Eski i en bon ouswa en move legzanp pour ou?
Eski i en bon ouswa en move legzanp pour ou?
“Bondye Zakob . . . pou enstri nou konsernan son semen, e nou pou mars dan son santye.”—IZA. 2:3.
1, 2. Dan ki fason ou kapab benefisye avek bann legzanp dan Labib?
ESKI pa ou konvenki ki ou kapab benefisye avek sa ki’n ganny ekrir dan Labib? Ladan i annan legzanp bann zonm ek fanm fidel ki ou ti pou kontan imit zot bann kalite ek fason viv. (Ebr. 11:32-34) Me, petet ou’n osi remark move legzanp serten zonm ek fanm ki nou pa devret swiv.
2 Anfet, serten endividi ki ganny mansyonnen dan Labib i kapab en bon legzanp pour swiv e osi en move legzanp ki nou pa devret swiv. Mazin David, sa berze ki ti annan limilite e ki pli tar ti vin en lerwa pwisan. I ti en bon legzanp konman en dimoun ki ti kontan laverite e i ti annan konfyans dan Zeova. Me, David ti osi fer bann pese grav, parey dan ka Batseba ek Ouriya e osi sa move lide pour fer en resansman. Me annou port nou latansyon lo son garson, Lerwa Salomon ki ti osi en ekriven Labib. Premyerman, nou pou vwar de fason ki i ti en bon legzanp.
“Lasazes Salomon”
3. Akoz nou kapab dir ki Salomon i en bon legzanp pour nou?
3 Zezi Kri, sa pli Gran Salomon ti koz an byen lo Lerwa Salomon, i ti refer avek li konman en bon legzanp. Zezi ti dir serten Zwif ki ti annan dout: “Larenn Sid pou leve avek dimoun sa zenerasyon e pou kondann li, akoz i ti sorti dan bout later pour vin ekout lasazes Salomon. Mwan mon dir zot, isi i annan enn ki pli enportan ki Salomon!” (Mat. 12:42) Salomon ti renonmen pour son lasazes e i ti oule ki nou osi nou rod lasazes, pa i vre!
4, 5. Ki mannyer Salomon ti ganny lasazes e ki nou nou devret fer pour ganny lasazes?
4 O konmansman son renny, Bondye ti koz avek Salomon dan en rev e demann li sa ki i ti a voudre. Vi ki i ti konnen ki i ti napa bokou leksperyans, Salomon ti demann lasazes. (Lir 1 Lerwa 3:5-9. *) Bondye ti kontan ki sa lerwa ti’n demann lasazes olye larises ek laglwar, I ti donn Salomon “disernman ek en leker ki saz,” ensi ki prosperite. (1 Rwa. 3:10-14) Parey Zezi ti dir, lasazes Salomon ti sitan remarkab ki larenn Seba ti fer en gran vwayaz pour vin ekout li pour li menm.—1 Rwa. 10:1, 4-9.
5 Nou pa ekspekte ki Zeova i donn nou lasazes par mirak. Salomon ti dir ki “Zeova i donn lasazes.” Me i ti osi ekrir ki nou devret fer bokou zefor pour ganny sa kalite ki Bondye i annan. I ti dir: “Port latansyon lo lasazes avek ou zorey, afen ki ou a ouver ou leker ver disernman.” Dan menm laliny, i ti osi servi bann lekspresyon parey “kriy,” oubyen “kontinyen rod” lasazes. (Prov. 2:1-6) I kler ki nou kapab ganny lasazes.
6. Dan ki fason nou montre ki nou pe benefisye avek bon legzanp Salomon?
6 I byen pour demande: ‘Eski mon konsider lasazes konman en trezor parey Salomon?’ Lefet ki lekonomi pa tro stab, bokou i tant pour konsantre lo zot louvraz pour ganny plis larzan, ouswa zot les zot ganny enfliyanse pour fer bann gran gran letid avanse. Eski sanmenm ki ou ek ou fanmir pe fer? Eski ou swa i montre ki ou konsider lasazes konman en trezor e ou pe rod lasazes Bondye? Eski ou bezwen sanz ou pwennvi lo larzan ek letid avanse pour ki ou kapab fer plis zefor pour ganny lasazes? Vreman, ganny lasazes e met li an pratik i pour nou prop dibyen. Salomon ti ekrir: “Alor, ou pou konpran sa ki drwat, sa ki zis, sa ki byen e tou sa ki bon.”—Prov. 2:9.
