bon kalite dan nou lavi. (Lir Galat 5:22, 23. *) Lekel parmi nou ki pa ti pou anvi kontan lezot plis, zwaye e kontan fer lape? Lekel ki pa ti pou kontan annan en kantite pasyans, kontan fer dibyen lezot e demontre labonte? Lekel ki pa ti pou kontan annan plis lafwa, ladouser ek kontrol lo son lekor? Lespri sen Bondye i fer nou devlop sa bann zoli kalite ki benefisye nou menm ek sa bann ki nou servi e viv avek. Nou merit kontinyen devlop sa bann laspe fri lespri vi ki i napa en limit dan lakantite laspe fri lespri ki nou bezwen e ki nou kapab devlope.
17. Ki mannyer nou kapab devlop en laspe fri lespri pli byen ankor?
17 I byen pour nou egzamin nou lekor pour vwar si nou parol ek aksyon i donn levidans ki lespri sen pe gid nou e ki nou pe devlop son fri. (2 Kor. 13:5a; Gal. 5:25) Si nou remarke ki nou bezwen devlop serten laspe fri lespri, nou devret les lespri sen enfliyans nou plis ankor pour ki i kapab ed nou devlop sa bann kalite ki manke. Nou fer sa kan nou etidye sak sa bann laspe dan Labib e dan nou bann piblikasyon ki koz lo la. I pou ed nou vwar ki mannyer bann laspe fri lespri i devret annan lefe lo nou lavi tou le zour, e apre sa, fer bokou zefor pour met li an pratik pli byen ankor. * Anmezir nou obzerv lafason ki lespri sen i enfliyans nou lavi e osi lavi nou bann frer ek ser, nou kapab vwar klerman akoz nou devret les li gid nou.
Eski ou pe les lespri sen Bondye enfliyans ou?
18. Vi ki i ti les lespri sen gid li, dan ki fason Zezi i en legzanp pour nou?
18 Konman “zouvriye abil” Bondye ler i ti kre liniver, Zezi ti konn tou lo sa lafors manyetik ki kontrol later, ki bann imen i servi pour vwayaze. (Prov. 8:30; Zan 1:3) Par kont, napa okenn levidans dan Labib ki montre ki Zezi ti servi sa lafors pour gid li kan i ti lo later. Selman, Labib i dir ki konman en imen, i ti santi lefe ki lespri sen Bondye ti annan dan son lavi. I ti les li ganny enfliyanse par lespri sen, par egzanp, kan lespri sen ti pous li pour fer en keksoz, i ti les li e i ti azir an armoni avek son lenfliyans. (Mark 1:12, 13; Lik 4:14) Eski ou osi ou sa kalite dimoun?
19. Ki nou devret fer pour ki lespri sen i gid nou dan nou lavi?
19 Lafors aktif Bondye i ankor pe enfliyans lespri ek leker sa bann ki les li gid zot e i pous zot pour azir. Dan ki fason ou kapab les li gid ou dan sa bon direksyon? Demann Zeova dan lapriyer pour ed ou e gid ou atraver son lespri sen. (Lir Efezyen 3:14-16.) Apre sa, azir an armoni avek ou lapriyer par rod konsey dan Labib, ki’n osi ganny enspire par lespri sen. (2 Tim. 3:16, 17) Obeir bann lenstriksyon saz ki i donnen e apre sa, les lespri sen gid ou dan ou lavi. Si ou fer sa, ou pou montre ki ou annan lafwa dan sa abilite ki Zeova i annan pour gid ou dan sa bon fason, lo sa bon semen, dan sa move lemonn.
[Not anba lo paz]
^ par. 4 Dan prefas son tradiksyon Labib, Webster ti ekrir: “Kan ou konpran en mo dan en lot fason ki sa ki dimoun ti konpran oparavan, e ki sinifikasyon sa mo i diferan avek langaz orizinal, si sa mo i kontinyen ganny servi, sa lekter pa pe lir Parol Bondye.”
^ par. 5 Izai 40:12, 13: “12 Lekel ki’n mezir lanmer dan son lanmen? Lekel ki’n pran mezir grander lesyel avek son ledwa? Lekel ki’n mezir later? Lekel ki’n kapab pez dan en balans bann oter ek bann montanny? 13 Lekel ki kapab konn grander lespri Zeova e lekel ki kapab konsey li e fer li konn okenn keksoz?”
^ par. 16 Galat 5:22, 23: “22 Me fri Lespri se: Lanmour, lazwa, lape, pasyans, [“fer dibyen lezot,” NW], labonte, [“lafwa,” NW], 23 ladouser, kontrol lo son prop lekor. Lalwa pa kont sa bann keksoz.”
^ par. 17 Pour plis lenformasyon lo sak laspe fri lespri, vwar sa size “Fruitage of God’s Spirit” (Fri lespri sen Bondye) ek tit “List by names” (Lalis par non) dan Watch Tower Publications Indexes.
Eski ou’n konpran bann pwen prensipal?
• Ki mannyer lespri sen i kapab enfliyans nou lavi?
• Ki sa kat rezon akoz nou les lespri sen Bondye gid nou?
• Ki nou devret fer pour ki nou benefisye plennman avek gidans lespri sen?
[Kestyon]
[Portre lo paz 17]
Lespri sen Bondye i en lafors ki ti motiv Zezi dan son lavi
[Portre lo paz 19]
Lespri sen Bondye i enfliyans zot lespri ek leker, i motiv zot e gid zot