Vre ladorasyon ti anmenn lape
7. Ki laranzman ki ti ganny fer pour ki tanp Bondye i ganny konstri?
7 O konmansman son renny, Salomon ti ranplas sa tabernak ki ti la depi lepok Moiz avek en tanp manifik. (1 Rwa. 6:1) Nou kapab apel li tanp Salomon, me pa li ki ti deside pour fer li, dan zar pour li ganny en bon repitasyon konman en arsitek ouswa en dimoun ris ki ti bonker. Anfet, David ki ti propoze pour fer en tanp, e lanmenm ler ki Bondye ti donn li plan detaye konsernan tanp ek son bann akseswar. David ti osi fer en bon kontribisyon anver sa travay. (2 Sam. 7:2, 12, 13; 1 Kron. 22:14-16) Toudmenm, se Salomon ki ti ganny sa responsabilite pour konstri tanp, en proze ki ti dire pour set an edmi.—1 Rwa. 6:37, 38; 7:51.
8, 9. (a) Ki legzanp Salomon in kite an rapor avek perseverans dan bann bon travay? (b) Ki ti arive vi ki Salomon ti promot vre ladorasyon?
8 Dan sa fason, Salomon i en bon legzanp pour nou akoz i ti persevere dan en bon travay e i ti konsantre lo sa bon lobzektif. Kan tanp ti fini e lars lalyans ti ganny mete ladan, Salomon ti fer en lapriyer an piblik. I ti priye: “[Ki ou] lizye . . . i ouver e i get sa lakaz lizour konman aswar, ver sa landrwa kot ou ti dir: ‘Mon non pou laba’ pour ekout sa lapriyer ki ou serviter pe fer avek ou dan sa landrwa.” (1 Rwa. 8:6, 29) Kan bann Izraelit ek bann etranze ti priye, zot ti kapab vir dan direksyon tanp, sa landrwa ki ti ganny konstri pour anmenn loner lo non Bondye.—1 Rwa. 8:30, 41-43, 60.
9 Ki ti arive vi ki Salomon ti promot vre ladorasyon? Apre ki zot ti’n selebre inogirasyon tanp, lepep ti “rezouir e ti santi lakontantman dan zot leker pour tou sa dibyen ki Zeova ti’n fer pour David son serviter e pour Izrael.” (1 Rwa. 8:65, 66) Anfet, i ti annan lape ek prosperite remarkab pandan sa 40 an ki Salomon ti dirize. (Lir 1 Lerwa 4:20, 21, 25. *) Psonm 72 i montre sa e i donn nou en avangou konsernan bann benediksyon ki nou pou gannyen anba dominasyon Zezi Kri, sa pli Gran Salomon.—Ps. 72:6-8, 16.
Legzanp Salomon ki nou pa merit swiv
10. Kwa ki premyerman vin dan nou lespri kan nou mazin pese Salomon?
10 Me, akoz nou kapab dir ki Salomon i osi en move legzanp? Petet ou kapab pe mazin son bann madanm etranze ek konkibin. Nou lir: “Letan ki Salomon ti’n vin vye, son bann madanm ti’n fer son leker swiv lezot bondye e i ti nepli annan en leker konplet anver Zeova.” (1 Rwa. 11:1-6) San okenn dout, ou determinen pour pa zanmen imit sa enbesilite. Me, eski sa i sel move legzanp ki nou kapab aprann dan lavi Salomon? Egzamin serten detay dan son lavi ki kapab paret pa tro enportan e vwar ki lavertisman nou vwar.
11. Ki nou kapab dir lo premye maryaz Salomon?
11 Salomon ti dirize pour 40 an. (2 Kron. 9:30) Me, ki ou kapab dir lo 1 Lerwa 14:21 *? (Lir.) Dapre sa verse, letan ki Salomon ti mor, son garson Reabam ti vin lerwa a laz 41 an, e “Naama en Amonit” ti son manman. Sa i vedir ki avan ki Salomon ti vin lerwa, i ti’n marye avek en madanm sorti dan en nasyon ki ti zot lennmi e ki ti ador zidol. (Ziz 10:6; 2 Sam. 10:6) Eski son madanm ti ador zidol? Menm si petet i ti fer li avan, i kapab ki i ti’n abandonn sa pratik e vin en vre adorater Bondye parey Raab ek Rit. (Rit 1:16; 4:13-17; Mat. 1:5, 6) Toudmenm, i tre probab ki Salomon ti annan bann fanmir par alyans ki ti Amonit e ki pa ti servi Zeova.
12, 13. Ki move desizyon Salomon ti fer byen boner pandan son renny e ki petet i ti’n mazinen?
12 Apre ki i ti’n vin lerwa, keksoz ti mars mal. Salomon ti form “en lalyans maryaz avek Faraon, lerwa Lezip e [pran] fiy Faraon e [anmenn] li dan Lavil David.” (1 Rwa. 3:1) Eski sa madanm Ezipsyen ti imit Rit e pratik vre ladorasyon? Napa okenn lendikasyon ki montre ki i ti fer sa. Plito, avek letan Salomon ti konstri en lakaz pour li (e petet osi pour son bann servant Ezipsyen) an deor Lavil David. Akoz? Labib i dir ki i ti fer sa akoz i pa ti byen pour en adorater zidol reste pros avek lars lalyans.—2 Kron. 8:11.
13 Petet Salomon ti’n vwar bann lavantaz dan domenn politik kan i ti marye avek en prenses Ezipsyen, me eski i ti kapab servi sa konman en leskiz? En bon pe letan avan sa, Bondye ti defann son pep pour marye avek bann Kananeen, en nasyon payen, ensi ki serten lezot pep. (Egz. 34:11-16) Eski Salomon ti mazinen ki Lezip pa ti enkli dan sa lalis? Si i ti mazin koumsa, eski i ti annan rezon valab pour krwar sa? Anfet, i ti montre par son aksyon ki i pa ti pran kont ki Zeova ti’n dir ki bann Izraelit ti pou abandonn vre ladorasyon pour sa enn ki fo si zot ti marye avek sa bann nasyon payen.—Lir Deterononm 7:1-4. *
14. Ki leson nou kapab aprann avek move legzanp Salomon?
14 Eski nou pou tir en leson avek move legzanp Salomon? En ser i kapab rod leskiz pour dezobeir lord Bondye e pa marye “selon Senyer.” (1 Kor. 7:39) En dimoun i osi kapab zistifye son partisipasyon dan bann aktivite sportif ouswa kiltirel kot lekol, ouswa donn bann fo lenformasyon kan i pe ranpli son form taks. Oubyen menm, i kapab koz manti kan i ganny demande pour rakont en keksoz ki kapab anbarasan. Dwatet Salomon osi ti esey zistifye son lekor e sa i kapab arive avek nou tou.
15. Ki mannyer Zeova ti demontre mizerikord anver Salomon e ki nou devret rapel konsernan sa?
15 I enteresan pour note ki apre ki Labib i koz lo maryaz Salomon avek sa prenses etranze, i osi dir ki Bondye ti aksepte son demann pour ganny lasazes e I ti menm donn li larises. (1 Rwa. 3:10-13) Salomon ti’n inyor lenstriksyon Bondye, me napa okenn levidans ki montre ki Zeova ti rezet li deswit konman lerwa ouswa disiplin li severman. Sa i montre ki Bondye i realize ki nou enparfe e nou’n ganny fer avek lapousyer. (Ps. 103:10, 13, 14) Toudmenm, rapel byen osi ki to ou tar, nou aksyon i annan son konsekans.
En ta madanm sa!
16. Ki Salomon ti’n inyore lefet ki i ti annan en kantite madanm?
16 Dan liv Kantik Salomon, sa lerwa ti dir ki en zenn vyerz ki i ti’n vwar ti pli zoli ki 60 larenn ek 80 konkibin. (Sal. 6:1, 8-10) Si sa pe refer avek sityasyon Salomon, sanmenm sa kantite madanm ki i ti annan sa letan pandan son renny. Menm si laplipar, ouswa zot tou zot ti bann vre adorater, dapre lalwa ki Bondye ti donnen atraver Moiz, lerwa Izrael pa ti devret “annan en kantite madanm, pour ki son leker pa ganny detournen.” (Det. 17:17) Me, ankor enn fwa, Zeova pa ti abandonn Salomon. Anfet, Bondye ti beni li, i ti servi li pour ekrir sa liv Labib ki apel Kantik Salomon.
17. Kwa ki nou pa devret inyore?
17 Eski sa pe montre ki Salomon ti kapab inyor lalwa Bondye san sibir okenn konsekans e ki nou osi nou kapab fer parey? Non. O kontrer, i montre ki Bondye i kapab pasyan pour en serten kantite letan. Selman, si en serviter Bondye i deside inyor son gidans e i pa ganny son konsekans deswit, sa i pa vedir ki i pa pou rekolte sa ki i’n senmen avek letan. Rapel sa ki Salomon ti ekrir: “Akoz santans kont en move aksyon pa’n ganny egzekite vitman, sa i rezon akoz bann garson zonm in vreman determinen pour fer sa ki mal.” I ti osi azoute: “Mwan mon konnen ki keksoz pou mars byen pour sa bann ki annan lakrent pour sa vre Bondye, akoz zot ti annan lakrent pour li.”—Ekle. 8:11, 12.
18. Ki mannyer leksperyans Salomon i montre ki sa ki Galat 6:7 i dir i vre?
18 Si zis Salomon ti’n ekout sa laverite! I ti’n fer en kantite bon keksoz, e i ti ganny benediksyon Bondye pour en kantite letan, pa i vre! Me, avek letan, i ti fer fot enn deryer lot. I ti devlop en labitid pour pran bann move desizyon. Eski pa sa ki zapot Pol ti ganny enspire pour dir pli tar i vre: “Pa bezwen tronp ou lekor, personn pa kapab anbet Bondye. En dimoun i rekolte sa ki in senmen.” (Gal. 6:7) Avek letan, Salomon ti rekolte konsekans son dezobeisans. Nou lir: “Lerwa Salomon ti kontan en kantite madanm etranze ensi ki fiy Faraon, bann madanm Moabit, Amonit, Edomit, Sidonyen ek Itit.” (1 Rwa. 11:1) I paret ki bokou parmi zot ti ankor pe kontinyen ador zot fo bondye e Salomon ti ganny enfliyanse li osi. I ti abandonn Bondye e finalman perdi laprouvasyon sa Bondye pasyan.—Lir 1 Lerwa 11:4-8. *
Tir leson atraver son bon e move legzanp
19. Akoz nou kapab dir ki i annan bann bon legzanp dan Labib?
19 Zeova ti enspir Pol pour ekrir: “Tou sa ki’n ganny ekri dan lepase in ganny ekri pour nou lansennyman, pour ki par pasyans ek konsolasyon ki Lekritir i donnen nou posed lesperans.” (Rom. 15:4) Tou sa ki’n ganny ekrir i enkli bon legzanp bann zonm ek fanm ki ti annan en lafwa remarkab. Pol ti osi kapab dir: “Ki mon devre dir ankor? Letan i manke pour mwan koz lo Zedeon, Barak, Samson, Zefte, David, Samyel, ek bann profet. Par lafwa, zot ti ganny laviktwar lo bann rwayonm, zot ti etabli lazistis e zot ti ganny sa ki Bondye ti’n promet. . . . Malgre ki zot ti feb, zot ti repran lafors.” (Ebr. 11:32-34) Nou kapab e nou devret benefisye avek bann bon legzanp dan Labib par swiv ouswa imit sa ki dan sa bann resi.
20, 21. Akoz ou determinen pour benefisye avek bann legzanp lavertisman ki dan Parol Bondye?
20 Me, dan serten resi Labib i osi annan bann legzanp lavertisman. Nou trouv sa atraver leksperyans serten zonm ek fanm ki en serten moman Zeova ti aksepte zot e servi zot konman son bann serviter. Anmezir nou lir Labib, nou kapab remarke kote keksoz ti mars mal e ki mannyer serten zot ti abandonn Bondye e vin bann move legzanp. Nou kapab vwar ki serten ti ptitapti devlop bann move latitid ouswa tandans ki avek letan ti prodwir bann move konsekans. Ki leson nou aprann atraver sa bann resi? I byen pour nou demann nou lekor: ‘Kot tou sa la ti konmanse? Eski mwan osi mon kapab devlop sa latitid? Ki mon kapab fer pour evit sa latitid? Ki mannyer mon kapab plito tir leson avek sa bann legzanp lavertisman?’
21 Nou devret egzamin sa bann legzanp pli byen ankor akoz Pol ti ganny enspire pour ekrir: “Tousala ti ariv zot pour servi legzanp pour lezot, me in ganny ekri konman en lavertisman pour nou, ki’n ariv dan letan lafen.”—1 Kor. 10:11.
[Not anba lo paz]
^ par. 4 1 Lerwa 3:5-9: “5 Ler i ti Gibeonn, Zeova ti aparet avek Salomon dan en rev aswar, e Bondye ti dir li: ‘Demann mwan sa ki ou oule.’ 6 Alor Salomon ti dir: ‘Ou menm ou’n demontre en gran labonte leker anver ou serviter David mon papa, dapre lafason ki i ti marse devan ou. I ti mars dapre laverite e avek en leker onnet. E ou ou ti kontinyen demontre sa gran labonte leker anver li, ki ou ti menm donn li en garson pour asiz lo tronn ozordi. 7 Aprezan, Zeova mon Bondye, ou menm ki’n fer ou serviter vin lerwa dan plas David mon papa e mwan mon zis en garson. Mon pa konnen konman mon pou sorti e ki mannyer mon pou antre. 8 E ou serviter i o milye ou pep ki ou’n swazir, en gran pep ki pa kapab ganny konte oubyen fer resansman akoz i en kantite. 9 Ou devret donn ou serviter en leker obeisan pour ziz ou pep, pour fer ladiferans ant sa ki bon ek sa ki move. Akoz lekel ki kapab ziz ou pep ki difisil?’”
^ par. 9 1 Lerwa 4:20, 21, 25: “20 Zida ek Zerizalenm ti vin bokou, parey gren disab o bor lanmer telman i ti annan en kantite zot, zot ti manze, bwar e rezouir. 21 Tandis ki Salomon, i ti sef lo tou bann rwayonm depi Larivyer ziska pei bann Filisten e o bor balizaz Lezip. Zot ti anmenn kado e servi Salomon tou dilon son lavi.” “25 Zida ek Izrael ti kontinyen reste an sekirite, tou dimoun anba son prop pye rezen ek pye fig, depi Dann ziska Beer-seba dan letan Salomon.”
^ par. 11 1 Lerwa 14:21: “Tandis ki Reabam, garson Salomon, i ti’n vin lerwa Zida. Reabam ti annan karanteen an letan i ti konmans rennyen, e i ti rennyen pour diset an Zerizalenm, lavil ki Zeova ti’n swazir parmi tou bann tribi Izrael pour met son non laba. Son manman ti apel Naama en Amonit.”
^ par. 13 Deterononm 7:1-4: “1 Letan ki Zeova ou Bondye pou finalman anmenn ou dan sa pei ki ou ti pou pran posesyon, i pou osi retir konpletman tou bann gran nasyon devan ou, bann Itit, Girgasit, Amorit, Kananeen, Perizit, Ivit ek bann Yebousit, set nasyon ki pli gran e ki pli for ki ou. 2 Zeova pou sirman abandonn zot dan ou lanmen, e ou devret defet zot. San okenn dout, ou devret detri zot. Ou pa devret form en lalyans avek zot, ni demontre faver anver zot. 3 Ou pa devret form en lalyans maryaz avek zot. Ou fiy, ou pa devret donn son garson, e son fiy, ou pa devret pran pour ou garson. 4 Akoz i pou fer ou garson aret swiv mwan, e sirman zot pou servi lezot bondye; e lakoler Zeova pou monte kont zot, e san okenn dout i pa pou tarde pour detri ou.”
^ par. 18 1 Lerwa 11:4-8: “4 E i ti arive ki letan ki Salomon ti’n vin vye, son bann madanm ti’n fer son leker swiv lezot bondye e i ti nepli annan en leker konplet anver Zeova son Bondye, parey son papa David. 5 E Salomon ti konmans swiv Astoret, bondye bann Sidonyen e Milkonm, sa keksoz degoutan ki pour bann Amonit. 6 E Salomon ti konmans fer sa ki mal devan lizye Zeova e i pa ti swiv Zeova plennman parey son papa David. 7 Lanmenm ler ki Salomon ti konmans konstri en landrwa ladorasyon pour Kemos sa keksoz degoutan Moab, anler lo sa montanny ki ti devan Zerizalenm, e pour Molek sa bondye degoutan bann garson Amonn. 8 Sanmenm sa ki i ti fer pour tou son bann madanm etranze ki ti pe ofer lafimen sakrifisyel e ofer sakrifis avek zot bondye.”
Ki ou’n aprann?
• Akoz ou kapab trouv bann bon legzanp ek move legzanp dan Labib?
• Dan ki fason Salomon ti devlop en move labitid?
• Ki nou kapab aprann atraver move legzanp Salomon?
[Kestyon]
[Portre lo paz 11]
Salomon ti servi sa lasazes ki i ti gannyen avek Bondye
[Portre lo paz 14]
Eski ou tir leson avek move legzanp Salomon?
